Zonneveld van, Klaas

… mor vanzulf wel n scholderklopke!
97 … 98 … 99 … 100! t Honderdste nummer van Kreuze is oet. Wat ducht joe! Nou wil ik geern d’oetgevers, Jan, Henk en Bert (echte Grunneger noamen ook, hè) bedanken veur heur bedenken, oetgeven, opmoaken enz., enz. Mor veuraal ook veur t plezaaier dat ik en wie mit nkander doaraan beleefd hebben.
Apmoal in joen aigen Grunnegs schrieven meugen … Wat n plezaaier en genot! Wat n soorten Grunnegs ook. Mooi man, gloepens mmooi! Ik loat dij twij m’s gewoon stoan, omdat der ook nait keken wuir of je wel of nait stuttern … of aander gebreken hebben. Dou mor gewoon, den dou je gek genogt.
Jan waarkte mit aan datteg nummers. n Scholderklopke. Ook aine veur t opstarten.
Bert begon in nummer 31 en muik de zeuventeg vol. Zien foto dou, lait zain wat hai aal in zien rolstoule aan attributen neudeg het. Stoer, dat e Jan opvolgen wol. Van mie n scholderklopke meer.
Joa, en den Henk: soam mit Jan de starters van n hail mooi initiatief. Meschain nait besevvend houveul waark zai zok op d’haals huilen … n Echte deurzetter mit schienboar n hoop vrije tied … Ook mor n scholderklopke ekstroa.
Gain borstklopperij (zollen ze zulf ook nait willen) … paast ook nait veur n ‘nummer ain’, toch?
Meschain n knufke van ale schriefsters? Kinnen ze nog even veuroet.
Op noar … of nait meer … ? Wat t ook wordt, wie zellen t aksepteren mouten. Aan ales komt n end. t Is nait aans. k Zag net nog, dat de site van Dideldom.com ook al oet de locht is. Vanòf maai haar Jacob Nijboer de site nog nait weer aanvuld … k Wil hopen, dat t mit homzulf wel goud gaait (op 20 dezember kwam bie de redaksie t bericht binnen dat Jacob oet tied kommen is en zien webstee opheven, mor dat pebaaierd wordt om d’inhold over te zetten op n nije webstee).
Hoop dut leven. Loatve dus mor hopen dat ‘ons’ Kreuze nog joaren deurgoan kin. Sukses! En veuraal bedankt veur de 100 nummers!

Op t mement dat k dit schrief, is t dinsdag 17 november 2020, de 55ste joardag van ons dochter. Woar blift de tied?
Òflopen zotterdag haren wie t lutjeste Zonneveldje te logeren. ‘Opa, help je me even?’ Hai haar op t mobieltje de letters N E T aantikt en pebaaierde nou oet te vinden of der n V of F kommen mos.
‘Wat zoek je?’
‘Netflix!’ Zien pa zegt dat opa dat nait het.
‘Oké, doe dan maar YouTube!’
Gelukkeg het opa n mobieltje, n laptop en n pc. Overal kin hai zok op oetleven, wat speultjes aangaait. De pc en laptop binnen aigenlieks alweer overbodeg, want op t mobieltje kin je ja alles wat je hebben willen wel vinden. Ons kinder zetten de kaggel al hoger as ze in Zuudbrouk onderwegens noar hoes binnen … t Binnen aander tieden, veur ons nait bie te hollen. Joa, n hail aander tied as 55 joar leden!

Nou aacht groaden op de thermometer en dou min tiene. t Snijde, t hoagelde, t was spekglad en t waaide meroakels. Joen hond luit je nog nait boeten deure. Brrr! Dou ik tegen haalf elven van t kerkje (drokkerij) thoes kwam – k mos overwaarken – zat de vraauw bie de buren.
‘Doe letst mie dat wicht nait allaint! Nou mor gaauw op bèrre … en waist hè, as ze begunt, mie roupen!’
Wie zaten op ons eerste potje te wachten en mien vraauw haar mie al te kennen geven, dat t dij nacht wel ais gebeuren kon.

Mit bruier haar k òfsproken, datve om n uur of vieve weer begunnen zollen. t Was zo as aaid beredrok.
Tegen haalf twije zee de vraauw: ‘Bel dokter Van Loo mor, t duurt nait zo laank meer!’ Pfff, mos k weer deur dij kolle! Bie de buurvraauw op d’roete tikt.
‘Jo!’ was t antwoord en twij tellen loater ston zai boeten … lag schienboar mit klaaier aan op bèrre.
Ik op t rad noar t kerkje en Van Loo bellen.
‘Hoeveel tijd zit er tussen de weeën? Kan ik eerst nog een uurtje slapen? Ik had net een erg zware bevalling…. ben er echt aan toe!’
‘Oké, as ie mainen dat dat kin, zel t wel goud wezen.’
Dou k trogge bie hoes was, vruig buurvraauw: ‘En?’
‘Hai wol geern nog even n uurtje sloapen.’
‘Den mor weer op bèrre, enne … oren en ogen open, hè En mie roupen!’
Tegen haalf vare: ‘Bel dokter mor weer, t gaait nou ducht mie deur!’
Pfff, weer buurvraauw roupen en weer deur dat ieskolle weer, bah! Bruier nog gaauw even anroupen, vanwege d’òfsproak datve om vief uur weer starten zollen. ‘Goa der mor oet! Hillie is begonnen!’ k Heurde hom naren.
Dizze raaize was dokter der binnen n ketaaier. Hai bekeek de zoak en vroug mie om waarm wotter en wat handdouken. ‘Het is er zo!’ En inderdoad, veur vaar uur was t lutje wichie boeten deure. Mooi man! Intied haar buurvrouw soam mit dokter t ain en aander kloar zet veur t vervolg en gaf ze dokter der n fikse over, omdat hai bie t eerste telefoontje nait kommen was. ‘Kinnen ie deur telefoon bekieken, hou of de situoatsie der veur staait?!’
‘Nee, maar ik had een paar zware uren achter de rug en snakte naar rust!
‘Haar je mor gain dokter worden mouten! Dat wos je veurdat je der aan begonnen!’ Loater zee de man: ‘Wat een harde vrouw!

Nou, 55 joar loater, is t net lenteweer: aacht groaden boven nul! Wel zitve nog aal mit t coronavirus en waiten wie nait wat veur tieden ons wachten. Nee, den toch mor laiver de snij en hoagel van 55 joar leden.
Dat je, ondanks d’onzekerheden van nou, n schiere Kerst en n goud oetenne hebben maggen!

t Liekt op n foute som of n misploatste grap. Is t nait! Nee, n woar gebeurd verhoal, woaras paartie lu zok aan meten kinnen. Of … is t pure mazzel?
Joaren leden mog ik kennismoaken mit n vrijwilleger bie de Seniorendag in Winschoot. Schiere peer, woaras ik goud mit overwegens kon. Hai was ook Zunnebloumer en was aarg begoan mit minder bedailden. Over en weer nuigden wie nkander, as wie wat biezunders organiseerden.
d’Eerste moal dat ik nuigd wuir op n gezellege middag, stelde hai mie veur aan n jonge knoap oet Irak. Hai woonde in t asielcentrum boeten zien dörp en mien moat haar hom nuigd, omreden dat hai nogal ainzoam was. ‘Kin e sosjoale kontakten opdoun en wordt t leven meschain wat droagleker.’ was zien mainen.
t Was n rusteg, beschaiden jonkie (ik schatte hom op n joar of achttien). Hail netjes, en aarg hulpvoardeg veur de gasten. ‘Dij redt t hier wel’, was mien reaksie.
,Dat hoop ik van haarten!’, was zien antwoord en oet t gesprek dat volgde, vertelde hai mie dat t aanvroagen van n verbliefsvergunnen aarg intensief en bewaarkelk was!
‘Ain en aal pepierzooi! en raaisderij noar Den Hoag. Zai zitten as daaier opsloten en maggen hailendaal niks! ‘Nait waarken, nait leern niks! Om muide van te worren!’ n Joar of wat loater kreeg k vannijs n nuigen. ‘k Heb veur die n specioale ploatse reserveerd!’ Soam mit ons veurzitter haar n wie n stee tegenover d’börgmeester. n Hail sympathieke man, woarmit t makkelk proaten was. Hai prait ook Grunnegs!
Al gaauw stuurde ik t gesprek mit hom op t asielzuikerssintrum en vroug of hai nait wat meer voart zetten kon op t verkriegen van n verbliefsvergunnen. Hai haar vot deur, over wel ik t haar. Zien gezichte betrok en hai vertelde, dat t jonkje woarschienlek weer trogge mos. En dat noa vief/ zes joar prosedeern! ‘Joa, t leven veur dij lu is slim stoer’, gaf e tou.
Anno 2013 is t den toch raak! Hai krigt zien vergunnen, mag noar schoule. Wat n weelde! Veul diploma’s het e inmiddels hoald en waark vonden. Ook n schier vogeltje in d’kooigie, dij hai touwezen kreeg! En van zien waark n gloudnije auto! t Kin nait op, zol je denken. Der zat nog n addertje onder t gras … Op de dag, dat ik op bezuik was, haar e vrij nomen, omreden dat hai n aais tot troggebetoalen kregen haar van € 3000,-! Nou mos e noar n adviseur om dat aan te vechten.
‘Ie blieven an de gang’, zee mien moat. ‘Mor hier kommen wie ook wel weer oet.’ En hai begon te vertellen.
Mit zien ollen en bruier en zus is hai vlucht veur Saddam. In Iran kwamen zai in n tentenkamp. Nait te roem moust reken. Zai keken voak n moal in d’loop van n geweer! Soam mi t n kammeroadje (zai wazzen dou 17!) vluchtte hai om van alle ellende òf te kommen. In n auto vol mit meloenen, woartussen roemte moakt was, kwamen zai via Griekenland, Turkije in Nederland. n Dag of vare gain wotter zain en vanzulfs ook nait noar d’wc!
Midden in Amsterdam konden zai der oet! Gauw de boskes in en t bundeltje goud, dij ze bie zok haren aan. Dat vuilde al hail wat vrizzer! Joa, en den aanmelden op t plietsiebero P Schietensbenaauwd wazzen zai doar al n moal of vieve langs lopen. Dou mos t toch wezen. Hailndaal verbiesterd wazzen zai van de vroag van n dainstdounde agent: ‘Jullie hebben vast wel trek in een kopje koffie en een broodje?’ Gain geweer! Gain gevluik! Wat zol dit betaiken? ‘Enne..’ ging de plietsieman wieder: ‘Als jullie een douche willen nemen, kan dat hier ook hoor!’ Hai haar al laank roken, dat t doezen al n zetje leden was…
Vrijhaid! Dit was vrijhaid! Zai wazzen al laank vergeten, wat t betaikende!
Noa meerdere sintrums, kwam hai in Noord Nederland. t Vervolg heb k joe inmiddels verteld.

n Poar weke leden haar k mien moat n mailtje stuurd over de betaiknis van t woordje MOI! Reden veur hom om mie te nuigen veur n bakje leut.
Doar heb ik guster gebroek van moakt en om ze te felesiteern mit heur sukses en vastholdendhaid nam k n kouke mit P opspoten mit creme:
1 + 1 = 1

77 Joar vrede!
Teminsen, zo hait dat hier…
Wie waiten beter. In d haile wereld worden nog aal mensken om zaipe brocht!

Vanmiddag docht ik aan vatteg-vievenvatteg…
Veul luu omkommen, mor ook veul hebben t red, omdat aander luu heur, ondanks gevoar veur aigen leven, onderdak geven hebben. Hail stoer!!

Affijn, ie waiten t maiste ja al wel, denk ik?
Veul bouken bennen der intied over schreven en op tv wuiren in d oaflopen joaren ook de neudege series oetzonden.

Zo ook de komische Engelse serie Alo Alo!
Wat wil t geval…? Mien voar, waarkzoam veur d Laikster kraante, was mit mien oldste bruier onderweegs in Roon (Roden).
Dou hai bie kefee Scheepstroa (Dikke Wilm!) langs kwam, raip dij: “Eppie, ho even! k Heb n putje veur die. Moust mie n sege slachten”, (voar slachtte in dij tied alles…)

“Woardat?”, wol voar waiten.
Omreden, dat t veurénne vol zat mit Moffen.
“Op deel!”
“Konst wel gek wezen! k Bin t leven nog nait zat!”
“Dij krieg ik wel om! Gain probleem, zai kriegen zat!!”
Ep, sikkom nooit baange, en aait stamgast bie Wilm, kreeg t vertraauwen, dat t wel kon en zee: “Tou mor den…”
Tegen bruiertje: “Goa doe doar in deure stoan en let op luu mit broene hemden! As t dij zugst, moust n moal of drije mit klompe tegen deure schoppen! Goud?”
“Joa Pa!”

Woarschienlek hebben zai n hoop mazzel had, want voar het de klus zunder problemen kloart!
De sege wuir keureg in mootjes oafleverd…
En zo t verhoal wil, hebben de aanwezege Moffen der ook lekker van eten!!

Kin ook n foabeltje wezen n vanzulfs, mor wel is bewezen, dat ter op zo’n 50 meter oafstand van t kefee n Engelsman stoan het en in de joaren noa d oorlog, der n tv-serie van moakt is?

En of je t leuven of nait, wat ik hier net schreven heb, is woar gebeurd!!

Ben je op leeftied, den holt t verleden joe bezeg…

Dou k in d joaren zesteg onderweegs was noar t wichje, stapde op Zwoag ook n jong kerel op fietse…

Ook noar Brouk? Nee, Nij Scheemde.

Den kin ve mooi mit n kander oprieden, goud? Jazeker!

n Beetje biezundere man…. En dat bleek al gauw, dou e mit mie over de biebel begon.

Doar ging e nogal slim in op. Sorry, mor doar ben ik nait zo van. Oh?

Wel es in leesn den? Ja, mor t is mie te foabelachteg! Noach, dei van alle daarn tweie in zien ark haar?

Ken ja nait! Den mos zien bootje wel datteg moal langer weesn as de Kroesschepen van Maier oet Poapenburg!

Nee, loat mor!

Hai was wel n denker, von ik en zien mainen aarg interessant. Doarom lait k hom nog mor wat deurreveln.

Der stait in de biebel ook, dat de wereld vergoan zel as verterend vuur, hou zuchst doe dat?

Joa, wat mout ik mie doar bie veurstell n? Vuur is vuur en dat ken bie braand hail wat vernailen….

Zol dat t weesn? Nou, revelde hai deur: ik zai dat aans! Oh? Hou den?

Der stait ,als verterend vuur’ Dus nait echt! Ik denk, dat ze bedoul n, dat de wereld ondroaglek wordt! Zol kenn n!

Bie d oafslag noar Nij Scheemde heffe oafschaid nomen. Goie raize wieder! Joa, Doe ook!

Geern tot n aandermoal raip e mie noa. Is goud!

Onderweegs noar d Boneschans haar k aans niks in d kop as dat de wereld ondroaglek worden kon…

En nou, roem 60 joar loater liekt ter op dat e nog geliek krigt ook!

Ie kennen dat laidje nog wel?
Wat kon je doar vrouger wat veur kopen! An elke vinger n diamanten ring!
Aj nou t nijs op tillevisie zain, of d kraande inkieken, is t ja net, of d Euro gain ollerwetse stuuver meer weert is!
n Zootje! k Heb der gain woorden veur!
En den zeggen pardie luu: Aarger die doar toch nait aan… Is slecht veur t haart!
Joa, was t mor zo makkelk! Kop in t zaand steken wil k nait!
Tuurlek is t wel te begriepen, dat elk wel n beetje meer wil…
Veur pardie luu is t knibbeln en mout d aankoop van n nije wasmesjien voak oetsteld worden tot t vekansie geld komt…
Ging mien veurege verhoaltje over onze gemainte, nou las ik vandoage dat Willem H. deur zien aigen femilie aankloagd is…
Bah! docht ik: van joen femilie mout je t mor hebben!

t Verhoaltje wuir aans, dou k verder las… Wat n krimineel! En wat gewaitenloos!
En k docht geliek an Wladimir en Gerrit mit zien lach en open bek!
Apmoal minsken… hou bestaait dat toch in s hemelsnoam?
‘t Komt deur aal dij rekloame!’ mekkerde opa.
‘t Kopen wordt der in houwen… elke bod herhoalen en kloar is kees!
d Luu worden harsenspuild! Dat is t!’

Zo zel t wezen, docht ik, dij trogge docht an de verbouwen van C-1000 noar Jumbo… Doar kreeg aal t waarkvolk ‘n cursus’ ombatterijen…
Mit n rollenspel, meziek en aander gedou, mos C-1000 in ain moal wegspuild worden… ‘JUMBO!’ Dat was ja de toukomst!
Eem trogge noar Willem en kesotten. Welke partij je ook stemmen…
t Is ain pot nat! De crimineel n zunder streepkespakken goan de bak in…
Dij mit streepkespakken kommen vot mit: “Dat had ik niet moeten doen…”
en… stappen in n aandere bestuursfunctie, woaras de belonen voak nog beter is!

Mien leste perbaaiern, om nog wat te verbetern in dizze wereld was bie t verkaizen van d leste moal…
Dit keer heb k de lieste ais echt bekeken. Oet de vieve, dij k nog n beetje respectvol achtte, en zuuver op de groat, heb k mien keuze moakt.
Nog nait echt n grote pertij, mor wel wait wat nog komt!

Ik hoop van haarten, da k dit moal goud stemd heb…
Al zellen hier ook wel n poar bie zitten, dij t nait te nauw nemen?

Deugd dee t mie, dat buurvrauw -nait waitend, aan wel of zai heur stem geem mos- mie in t stemhokje zain lait, dat ze op dezulfde man as ik stemd haar…
Zai haar mien oetleg overnomen!!
Hoop dut leven!

t Was n schiere zummerdag. Manske haar zok net n pilske pakt en zat te prakkezaairn over de slechte handel.
Schienboar deur t waarme weer, haar e waineg aanloop en was de bodem van de kas goud zichtboar! “Hou mout dat wel wieder…”, dochde haardop.

Trijn komt aanlopen. Zai haar net n rondje lopen mit kinderwoagen en haar tussendeur nog even n kopke thee dronken bie Ol Graitje, dij stief zaik was.
“Hou was t?”, vroug Manske.
“Oareg nuver, zai komt der wel weer boven op.”
Ol Grait haar d enkel broken, dou ze d hounder vouern wol. Dou ze t hek open dee, bleef ze mit d aarm achter t goas hangen en… boms!’ doar lag ze.
“Hou is t meugelk”, vertelde ze. “Dou ik vuil, glee klompe mie van voute en knakde enkel mie dubbel. Gelokkeg heb k t aargste had. Dokter zee vanweeke, dat t zok goud herstelde en mit ain krukke rommelt t al weer n beetje aan….”

“Nait veul west?”, wol Trijn waiten.
“Gain knope beurt. En dat al drij weke!”
Trijn pakt Jampie oet kinderwoagen en lopt t ol hoeske in in.

“Moi!”, Haarm Gankemoa komt aanlopen.
“Moi!”, groutte Manske trogge. “Hou is t?”
“Nait te roem. Vrauw krigt n potje en ik heb gain dubbeltje om spullen veur heur te kopen!”
“Wat hest aal neudeg den?”
“Luiers, n kinderwoagen, klaaier en dat zok dingen, waist ja wel.”
“k Heb hier wel n kinderwoagen”, zee Manske, in de hoop, dat e toch nog n beetje vangen kon…
“Dat zai ik, mor ik zee ja: k heb gain dubbeltje!”
“Den kinst ook niks kopen!”
“Nee, mor ik docht: nisschain wil Manske wel wat ruilen…”
“Wat wolst din ruilen?”, wol Manske waiten.
“Nou, as ik dij kinderwoagen krieg, krigst doe mien hoes?”
“Dien hoes?!” t Was net of e t in Keulen dunnern heurde…

Dat kin k nait moaken… t Is wel n ol krödde, mor den hebben zai gain dak meer boven kop en krieg ik zulfverwiet! Docht e.
“Hou wilst dat den wel doun? Woar mouten ie den hin?”
“Oh, dat heb k al regeld. Taiske heur ollen hebben aanboden, dat wie wel bie heur wonen kennen.”
“Den is t mie goud”
Haarm schrok der van… Joa, ho even! Doar mout nog wel wat bie!
“Ook goud, zuik die nog mor wat oet!”
“Dij fietse en dij kopern bloumpot”, stutterde Haarm.
“Tou mor, neem mor mit!”, zee Manske, dij t veur Haarm den ook wat aannemelker von.
Haarm greep de fietse, slingerde d bloumpot an t stuur en pakde d kinderwoagen. Manske zol zok nog ais bedenken kennen!

Mits komt Trijn boeten deure en vlijt Jampie in t kinderwoagen om nog n klain endje te lopen.
“Dij heb k der nait bie kocht!”, raip Haarm.
“Hou, dij heb k der nait bie kocht! Wat hest den wel kocht?”
“Dij kinderwoagen!”, zee Haarm. “Kinder koop ik nait, dij moaken wie zulf.”
Trijn schrikt zok röt, draait zok noar Manske en vragt: “En woar loat ik Jampie den?”
“Leg dij mor in t hounderhok, doar bedenk ik wel weer wat veur!”
Haarm, baange dat de ruil asnog over goan zol, sprong gaauw op fietse en sjeesde as n raket t aarf oaf…

“Ol stumper!”, zee Manske. “Gain noagel om de kont te kraaben! Moust heur vanweke nog mor n pude vol potjegoud brengen en dou der din ook nog wat eerpels en gruinten bie. Zai kennen t best broeken!”
Trijn begreep hom en muik der gain woord meer over voel…
Baide wazzen aarg sozioal.

Dou Jampie n joar of twaalm was, kwam Haarm weer ais langs.
Manske schrok eem en kreeg der gemengde gevuilns bie…
“Moi! Hou is t? Enne… hou is t mit t luttje wicht en de vraauw?”
“Meroakel, t kin nait beter! k Heb vast waark bie d boer en doar bin k al weer n joar of negen tot baider tevredenhaid!”
“Mooi man! t Wazzen barre tieden indertied en bie ons was t ook gain vetpot! Doustoe bie mie kwamst veur n kinderwoagen haar k ook al drij weke niks verdaint. Mit dien aanbod docht ik weer n zetje veuroet te kennen…”
“Den haar n wie baide n goie dag. Ik kon t ol nust an stroatstainen nait kwiet en doe hest die der goud mit red?”
“Joa, k heb der nog n beetje aan overhollen. Bin blied, dat t veur ons baide goud oetpakt het! Doar mouve even aine op drinken.”
Manske pakde twij fleskes bier en langde Haarm ain tou.
“n Stokje worst der bie?”
“Joa. Proost den mor he!”

Oktober twijdoezendacht…, t is weer zowied. De Senioorndag is start. Verwacht bezuik: zo’n vaaierdoezend man. As mitwaarker van d’organisoatie bin k om acht uur in de Klinker, in Winschoot. Ale dranghekken en aandere ofboakens stoan op stee. t Volk kìn kommen.
Mien karrechie van de Zunnebloum heb k stald bie n lanteernpoale zo’n tien meter van de hoofdingang. Vaalt goud op! C-1000 Scheemde ook weer tevree, ducht mie. (hai is sponsor van de oafdailn Scheemde en zien logo staait op t karrechie) Mien waark vandoage is soamen mit twij schonen oet Sodom de infermoatiestand te bemannen. k Heb t weer oareg trovven! Om kwart over negen (roem veur de start!) kommen de eerste ollechies al aanschoeveln……
“Wat doun wie?” vroag ik Abe de Jong, algemain laaider van de evenementenhal. “Deure al open?”
Abe twievelt nog wat, mor as e zugt houveul de toustroom al is, geft e ‘carte blanche’. “Kerel, wat al n Duutsers”, zegt Warmtje oet Oostwold. “Dij bìnnen der vroug oetstapt vanmörn! Zai laiver as ik!” Terloops verget e, dat t veur hom ook haalf zeuven was, dat e ziennachtgoud zakken luit….
Bie de info is t al drok. n Man –gezicht wat ofziedeg- vragt woaras hai de stand van de BeeGeeHaa vinden kin. “Twaide pad rechts en dìn ongeveer aan t enne…. As ie hier liekoet goan, goa je veur de Zunnebloumviever rechtsof”. “Sorry, meneer, ik ben blind” is zien antwoord en as e achter de balie langs lopt, zai ik zien widde stok en n gelaaidehond. ,Stief van schoamte rag ik in stilte op miezulf: “Koukop, let dìn ook op!” “Als u hier even wacht, vraag ik zo een van de dames om u te brengen!” Ik mompel nog wat zenewachteg mien excuus en evenm loater brengt ain van mien assestenten hom op stee. Het stroomt mor deur en ik schat zo, dat der oareg meer lu as veureg joar bennen. Mien collegaas hebben zulfde gedachten.
t Wordt drokker en drokker en ik wor gloepens nijsgiereg noar n hoop geblaf in de zoal.
“Goa ais kieken”, vroag ik ain van de wichter. “t Liekt wel ofdoar wat loos is!” Mitsdat ze mien vroag oetvoeren wil, komt der n mooi zwaart wiefke bie de kroam. “Meneer, mag ik U wat vragen?” Op mien knikken gaait ze wieder: “Is het mogelijk, dat wij een andere plek krijgen? Onze honden zijn erg onrustig. Dit houden ze geen dag vol!’ Op mien vroag wat der mis is mit heur stee ropt ze vertwieveld: “U hebt ons naast de worstenstand van Huls geplaatst!” “Hou kìn je t bedenken”, docht ik en greep geliek in. “Roup Abe even op!” “Attentie, attentie! Wil Abe de Jong naar de infostand komen? Het is erg dringend!” Twij tellen loater Abe: “Wat is der loos?” “Je hebt de BeeGeeHaa naast Huls geplaatst en dat schijnt niet te kunnen”. “De BeeGeeHaa? Wat is dat nog maar es?”
“De stand van de Blinde Gelaaide Honden!” zee ik en mit n dikke rooie kop stoof e vot.

n Haalf uurtje loater kwam e trogge mit de bosschop, dat t lokt was……. Noa oafloop bie de stamppot mous in de Boschpoort hebben wie der nogmoals smoakelk om lacht. “Veur de volgende moal goud om denken: BeeGeeHaa is Blinden Gelaaide Hond”! was t advies bie t ofschaaid. Van Bouwie Huiting heurden wie de eerstvolgende vergoadern, dat der bienoa zesdoezend mensken west wazzen! De Duutsers haarn mit heur vievendatteg buzzen t hail Oldambtplaain lam legd!
Nou, alweer n joar of wat loater, -zunder de Senioorndag- besef ik wat dat veur Sodom betaikende!!
Klinker is vot en der komt gain evenementenhal bie de nije….. Mor toch het volgens mie: t Oldambt wel Toekomst!

‘Gaaist mit, Bram, t voel even in de container mietern?’
‘Nou direct? Ja!’
Bram huppelnd en opa stroekelnd (leeftied, hè!).
‘Gooi doe de vlezzen der mor in.’
‘Oké … Opa, de witte bak zit vol!’
‘Ik kom deraan.’
Zegt n vraauwchie: ‘Als er een vol is, mag je wit ook in de bruine gooien, hoor!’
‘Oké!’ As e de tazze leeg het, roemt e geliek de vlezzen noast de container op.
‘Wat ben jij ja netjes,’ zegt t vraauwchie.
‘Ja, doe ik altijd.’
As we votlopen: ‘Dat moet toch, opa?’
‘Zeker!’
Bewondern!

Klaainzeun Bram zit bie toavel veur n lekker bordje soep. Hai dut zien oogjes dicht en voldt zien handjes.
‘Wat dust, Bram?’ vragt moeke.
‘Dat doet Jeffrey altijd.’
‘Oh joa?’
‘Ja, en ze gaan ook naar de kerk!’
‘Wat doun ze doar den?’
‘Domino spelen!’

As advertensie-verkoper kwam k aal weeke bie Manske. En k mout zeggen: mit veul plezaair!
Dinsdoags was de dag dat k eev’m langs ging om te kieken, of der wat te verdainen was…

Hail gauw haar k al deur, dat t zoaterdoags nog veul plezaireger was op zien luttje kantoortje in de enorm grode romney-loods vol mit allerhande spullen.
Den gooide hai de kiosk open woaroet patat en fricandellen verkocht wuiren.
n Drokte van belang! En… altied in veur n proatje!
Somtieds wel twaalf, dattien man in dat luttje kantoortje.
“As ie kovvie hebben willen, t staait op t aanrecht, melk en zuker stoan op toavel”, was aaiweg t taimke van Trijn -zien vraauw, dij nait minder gastvrij was-.

En den ging t loos! Stoere verhoalen over luu, dij langs west wazzen, moar ook over zien handel en nait te vergeten, de verhoalen over vrouger…!
Wat doar aan t verleden over toavel gung…
Nait allaind flauwekul, nee, ook over t ontstoan van Kloosterholt enzo.

“Manske, doe woonst aan Troanendalloane, woar komt dat vot?”
“Ja…, dat zelk joe vertellen…” t Stoule kwam wat noar veuren om zien gasten veuraal niks te loaten missen en den:
“Ie waiten vast wel, dat der vandoage de dag n bult luu bennen, dij in heur laand bedraigd worden en hier heur hail zuiken. Dat is altied al zo west, dus: niks gain nijs onder de zunne!!
Zigeuners wazzen vrouger luu, dij ze naargens hebben wollen. Oet Egypte kwamen ze mit doezenden noar Europa en honderden doarvan kwamen via Schanze in Kloosterholt. Hier, op dit stee, woar nou mien loodsen stoan, wollen ze heur woonwoagens zetten om vervolgens van hieroet heur woar aan de man te brengen…”

Je heurden mensen dinken: ‘zol hai ook n zigeuner wezen?’ De link mit zien neern was ja al gauw legd…!
“Heb je zin in n zolt heerntje?”
Onder heerns opmoaken pruit e gewoon deur:
“Kloosterholtjers wazzen t doar nait mit ains en kwamen s nachts mit schuppen, snitten en zaizen aanbroezen en hakten op dat volk in! Der was zoveul geweld, dat mainege zigeuner sneuvelde en wat der over was is vlucht richting Maiden/Muntendam. In tied dat dat west het nuimden d luu dit dail van Kloosterholt ‘Het dal der tranen’. Loater: Tranendallaan!!”

“Achter de Maiden bennen zai dou deelstreken. Zo as ie wel waiten, hait dat nog aaltied: Egypteneind!
‘Wat n logica’, docht ik. Moar t heurt goud…
“Al gaauw haarn ze deur, dat n beetje wiederop, n beter stee was om zok te setteln en doaroet ontston Muntendam…
As je d echte Muntendammers kennen, waiten ie dat dat aal gitswaarde luu bennen.
“Verrek, hest geliek”, was de reaktie van enkelden, dij mit bek open t verhoal tot nou tou aanheurd haarn. Ie konnen ze dinken heuren: ‘woar hoalt hai t vot…!’

“Den waiten ie ook vast wel”, ging Manske wieder, “dat Muntendam n echt koopmansploatse was?”
‘Joazeker!’, beoamden touheurders.
“Wait ie, houveul hondekaarn der dou wazzen?”
“Nee”
“Zes honderd! En dij zworven elke moandag oet. Zai laipen haile noar Drinte en Vraislaand om heur woar te slieten! Appelsienen was dou heur grootste handel, moar der wazzen ook pardie dij bozzels en aander hoesholdelek spul verkochten. En vis! Nait elk was vanzulfs koopman…”

“Net as overal, haarn enkelden gain brood op plaanke. Zai belandden loater bie boeren in t Oldambt.
n Poar handen vol settelden zok tussen Nij Scheemde en t Woar!”
“Verrek”, zee ik, “dat klopt! Doar ligt t streekje ‘Luttje Muntendam!'”
“Joa”, beoamde Manske, “en doar wonen Sam en Moos…”

‘Den is mien schoonvoar ook n zigeuner’, docht ik, ‘dij komt doar vot en is ook gitzwaart… enne… Den klopt zien verhoaltje, dat e as klain jonkje n moal kidnept is deur zigeuners ook!’
Mien hazzens begonnen te kroaken: de Nijlanten en Drenten, zai wazzen aaltmoal zwaart!

“Nou begriep k woarom die t zo goud gaait”, mos k nog even kwiet bie t oafschaaid.
“k Dink t ook grijnsde Manske; tot volgende weeke! Moi!”

k Mos t verhoal vanzulfs vot kwied aan moeke…
Moar dat heb k waiten!
“Hol der toch over op raip ze: wie zigeuners? Kirrel woar hes t dien verstand! Manske het joe der n mooi ploatje op draaid!”

Ik heb mie moar stil holden. Misschain haar ze geliek, moar k wol der nait van waiten: t Was zo’n mooi verhoal, dij goei je toch nait vot…?
Tot n aander mie bewiezen ken dat t oet Manske’s doeme kommen is, hol ik t veur woar!

Veul Grunnegers vroagen zich oaf, of de gaskroan nou echt definitief dicht is….

Eerst zain en den geleum!! Mit mooie foto s en ,loze’verhoalen ben je der ja nog nait…

Hebben ze de luttje lokoaties bewust vergeten?

Of…. of….. en doar gait t weer hin! Noast veul luu, dei t wel geleum, benn n der n smak dei d scholders alweer optrekken . En nait zunder reden. Noast de luttje putten heffe de zee ook ja nog!

Onlangs ston der nog in d kraande, dat de bodem doar al zakt en t mit de fauna hailndaal mis is!

Nije bronnen, nije rampen? Zee-beems? t Sunamie s? Dei t wait mag t zeggen…!

Goud onderzuiken? Deur wel dat din? Nam en Shell hebben din de maiste kennis, mor dat liekt mie nait eerlieks! Toch?

Nee, din laiver de vaar luu, dij dubben mit de baide informateurs?

Ook gain goud idee? Ik opper dat, omdat je met Nam en Shell gain compromissen sloeten mouten….

En doar benn n zai toch wel goud in?

Ain ding stait veur mie wel weer vast: het geld is hier vannijs belangrieker den t Grunneger volk!

Doarom dit verhoaltje! Ie meugen der gerust aans over denken vanzulfs, mor mien geleuf zakt aal wieder onderoet! -In alles!-

Over n luttje vatteg joar zel ve t messchain wel weer waiten?

En komt de noam Adolf weer in beeld?: ,Wir haben es nicht gewust’?

t Wordt weer de veurege aaiw woar dit stokje over gait….

( n aaiw is honderd joar, mor ik ben van t zummer nog mor 87….. dus…..?)

Oll n goan voak trogge in de tied, omdat de eerste ervoarn s t beste hangen blieven?

Rond 1960 trof ik t wichje, woarmit ik n moal of wat op stap west was.

n Laif ding, woarmit ik goud overweg kon! En… zai kon lekker smokjen!

k Haar heur al n zet nait zain omreden, dat zai in t westen op schoule zat.

Van mien voar mog ik t Kevertje wel broeken, dei oamd en dou ik veur t station in Sodom reed, laip zai doar…

t Roampie open en heur anroupen. n Zet nait zain! Gaist mit n endje toeren?

Zai sprong bie mie in d auto en vroug: woar gaist noar tou den?

Och, moakt mie nait oet…. richten Blijham? Is goud! Bie t instappen alweerl n dikke smok op d waange….!

Kloar! De klik was der weer! Zai vertelde, dat ze nait noar schoule west was…. Vaar weke geelzucht had! Oh?

Bie t Paviljoen t Kevertje op zied van t wotter zet, d lichten oet en vannijs n smokje….

k Was votdoadelk in de wolken, dat kin je joe begriepen.

Noa n uurtje zee ze, dat ze noar hoes mos, anders wuir n heur oll n onrusteg. Nog n dikke smok en… Tot aander weke?

Aander weke kwam der nait van. Ik was al n zetje broert in de pokkel en veur dat t wiekenne kwam lag k al zaik op berre!

n Poar doage geel om t snoetje en dou was t weer over! GEELZUCHT! dat noar binnen sloagen was!

Ben der meroakel zaik van west…. Volgens dokter De Haas, was t nait besmettelk, mor ik dochde, dak t beter wos!

Negen weke plat! En dat in n gloeiend haite zummer! k Zee noa n weke tegen moeke… t Is veuls te hait op mien koamertje!

Ken der gain ledikant in d koamer? Noa wat treuzeln… mog dat en ik lag vanoaf dou mooi veur t roam.

n Stok koeler en… nog beter: ik kon mooi op stroate kieken!

k Haar vanoaf t begun nog gain verlet had om n sigaretje, mor nou kreeg k weer oareg jank!

Dei oavend tegen haalf twaalm kwam Chris Kraster langs….. Ik tegen t roam tikken en hom vroagd, of e mie n deuske sigaretten oet d automaat bie Richte trekken wol! Dat was goud en ik kon weer lekker dampen!

Moeke het mie der nog wel over aansproken, mor t mie nait verboden…

Noa roem negen weke mog k weer noar boeten en mien kameroad opperde, mit hom noar t Kraaienust bie t Schildmeer te goan.

Leek mie wel wat! Noa aal dei stilte was k der nuver an tou!

Kom in kontakt mit t wichtje, woaras ik dammeet zesteg joar mit trauwd ben!

Wat bist doe ja wit om d neuze zee ze. Ja, negen weke geelzucht had !

Zai mos lachen…. Geelzucht? Dat het ons buurwichje van elm ook net had!

Heur moeke zee tegen heur bruirtje van aachte: Jampie, doe moust eem tegen meester zeggen, dat Sienoa nait op schoule kommen kin, omreden zai geelzucht het. Kinst dat ontholl n?

Joa zee Jampie: Blau Juk! Nee…! geelzucht! Jampie nog n moal: Blauw Juk!

Of meester t begrepen het?

t Is weer Carnaval! Het feest der zotten..

In t midden van de veurege aaiw wuir men in Grunn n der ook mit besmet.

Zo ook wie. (mien kameroaden en ik).

In Ter Oapel en Kloosterbuurn veur de Roomsen en de rest gewone feestvierders.

Ons eerste was bie Berend Dommering in Sodom… Volle zoal n en bienoa t haile publiek in biezundere kostuums.

As tiener vol mit hormonen vuil mie t oog vot al op n prachteg mooi en sexie wichje….

Noa n moal of wat mit heur danst te hebben, vernam k opains, dat mien hormonen verslapten!

Verrek zee k tegen t wichie: Waist dat dat nait mag? Wat bedoulst? Die as wicht vermommen, terwiel st n jong bist!

Oh… hest t ontdekt? Wil st mie n plezaar doun? Joazeker wel! Proat der mit gain aine over, want den is de lol der oaf! Oke!

Loater op d oavend, mien kameroaden was t opvaaln, da k ,heur’ nait meer vroagt haar, kwam n aander kameroad hels noar mie tou…

Woarom hest mie dat nait verteld? Wat? Dat dei maid n jong is! k Zat mit heur in d bioscoopzoal en dou kreeg k de kriebels…

Haand onder d rokken en…. Kerel man, n poale as n riggelpoale! Bah, bah, bah!

k Haar hom bienoa veur de kop houw n! Och, woarom! Kinst toch wel over n grapke? Hest geliek en k wol mie d oavend ook nait verpesten loaten!

Tot daip in de nacht echt feest had, zunder Rooms te wees n! Berend bedankt!

In Scheemde haar Jan kuper n muziek en feestwinkel in d Kerkstroate.. Kameroad Bee en ik stonden veur d etalage en zagen twei grode koppen… Prachteg! Net wat veur t carnaval bie Struvee zee mien moat. Kom eem passen!

In d winkel zwaaide Imchie -Jan zien vrouw- de scepter.. Ik zag joe al loeren, zit der wat bie? Joa, dei baide koppen will n wie geern passen.

Imchie dook in de kiekkaaste : Dizzend he! Joa. Wat prachtege koppen raipen wie in koor……. woarop zai reagaarde mit: Ja, geweldeg he…

Benn n ook nait echt goudkoop heur! (koopluu he).

Mien moat begon in december al te fanteseern, hou of wie t minst opvallen mossen.. bie Struvee.

Wie goan noar oom Bertus, en klaiden ons doar om.. Den brengt oom Bertus ons noar Struvee. Ik stap 100 meter eerder oet as doe, den wait gain aine, dat ve bie n kander heurn! mie goud zee ik en zo geschiedde..

Be haar n stoere boeren/zeemanskop en ik n artistiek en koal koppie..

t Was bie d ingang vot al: moi Freerk! Ik zai t wel heur! Ik docht t nait reageerde ik den. Nou, k zai t wel an dien loop!

Oke, zet ve der n potje bier op? Is goud, zet hom mor eem oaf!

Nou? Vuil die ais veur de kop…. as t oaflopen is! Vannacht dus! Was hom ook goud, al haar e al gloepens zin an n potje bier!

d Haile oavend/nacht ging dat geintje aal mor deur.. Doe bist Freek he! Nee! Zet ve der n pilske op? Joa!

Dou ik eempies bie mien kameroad ston te proaten, vertelde ik hom van mien wedderij. Krigst dammeet nog zat van mie!

Wat bedoulst? Bier? k Heb d haile oavend niks had…. k Heb de ober vot n joet geem en hom vroagt: As ik vanoavend n borrel bestel, wil ik gain jenever mor wotter!

Ik ston paff! Eerlieks woar? Hest d haile tied allend mor wotter zopen?

Ja, den begun ik ja nait roar te doun…. k Heb d haile tied n bult plezaar had!

Net weer wat veur die!

Hai was hail staark in zien wille en as hai von, dat ik te stil wuir (ook ait n revelboaske) den zee e: wat bist ja stil! Ik zal mie de bek wel n zetje holl n den bist doe der zo weer! En verduld, Ik kwam weer hailndaal in mien doun!

Tegen n uur of vaare kwam de veurzitter van de dansclub noar veur n en vertelde, dat t feest oaflopen was…

Bie de bar stonden zo n man of tiene mie op te wachten: En nou dei kop der oaf!

Joa zee ik en ie traktaarn! Noa nog wat omzwendeln -om t spannend te holl n, trok ik t masker van mien kop en zaten alle zeker waiters mie mit bek open aan te loeren…

Doe hest t wonnen…. Doe bist Freek ja echt nait! Van de kastelain kregen wie nog n uurtje extroa en hou wie dou noar boeten gingen,kin je zulf wel roaden!

Wie goan trogge noar negenenviefteg…
Viefteg joar leden, woar blift de tied!

Ons bedrief, n drokkerij was net verploatst noar Meulnstroate.
Ons voar haar n beste slag moakt deur t bedriefspand mit woonderij oet 1741! te ruilen veur t gereformeerde kerke mit jeugdgebouw.
Wat n roemte! En wat n licht!
Van 60 vaarkante meter noar zo n 150!

In t olle pand gain stee om kont te keren, nou mos wie hoast op fietse van d ain noar d aander mesjien.
Smörns nait meer hozen… zoas in t olle pand dij zo n datteg centimeter onder t stroatpail lag en woaras t grondwotter roem boan haar.

t Ainegste noadail in t nije pand was d ol schoulkachel… of beter zegd; de oafvoer der van. Piepen luipen noa zo’n drij meter omhoog mit n knik overdwaars tou ziedmure oet. En dat gaf nait veul trek!
As e moar eerst goud brandde, was t aal goud, moar veur dat t zowied was was t housten en noagais housten! En deur de kwaalm zag je gain haand veur ogen, aal mörns n goie start!

Dat was n biekomsteghaid…
Wie konnen mit zoveul roemte veuroet! En dat was n zegen.
Scheemter kraantje luip nait en ons voar haar d’euvele moud om den moar wat aans te perbaarn. Hai startte mit n hoes aan hoes kraante in Maiden en Muntendam. Mensken kregen hom veur niks! Betuilen gain lezersgeld! In dij tied n haile grode gok.
Het laip goud; van 2500 noar 22.000! in n joar of tiene! t Kon nait beter!
As titel haar t krantje de noam M-M-Nieuws (Maiden-Muntendam). In de volksmond was dat al gauw: MAU MAU!

Aal meer mesjienen en aal meer volk. Van vief man noar sums twinteg.
Ook Christy kwam der bie. n Wichtje van sikkom zestien.
Zai kwam van ULO-schoule en haar t plan om in verplegen te goan.
Doar kon ze pas mit begunnen as ze zeumtien was, dus mos ze nog roem n joar wachten. Maal veur heur, mooi veur ons.
Oerdegelk en zoas n Grunneger betoamt: nuchter en rusteg.

In n luttje kantoortje, dij wie onder d’örgelbeune bouwd haren, begon ze in administroatie. Zai haar der kiek op, was goud sekuur en was ook noeit te beroerd om ais n uurtje langer te waarken.
Ons voar was wies mit heur! Noa n goie moand zee e tegen heur: “Christy, dit ken nait langer zo, dien loon is nait goud!”
“Oh”, schrok t wichtje, “ben k te duur?” d’Olle laagde: “Nee, te goudkoop! Doe verdainst meer! Dust ja zo dien best!”
En zai kreeg honderd percent opslag…

Vanoet heur stoule achter t buro haar ze via n tussenroam oetzicht op d zetterij.
Haile dag roatelden doar twij mesjienen woaras zai slim in interesserd was. As dochter van de dörpssmid haar zai wel n beetje technische gevuil ducht mie. Noa n joar vruig ze d’ol of zai dat n moal perbaarn mog.
“k Ben n beetje oetkeken op t schriefwaark en mesjienezetten liekt mie hail mooi”
“Den doun wie dat,” was t antwoord, “dij aander baiden kennen t waark op ketoor wel oaf. Kloar was t. Mit n glunder gezicht stapde ze aanderdoags achter t zetmesjien en of ze t al eerder doan haar; t ging meroakel!
De vakbond was t der nait recht mit ains. ‘Vrouwen horen niet achter zetmachienes!’
Mien voar haar echter zien aigen regels: “zai dut t meroakel, wat is doar mis mit?”
En zai bleef woaras ze zat! Vakbond of gain vakbond!

Christy is bleven tot heur traauwen.
Zai was dou sikkom drijentwinteg. Aigenlieks was ze n beetje sneu, dat ze heur hobby; mesjienzetten opgeven mos, moar ja dat was in dij tied zo: Traauwen? Den ophollen mit waarken! Traauwde vraauwlu heuren in hoes! t Was nait aans…
t Gemis was aarg en aan baaide kanten.

Op n goie dag, t waark gruide ons boven kop, zee d’olle: “Christy. Ik vroag heur of ze gain haalve doagen helpen kin!”
“Dat mag ja nait van de bond”, zee ik.
“De bond kin ons nait helpen, wie mouten t zulf regeln”, was t antwoord en vot was e!
Aanderdoags zat Christy weer glundernd achter HEUR mesjien.
Dat huil ze vol totdat ze n potje kreeg. En vot was ze, joaren laank.

Tot veur n week of wat bie ons t schelle ging en Christy weer veur deure ston.
Wat n weerzain, wat n herinnerns kwammen der over toavel! Noa viefteg joar was t net of tied stil stoan haar.
Jammer genogt, het ze heur man verloren en dat muit mie veur heur.
Mit heur instellen en waarklust zol je denken, dat zai beter verdaaind haar.
Zo is t leven; je hebben het nait veur t kaizen.
Vannijs kennen wie ons verblieden mit t kontakt mit Christy!!
t Proat is den haail aans as de doagse roddels en mit n glimlach hoalen wie herinnerns op oet ‘dei goie olle tied!’

Gain maal woord of noam, toch nait te vertraauwen!
Op t plain in Scheemde alle parkeerploatsen vol!
Mien laive tied, wat willen dij luu wel aal! Denk ik bie t zain van zoveul drokte…
“Hamstern! Baange, dat Corona heur te pakken krigt!”, mompelt moeke!

Ik goa in gedachten even trogge… n Vriendin, woaras ik op de kovvie was, haar t over de ik-cultuur!
k Von t wel n beetje overdreven, mor as ik nou zai, houveul der insloagen word?
t Mobieltje an t oor…, “Neem ook nog mor wat tandpasta mit”!
“Hmm? Der liggen ja nog vief tuubkes in t kastje van t aanrecht?”
“Dou toch mor! Enne… chips en bier! Enne… melk, stoete, kouken en veuraal wc-papier! Dou nog mor n pak of drije!”
Joa, denk ik: as je veul eten, mout der ook weer hail wat oet!
Tuurlek bennen der ook luu bie, dij de bosschoppen hoalen veur d oltjes en doardeur d kaare flink vol hebben! TOP!

Even loater: de schappen mit melk en stoete bennen volkomen leeg!
Wat nou?
Perbaaier t nog even bie bakker Prins? Dij het ja gain melk!

Zo ruireg as t op t plain is, zo rusteg zit t holtdoefke op t nust te roupen om n partner… Zai wil starten mit t baauwen van n nij gezinnechie…
Ook vogels kennen in de waare wezen… in dizze tied nog jonkgoud?

De doffers heuren heur schienboar nait, of… benn n der nait an tou?
Of zai ook in de ik-cultuur zit?
Ze vlôgt wel veul voaker of en aan…
Zel ook wel stress wezen!?

Wat is t en hou komve deròf? d’Haile wereld ligt plat. Ontsloagen, faillissementen en, nog aarger, paartie lu dij der in ainzoamhaid aan dood goan. n Mysterie! Net as mit alles wat der in de wereld gebeurt, kinve ook hier veul vroagtaikens bie zetten. d’Ain wait nog beter as d’aander watve wel en nait mouten. Mor dat ligt vanzulf aan ons aigen goave van denken. k Las guster in t boukje Soms denk ik wel eens bij mezelf van Wim Kan en kwam vannijs tot de conclusie, dat denken wel hail stoer is. Nee, veur joe nait … begriep ik! As k bie miezulf kiek en moeke en ik t laank nait ains binnen onder t televisiekieken den krieg je deur, dat twij wezens al oareg verschillen in t denken (wat denk je den mit aal dij miljarden lu?). Wim Kan schrift: ‘Televisiekieken: wachten tot der meschain wat schierders op komt.’ En dat wil ik hier geern onderstrepen. Woar moeke heur oareghaid aan het, is veur mie n ratjetoe. De riedende rechter, debatten, shows en nog staarker: rekloame. Wat n gedou! Ie kieken op ain oavend wel anderhaalf, twij uur noar dezulfde koppen, dij t apmoal zo goud waiten en bedoulen … bah! Ie kriegen ja glad t idee dat ze mainen dat je dement binnen. En mor lagen en mor schijnheilege bekken trekken, om joe t gevuil te geven dat t zo goud is wat ze aanpriezen. En den de miljounen dij je aal winnen kinnen! (Zo denk ik dus. Fout? Ook goud!) Allent al dat vraauwchie oet Laik mit heur wotterontharder dut mie gruweln, as k heur gezichte zai (toch wel n schier wiefke?). t Gaait ook heur om d’handel, t geld en heur ego. Heur gezichte sprekt doarbie boukdailen. En hier binnen moeke en ik t wel ains, wie draaien baaide d’kop om as ze der veur is! Roar, hè? Doemdenken? Coronatied is nait van t mooiste, mor geft wel de tied om noa te denken. Mor t denken krieg je nooit op ain liene. Anderhaalf meter òfstand is veur d’ain normoal en veur d’aander n onmeugelkhaid. Zulf wil k geern n roemdenker wezen, mor k vuil mie ook soms wel n doemdenker. Soorten zat, dus keuze volop! Allain zit voak ons ego in d’wege. En doaroet gruien den weer contra-groepen as Viruswaanzin. En dij lu denken vanzulf net zo goud as aansdenkenden! Nait mit ains … mag je ook zulf waiten!
Ik bewonder lu dij aandern heur denken respektaaiern kinnen. Zo as de vrundin van Anne Frank, Hannah Goslar. As kind in t konsentroatsiekamp bienoa alles aan femilie enzo verloren. En nog zegt ze onlangs in n vroaggesprek, dat de Movven der ook wel over noadocht haren, veur ze aan WOII begund binnen. Pfff!

Mien hazzens kroaken nou van t denken, hou of ik net zowied en zo roem denken leren kin as Hanna. Mor k denk nait dat mie dat lokt, want den denk ik toch wel wat bekrompener. Denken … k wol ook dat k t beter kon!

Sumtieds schut joe der wat deur de kop en krieg je de drang om dat op pepier te zetten. Zo ook vandoage, twij maai twijdoezendtien. Kinder mit vekaansie en wie achter t roam, oetkiekend over t plaain. “Dommee noa t eten nog moar n indje fietsen”, zegt moeke.
,Dat is goud, woar wilst hin? Even n ritje om t meer of richten de bossen?”
“Kiek zulf moar.”
Joa, zo makkelk is dat vandoage de dag. Vrijhaid, bliedhaid. Twij elektro-fietsen, n auto, n biepazend rik en wat nait aal. t Kin nait op.
Dat was vrouger wel aans, docht ik en gedachten dwoalden oaf noar opa en opoe in Nij Scheemde: Raint en Rikoa van Koldam. Zai woonden in n mieterg klain hoeske tussen Sanje en Bos, schuun tegenover de kerke. De sporen van n haard en waarkzoam leven wazzen dudelk zichtboar. Zai, zo krom as n flitseboge, moar t bekje nog goud op stee en hai wat kaalmer, mainsttieds zittend in d’hörn.
“Raint het d’hupke kepot’ kraaide t hennechie voak, al veur t hoantje zulf antwoord geven kon op de vroag wat of hai haar. “Hai het n bult piene. t Is nait aans!” En doarmit gaf zai dudelk weer hou t der in de joaren zesteg touging. Aksepteern en berusten…
Doaglieks in de kroakstoule achter t roam mit n piepe vol tebak. Joar in, joar oet, mit zicht op t kerkhof. Veul proaten dee e nait, denken zoveul te meer? Mit d’handstok onder beraaik kon d’ol nog n rondje om t hoes moaken en even zien toentje bewondern.

Wieders was t veur hom doan. Poesten trappen zundags in de kerke was ook verleden tied.
Noadat meester Sporrel hom n ladde bie trappen moakt haar ging t eerst wel weer, moar d’ol heupe begon aal meer op te speulen en joa, din komt de tied van stoppen. Opa haar ook nait veul wensken meer. Dou opoe mit n nije stuutsikoorn boksem thoes kwam, zee e: “Is dat nou neudeg? Ik heb ja nog genogt!” Het zat hom hoog dat ,moeke’ dat dee…net asof hai der nait fersounliek bie luip.
Soavends in de bedstee zee e: “Kom ais dicht tegen mie aan Riekoa. Wie binnen hier nait zo laank meer. Ik ben al viefentachteg.” “Och….“, ruip t olske: „Wost die stil hollen. Dat wait gainaine en wie binnen t leven nog laank nait zat!”
Ik stel mie veur, dat ze dij oavend in holden vaarnvatteg in sloap vaalen binnen. Veul meer roemte was der noamelk nait in de bedsteden van dou. Aintwinteg braid? In de woonkoamer wazzen der twije van en op dele ook nog twije. Zai kregen doar soamen tien kinder. Vief jongs en vief wichter.

“Joa”, vertelde ze mie n moal: “t Was oareg vol! Voar en ik hebben nog n tiedje mit twij kinder op t voutenenne sloapen. En dou kregen wie der ook nog n lutje bie. Baide jongs hebben der niks van vernomen. Aanderdoags vruigen zai mie glundernd: “Moeke, dat potje is van ons he?” Joa heur, dat is joenent”, zee ik en zai wazzen blied” As kinder blied wazzen, was zai t ook. Of der nou vieve of tiene wazzen. t Was vanzulf nait te roem mit zoveul grut moar elk was aaid welkom.
Loater dou wie mit klainkinder bie heur kwamen was t altied zulfde ritme: Eerst aal t nijs oet Nij Scheemde over toavel en wat loater: “Wil je n baaltje hebben?” Din kwam der n puutje mit Willemientjes teveurschien en kreeg elk aine. Twije zat der nait aan. Der kon nog ais meer veziede kommen en dij mozzen din ja ook aine. Noast heur hoesholdelk waark ging ze ook zummers mit voar over t laand. Baiten op aine zetten, vouers vleien, heuen, zichten en binden, aarten rudern en voak noa t waark nog koien melken. Siddern en beven! t Taimke van vandoage: drok, drok, drok, ston nait in heur agenda Haren ze dou gainains. Alles ging vanzulf. Opstoan, eten op toafel, kinder noar schoule. Doar mozzen voak d’oldsten veur zὅrgen. Din wazzen d’oldjes al laank op t laand. k Wait nait, hou joe lezers t vergaait, moar ik haar noa t schrieven en noadenken over dou, t swait veur de kop. Wat n elléndege tieden! Vandoage de dag wordt der aaid zegd: zai wozzen nait aans. Nee, dankjoe de koekoek. Zai haren totoal gain keuze, t was boegen of barsten. Dou wied noa d’oorlog in de joaren tachteg heur dochter Ketrien last van n heupe kreeg en ook aarg veul piene haar, zee dokter in t Academisch: “U komt op de wachtlijst. Met ongeveer n half jaar, denk ik dat wij U oproepen voor een operatie.” “Och dokter, dat duurt ja nog zo laank… is der din in hail Nederland gain zaikenhoes dij mie helpen kin? k Heb ja zo n piene!” “Oh, mevrouwtje, vindt U het niet erg om elders te worden geopereerd?” Hai sprong achter de computer en antwoordde noa n tiedje: “In Zwolle is nog plaats, past U dat? Volgende week kunt U daar terecht.” “Geern!”, zee t olske glundernd. En drij weeke loater was ze weer thoes. Nije heupe en gain piene meer.
En vandoage aan dag gait t nog vlogger.
Twij, drij doage in t zaikenhoes en t is piept. Tuurlek hebben wie nou ook nog genogt om te kankern en kinnen der slechter tieden kommen.
De werkelkhaid geft aan, dat veul aarbaiders overlopen binnen noar de VVD en christenen noar de PVV. “Dat is n taiken aan de wand”, zee mien zwoager lest op n verjoardagfeeske. Hai het geliek. Aarbaiders binnen net as aansdenkenden oet op macht. En wie kinnen aans nait as aksepteern en berusten…? De goie olle tied, woaras wie t voak over hebben, is west en mout nooit trogge kommen. Ook al is de jank noar gemoudelkhaid slim aanwezeg.
Wie kinnen ons gang goan mit auto, motor, fietse en openboar vervoer. Vrijhaid bliedhaid! Veur loater meschain n tied om echt over te miemern as t din wat minder gait? Hier in t Oldambt is t leven anno 2010 gloepens mooi. En dat is goud!

Verduld nog aan tou … wil je n automoatische overbouken veraandern, hebben ze t alweer aans moakt. ‘Dat moet u nu zelf doen … Nee, kan niet meer op het postkantoor.’ t Kon allent nog via de computer. ‘Dat is heel gemakkelijk, hoor.’
‘Zel best, mor dat wil ik nait. Wie binnen al òfhankelk genogt.’
‘Hebt u geen kinderen die dat even willen doen?’
‘Hè-je nait heurd wat ik zeg?’
Dat was twijdoezendtwijentwinteg … d’aine veraandern noa d’aander!
En Co Rona (wel dat ook wezen mag) is der ook nog aal. Zulf kwam e bie ons langs in feberwoarie. Tot nou tou nog aal bekòf!
DIO – badmintonclub – staait op springen (lid).
De Zunnebloum in Scheemde gaait t stoer (vrijwilleger).
Dideldom.com van de buis (dailnemer)?
En den ook nog Kreuze! Mor dij is honderd worden, en den mag je nait kloagen. Mor ik bin wel n poar van mien hobby’s kwiet en dat moakt mie nait vrolek!

As Bram (6) en zien grode neef Kenji (12) vekansie hebben, goan zai geern mit opa en pabbe/oom mit noar badminton.
Bram: ‘We gaan zo weer mee hè, opa?’
‘Joa, dammeet in d’haarfstvekansie, aander weke.’
‘Of …’ zee e mit n grode grijns op t gezichte, denkend aan corona, ‘als ik op dinsdag verkouden ben!’

Bie n veureg stokje op Dideldom : ‘Gloepenshaard’ gong t over n olle Opel Kapitän…
Loat dat nou aanlaiden wees n veur dit verhoal! Van t ain komt t aander hé!

Van n Kapitein Mobylette (ploffiets) n Solex, n poar Quickly’s noar n luttje motortje (DKW 98 cc) en dou k dij in flaarden ree : n echte auto!
Omdat ik nait in dainst huifde (boetengewoon dainstplichteg) kon k deurgoan mit waarken en al gaauw, -nou ja!- haar k doezend gulden in t spoarpot…
En as je t riebewies den hoalt hebben, denk je as kwoajong al gauw an n autootje. In mien geval docht ik an n Fiatje, n NSU-tje en zokswat.
Nait te groot en betoalboar… Docht ik.

Bonzo Kuper -garageholder in Meulenhörn- brocht mie van dat idee of.
‘Koop die doch n fatsounleke! Doe wilst toch nait om d hoaverklap mit zo’n ding noar de garage?’.
As vakman, overtuugde hai mie van zien geliek en ik aanderdoags op struun noar n grotere, minder kostende bolide.
Bie Doeko Blaauw in Mewolle zag ik veur thoes n mooie rooie en roeme auto stoan. Aigenlieks, docht ik dat Bonzo Kuper an zowat dochde.?

Noa wat hinneweer geproat kreeg k der honderd doalder of en kon k hom mitnemen veur doezend gulden…
Hai was nog mor drij joar old… As nij haar e, besef ik mie nou, roem drijdoezend gulden kost! Anno 2021 nait meer te begriepen!
Hai laip ain op tien en an belasten betuil ik fl. 12,50 per drij moand!
Veur n tientje haar k n volle tank bezine… Wat wil je meer!

Deur de weeke wuir e nait veul broekt. Maisttieds gingen wie der mit noar dancings as Beijering, Dommering, t Kraaienust en Dik in Delfziel.
En den haarn wie nog n spesioale oetgangsoavend. s Moandags noar d automaart op t Damsterdaip in Grunnen. n Belevenis van jewelste!
De handel begon pas as t duuster wuir en was tegen middernacht oaflopen.
Maineg wrakje ging doar veur n poar tientjes over in aander handen…
As je n handeloar vruigen noar de kwaliteit den wast voak: ‘veur zover ik wait, mekaaiert der niks an’. En den dee e n poar passen over zied, zodat e veur d auto ston en vervolgde mit: ‘ik stoa veur de gebreken…!’ woarop de maisten deurluipen en n enkeling ‘spot’ bood op t ding.

Tegen n uur of elm besloten wie voak nog even noar t Keldertje te goan in de binnenstad… n Oer gezelleg ding en maisttieds n hoop schiere wichter!
Zo ook n olle vriendin oet Sodom, woaras ik n zetje mit goan haar.
As wie n kander troffen, klikde t weer vannijs en zo haar ik noa n blauw wiekenne zunner vrauwluu aait nog n schiere oafsloeten.
Noa twaalven ging der vanzulfs gain bus meer en den was zai wel te porren veur n lift noar Winschoot.
Mien kameroaden op veurbaanke en ik mit mien scharreltje op de achterbaanke…
Ain van mien kameroaden zee lestens nog: ‘as dei Ol Opel proaten kon, den stonden wie noa zo n viefteg joar hier nog mit n dikke rooie kop…!’
En zo is t mor net! Ja, ie bennen mor ainmoal jonk!
Tot zowied mien eerste verhoaltje over de Kapitän.
Tussen t schrieven deur, kommen der aal meer belevenissen boven…
Messchain zet k dij ook nog op pepier en kennen ie n volgende moal lezen hou of t mit hom oaflopen is…

Vandoag de dag heur je t voak….. Echtschaaiden? Ja, de ‘klik’ was er niet meer….! Mainsttied schrieven ze dat mit n C, mor dat is mie wat al te görteg! k Heb gain hekel aan Engels, mor t Grunnegs doar mit verkrachten? Laiver nait! Joa, in dizze tied heur je voak dat de klik der nait meer is. “Hou, klik?” denken wie oldern den. “Wat nou, klik?” En den goa je mit joen gedachten soms trogge in de tied. Ik mos inain denken aan n ol oomke en taande:
Veur twij joar leden baide op ain dag oet zied kommen. 67 joar wazzen ze traauwd west en dat, noadat hai pas mit zien dattegste toupakte! Hai haar heur al n moal of wat toulagd as hai zien melk noar t febriek brocht. Deur t roam van t kantoor was zai duudelk zichtboar. Mainsttied stak ze den spontoan even n haand op.

Dou t Roner Maart was, haar hai zok veurnomen om tou te pakken, as hai heur trevven zol. En verdold… hai zag heur bie Wilm Scheepstroa op de daansvlouer.

Spontoan bood hai heur aan om soam n glaske ranja te drinken… (Joa, ie lezen t goud) Gain kurzus ‘hoe maak ik contact’ veur neudeg… Al was de ‘klik’ der nait geliek, heur gezichte – rood tot aan d’oren – was dudelk zat. Zai zag t wel mit hom zitten. Noast nkander laipen ze de maart over en zo rond n uur of aachte, bie t òfschaid zee e veurzichteg: “Ik vond t aibels gezelleg, zai k die aander zotterdag weer?” “Joa”, zee ze beschaiden en weer kwamen de bloskes op heur wangen. “Op zulfde stee? Bie dikke Wilm?”
“Goud, tot zotterdag den. n Uur of vare?” “Dou mor om twije”, was ze greteg…. “Goud! Moi!” en elk zöcht zien weegs. Was doar de klik?’

t Bleef ‘aan’ Zai binnen traauwd en kregen twij jongs. In Lievern kochten zai n klaain boerderijtje en doar haren zai n schier bestoan. Haard waarken en zuneg leven brocht ook bie heur n beetje welvoart!

Mien ollen kochten in negentienaachtenvatteg n lutje drokkerijtje in Scheemde en op de leste dag in Nijtap gingen zai noar ‘De Brug’ t woonstee van mien grootollen, om òfschaid te nemen… Oompie en taande oet Lievern konden doar nait bie wezen.. melken en zukswat ging veur, vanzulf.
Mien olste bruier en ik gingen doarom dij dag noar Lievern… Dat hebben ze doar waiten!
Bruier von n deuske luzivèrs en stak n polle gras aan d’aander kaante van de zandloan in t bos in de fik. t Was oareg dreuge in t bos en t polke wol branden as smeer. “Moak t nou mor weer oet”, raip ik, dou ik zag dat t twaide polke ook vlam vatte en ik oareg baange om t haarte wuir… “Nog even”, zee bruier en veurdat e t in de goaten haar konden wie der al nait meer tegen kieken… t Was aal vuur en ik – schietensbenaauwd – stoof noar t hoeske van oom en taande.
“Nait meer te redden”, zee oompie en schoakelde via de dou aanwezege middeln de brandweer in. Dij kwam mit veul blabla en loeiende sirenes van Roon noar Lievern, om te redden wat der te redden was en konnen veurkommen, dat de twij boerderijtjes in t bos ook in de vlammen opgingen…
Aal t bos, zo’n vief, zes bunder braandde òf! Plietsie muik proces verboal op en bruier kreeg n kruuske achter zien noam veur slecht gedrag. (mien voar, loater: n beter òfschaid haren wie nait denken kend!)

Ons opa kwam oet tied in varenviefteg en deur de femilie wuir besloten, dat oom en taande oet Lievern de boerderij van t grootollen mor betrekken mozzen. Moeke – opoe – kon den op t stee wonen blieven en zai konden den weer veuroet, omreden dat der meer laand bie was. d’Aander kinder kwamen den ook weer ‘thoes’, as zai op verziede gingen. Dat mos den wel overdag, want om acht uur soavends was t bèrregoanstied…. Aanderdoags, bie t opkommen van de zunne, mos der molken worden! n Drok leven, woaras aal heur vrije tied mit vot ging…

Tot ‘Drees’ der ook veur heur kwam! Pensioun… en nou? Bie lutjen aan wuir de boudel oetdund: Raive, t peerd en koien gingen deure oet en n joar of wat loater wazzen zai zulf ook zo wied, en verhoesden noar n klainer hoeske in t sintrum. Makkelk veur taande om heur boodschappen te hoalen. Oomke haar rond t hoes nog wel n stokje grond, mor doar ging nait veul tied in zitten. Taande von, dat zai op heur leeftied wel wat bewegen broeken konden en besloot noar volksdaansen te goan…
“Den goa k mit”, zee oomke en kloar was t! De klik zat der bie hom dus nog duudlek in! Zai haren n hoop lol en veuraal het socioale kontakt dee heur goud.

Dou mien ollen weer ais onderwegens wazzen en mien voar opperde om n kop kovvie te hoalen bie oom en taande, was t antwoord van moeke: “Dij binnen der nait! Zai binnen vandoage aan t zwemmen…” En asof zai toaveltjes op legere schoule opzee, ging ze wieder: “Moandag zingen, dinsdag volksdaansen, wonsdag zwemmen, dunderdag gimmestieken en vraidag koarten!”

Teleursteld binnen zai dam in draaid bie Dikke Wilm woaras zai kovvie mit n appelpunt nuttegden. “Nou hebben zai alle tied en nog kin je der nait trechte”, was de konklusie van voar, dij vot doar achteraan n proatje begon mit de stamgasten en Wilm zulf. Oergezelleg, mor nait recht veur moeke.
Nee, dij haar ook laiver boantjes trokken mit voar, net as heur swoager en schoonzuster… Mor ja, as dij klik der nait is…..

Bie oomke en taande, dij der dou nog noeit van heurd haarn was e der tot t enne…
De Klik!!

Bie Kees en Riekje van de Rose Bar an t Maarkplain in Sodom was t aait feest!

Aal wiekennen stampvol! Wie, Berend, Eppo, Chris en mien persoontje hadden hom benuimd as ons stamkroug.

Lekker bier jong! De tap laip d haile oavend achter mekoar deur en wie as ,kenners’ konden dat aarg woardeern.

En Kees was nog as n kwoajong…. Hai dee helderop mit.

Om twaalf uur was t bie hom sloeten. Tot zolang haar e ,mor’ permissie!

Omdat ons dat te vroug was, (18/20-joaregen) , gingen wie den nog tot twei uur wieder bie Kees Bos to. t station.

Dei haar n Russische vrauw en o zo n mooie dochter!

Dou Kees van onze stamkroug doar achter kwam, zee e n poar moand loater:

Wie goan nog eem deur! Ik dou d gedienen dicht en zet t licht op schemern….

Enne ie huim niks betoalen, t is veur mien reken!

Dat was nait tegen dovemansoorn zegt! Apmoal bleem zitten.

Pas om twei uur wuir der sloten. Kees blied en wie nait minder!

Ie begriepen joe vast wel, dat t bier ons den in schounen ston?

Kees zulf dito en den begon e der zin in te kriegen…. Hai gaf ain van ons zien colbert en as Riekje wat loater oafsloeten wol, stoof Kees heur veurbie mit de woorden: Tot dammeet!

Mit n kander in d auto en den was t: Hest n plan? Joa, rie mor noar Ter Oapel….

Ter Oapel? Wat mouten wie doar? Goa mor, t zel joe nait tegen vall n!

Onderweegs pailen woar as hai hen wol, mor wie kregen gain sjoege!

Op t stee aankommen, kreeg ve t deur…… Verrek sloten!

En nou? Rie mor noar stad! Nou nog? Ja wis, woarom nait!

Inmiddels n uur of vaare, en ook in Stad nait veul te beleem..

Den mor zulf wat regeln zee Kees en dailde ons ploug in twei n. Ie dei stroate in en wie dizze…

Loater bleek, dat ve koubouwtje speul n mossen…

In d rechterhaand n revolver -d wiesvinger liek veuroet- en mor knallen!

Den kin je zain wat bier dut! n Stel volwassen kerels dei as kinder deur d stad runnen en deden asof! k Hoop nait, dat mien kinder dit lees n… al zell n zai t ook wel ais roar doan hebben.

k Mag mie gelokkeg priesen da’k nog n beetje an sport doun ken.
En de zozioale kontakten doarbie mien leven verrieken.
Bie badminton heffe jonk en old deurnkander.
De jeugd smui en snel, de oldjes wat stram en troager.
Gainaine, dij doar muite mit het.
Veurege zummer was d’ol bakker goud op dreef…
Hai houwde asof e deur de duvel achternoa zeten wuir!
Zien leeftied? gaf doar n ekstroa dementie aan…
Racket stoof hom oet haand en kwam bie tegenpartij in t veld.
En wat nog schierder was, zien kunstgebit kwam doar weer achteran!
Proesten van t lachen en onder t kovviedrinken t gesprek van de dag!

Vanmörgn bie t biljarten snoof k opains n maale zuide locht op…
Zoas dat voak gaait, mit de opa’s, is de knalpot wat gauwer n moal lek.
Kwedel as ik ben en te voak n rap antwoord, zee k in alle ‘beschaidenhaid’: “k Heb niks gezien, k heb niks gehoord. Deze werd schijnbaar in de kiem gesmoord?” k Wait nait wel t dee… en al heb k niks zain of heurd… Roken heb k hom wel!
De moaze is die joa bienoa scheurd!
Man, wat n kwalm!
Kleur schoot hom oet…
En mie der bie!
Sorry, zo bedoul ik t nait! Blief kaalm… blief kaalm!

Joakop Kupers gaf mie mit zien verhoaltje over d Olle Veimaart in Grunnen de inspiroatie veur n nij verhoaltje..

Mien oomke haar an de Veimaartstroate n kapsalon. -Stoffers-

Ik kwam hier als zeventien/achttienjarige jongen. Soms een week om mijn hoar op orde te brengen.

Beetje broanie was ook mie nait vrumd! Veuraal dou hai mie vruig om zien model te worden!

Wat ducht joe! Jammer genogt bleek mien nekke nait braid genogt en was t noa n zetje ook weer doan.

t Was der ait gezelleg en je konden doar n hoop stadse fratsen leern.

Bievubbeld van de studenten… Aal weke mos der aine achter op kop biewaarkt worden. Zien blode vouten mossen den oafwisselnd in hait en kold wotter onder t knippen en oomke mos hom den de letters LUL biewaarken!

t Zelln vast wel Sindikatters west weden?

Ook zo n student mos mit n laange boomtakke en n entje boontjetouw d hail dag in d Herestroate zitten te visken in n zinkputtje! Veul van dei gasten benn n loater dokter, direkteur enz. worden! Mot je mor nait te laank over noadenken!

Oomke haar ook n bedainde… Boekelo. (joa, was zien echte noam!)

Hai mos veur t middageten nog eem smoken en ston in d veurdeure… Heurt e n buurvrauw schelden tegen n koppeltje tieners.

Zai ging der gloepens om weg! Tot ze Boekelo in de smiezen kreeg en verschrikt zee: Ze trappen die bal steeds tegen de ramen!

Dat heurt nait! Mossen ze mie ook nait doun!

Nee, k heb zelf geen kinderen en k wil ook geen last hebben van andermans!!

Ie hebben geliek! Taante ropt dat t eten kloar is en ropt hom… Mits dat e deure dicht doun wil, legt buurvrauw n poar deurmatjes bie oomke op stoupe…. Hai nemt n roam en schupt ze midden op stroate…. Wat doet u nou? vragt t wiefke.

k Heb zulf gain vrauw en k wil ook gain last van n aander ziend hebben!

t Was in de joaren, dat n bekende zoakenman veur t gerecht kwam en straft wuir veur t oafbieten van n tepel van ain van de doames van plezaar.!

Hai ston der doordeur gekleurd op en voak as e deur de stad fietste keken d luu hom noa en was t: Dat is hom!

Bie oomke in de zoak wuir doar nog n schepke boomop goeit: Ast veimaart was en ain van de klanten zag hom, den was t schattern…

Mout ve d plitie ook vaarschauwn met aal dei koi n hier op d Maart? Hoe?

De tittenbieter komt der aan!

Ie kennen t gezegde: old worden is mooi, mor old wezen is minder! Ik wait doar inmiddels as 80-pluzzer ook n beetje van …
Vandoage de dag heur je aal meer over honderdjoaregen en zulf ken ik ook n handjevol. Wat mie opvaalt, is dat de mainsten liggoamelk meschain aan t òftoakeln binnen, mor dat heur verstand voak nog oareg schaarp is. En zai binnen nait op heur bekje valen!
Neem opoe Hillechien (102): zai mout overal bie holpen worden. Heur dag bestaait veulaal oet wachten noa n druk op t bellechie. Wieder leest ze veul.
‘Wat is der loos opoe?’ vragt t zustertje bie binnenkomst.
‘k Mout neudeg!’
‘Den helpen wie joe toch even.’
Noa de boodschop de billen veegd en de boudel weer omhoog.
‘Dou dat ais aans!’ zegt opoe vranterg. ‘Dat zit nait goud,’ en wist op heur rogge.
‘Mor opoe, dat zit wel goud heur. k Heb joe t hemd der goud bie instopt.’ Opoe nors: ‘Wèl vuilt dat, doe of ik?’

En den opoe Ammie (106): bie t doun van spullechies nog n topper! Nait veul van heur tegenstanders kinnen t van heur winnen. n Kop as n aalmenak! Noa twij joar corona is dat jammer genogt wel n beetje minder worden, mor zai is nog laank nait monddood.
‘k Zel mie even veurstellen: mien noam is … en ik kom joe even wassen.’ t Vraauwtje was nog nait eerder bie heur: zogenoamd ‘n nije’, zeg mor.
Opoe nam heur op en heur gedachten mouten ongeveer as volgt west wezen: nog oareg jonk, as dat mor goud komt! ‘Den tou mor,’ zee ze en ze mout docht hebben: k bin der zulf ja bie!
Onder does was nait meer meugelk, dus mor n bakke mit zaipwotter en mit n washandje. t Vraauwchie bukt zok en wil begunnen. Opoe schrikt dervan: ‘Wat dust?’
‘Ik goa joe ja wassen.’
‘Dat begriep ik, mor ik heb ja ook n kop!’
Schienboar haar ze t begrepen: zai kwam omhoog en waste heur gezichte.

(woar gebeurd)

Noa de val van de muur in Berlien 1989, besloten wie in t veurjoar ’90 mit ons vw-buske doar hin oaf te raizen.

Van bruier in Lübeck haren wie al veul heurd over de ritten, dij zien zeun dee as medezien-bezörger. Aal weke op en dele noar Berlien!
En aal weke n pas vol stempels! En…. nait te vergeten: bekeurns!
Onderweegs kwam t voak n moal veur, dat der schrikhekken op stroate stonden, dij aangaf, dat e links aanholden mos…
As e den zo’n vief kilometer wieder was, wuir e deur de vopo’s aanholden mit de vroag, woarom hai aigenlieks links ree?
As e den zee, dat der n endje trogge borden stonden dij dat aangavven, kreeg e te heuren: ‘Du bist ja verrückt mensch! Wo stehen die den?’
Zai haren ze den al gaauw vothoald!
Zien boas het t vanzulfs aal betoald… kaptoalen kwiet an bonnen!
Zel e wel deurberekend hebben vast?
Ain en aal corruptie!

Mit zien paspoort was t ook n boudel…
De Ozzi’s wazzen gek op stempeln.
Zo mos neef elk haalf joar n nije pas! Vol!
Op n duur kreeg e mitwaarken en kon e aine hoalen mit 100(!) bladzieden.
Koren op de meulen van de grensbewoakers! Aine?
Drije kon toch ook? ‘Du hast ja genug seiten!’

In Berlien zulf was t nog beter! Mainegmoal wuir zien bestelbus openbroken en was e n smak pillechies kwiet…
Totdat… e n grode swaarde bouvier mit nam!
Doan! Hai huifde deuren zulfs nait meer sloeten!
Van zien boas kreeg e t aankoopbedrag veur d hond dubbel trogge!

In de wereldstad ankommen hevve eerst oetkeken noar n camping…
Ston naarns aangeven, dus mor even vroagen.
‘Camping?’ Gain reaktie! Nog aal anti Amerikoans?
Kon k mie wel n beetje begriepen…
‘Wir wollen kampfieren….’
‘Kampfieren. Was ist den das?’

‘Jezus!, wat is kamperen in t Duuts?’
Mien vriendin kwam der ook nait op.
Ik n lucifers-deuske oet buutse en der gauw n tènte op taikend.
‘Ah….! Sie wollen zelten!’ en spontoan begon e mie oet te leggen, dat e gain zeltplatz wos.
Gelokkeg kwam der n jong deerntje bie, dij ons wieder oet douken doun kon en zo kon wie soavends in t duuster asnog n steegie vinden.
Aan d raande van t vlaigveld… waineg sloapen!
Mit de metro noar t centrumm glad n belevenis! Mooi? Nou neu!
De stad op zog was nait verkeerd. n Hoop te zain en te beleven.
t Vuil ons op, dat der nog zoveul olle gebouwen stonden!
‘Zeker vergeten’ docht ik sinisch.

In n ziestroate van t Alexanderplaz, n hail schiere winkelstroate, was n hoop reuren. Modeshows midden op stroate, stroatnuzikanten en… rond n klain plaintje zo’n vatteg Chinesen, dij heur woar an de man brochten -sieroaden, horloges- en zokswat.
In tied, dat wie bie ain van heur stonden te kieken, -t leek altmoal prachteg, mooi oetstald op n muurtje en schitternd in d zunne, stoven ze as muskes oet n kander! Wie schrokken ons lam!
Drij buskes mit plietsies kwamen der aangieren en stoven op de spleetogies oaf! Ik kreeg nog n beste roam en ging sikkom onderoet!
‘Moust dij kieken’ ruip mien vriendin… n Luttje pindaatje stroekelde over t muurtje, woarop e zien woar oetstald haar en kwam plat op bek omdele. Hai kreeg zien kovvertje, dij opensprongen was, nog wel mit, mor mie ducht, dat dij al wel haalf leeg was?
‘Vot hier! k Wil hier gain dag laanger wees n!’
k Mos goud op heur inproaten, mor k kreeg heur nog wel zo wied, dat we bie Chackpoint Charly de restanten van de muur bekeken, n stokje stain kochten en… in t draaiende restaurant, hoog in de locht lekker smikkeld hebben. Onder t genieten van t toetje zee ik: ‘Wat n oetzicht he… Kikst over d haile stad hén en zuchst ook pesies woar of de muur aal ston het.’
‘k Ben laiver in d luttje dörpkes as in dit gekrioul’ zee ze nukkeg.

Aanderdoags den mor t Oosten in… Wat n ainvoud… (armoude?). Grauwe hoezen, woar in aal dij vatteg joar noeit meer n kwaaste vaarve op kommen was! Stroaten mit koelen en zulfs goaten! Oetkieken gebloazen!
Nait allaind veur dij gammele wegen, mor ook veur dij mieghummels, dij t joe hoast onmeugelk muiken om n aigen koers te voaren!
‘Wat n Trammelanten!’ Tientallen Trabantjes (Trabi’s) stoven joe aan alle kanten veurbie en haren schienboar minder last den wie van de slechte stroaten…? Aalgedureg stoiterde der wel aine deur d locht, mor kwam wonder boven wonder weer op zien vaar pootjes trechte. n Belevenis!

Bie de wainege tankstations stonden de twijtakjes in riegen om bie te tanken. Benzine der in, kofferbakje open… n praane eulie der deur, even goud hinneweer schudden…(deden ze deur t t kofferje noar omdele te drokken en trogge te stoitern) en…. joagen mor weer!

Op t laand net zo n boudel! Zes luttje combines noast n kander…!
‘Kiek doar ais! Pond Tebak in zesvoud’ ruip ik verwonderd. (Pond Tebak was n man bie ons in t dö rp, dij in zoad handelde en op zien proefveldjes n hail luttje combine broekte.)
‘Zo hol je wel waarkgelegenhaid’ zee mien vriendin.
Manluu en vrauwluu, zai haren apmoal waark en n inkommen. Leek mie nait verkeerd!

Net as in d winkels: gain vaarkleuren etiketten, gewoon gries en swaart-wit! Dou ik t doar mit krudenier over begon zee e dapper: ‘Das sol man ja alles bezahlen! Wofür ist das den nötig?’
Geliek haar e! En ik zeg joe, dat t meroakels goud smuik!

De camping, dij wie dou opreden, was as t woare gewoon n groot grasveld mit in t midden n hokje woaras je joen behuifte doun konden.
Gain pot of niks… Gewoon n hail daip gat, woar je striedewiets boven stoan mossen. Niks veur mie!
Noa drij doage vroug k n mitkampeerder, woaras ik betoalen kon? ‘Ach wasz! Scheize! Hier brauchst Du nicht bezahlen!’
t Bleek, dat dat n kampeerploatse veur t volk west was.
Op t strand bie d Oostzee was dat wel even aans. Zwanzig D-Mark!
‘Ie waiten van wanten!’
‘Wie bitte?’
‘Ie hebben joe al nuuver aanpast!’

Dat was ook zo mit de vaileghaid. Noeit wuir hier stolen of inbroken… nou is t de orde van de dag!
Of dat de toeristen wazzen, of aigen volk is mie nait duudelk worden.

Van bruier wait ik, dat de Ossi’s over t algemain veul geld hadden…
Wollen zai n Trabantje of Wartburg kopen, den wazzen zai wel vattegdoezend Maark kwiet! En dat konden zai spoaren omdat baide an t waark gingen. Noa d aanvroag van n autochie duurde t den voak n joar of tiene, dat ze aan beurt wazzen!
Noa die Wende konden ze dat weerdeloze geld inwisseln veur westduurse Maarken en was ook doar t kapitalisme geboren!

Aarg jammer!? Elk zien mainen!
Bruier haar in dij tied n bult stress van aal dij Trabi’s, dij de centra van Hamburg, Lübeck inpikten. Zai smeten mit geld en de neerndounden haar n ter goud mit!
‘Ik ken ja nait meer op tied mien klanten beveurroaden!’
Noast hoesgeroad en klaar wuiren der ook veul BMW’s en Mercedessen verkocht.
Hou gek ken de ‘bling-bling’ joe moaken!
Volgens bruier vuilen der dou ook veul doden in t verkeer aan ‘d aander kaante’. Mit zo’n westduutse slee over dij strontwegen ging t ja veuls te haard!

Veur ons was t n haile ervoaren en n slim enerveernde vekansie!

Nou anno 2015 vroag ik mie voak oaf of t kapitoalisme doar inmiddels net zoveul vernaild het as hier bie ons?
Ik denk het! En dat te waiten, dut mie zeer!

Ben inmiddels al zo n 65 joar lezer van t Nijsblad (sorry!) nou Dagblad van t Noorden…

Beetje olderwets, mor k vin pepier toch mooier den digitoal!

Te voak stoan der nou jammer genogt te veul bekenden in met n zwaart raandje!

Zo ook Hans! n Olle bekende oet de joaren viefteg/zesteg! Wie troffen n kander maisttieden in de bar van Dommering..

De echte! En nou stait der in kraante, dat Cafe Dommering de zoak dicht goeit…

Touval? Hans en Dommering? Ken wees n. Of…. n hint veur mie doar wat van te moaken en op te stuurn noar Dideldom?

Hotel/cafe/restaurant/dancing/bar en bioscoop Dommering! Hou wil je t mooier kriegen!

Noa t dansen nog n uurtje noaproaten in de bar, bere gezelleg!

Voak mit zo n twinteg luu, woaronder noast Hans en mie, ook Jopie Koopman en Harry Dietrich!

Twei komieken dei joe best bezeg holden konden.. en zo aanschikken konden bie de stamtoafel van Radio Noord!

Mor dei was veul loater…

Wat ons apmoal deugd dee, was as Bee meldde dat de tent dicht ging en of wie oafreken wolln…

Den vroug ain van de komieken steevast: Wat doen we Hans, betaal ik of betaal jij?

Den was t antwoord steevast: Nee hoor, IK betaal!

t Was hom te min om op n aander zien buutse te teern as zeun van vermogende oll n!

En…. ons best noar zin!

Op legere schoule in Scheemde kwam k veur t eerst mit hom in aanroaken: Jaap. Hai was n giechelbekkie eerste klas en de klik was der geliek. Ik mog geern geinen en dat wuir dus: n dag nait laagd is n dag nait leefd.
Ik kon beter zingen as leren. Hai kon meroakel accordeon speulen. Bie hom thoes was t voak: hai de meziek en ik zingen!
Mit ons baaide noar d’ULO. Hai hail serieus, ik n pest aan t baanke zitten!
Dou e n joar of dattien, was kreeg e verkeren mit Aaf. Ja, wie wazzen der vroug bie!
Joaren hevve bie nkander lopen en soam op vekansie west. Totdat kinder groter wuiren en zulf kinder kregen. d’Aandacht ging dou n aander kaante op, mor t kontakt is aait bleven: n poar moal in t joar bie nkander op bezuik en elke bod mit n joardag n koartje.
Kriegve in april n bellechie: ‘Mit Jaap. Aaf is guster overleden!’ Bams! t Vuilde as n klap veur d’hazzens. Je waiten dat dij tied komt … mor t is aait onverwacht!
n Poar weke noa de kremoatsie even beld hou of t ging …
‘Kerel man, wat n piene! Wat mis ik heur! Nooit waiten, dat dat zo zeer dee! Meer as zeuventeg joar bie nkander en nou is t beurd! Hier kom k nait weer bovenop! ‘
As ik zeg dat de tied hailt …
‘Joa, dat heb ik ook aait zegt, mor nou vuil k t zulf!’ t Binnen mor woorden, hè. Goud bedould, dat wel.
En zo is t. Ik pebaaier t mit mooie herinnerns op te hoalen. Krieg hom nog even aan t lagen, mor nait meer zo as vrouger! Aarg sneu. ‘Kiek,’ zee ik, ‘ofst mooie herinnerns ophoalen kinst. Van de tied bie t piroatenkoor in Emmen … of … of …’
‘d’Heerns waarn hartstikke lekker,’ schotterde hai opains.
‘Heerns? Wor even wat dudelker!’
‘Dou ik vatteg joar leden mit n haartinfarct in Zwolle in t zaikenhoes lag, kwamen ie op bezuik en namst mie twij heerns mit! Soam mit mien koamergenote hevve der van smuld. k Heb nooit meer zo n lekkere heern had!’ k Wuir blied! Zol mie t lukken hom weer n beetje in t gareel te kriegen? Wie gunnen t hom vanzulfs van haarten! Net as wie Kreuze t gunnen om noa nummer honderd nog hail veul oet te geven. Tuurlek is t ook n beetje aigenbelang.
Net as mit Jaap heb k ook veul plezaar had an Kreuzekeuze! En goa k mit baaide nog geern n zetje deur.
Dood is t leste!

Noordmannen. Wiebe Klainstroa en Erik Hulsegge brengen heur programma oet Muzzel.
Om haalf negen vertelt Wiebe over Dou en Nou en om haalf tiene het Erik zien biedroage over opa, dij zo’n hekel aan politiek en hounder haar!

Onder t lustern kom ik bie de neven van mien voar…
Apmoal boeren, dij deur t zwoare waark op t laand steveg oet de kloeten wozzen waren.
Grode handen en aarms as boomstammen…

Noa heur waark op Drees, mor thoes zitten konden ze nait!
Ep haar zok n steegie kocht tussen d luu dij t aait roem had haren.
Grode villa’s mit nog groetere toenen.

Hai was deur ain van zien noabers al ais vroagt of e zien toene schier holden wol.
In t begun haar e dat oafzegd, mor dou bruier Andrais ook op Drees kwam, mossen ze mor ais proaten docht e.
Andrais haar der wel oren noar en zo kwam t, dat ze mit zien baidend op stoupe bie d buurman stonden en zok aanboden veur t onderhold van meneer zien grode toene.

Man glom van bliedschop. Hai haar net zien veurege oafzegd, vanwege t roege waark, dat e leverde!
Komt goed uit mannen! Jullie mogen maandag wel beginnen.
Dat is goud, zee Ep… as t ook n beetje oplevert?
Meneer gaf aan, dat as t hom en veuraal zien vraauw noar t zin was, hai geern in de buidel tasten wol.
Den zai je ons moandag!

Je konden zain, dat de veurege toenman al n zetje niks doan haar.
t Was aal roegte en der mos hail wat snuid en biewaarkt worren.
Rusteg aan begonnen ze mit snuien. Bulten takken en twiegen wuiren op Ep zien boerenwoagen vleit en oafvoerd.
Meneer was aarg blied mit heur waark en zien vraauw nait minder!
Reden om d jongs goud te belonen.
En… bie zien buren te snaren, dat e endelk n poar geweldege toenluu vonden haar!

Het duurde mor even, of ook zai vruigen de mannen om heur toentje schier te holden…
n Joar loater haren ze meer den vief klanten!

Bruier Marinus, n nog grotere potert vertelde op n joardag, dat hai aander weke 65 wuir en doar nou al tegen opzag… Wat mout ik in godsnoam d haile doagen wel thoes doun?
Ons helpen mit toentjen! Zee Andrais. Wie kennen der nog wel aine bie broeken.
Ep het net aine oafzegd, dij ken der den ook nog wel bie!

Zo zegd, zo doan… Marinus ook in d ploug!
Omdat hai nog gramnieteger was den zien baide bruiers, ging e tekeer as n bolle.
Rieten, scheuren of t niks was!
Wie mouten even proaten zee Ep… As t doe zo haard waarkst, stoan wie mit n weke op stroate, en dat mout vanzulfs nait!
Dat is ja net politiek raip Marinus! Dat kin ik nait!
Zel wel mouten, as t in dien Dreestied ook nog wat verdainen wilst!

Marinus het t der zwoar mit had, mor zag wel in dat jongs geliek haren en meneren betuilen ja hartstikke goud!
Woar hai aans n uur over dee, haar e nou wel twij doage veur neudeg!
En mit heur drijen hebben ze der nog joarenlaank heur buudssìnten an had.
Het mooiste der aan vond ik, dat ze in dij tied meer begrip kregen veur de luu in d politiek in den Hoag!
Ook heur verstand kwam dus tot zien recht al was t wat aan d loate kaante!

Grunnen staait der weer gekleurd op Imca toonde heur grode scheur aan de NAM! Net as Geert oet Muzzel nam zai gain blad veur de ‘mond’.
Komt van de bevens en nou zit ik mit de schoa!
Vot is mien pensjoun!
Ook nou worden der al weer hail wat grappen over moakt ….
En paartij lu beweren, dat ter nog nooit n beven west het in Midwolle?
Dij waiten nait beter, Mo’j mor reken.
Hail Grunnen zit ja mit dij toustanden. Nou den! Gain wonder, dat de Vicarie nait te verkopen was.
De mooiste boerderij van t Oldambt het beter verdaind.
As ik de NAM was, zol k mor toupakken. n Geweldeg mooi stee veur aigen gebroek (vergoaderns en zuks meer).
En…. Imca heur pensjoun!

Kleureger kin je t ja nait moaken.
Dat zel t Oldambt goud doun!

n Biezundere man, n koopman mit Jiddische oetsproaken en tactieken. Om joe inzicht te geven hou of dat veur, in en noa de oorlog ging, wil ik onderstoand laidje geern ploatsen.

Poen, poen, poen, poen
De een zegt geld, de ander money
maar wij zeggen poen

Een duppie is een beissie
een kwartje is een heitje
een gulden is een piek
en een rijksdaalder is een knaak!

Een tientje is een joetje,
vijfentwintig piek een geeltje
maar hoe heet nou een lap van honderd gulden?
(Meier) Raak!

Vatter handelde in slachtvij, zo as knienen, hoazen, hounder enz. Hai haar in zien leven n goave ontwikkeld, woarbie hai deur d’aankoop even van de grond te tillen op n beetje noa, t gewicht schatten kon. In zien hazzens wuir de pries van in- en verkoop den rap moakt en nuimde hai de verkoper zien pries. “n Doalder!”, was bievubbeld den zien bod.
“Houveul is dat?”, wol verkoper waiten. “Ain gulden viefteg! Nou, vot, k zel die vief heitjes geven. Om dastoe t bist!”
En den haar e zien knippe, dij e mit n kettentje om haals haar al open en huil der vief kwattjes oet.
Voak was de verkoper den zulf nog nait zowied, dat e oetreken kon, houveul as vief kwattjes was. D’lu haren t nait te roem en t knipke was voaker leeg den vol. As der al wat in zat, was t voak dubbeltjes en kwattjes. En vief kwattjes (heitjes) meer was den al hail wat!

Bie t verkopen was t zulfde. “Twij piek! Magst ook tien heitjes geven. Wilst hom geslacht? Den mouten der twij heitjes bie. d’Eulielaampe braandt nait veur niks!”

Bie Radio Noord haar men heurd, dat Vatter oet Scheemde zo goud schatten kon. Hai wuir nuigd om dat oet te testen en mos doarveur 5 hounder en knienen taxaaiern. As e der nait meer as n onze noast zat, zol e n pries verdainen. Hai ging mit n vette pries noar hoes! Vatter kon der goud van leven. Haar aaid zat geld bie zok om meerdere daaiern tegelieks te kopen. Vandoar zien nogal grode knip mit ketten om d’haals.
Haar e n pertij hounder kocht, den legd’e dij noast zok dele totdat e ze altmoal haar en den gingen ze in n zak.
“Hou kin dat wel?”, wol ik waiten. “Zai blieven ja stil liggen!”
“Och, da’s nait zo muilek ….. even vleugels over nkander en zai kinnen gain kaande oet.”

Op n zundagmörn komt e mit n dikke rooie kop bie zien oomkezegger binnen stoeven. “Man, wat hest wel?”
“k Heb mien knippe verloren!”
“Woarzoot? Woar bist west?”
“k Was even bie t waarkhoes op Gasthoesloane.” “Nou, kaalm mor ….. wie goan mit nkander wel even zuiken.”
“Hai kin ja nooit wied vot wezen.”
“Zat der veul in?”
“Joa man! Beis elef!”
“Houveul is dat?”, wol ik van mien kammeroad waiten. “Twijdoezend!” d’Bek ston mie open! Zoveul? En dat mit handel in hounder en knienen? d’Knippe hevve weer vonden. Ale geld zat der nog in en Vatter glom as n ekkel!

Hai is maal an t enne kommen. Volgens mien kammeroad lag e d’leste tied van zien leven in stad en haar e baaide bainen der òf.

Deur zien zuneghaid kocht e ook wel haalf verlamde bokjes op en den snee e t verlamde dail der òf, om t aander dail op te eten.

Joen eerste joaren beleef je voak in laifde. Jammer genogt kommen doar ook d’eerste leugens. Joa, woar … al is t ook om bestwil.
Noa november komt de grote dag: vief dezember! Dus mout je joe gedeisd hollen, want den komt e: de Sunt! En verdold, den worden de grootste droktemoakers stil.
Op joen achtste bliekt den voak dat De Sunt aigenlieks ain grote leugen is! Luttje Bram kwam bie opa en raip: ‘Opa? Wil je mijn contract zien?’ ‘Contract?’
‘Ja, wij moesten op school dit contract tekenen.’
‘Oh?’ Ik lees: Sinterklaas is een kinderfeest … Jij bent nu 8! Dan wordt je verteld, dat Sinterklaas NIET bestaat. Je krijgt dit contract om te verklaren, dat je dit niet vertelt aan de kleintjes. Ik stoa paf! Sunterkloas bestaait nait? Hou gek bin je den?
Ik heur Hans Wiegel nog zeggen: Sinterklaas bestaat! Daar zit ie …!’ en wees noar Joop den Uyl. Ze kinnen om mie wat … ik blief in hom leuven!

Banketbakken was zijn leven
‘De bekende Veendammer Ernst Puik (76) is niet meer…’

Dat kopte t Dagblad van het Noorden begun van weeke.
t Was even sloeken. Alweer aine!

Decennia geleden t feestbeest van de Parkstad…
En oet dij tied ken ik Ernst…

Binnen zien bedrief mos t aal perfekt wezen, mor doarboeten haar e schiet aan alles!
Dag en nacht knoeien was veur hom gain punt.
Mainegmoal ben ik snachts bie hom binnen wupt.
Den zag ik deur t achterroampie dat e nog drok dounde was en kon ik mien zinnen nog even verzetten deur wat mit hom te oll-hoeren.

Ernst was n Hilversummer. Was doar start mit n banketzoak, mor kon nait genogt omzet draaien. ‘n stee van niks!’

Dou e n advertensie las over n nije Winkelpromenoade in Veendam was e votdoadelk spekkoper. Hai huurde – mit de waitenschop van zien veurege stee nog in gedachten- n houkstee, woaras e gloepens wies mit was. “dit is t mooiste punt van de Promenade! Hier loopt altijd volk!”
Hai kreeg geliek.
t Wuir beredrok. Elke moand lait e mie zien nije omzetten zain…

“Dat huift toch nait”, sputterde ik. “Doar moust nait zo open over wezen, wat gaait mie dat aan!”
“Jij mag alles van me weten, geen enkel probleem!”
Hai was as n kind zo blied, dat e noa zien foalen in Hilversum, de boudel in Veendam goud an d loop haar!

Doar waarkde hai slim haard veur. Sums nachten achter mekoar was e in zien domien: de bakkerij. ‘Wij verwerken uitsluitend roomboter’ haar e op meerdere plekken in zien bedrief hangen.
Loater kreeg e doar nog mot over. Bie controle van zien bedrief, vonden zai n pakje margarine! En dou verboden zai hom om dij tekst nog te broeken.
Duuvels was hai! “Die hufters! Ik heb ze uitgelegd dat ik vanwege mijn ‘suiker’ geen roomboter mag hebben en daarom de margarine op mijn brood smeer!”
Het het hom nait holpen.

De klanten muiken zok der nait drok om. Ik denk, dat t heur hail nait opvalen is, dat de plakkoaten verwiederd wazzen. Het dee aan zien gebak ook niks oaf…
Traauwens, wie haren mit ons baide al n nije rekloametekst bedocht.
t Is ERNST mit PUIKe kwaliteit.
Ik haar hom der al ais op wezen, dat e wel wat mit zien noam doun kon…
“Met zo n klote naam?”, was dou zien reactie…

Baide slogans het e volgens mie noeit neudeg had.
De kwaliteit van zien produkten was super en zien inzet om t de klant noar de zin te moaken meer as 200 procent!

Zien winkels stroalden luxe oet, -in mien ogen wel ais TE LUXE,- mor as ik mien mainen doar over zee, dee e n greep in loa en gooide mie zien omzetzievers van de leste moanden veur d’neuze: Aal moand zo n twinteg, datteg procent meer!
Ik kon mien ogen nait leuven! “Hou krigs t kloar!”, was mien reaktie.

In aal zien winkels het e kapitoalen verspiekerd. Aal mit n kander veur tönnen!
Hai beknibbelde naarns op.
“Ik wil al mijn drukwerk met een gouden krakeling”, zee e op n middag tegen mie en ik mos dat mor even regeln…
Hai docht an n golden opdrok mit n ondergrond in sjiek blauw.
Dat was veur ons gain perbleem. Wie haren as eerste in de pervensie n mesjien, woarop je alle soorten folie drokken konden en dus ook wel gold.

As n kind zo blied was e, dou ik hom zien bestell n brocht …
“Hee trut, geef die man effe zo’n heerlijke slagroomsoes! En doe er een zak gevulde koeken bij voor zijn vriendin!”
Hai klopde mie op scholder en zien enthousiasme was slim aanstekelk!

n Eerliekse kirrel. Gain blad veur de mond.
As t hom nait zinde, kon je joe wel baargen. n Wotterval van scheldwoorden was den joen dail!

Zo kom ik op n moandag van mien route en wil nog even bie Ernst kieken…
Mits ik d achterdeure open doun wil, vlogt dij mie sikkom tegen de kop.
8 man vlaigen der oet en ik heur Ernst roupen… “En je komt der niet meer in ook, ik heb het gehad met jullie sjachrijnege koppen…!!”
“Kerel man, wat is dit? Waist wel wast dust?”
“Kan me niet schelen! De hele dag kan der geen lachje af en ze doen anders niets dan zaniken!! Ik doe het zelf allemaal wel weer in mijn eentje.”
Bam! Dat was dat. Zien gramnieteghaid was reden om mie ook deure oet te joagen…
“En donder jij nu ook graag op! Ik moet zorgen dat ik mijn winkels morgen weer gevuld krijg.”

Hou haard e waarken mos, huifde ik hom nait vertellen!
De haile nacht het e waarkt as n peerd, gain tied veur n körde pauze, loat stoan veur n kopke kovvie…
Of dat loater de reden west het veur t oafsteuten van zien winkels, wait ik nait…

Der goan hail wat verhoalen over Puik van de Promenade.
Zien taande oet Hilversum het hom aait steund in alles wat e dee.
Hai ging der voak op bezuik.
Op n moandag vruig e mie: “Kun je effe voor me naar Assen?”
“Nee”, was mien reaksie; “k mout nog noar de Wieke, houzo?”
“Ben gisteren naar Hilversum geweest en in Assen uit de trein gezet.
Der zat een opgedoft wijf tegenover me en die dacht een opmerking te moeten maken over mijn kleding…
Je weet, dat ze dan bij me fout zitten en ik heb haar dus flink de waarheid gezegd!
Ze deed beklag bij de conducteur en ik ging er uit.
Ook dat dus niet zonder mijn agressie! Ik was hartstikke fout en nu wil ik mijn excuses aanbieden via deze taart!”
Hai was nait n man mit veul takt. Doar was e wars van. Recht veur de raap en veuraal as e n pilske dronken haar.
Op toarte haar en schreven: Sorry voor t ongemak! Ernst.

Dat was dus zien goie kaante en doarom mog ik hom geern!
Aander luu dij hom kent hebben, zellen der aans over denken…
k Ben blied, dat e op mien pad kwam en t dut mie deugd, te waiten dat e op zien aigen wens: te staarven in t harnas oet tied kommen is.

ERNST PUIK… Sjapoo!

Dit joar al weer twaalf en haalf joar leden, verkasten wie van n hoeske in t veld noar t centrum van Scheemde.
‘Hou gek binnen ie den?’, was voak de reactie, as wie t vertelden. ‘Woonst hier ja in t parredies! En nou wilst noar n doevetille? Hest ja hailendaal niks meer om handen! k Zol mie nog mor ais bedenken!’ Joa, en den begun je te twieveln …..Al n stok of wat woonbeurzen haren wie bezöcht, mor nog niks vonden. Noa zo’n twij joar n grode advertensie over n bouwplan in t centrum. n Nije supermaart mit doarboven 12 appartementen. Dat wast! ‘Toupakken mor’, zee moeke, ‘t liekt mie wel wat.’ Loater kwamen der nog wel wat twievels over of der wel genogt zunne wezen zol!
In t veld konden wie doar volop van genieten!
Zunne rondom! Gelokkeg is t hier nait minder. Ja, en den woon je doar zomor al weer twaalf en haalf joar! Woar blift de tied? k Mout eerlieks zeggen, dat wie der nooit n dag spiet van had hebben! Ten eersten is der veul dieverdoatsie op t plaain en dat was d’eerste tied voldounde oflaiden om ‘t parredies’ oet kop te kriegen. Joa, gain waark meer. Doar mos we wel n beetje aan wennen … Wat n weelde! Aal doage allaint mor doun, woaras je zulf zin in haren! Noar de bozzen in Drente, fietsen in Vraisland, Overiessel en nog wieder vot! Gain gezeur meer: ‘Wie kinnen wel n dag of wat vot, mor ik wil tegen t wiekenne weer noar hoes. Bonen mouten aan zied!’ En nooit meer aine vroagen, of e de hounder, vizzen en eenden vouern wol! Wat toch ook voak nait ging zo as je t wend binnen … Nee, pure riekdom, zo’n doevetille! Guster was moeke even noar t wicht aan d’aander kaante van d’brogge. Zulf zat k wat te pasjansen achter d’computer…

Nog mor even kwedeln!

Zo docht, zo doan …… An d’linker kaande via de noodtrap noar beneden, even over t plaain veur de super langs en … d’eerste kwedelerij kin al begunnen! Voak dou k over d’ofstand van n lutje viefteg meter (veurfront super) wel twij uur. Aal bekenden! Femilie, vrunden van de sport en Zunnebloum en nog veul meer … Joa, de C1000 dut t hier beregoud. Wat n volk!
Nog mor even n pakje vergif hoalen, docht ik bie t opsteken van n pafke. Der zaten nog drije in en ik wol nait mit n jankend gevuil noar nicotine op bèrre! Versloafd! Joa, hailendaal! Aarg? k Wait t nait. Denk wel, da k tot nou tou n hoop mazzel had heb … Ben in mien zeuventegste smookjoar! Dat even terziede.
In d’winkel n knuvvel van n Zunnebloum-collega. Mit d’ain he je dat, mit n aander nait. Achter ons twij vraauwlu, dij voak mit oetjes van de Zunnebloum mit goan. t Wiesvingertje zwaait henneweer en mie wordt dudelk moakt, dat dat nait heurt! Wazzen ze vrouger nait wend, docht ik. ‘Ho ho’, zee ik ‘Nait jaloers wezen! Wol je ook aine?’, en k greep heur om zied … ‘Nee, dank je’, was t antwoord verschrikt. Deuske gif kocht bie de balie en in tied da’k t knipke in buutse dee, opains n smak achter mie …..Henderk, ook n zwoare versloafde wol tou zien scootmobiel oetstappen, mor dat ging mis! `Oh, mien heupe’, jammerde hai mit n verwrongen kop. Mis, docht ik, dij het heupe broken! t Wichtje achter teunbaanke greep vlot heur mobieltje en belde 112.
Veur dat d’ambulaanze der was, verstreek der nogal wat tied. ‘Help mie mor even overenne, piene is al vot’, zee Henderk, dij t al n zetje verveelde.
‘Nee, dat kin nait. Wie wachten op hulp en dij mouten waiten, wat of der wieders gebeuren mout!’
‘Och here, mou’k noar t zaikenhoes? Dat kin k ja nait wachten!’
‘Dou we toch mor, is beter veur die en wie maggen die ook nog wel n beetje lieden!’ ‘Meschain is t mor veur even? Kinst vanzulfs nait voetballen mörn!’
‘Oh, mor dat haar k al ofzegd … k wol scheuveln!’ De broeders konden waaineg vinden, piene was vot! ‘Veuroorlogse botten he!’, zee Henderk laggend. ‘Enne omringd met goud wat vet en spek!’ ‘Wie brengen joe nait noar t zaikenhoes…. ie goan noar hoes!’
‘Dat dut mie goud’, zee Henderk dankboar. Kin k tenminsens n sigaartje roken!’ ‘Den moust ze wel mitnemen vanzulfs’, ruip k hom noa. Greep ze gaauw oet t mandje van zien scootmobiel en laangde ze hom tou!
Hai laangde mie n haand: ‘Bedankt mien jong! Bliede dat wie even kwedeld hebben! Enne … as k mien sigaartje dammeet op steek, zel k aan die denken. Moi!’

Hoezie? Houst? Moi! Hou gaait t? d’Eerste baaide binnen van nou, d’aander baaide wat older. t Moakt nait oet, hou of je n aander benoadern, as t mor goud bedould is! Aait eerst even vroagen, hou of t gaait dut d’aander goud.
n Joar of wat leden, wol k bruier n braif sturen, mor k wos nait hou of k begunnen mos …

Eerst mor ais vroagen, hou of t mit hom gaait. En dou ging t loos! Kerel man, wat komt ter den n fantesie boven. Lees mor even mit:

Moi Bruier,

Hou gaait t? Kinst der nog n beetje tegen? En gaait t mit kinder ook nog aal goud? Hier gaait t oareg nuver, dus gaait t hier goud! Je waiten mor nooit, hou t goan zel, hè? Elk wil geern dat t aal mor goud gaait, toch? Bie t heuren dat t hier goud gaait, gaait t bie die vast ook weer wat beter.
En hopelk gaait t den bie joe ook goud.
Nou ja, nait alles is meer honderd persent vanzulfs, mor dat zit hom in de botten. t Lopen wordt bie ons wat minder en je kriegen wat minder energie. Nait alles gaait meer zo as vrouger. De gang gaait der wat oet, zeg mor. Dat mout je den mor akseptaaiern, old wezen is ja hail wat aans as old worden. Zo as k al zee, t gaait hier oareg nuver en den gaait t veur ons leeftied ja goud. As je aal zemeln, dat t nait zo goud mit joe gaait begunt d’aander dat gaauw te verveeln!
Zo nou en den der even oet … wat òflaaiden is voak n wondermiddel. De kop leeg en t gaait weer stukken beter! Bievubbeld noar Hofsteenge in Rolde. Treden voak mooie groepen op. Of noar Grolloo – ook n Hofsteenge. Femilie? k Wait t nait. Gaait mie ook ja gain donder aan! Lokoatsies zat, woaras je joen lamlendeghaid kwiet kinnen. Even op verhoal kommen, zodat t wat beter gaait. Op t rad gaait ook nog nuver…. Rondje Blaauwestad, of n heerntje eten in Termunten is beslist nait verkeerd. Gaait der lekker in!
Ons jongste klaaindochter kin mit 39 groaden koorze op bèrre liggen … As je heur den vroagen, hou of t gaait, is t antwoord: ‘Och, t gaait alweer n beetje beter opa!’ n Staarke maaid, gain zeurder. As kinder zo nuchter binnen, gaait mie t haart der van open!
Mor nait elk is geliek. Partie lu gaait t oareg minder. En dat gaait den voak weer over op heur kinder! Ja, en as je tillevisie kieken of kraante lezen, liekt t wel of d’haile wereld in braand staait. Zo is t noatuurlek nog nait, mor zo te zain leuf k nait dat ‘vrede op aarde’ op t heden veurop gaait. Mor doemen, dat t overal weer goud gaait. En hopen dat de wereld nait noar de verdoemenis gaait.
Zo, dat was hail wat mit t woordje gaait.
k Was ook n moal mit n Gait noar daaierntoene in Emmen. n Schiere dag mit had: doe begripst wel, dat t hier om n man gaait toch? n Biezunder woord, dat ‘gaait’. As je t zo voak broeken, is t net of t naarns over gaait. Dat hoop ik dus nait. Mor as t wel zo is, hoop ik dat t lagen die nait vergaait. Hier mor stoppen ducht mie … gaait ook ja veuls te veul pepier kosten.

Het ga je goed! (heurt toch beter?)
Holt joe taai. En as t wat minder wordt, der nog haarder tegenaan. Wie bennen Zonneveldjes, waist t nog?

De mazzel!

Klaas

MOI!

Ficq & Partners avvekoaten trekken ten stried tegen de smokerij. En hou!
Zol der endelk recht doan worden an d’lu, dij de vingers en de longen zwaart hebben van heur versloaven?
Je kinnen der van zeggen wat je denken, mor fait is, dat de sigaretten en zukswat volstaauwd worden mit gif om de begunners alvast aan te hollen veur heur haile leven. En bie veul lukt dat … Ficq! Tuurlek binnen der paartie lu dij zunder meer stoppen kinnen, mor de mainsten kommen – ainmoal begonnen – der nooit meer vanòf. Fuck!

Onze regeren vindt roken ook aarg ongezond. Tenminste, zo hait dat. Zai willen de versloafden middels ploatjes baange moaken en t roken minder aantrekkelk deur t verhogen van de priezen? Ja, ja! Net as de producenten, waiten zai volgens mie bliksems goud, dat versloafden doar nait gevuileg veur binnen. Beetje hypocriet. Der mout toch geld in t loatje kommen. Nou den! Regaaiern is veuroet kieken. En dat doun onze laaiders. Van elk pakje n euro of drije? Mooi man! Net as mit de inkomsten van t gas kin je doar hail wat van doun. Ook onneudege dingen mit meerkosten … zo as je voak in de medioa lezen.
Kwoad worden het gain zin. Dou t den zulf beter!
As Ficq t over 10, 20, of 30 joar veur nkander krigt om dij rommel te verbaiden, en de smokers zulf weer tebak telen goan, roup ik meschain fuck! Mor dat is mien probleem. Ik zel heur de rest van mien leven aiweg dankboar wezen, dat zai ons kinder en wiedere noazoaten van dij troep bevrijd het!
k Las van d’weke in d’kraande, dat de pensjounfondsen heur kapitoal op paail hollen deur … de winst op heur aandailen in de tabaksindustrie! t Mes snidt hier dus van twij kanten!
Ik wens Ficq & Partners hail veul sukses!
Zel k, as versloafde, in de toukomst aans denken? Wel wait. Meschain roup k den nog voak n moal fuck! k Heb t der geern veur over!

Bienoa al weer n joar om…!
Der was weer hail wat reur n in t oaflopen joar mit as oafsloeter:
Boeren leggen distibutiecentra supermaarten lam?
d Luu bennen woarschaauwd, dus hamstern mor! Gain probleem!

Oldern onder ons moaken zok doar nait zo drok om…
Dij hebben wel minder tieden mitmoakt!
Zai denken meer an d luu, dij heur dit joar ontvaaln bennen.

En… dat bennen der nogal wat!
Tjezus, weer veuls te veul!
Jaantje, Pietje, Kloaske en nou ook nog Meindert Schollemoa van Pekel!
69 joar nog mor! Veuls te jong toch!
Dij man mout n standbeeld hebben! Wat n toffe gooser!
Hai was der veur elk, pruit joe nait noar de mond en was der oprecht veur t volk!
Zo aine kriegen ze doar in Pekel noeit weer!

Zulf mog k hom veur t eerst mitmoaken op n feesje van de Zunnebloum Pekel.
Willy Petzinger – dij ik kon van de Seniorendag Winschoten – haar mie nuigd.
Touvalleg was ik bie de Zunnebloum-oafdailen Scheemde, zodounde.
k Heb joe op d eerste rang zet, zee hai bie binnenkomst.
Oh…?
Wie zaten net op stee, dou der n man tegenover ons zitten kwam…
k Zel mie even veurstellen: Schollemoa!
En hai ging in t Grunnens mit ons wieder.
Versta jij die man? Vruig mien moat. (hai was n Westerling en kreeg gain woord mit!)
Ja hoor! Mooi man, een burgemeester die zijn volks taal praat! Tof!

Schollema kreeg van ons gesprek n beetje mit en verontschuldegde zok:
Sorry hoor, ik kan natuurlijk ook ABN!
Paasde zok geliek aan. Tegen mien moat in t ABN en tegen mie in t plat!
Wat een aardige man, helemaal geen burgemeesterstype!

Zien openingswoord ging weer in t plat en mos ik noar mien moat tou vertoalen: Hij zegt, dat zijn vrouw een andere agenda heeft en niet aanwezig kan zijn…
Maar ze komt nog wel hoor!
Meestal gaan ze samen overal naar toe!
Oh? Wat leuk!

Mooie herinnerns aan n sypathieke man… n mens!

Schrifst doe de nijjoarskoartjes even, vragt moeke… (wonsdag de 10e dezember)
Hé? Joa, mout dat nou al?
Joa, mouten minstens aander weke op post, anders kommen ze nait op tied over!

Op heur zulf gemoakte koartjes stait de tekst: Fijne Feestdagen!
k Ben zo vrij west dat te veraandern in ‘Schiere doagen en n gelokkeg en veuraal Gezond 2020!’

Dat kommende vrijdag de dattiende Meindert Schollemoa veur t lest onder ons is dut zeer!
Tuurlek blieven de mooie herinnerns an hom, en mooie herinnerns bennen weer n beetje gelok…
Mor koartjes verstuurn mit de tekst ‘Fijne Feestdoagen’ gaait der nou even nait in!

Hou kom je der op, heur k joe denken. Joa, doar kin ik joe gain oetleg op geven. Dit verhoaltje gaait as zo voak weer over vrouger en dou haar je wel meer van dij wonderlieke oetsproaken en noamen. Op n vergoadern van de Zunnebloum vroug veurzitter mie, of ik ook nog gasten haar. ‘Joa,’ zee k: ‘Foppe Moaze, Berend Koekak, Wilm Klode en Ome Job.’ Apmoal bienoamen, dij ik vanzulfs nait broekte as k op bezuik kwam (al zol heur dat om t even wezen).
Foppe was n jongere bruier van mien schoonvoar en ik leerde hom kennen in de joaren zesteg van de veurege aiw. n Oardege, roemdenkende man, dij voak op n smeuege menaar zien mainen oette. Mien zwoager Haarm (in t Grunnegs ‘Aarm’) waarkte bie n aannemer in Brouk. Dij vroug aan zien volk, onder t schaften of zai nog n goie grondwaarker wozzen.
‘Joawel, n haile goie,’ zee Haarm, ‘mor wel aine mit n gebroeksaanwiezen.’ ‘Loat mor kommen,’ zee de boas, allaank bliede, want hai zat der om te springen.

Foppe haar der wel oren noar. ‘Kin moandag wel begunnen.’
d’Aannemer aarg blied, schoof hom n nije koare en schuppe tou en zee: ‘Hier heb je joen raive. k Hoop, dat je der goud zuneg op binnen, want zai binnen goud in de pries!’
‘Oh,’ zee Foppe en schoof t spul geliek weer trogge: ‘Den denk ik, dat je der zulf beter mor om denken kinnen. Ik mout der mit waarken en ie zetten hom gewoon op dele!’ ‘Ach Drent, zo bedoul ik dat nait!’ schrok de boas.
‘Den mout je t ook nait zo zeggen!’
Afijn, de boudel wuir schikt en Foppe begon aan zien opdracht.
Noa n moand opperde de boas tegen mien zwoager: ‘n Monster waarker! k Heb nog noeit zo n goie had.’
‘Doar mout je den mor zuneg op wezen!’

n Joar-anderhaalf joar loater, tiedens t vrijdagmiddegborreltje, zee Foppe: ‘Ik bin hier vandoage veur t lest. k Heb aander waark vonden!’
‘Dat kin nait,’ raip de boas verschrikt, ‘wie kinnen die nait missen!’
‘Der is gain minsk onmisboar, ik ook nait!’
‘Wat gaaist nou den doun?’
‘k Goa noar Duutsland, doar is veul vroag noar grondwaarkers en d’verdainste oareg meer!’ ‘Houveul den?’ wol d’boas waiten.
‘Wat moakt joe dat oet?’
‘Joa, mor as ik die dat den ook betoal, hevve den n deal? Blifst den?’
Foppe wuir knalrood om kop en knalde der gramnieteg oet: ‘Wat binnen ie ja n vrek! (hier wol e nog wel fersounlek blieven, mor dat kon e nait volhollen) Hest mie dus aal dij tied besodemieterd! Of wilst mie nou ook doezend gulden betoalen, ik steek veur die never noeit meer n schuppe in de grond!
Gaalsterd!’
Of de boas doarvan leerd het, wait ik nait … d’Aander jongs haren de weke der op apmoal 5 gulden meer in t loonpuutje!

n Woargebeurd verhoal

n Toffe Commenist. Nait allend veur de kartonarbaiders in Pekel. Mor veuraal ook in zien benoadern noar aander luu tou!
In zien tied ree e in n Audi 60. n Zandkleurege. Nait bepoald n commenistisch karregie!
Ik kwam hom tegen bie d benzinepompe van n ‘gereformeerde’ aigenoar!
Mien gedachten doarover dee mie vroagen noar zien tankgedrag en zien chique kaare…

Is dat nait wat krom veur n commenist, wol k van hom waiten?
Wie mouten mit mekoar de wereld deur, mien jong! Dizze man mout ook leven en n commenist krigt ook last van zien rogge in n Trabantje.
Omdat ik veul kilometers moak, Grunnen/Den Hoag, v.v., mag ik dizze kaare broeken van de partij…
Hai het geliek, docht ik en gunde hom zien Audi!

De oetslag van zien inzet veur de kartonarbaiders is bekend… Zien standbeeld meer as terecht! De loonsverhogen, dij hai der veur t volk oetsleepde was nait mis!
Ondanks, dat Fré veur de Pekelders n oafgod wuir, was der ook veul teleurstellen! Teleurstellen in de vakbond, woaras zai bie aansloten wazzen en aait docht haarn, dat dij veur heur traauwe leden opkommen zol!
Joaren achtermekoar kwam der n vakbondsman mit de directie onderhandeln over ‘n beetje meer’ …. Ieder bod was t den: Sorry, de tegenvallende resultaten staan geen verhogingen toe!
Mit n flezze draank en n dikke sigare in de mond gingen ze de der den rap vandeur!
Bennen dij der nou veur ons? Of speulen ze onder ain houdje mit de directie?

Nee, den Fré! n Commenist mit n grode bek! n Kerel, dij vocht veur zien volk! Wel of gain lid van zien partij! Onrecht! Doar ging t om en dat mos ais oaflopen weden!

In d joaren zesteg wuir ons hoes-an-hoes bladje ‘Mau-Mau’ vergees in dizze regionen verspraid…
Bie binnenkomst en t oafgeven van n stoapel kranten, zag ik de bezörger mit d handen onder kop zitten te schraiven…
Wat is dit? Ie kriegen n fikse loonsverhogen en toch janken? Vroug ik…
Joa, zee zien vrauw: Hai ken mor nait begriepen, dat zo n staarke bond niks veur n kander kreeg en Fré opains wel! Hai vuilt zok zwoar belazerd!

t Standbeeld van Fré Meis staait nou al joaren stoer in Pekel… Haar de vakbond nait zo laks west, den was t beeld der noeit kommen!
Nou, noa zesteg joar bliekt, dat de bonden muite hebben te bestoan… Zol der n verband weden?

Al weer roem zeuven joar leden betrokken wie ons flatje aan t Vredenhovenplain in Scheemde.
Van oet t loug (25 joar in t veld aan raante van t dorp) noar t Centrum!

Dat is nait niks zee moeke… Dat wordt wennen…
Vanoet de stilte noar de störm zol je dinken, moar t vaalt best tou!

Wat n diemdoatie!
Moandoags begunt dat al mit grode vrachtwoagens, dij of en aan rieden om de winkels te veurzain van koopwoar.
Wat n gedou! Den zai je pas, wat t is om zo’n truck mit treler of aanhanger goudschiks deur t krioul te kriegen.
Nait allaind mout je tussen aal dat blik deur manoevreern, ook mensken mit n kuierkoare (rollator) kennen joe t stoer moaken!
Is der nog n steetje van n meter tussen stoup en vrachtwoagen: ‘t ken nog net!’ zai je d oltjes dinken en hou troag dat t ook gaait, zai scharreln der tussen deur!

d Acordeonspeuler zet om n uur of negen zien eerste deuntje in, in de hoop dat t weer n poar stuver geft vandoage.
Tot soavends stait e te speulen: ‘drink, drink Brüderlein drink…’, en wieders nog twij deuntjes, dij hai schienboar oet kop leerd het om kost te verdainen…
Deur de weke word hai oaflóst deur twij aandere moaten. Alle drij oet Roemenie.
Stefan verkocht stroatkraande en Josef mit gitaar zingt der lusteg op lös.

Net as de visboeren het elk zien dag aan t plain.
Sjors heurt doar vanzulfs ook bie. Het is onze vaste plainbewoner.
n Rooie koater. Is vanoaf t vannijs indailen van t plain nait weg te houwen.
Veuraal as de visboeren heur stekkie innemen. Den is hai d eerste klant!

Aal doage wat nijs! En den komt noa zes doage weer n rustdag…
Tenminste dat main je!
Aal mörns stoa ik noa t eten van n stoetje vergezeld van n bakje leut even achter de geroaniums op t balkon n pafke te smoken.
Noa aal dat gedonder over t gevoar van smokerij het moeke mie ook zo wied kregen, da k nait meer in hoes smook, moar op t balkon en achter op de galerij.
k Mout wel zeggen, dat ik nou minder smook as aistieds en wat t mooiste van dat gedou is: elk joar sauzen en/of behangen is der nait meer bie!
Op joen oldere leeftied is dat vanzulfs n zegen!

Zundag veur n weeke was t roak!
Noa wat voetballers, dij zok verzoamelden, ston der n bus van Deiman, dij t volk van c-doezend vervoaren mog veur n schier oetje.
Loater laipen der nog wat kerkgangers, en dou was t stil!

t Plain wuir even loater bezet deur n vattegtal swaarten…
Nait da k n hekel heb aan anders- dinkenden of kleurden, moar aan dizzen heb k nait zoveul plezaaier.
t Bennen de assistenten van buurman Henk Stainhoes.
Zotterdoags noa t sloeten van C-doezend pakt Henk de grieper dij hai kreeg van Gemainte en pakt alle troep, dij achterbleef op.
Schienboar dut hai dat nait echt goud, want…
De koppel swaarten komt aanvlaigen en pikt alles op wat nog eetboar is.

Ie begriepen t al wel, ik hebt t hier over swaarte kraaien!
Lawaaischuppers ben t!
Opaains heur ik gerammel van n achtergebleven colablikje dij over t stroate rolt.
Schienboar is der ook nog wat jonkgoud oet berre vallen, docht ik…?
Moar nee: twij kraaien haren schienboar noar studio voetbal keken, zotterdagoavend:
Bek vuil mie bie t aanzain van heur trapperij wiedwoagen open.
Mit heur gele snoavel slougen ze ombeurt tegen t blikje en zowoar as k leef:
de Koemantjes wazzen der niks bie!

Over n kander hén stroekelnd en koppeltjedoekelend wol d ain schienboar nog beter wezen as d aander…
t Feest begon bie Henk ten Hoor en binnen een mum lag t blikje bie Harte van Dam veur deure, zo’n viefteg meter wieder!
Mien hekel aan de swaarde joekels, zoas k ze voak nuim, verdween as snij veur de zunne…

En nou stoa k elke zundagmórn om n uur of zeuven al op mien balkon oet te kieken, in de hoop, dat der n vervolg wedstried komt.
Pafke tussen de lippen vanzulfs!

Jammer, der liggen gain blikjes meer zundags.
Schienboar het Henk Stainhoes wat wiederop ook d boudel aanschiert?

Neef Haiko was aait oareg zuneg. Volgens d femilie bie t gierege oaf!
Dat haar zien oarzoak in t opvouden… Zien oll n wazzen ook zuneg en hadden n hail grode toene!
Alles wat ze neudeg haarn, kwam van aigen laand. Eerappels, bonen, prai, worrels, andievie enz…
Nuim mor op! Net as partie luu in de streek was t aal doage noa twaark haaistern op t laand.
Haiko het ook noeit n wiefke vonden, dat von e mor niks! Volgens mie was e doar te beschaiden veur.

Alle vraidoagen en zotterdoagen was zien oetje eem noar t kefee. Den groette hai de gasten an de stamtoafel en schoof bie heur aan zunder wat te bestellen. n Pilske Haiko? vroug den wel ain van de gasten en den was t vot:
Joa mor! Sumtieds wuir hom der den nog wel es ain aanboden, mor voak ging e noa aine weer noar hoes.
Nog eem tilleviesie kieken en den in de koffer.

Zulf de tv aanzetten mog e nait van moeke. As der touvalleg wat bloots langskwam, zette zai hom gauw op n aander zender mit de woorden: Dat is niks veur die! Wel kocht e zok om de zoveul joar n nije auto. Mor as e bosschoppen dee, ging e op fietse en den ook nog zo n 6 km wiederop, omdat t doar goudkoper was….

Ainmoal op n waarme dag komt e Geert tegen. Ook eem wat aanvull n? Joa. En den, noa n ketaartje: Verrek, ik mout noar hoes, k heb botter en ijs in d fietstasse! En vot was e!
Dou zien voar oet tied kwam, bleef e mit moeke in t lutje hoeske wonen.
Komt e op n dag mit n dikke rooie kop bie zien zuster en zwoager en zegt; Ze hebben bie ons inbroken!!
Bliksem, en….? dien aandail n en zo vot? Nee, allend moeke s tromke mit heur AOW biffe kwiet!
Den waist nou wel wat of st doun moust! Wat den? d Haile boudel noar de bank! Oh? Aanderdoags fietst Haiko bie zien zwoager veur t hoes langs. Zwoager tegen zien vrauw: Moust ais kieken Sunterkloas! Haiko haar alle pepieren en geld in n grode jutezak op nekke! Aanderdoags: Kon st kwiet worden bie de bank?
Nee, zai haarn mor ain kluiske over. De rest heb k noar n aander bank brocht!

Dou moeke oet tied kwam het e op aandrang van femielie zok meld bie n bejoardenhoes…n Hail mooi stegie op d houke. En.. zulfs radiatoorn op gaange! As e eten ging, kwam deure noar d gaange open en de waarmte, dei e doar van kreeg, was hom genogt!
Om acht uur kwam tv en n lampke aan… Stroom is ja hartstikke duur!

En al wuir t mit zien botten der loater ook nait beter op, hulp vroagen wol e nait!
Zien zuster en schoonzuster kwamen ja wel n moal om d boudel op te schiern!
As ze noa n uur anderhaalf eem poesten woll n, was t: Hest n beetje drinken veur ons Haiko?
Ehh…. Nee, hem ie den niks mitnomen?

Ook noar dokter ging e nait en n pedicure? Noeit van mien leem! Wat kost dat wel nait! Mos e der n koeze oet hebben, den greep e n taange en: Hups! Der oet! Mit noagels dito, dei kon je ja best mit n knieptaange knippen en veur t biewaarken heb k wel n viele!

Zien zwoager mos aalgedureg eem noar d auto kieken… Kiek ais noar mien roetewissers Piet. Dei rappeln mie te veul! Piet kikt en zegt: dei benn n schoon oaf! Doar dou ik niks aan! Hoal die mor n poar nij n! Joa…. mor e….! Soes nou mor nait! Kinst ja zat betoal n!

Zien bruir en zuster en oomke zeggers hebben ter goud mit had! Mor zai haarn laiver zain, dat e der zulf wat meer van leeft haar!

Haiko was biezunder, mor n meroakel laive jong!

(noamen gefingeerd, de rest is eerlieks woar gebeurd)

Geleuf is der in alle soorten toalen en geschriften..

Ik gun elk zienend, mor k heb der zulf nait zoveul mit!

Al is dat ook mor haalf woar…. De verhoalen dei in aal dei bouken stoan en woar de geleuvegen heur ,kracht’oet zeggen te hoalen, benn n veur mie meer fantasie… en veur heur n holvast…?

Noach mit n proamke as dei van schipper Hogerman oet Scheemde zol van alle daarn in de wereld twei an boord had hebben?

Hou kin je dat wel leum, vroug k an n sportkameroad…..

As t nou 20 kroesschepen van Maier oet Poapenburg an mekoar west waar n…….!

Ach Klaas, dat is symbolies! Ja, zal best zee ik en ben der mor nait wieder op ingoan.

n Aandermoal was k bie n klant en zien kameroad, ook baide kerkgangers.

Mit mien klant botste t voak… Wie dochten hail verschillend, mor mochten n kander groag!

Asof t zo weesn mos, begunde t noa n ketaar al over heur geleuf… -Gereformeerd-.

Het geleuf is wel de hoeksteen van de soamleem zegt de kameroad mit n stoalen gezichte.

Ja, en wat benn n doar n oorlogen van kommen….!

Trauwes het liekt ter op, dat t nog wel goud worden kin… Hou zo?

Ie hebben soamen mit de Hervormden nou ain kerke… Nou de roomsen, jeuden, adventisten, art 31, en islamieten der nog bie den begunt t der al op te lieken…..? Ach man!!

Dat benn n ook geleuven toch? Is dat van joe den t ainege goie?

k Heb de Jehova s nog mor nait nuimd, want doar denk ik nog hail aans over… en den ken k dr oareg kwoad bie worden..

En wat heb je an roezie, niks toch!

Wonsdag kom ik van t biljarten en kom aan de proat mit twei oarege, donkere doames.

Zai zetten de daarn in t paarkje op foto.. Mooi he, zeg ik. Ja, prachtig!

n Indische en n Surinoamse. Wie kwedeln wat en opains de vroag: gelooft U? Nee, sorry. doar heb ik niks mit!

Ach, jammer. Het is zo mooi! Dat is joen denken, mor ik denk aans. Houveul oorlogen benn n der nait oet vot komen?

Dat is zo…. maar… En zai pakde heur mobieltje en lait mie n tekst leesn… God Jehova las ik.

Ben n ie Jehova? Ja! met heel mijn ziel! Nou, dan kunnen we nu wel stoppen met ons gesprek.

Dat von ze mor niks. Heeft u een andere mening? Dat ducht mie! As joen partner of kinder oettreden, loat je ze as n flinte vallen… staarker… ie bann n ze volledig oet! Ja,maar dat hoeft toch niet aan de gelovige te liggen? De ander kan toch ook de oorzaak zijn?

k Zel joe n aander stoaltje Jehova-ervaring vertell n…. Joen moaten hebben in Scheemde n weduwe inpakt mit loze beloften.

Zai haar heur man verloren en was daardoor erg afhankelijk geworden Jullie stelden je op als ,barmhartigen…’

As der kenissen van heur kwamen, huil je de deure dicht mit ain of aander smoes!

Bie luttjen aan heb je heur op alle kanten plokt! n Nij dak op t hoes veur 80.000 gulden en kwait nait aal wat nog meer!

Schande! Ik heb mie doar zo kwoad om moakt, da k mien collega s bie de kraande moant heb om doar over te schrieven…

Der was mor aine, dei dat aan dus… Weken achter mekoar schreef e der over en bepruit dat mit de politie..

d Luu benn n volgens mie noeit straft, mor zai mozzen wel direct opdondern en de vrouw nait meer lasteg vaal n.

t Wiefke haar aandacht neudeg en hulp…. Joen ,hulp’ het heur wieder t moeras indrokt….

Zowied, dat ze der zulf n eind aan heeft gemaakt! Daar heb ik iets over gehoord…

Den wait je ook, da k hier gain leugens vertel!

t Was der oardeg kold bie en mit de emotie der bie begon k aal meer te schuddern.

Ik ga nu naar huis, t wordt me veel te koud! Dank veur het toch wel roezie-vrije gesprek.

Doeg!

k Haar veurege weke n schier moment in Pekel…

Zo n twei joar leden begon mien jongste bruir wat vrumd te doun….

n Tiedje loater kreeg e de diagnose: Parkinson-dementie!

n Moal of wat sloeken en wieders oafwachten en hopen op beter.

Nait dus!

d Aine moal wat minder as d aander moal en nou opains n beetje lucht…

Dou k aankwam zat e mit n zuster te oefenen in zingen en floiten!

Ja, zee ze, ik perbaar t op n aandere menaar. Maisttieden zet ve noa t opstoan en wasken de TV aan, mor dat leek mie noa n tiedje mor niks. De patient blift den wel n mooi tiedje rusteg, mor dat is t den ook aal!

De zingerij kwam der nait meer oet…. Wie kunn n ook floiten mit ons baide Lex he!

Hai nikde en dou zai begon, dee e mit n stroalend gezichte volop mit!

En wat zee e doarnoa? GELUKKEG!

k Wuir der glad n beetje waik van. Zo mooi!

n Kopke kovvie? vroug ze mie en klopde mie op scholder..

Geern , dat van die zel vast hail lekker wees n!

Dat mout je mor oafwachten zee ze en stoof noar d keuken.

Dou ze trogge kwam en bruir heur zag, glom e as n ekkel en mie dunkt: as zai voaker mit hom doktert, hai t nog wel n tiedje oetholt!

Onmisboare wichter!

Onderweegs noar hoes kon ik ook weer slim blied wees n en kwam de zunne veur ons baide weer n beetje in zicht!

GELUKKEG!

1952

Bonzo en Flip stonden soavends om n uur of aachte veur bie dam in Meulenstroate.
t Was n waarme zummerdag west en dij waarmte gaf aanlaiden om boeten nog even noa te kwedeln over de resultoaten van heur neren.
“Nait te roem”, zee Flip, “Meer as 10 klanten heb k nait had vandoage!”
“Den jeuzel mor nait”, zee Bonzo, dij n auto-reperoatie bedrief haar.
“Ik haar twij klanten mit n lege knibbe, n bult waark en gain hunneg!”

“Nou kiek toch ais. ..!”
Der stopde n nije Opel Kapitein en wel kwam der oet?
Pak -bienoam van d achterbuurman-.
“Dou mor duur” ruip Flip, “was d bus te min?”
“Nee”, zee Pak, “wie mozzen n poar uur laanger en dou zee de boas: ‘Ik mout nog noar Winschoot, stap mor in, den breng ik die wel thoes’.”
“n Mooie kaare, dij het wat kost”, zee Bonzo as deskundege.
“Joa, en wat wol e haard”, zee Pak, “wel 100 km!”
“Dou even normoal”, grijnsde Flip, “van Stad noar Scheemde is ja mor datteg!”
“Oh”, stutterde Pak…, dat wait ik den ook nait, mor t ging gloepens haard!”

In Amerikoa was t nait van de locht bie t aantreden van Trump as president…
Mit zien dikke proellippen gooit e ter an d lopende baand oet : Go bl… Y…
Zai zeggen t doar dus aans, mor dat vin k nait passen in n Grunnens stokje.

Ik vond t wel n beetje veul, as k eerlieks ben.
Mor ja, k ben den ook nait ‘christelk’ ! (Althans gain kerkganger)
Nee, om eerlieks te wezen, hol k nait van dat gedou.
Volgens mie mainen zai t ook hailndaal nait, want tiedens de kampanje en noa zien aantreden wazzen d aandern apmoal mieskasters, dij der niks van moakt hadden. (heb Joen noasten laif as joe zulf!) Ja, ja!

Den heb k t hier vanzulfs over Trump en Clinton en… God zegen hom echt: Obama!!
Obama is hail aans. Al gaf e ook dudelk te kennen, dat Trump zien zegen veur t presidentschop nait van boven kommen kon en zok doarom inzette veur Hillary.
Al ben ik ook wars van Trumps goare oetsproaken, en vuil ik totoal gain verwantschop mit zoks luu, toch mout mie t van t haart, dat ik ook totoal gain aanbidder ben van aal dat vrome gedou dij summege van zien veurgangers verspraidden!
k Nam soms t woord ‘Godverneukers’ wel ais in de mond…! (noa t aanzain van n debat op tv).
Mooi proaten, en achter d rogge om d aander verneuken of beschimpen !
Dat is toch vluiken in d kerke? (Go… bl… Y… ! Hou duur je!)

Vluiken heurt nait!
En veuraal nait op zo n menaaier…
Dat was CDA-man van d gemainteroad in Scheemde mit mie ains.
Hai vertelde, dat ze bie elke vergoadern van zien club aait in gebed ‘veur’ gingen.
Op n oavend haar hai dat doan en noa t woord amen, ging t loos!
De aine schampte en roddelde nog meer as d aander over n collega!
Ik ben dou stoan goan en heb zegd, dat ik noeit meer ‘veur’ goan zol! ‘Dat nuimen ie christelk? Schoam joe!’

Hai gaf mie te kennen, dat mien woord godverd… hom gain vreugde brocht…
Mor wat dij luu mie doar flikten woog veur mie veul zwoarder!
Dat nuim ik vluiken in de grofste zin van t woord!

Noa dij oavend kon ik loater t nog beter mit hom vinden!
Wie begrepen n kander!
t Zol schier wezen, as ze in Amerikoa d zulfde kaande opgingen!
Toch mor even din…:
Got bless joe!
En… noeit meer vluiken in d kerke!

Nou zeg ik joe!

Van zokse aainzaalms kin je ja wel n haartverzakken kriegen!

Joa, dat kin, denk ik…. mor je kenn n der ook positief over denken!

Willem van Hanegem: -nee, nait Johan!- het bedocht, dat elk noadail zien veurdail het.

Ook ik heb de oetzenden zain, woarin Emma Wortelboer (familie van de pillendraaier oet Pekel?) dat zee.

Doar hest weer zo n t.v-ster, dei t zo goud wait! zee k roazend.

Mor nou, n poar weke loater, ben k der wel gelokkeg mit!

Loat ze mor mooi blieven, woar ze zitten, zee k vanmiddag tegen moeke. Je mouten der toch nait an denken, dat zok volk hier heer komt!

En boomdien, as wie hier aal dat kak kriegen, hou drok kin t den wel nait worden? n Bult theorie-intelligentie, woaras wie niks mit kenn n, toch?

k Mout der nait aan denken!

Mor zo n oetdrokken van n ,dame’ is wel schoamachteg! Der wordt over dat lichoamsdail proat of t n kankergezwel is!

Nou, wie waiten t wel aans! Nait den?

Ook bie aander zenders en programma s word der regelmoateg smeten mit seks. En dat hait den n goud programma!

Zai verzaiken de toal en t moreel, en dat mag. Dat heur programma ,Talkshow’ hait is weer zowat.

t Is ja gewoon n proatprogramma! In t A.B.N. vanzulfs praatprogramma! En…… wat wodt doar den beproat?

Elk het t over de aander, dei t zo slecht dut! Bah!

Bie Eva lestdoags zat de veurzitter van LTO in heur programma, soamen mit Caroline van der Plas….

t Ging over t klappen van n akkoord tussen t kabnet en de boeren.

Hail slauw opsteld, mor gain zekerhaid noa t akoord! Baide aanwezegen legden -volgens mie- hoarfien oet woarom zai nait ,mitgoan’ konden.

Tot wel drei moal! Mor Eva en TV-profeet Fleur Bremer konden t mor nait begriepen! (Gain Boeren verstand?)

Nogal boazeg wuir der op reagaard: Als het niet meer wil, dan zoek je toch een andere baan? en

Nu laten jullie de boel klappen….. schiet je weer niets mee op! Wat willen jullie dan wel? Caroline en collega woll n t nog wel n moal perbaarn,

mor t haar gain zin! Tegen zoveul ,intelligentie’ was nait te proaten! Geliek haarn ze!

Wat ik tegen moeke zee, noa t oafsloeten von k zulf nait mooi mor mos k eem kwiet: ,Kutwiem’!!

Mor zai waiten nait beter. Vandoage de dag spij n op t Noorden en aal mor denken, loat ze verrekken Beemschoa/Ter Oapel en….. en…..!

En nooit heurt van dei ,Hollanders’ dei in oorlogstied heur vreterij geern op n ol fietse zo n tweihonderd kilometer van hoes in t Noorden hoalden omdat

ze aans niks meer vraten as bloumboll n en aander rommel, te gek om hier te benuimen!!!

Dou nait zo wied vot op fietse of lopend, as nou mit d auto!

Caroline zelt nait makkelk ktiegen, mor zai blift wel mien hoop! En hoop dut leem! Vandoar…..

‘Gaaist nog even noar d’maart?’ vragt moeke: ‘k Mout nog eerappels hebben en neem ook mor n pondje jong belegen mit. Enne … van dbakker n ol wief en 6 kedetjes.’
Bram: ‘Mag ik mee, opa? Ik krijg altijd rozijntjes bij de groenteboer!’
‘Den gaaistoe mit … kinst mie geliek helpen puten te droagen!’
Op d’maart ropt n kennis: Moi, jongkerels!’ Bram zegt: ‘Opa is al 85, hoor!’
Dou k betoalen wol bie de bakker, ston der ook n puutje haardbroodjes …
‘Dij haar ik toch nait besteld?’
‘Opa, die heb ik daar neergezet! Ik heb ze al een hele tijd niet gehad.
Kreeg ze altijd van oma Froukje, maar die is ja overleden!’ ‘Den dou ze der mor bie,’ zeg ik knipogend tegen de verkoopster! t Binnen de klaaine dinkjes dij t doun, hè?

Mien zwoager Haarm Drent was al op tied bie d’meziek. Zien voar nam hom veur op fietse mit noar t korps in Woagenbörgen. Haarm mos zien lutje hoorntje zulf vasthol len, de tuba van voar hong aan t stuur. Dou ze van Boneschaans d’Hamrikkerweg op rieden wollen, kwam d’boudel in knel en stoven zai liekoet, Dallengoa’s graachte in! Voar vergreld, mor noa schoon goud toch mor wieder.
Voar was boer en Haarm ging noa d’legere schoule noar d’ambachtsschoule in Winschoot. Hai wol geern timmerman worden. Hai wos bienoa alles van Nij- Dou e achttien was, kreeg e n oproup om zok te melden in Nijmegen. De lochtmacht haar schienboar verlet om hom. Ondanks zien kennis van timmern en hoornbloazen, was e aarg onzeker as t om vrumde zoaken ging. Dat was in t leger nait aans. Wat n soldoat was en wat e doun mos, ston aal in n boukje. Van d’lu dij nij kwamen wuir verwacht, dat ze dat boukje noa vattien doage oet kop konden. En doar zat e mit n groot perbleem! Elke oavend op zien koamer dee e zien gloepense best om de bou del tussen d’oren te kriegen mor hou of e ook ploeterde, hai kreeg t der nait in.
Zwaiten dokter, emmers vol!
Dou zien meerdere langskwam en vroug, wat der aan t haandje was, zee e: ‘Dat kin
ik nait! En al lees k t ook doezend moal, den lukt t nog nait!’
‘Wat kun je dan wel?’
‘Timmern en hoornbloazen.’
‘Nou, dan kun je toch wat! Ik zal kijken of ik daarin wat voor je kan vinden.’ En vot was e. Haarm bleef in spanning achter, mor was blied dat e zien verhoal kwiet was. n Poar doage loater komt de man weer langs. ‘Wat voor instrument speel je?’ ‘Trompet!’ zee Haarm mit n grode grijns op zien gezichte.
‘Dan denk ik, dat ik wel wat voor je heb. Maandag moet je je melden bij …’ (en hai nuimde n noam).
Zel wel aine wezen, dij n schuurtje bie t hoes hebben mout, was Haarm zien gedachte.
De man achter t bero bleek aine te wezen van de Koninklijke Luchtmacht Kapel en dij vroug hom n stokje veur te speulen.
Haarm, stutternd: ‘Dat kan miet, k heb mijn trompet niet bij me. k Wait nait of dat wel kin … oh, sorry: ik weet niet of dat kan. Het mondstukje moet wel passen hè?’
Ook dat was gain probleem. Dij wazzen der in soorten. Hai speulde de man n stokje veur en dij wuir aal enthousiaster. ‘Kerel, geweldig! Je bent aangenomen!’
Vanòf dat moment mos e weeklieks repeteren mit t korps en as e thoes kwam, stroalde hai t oet. En mor kwedeln en vertellen hou of hai t wel trovven haar.

Twij moal het e in Delft mitdoan aan de Taptoe. n Belevenis! n Joar of wat leden vertelde hai mie, dat e toch wel n beetje stom west was: ‘Dou k dainst oet ging hebben zai mie aanboden beroeps te worden bie t korps. Haar k achternoa doun mouten. Mor dou wol k nait zo wied van hoes!’
Hou roar … of mooi … kin t lopen?

“Joa, dat liekt mie wel wat, mor hou stelst die dat veur den?” Mien doofhaid speulde mie weer ais paarten, dou moeke veurstelde om n haai-tie te doun mit mien 79e joardag…

Zai ging onlangs deur t knije en zag aarg op tegen de kommende drokte. Begriepelk. d Haile dag in t enne en s oavends nait sloapen van aal dij drokte!

“Loat dien oren toch ais oetspoiten! En goa den ditkeer mor noar de brandweer! Ik denk nait an n vekaansie mor an dien joardag! n Haai-tie! In Mewoll bie Simone, waist ja wel… woar ik van t veurjoar mit wichter west bin!”
“Oh, dat Engelse gedou? Dat is toch wat veur vrauluu?”
“Joa, en ook veur ol wieven, zoas doe!, bist nou lekker?”
“Doe waist ja wel, da k al joaren van thee of bin….?”
“Dat wait k! Mor kinst der ook wel kovvie kriegen en t is der hail biezunder! Elk dijst der over heurst von t n belevenis. Ik dou t!”
“Doe dust mor” was mien antwoord. Al laank bliede, da k nait in t vlaigmesjien huifde en laange enden over t strand sjouwen mos.

t Feit, da k mien kovvie en tebak nait missen huifde was al n zegen!
En…, de lokoatie, dij ze kozen haar, dee mie ook deugd!
d Olle gaiterei in Mewoll, woaras vrogger kerkklokken goten wuiren deur Van Bergen en anno twijdoezendzestien t domein is van jongeluu mit n klaine bepaarken.
k Haar aait al n zwak veur luu, dij zogenoamd n beetje boeten de boot valen wazzen.

Dou ons dochter en schoonzeun de stap muiken om krisiskinder op te vangen, haar k doar wel n beetje mien bedenkens bie, mor dou k mit aigen ogen zag, hou dij bie heur weer op verhoal kwamen, was k ain en aal trots! Onveurstelboar houveul pech dat je bie joen geboorte al hebben kinnen!!

Bie aankomst wuiren wie al welkom haiten via n bord boven d ingang: ‘Welkom Familie Zonneveld’. Vuilde waarm aan!

De vraauw van de oetboater dee doar nog n schepke bovenop en gaf oetleg hou ain en aander waarkte.
Zai felesiteerde mie ook noamens aal t personeel en ik wuir zowoar verrast mit n klain kedoochie! Ain van d wichter mog mie t aanlangen.
Wat schuchter langde zai mie t tou…
“Wat ja mooi, da k n kedochie van die krieg! Dat is n kuske weerd!”, zee ik. Trok heur noar mie tou en gaf heur, zoas men dat tegenswoordeg dut, drij doekjes.
Volgens mien klaindochter schrok ze eerst even, mor glunderde doarnoa van oor tot oor! (“dat je dat zomaar deed…!”)

Der zol hail wat lekkers opdaind worden en t wotter laip mie al in mond.
De bedainen was prima. Jonges en wichter deden heur uuterste best om t ons noar de zin te moaken en dat ging heur best oaf. Kon nait beter!
En de hapjes op d schoalen … Kerel man, wat lekker!

Manluu wazzen t dik mit vraauluu ains: ‘Beter kon t nait!’
Schoonzuske oet Hoorn haar nog wel wat laanger wilt… Zai kon mit heur twij loagere schoul vriendinnen herinnerns ophoalen en den heb je an n poar uur nait genogt!
Dat elk zo genoten het, dee mie slim deugd.

“Aandermoal mor weer”, was mien antwoord, dou moeke vroug: “Hou vondst?”
“Bist maal? Dat douve nait elk joar! Elke bod wat aans!”

“Is mie goud heur. Doe hest goie ideeen!” En k gaf heur n ekstroa smokje veur wie sloapen gingen.

“k Haar t aans braid noar zin in Taiti!” sputterde ik noa… “k Huif nait aans!”

De toukomst kin je nait veurspell n….

n Beetje handeln zat ter bie mie al vroug in…

Op loagere schoule in Nietap kwam k tot de ontdekken, dat bie bakker van der Ploug in Roon eetboar pepier te kriegen was…

Ik op mien luttje deurtrappertje tussen de middag gauw noar v d Ploug en din veur n haalve of n haile cent pepier verkopen.

Loater in Scheemde, dito. Jan de Grooth, krudenier bie d toren, zee: is dit nog wat veur die, Klaas?

Hai haar net n partij deuskes mit stengeltjes zuit holt inkocht en ik kocht geliek twei deuskes….

Op t schoulplain zagen d jongs, dat ik op n stokje zat te sappeln.

Wat hest doar? Zuit holt! Ook n stokje? 2 Cent!

In n mum was k n pakje kwiet. Aal meer jongs woll n wel wat van mie kopen!

Dat ging zo n moand of dreie… Dou kwam Kootje Kuper noar mie tou en blafte: Wat bist doe ja n boef!

Kochst ja bie de Grooth!

Ja, en….? vroug ik: Mag dat nait?

Mis! Elk kocht t nou zulf bie Jan Hinderk.

Loater in mien trauwen net zowat. Wie woonden op Gasthoesloane in Scheemde.

Aal weke kwam ik bie Thoalens, achter in Wildervank….

Hai haar n winkel mit allerhande raive. Ook veul toenspul en omdat ik dou nog in n olle VW-bestel toerde, kon ik aal weke wel n vrachtje mitnemen. Via t Scheemter kraantje, dei wie dou ook nog oetgaa m, verkocht ik t weer.

Komt op n zundagmiddag Haarm veur t hoes langs.. Zwaaide tegen mie en laip deur.

Haarm was boukholder bie zien neef (van D.) in Veendam, dei in van alles en nog wat pengelde.

Dei is verdwoald vast, zee ik tegen moeke..

Moandags bie hom in de zoak bleek, dat e bewust keken haar woaras ik woonde!

Dus, doe bist de booesdouner! zee e….. Ik, mie naarns van bewust, keek hom onneuzel aan en vroug: boosdouner? Hou bedoulst?

Doe zitst in ons handel! Verkochst toenraive in ons gebied!

Joen gebied? Ie zitten ja in Veendam! Ja, mor wie verkopen ook veul in Scheemde en omgeem….

Doe stopst der voatdoadelk mit, aans krigst hier gain adverensies meer!!

Oh, eh, eh… stutterde ik… en kreeg geliek n inval tussen de oren!

Dat zel den wel mouten ja, want ik wil joe geern as klant holl n!

Mor ik heb nog wel n vrachtje zitten, dat mou k nog wel eem kwiet!

Dat brengst hier mor!!

Ok! Dat vin k netjes. Dou k! k Heb der wel oareg wat zitt n, goud? (loog ik)

Joa, breng mor!

Ik vervolgde mien route en stapde om n uur of vaare bie Thalens de winkel in.

Vertelde hom, dat k t buske nog geern n moal of wat vol hebben wol en dat k den stoppen mos!

De menaar, woarom snabde hai ook nait…. Kom vanweke nog mor n moal langs… k heb nog veul meer veur hom! zee e mit n grode grijns om bek.

Dat was k al van plan zee ik en heb nog n poar moal n buske vol ophoalt…!!

Ondanks da k n beste weke haar, ben k der net as an t eetboar pepier en t zuit holt, nait riek van worden!

Klainzeun Bram wuir veurege weke 10 joar en wol geern n VR-brille op zien joardag….

Oma: wat ja duur, dat douve nait heur!

Br: Ik dacht, iedereen E….. (nuimde t bedrag) dan valt het mee toch?

Gladjakker! Mor t lukte nait, oetverkocht! Nou n aanbaiden veur E 100,- meer!

Dat gait dus nait deur! zee voar en Bram kon t begriepen!

Guster kwam hai der mit n report aan….. kijk pap, mijn rapport.

Oh, nou al? Ja!

Ziet pap opeens, dat het rapport van 2023 is!

Der stait op: bevorderd naar groep 5!

Aine mit goie ciefers, dus goud veur buuskecenten!?

Doe Bliksem! Wegweesn!

Tot ainentwintegsten kin je joen biedroage inlevern veur Kreuze 52. Mien laive tied! Al weer n moand om? t Gaait mie aal veuls te haard! Dizze herinnern kreeg k van Bert Wijnholds ….en dat was goud! t Woord herinnern muik wat bie mie lös en was hier twijledeg ….
Herinnerns of, zo as Anita Witzier heur programmoa ‘Memories’, doun mie op dizze asgraauwe tied denken an ellende en schiere olle laifdes.

Dit joar haren wie de laangste zummer zeggen d’lu, dij t waiten kinnen. Mor net as vandoage hebben wie doar nait veul van maarkt! t Weer zel inderdoad wel schier west wezen, mor veur ons zulfs en in ons femilie- en kennissenkring was t haile joar aigenlieks net zo graauw as vandoage (8 dec ’14). Hier en doar n poar nije heupen was nog wel te doun …. om van de rest mor te zwiegen (k Wait zeker, dat Bert mie den in n volgende mail vragt om de boudel wat in te körten!). As t ainmoal begunt, komt t aal op bulten! En zo was dit joar veur ons dus ook. Bruier zat der net zo mit en haar t ook wel had. Reden veur mie om hom te nuigen veur n oetstapke. k Haar in d’kraande zain, dat ter in Laik, op Nienoord n ekspesietsie van 100 joar Laikster kraande was en omdat ons voar doar as kwoajong van 13 begund was te waarken, docht ik dat dat veur ons baaide wel n beetje ontspannen geven zol.
Gelokkeg zag e kans om zotterdags wat tied vrij te moaken: wie an d’raaize. “Wat n genot! Even n aander sfeer”, zee e dou e bie mie instapte. Tuurlek mozzen wie baaide ons verhoal even kwiet, mor noa n ketaartje zee ik: “Zo, nou over wat aans. Wie moaken der n zunnege dag van!”
“Dat is t ook ja! Schier weer en even ‘vrij’!” Ik dee d’radio aan en verduld …. de Erika Kapel speulde net zien populaire laidje ‘So ein Tag’. Beter kon t nait! Oet volle borst hebben wie mitzongen. De stress stoof der oet!
Bie Nienoord aankommen vertelde ik hom, dat ik doar voak mit ons voar west was. Dat was in d oorlog. Job Boer was dou de bewoner en haar der n fokkerij van Afghaanse Windhonden. “Den is t nou oareg mooier, ducht mie?” “Meschain wel, mor ik kon der dou ook hail mooi speulen!”
Ook de ekspesietsie luchtde op bie t zain van al dat olle raive, woaras wie zulf ook mit waarkt haren: n olle trapdegel, n heidelberger degel, kranten dij nog letter veur letter zet wazzen en aal t aander raive, was veur ons as n medezien! Bie t òfschaid hevve t nog had over d’oorlogstied. Doar was prakties niks van aanwezeg. Heb de man van Historisch Laik beloofd hom doarover nog wat op te sturen. Mou k nog aal doun! Kommende weke mor ais waark van moaken, ducht mie.

Op trograaize noar d’auto vertelde ik bruier, dat ik hier ook veur d’eerste moal traauwd was.

“Hè? Doar wait ik ja niks van! Bis t doe den al eerder traauwd west? Wenneer den?” Ik laggend: “Joa, dou wastoe ook ja nog mor n hummeltje dij pisdouken volmuik!” Hai nog verboasder: “En hou old wast doe den?”
“Zeuven”, zee ik en vertelde hom, dat ik op de Flint in Nietap op schoule goan haar en mainde, dat ik al wat scharrelderij haar mit Jantje. n Poar oldere kinder bedochten, dat wie wel n bruloft organizeern konden om wat lol te trappen. Baaide wat opdoft mit olle polten togen wie noar Nienoord. Der heurde ja ook n feestmoal bie! n Emmer vol beukeneutjes opzöcht in de bozzen bie Nienoord en dij achter d’schoule onder t fietshok opbakt in roombotter.
“Roombotter in dij tied?”
“Joa! Haar ain van d’boerenwichter bie moeke oet d’kelder snaaid!”Bek vuil hom open van ongeleuf.

Onderwegens noar hoes mos mit alle geweld t ploatje ‘So ein Tag’ weer draaid worden.
Thoes kommen vertelde ik moeke, hou of wie t had haren en tegen t brood-eten haar k t bekje nog aal aan schieterij ….
“Hier”, zee ze en langde mie t bordje tou. “Nou mor n zetje kaauwen in ploats van kaauweln.” Geliek haar ze, ik pruifde dat zai der genogt over heurd haar en begon an mien eerste stoetje. Tenminste, dat wol ik, mor dou rappelde de telefoon. “Dat kin der ook nog wel bie!”, was moeke heur reaksie.
“Mit Klaas.”
“Mit Jannie B”, was t antwoord.
“Jannie B.? Dij ken ik ja nait! Sorry, ie mouten even dudelker worden!”
“Kinst Jantje H. den nog wel?”
Ik ston paf! “Wat? Eerlieks? Bistoe dat echt? Hou is t meugelk! Ik haar t vanmiddag mit bruier over die, dou wie op Nienoord wazzen bie d’ekspesietsie van t Leikster kraantie! k Vertelde hom van ons traauwen. Herinnerst die t nog?” “Nou en of!”, en zai giechelde as n bakviske. “Doar wol ik ook eerst hen, mor t is mie in d’schounen zakt. k Heb der ook joaren waarkt!”

Meer as n uur loater at ik mien brood op! “Kerel man, wat glunderst ja!”, was moeke nijsgiereg.
Zai was minder blied as ik, mor op berre wol mie t verske ‘So ein Tag.’ nait oet kop! Zo tegen de kaarstdoage as t aarg donker is en as doarbie t oflopen joar ook oareg roeg west het, is ain zo’n oetje opains weer n geweldeg lichtpuntje!

‘So ein Tag, die müsste nie vergehen!’

Ik wens joe geern net zokse oetjes. Krieg je weer wat locht.

Schiere Kerst en n goie joarwizzeln!

Wilst nog wel eem noar d maart? vragt moeke.

Mit dit weer? Nou tou mor den mompelt Appie, as e zucht dat t olske wat sneu wordt.

Ja, wel aans… ik ken t ja nait!

Moeke het t nait te roem… al laanger as n joar slim muide.

Op maart komt e Kneles tegen.

Duur stoe der ook nog oet? vragt dei.

Mouten is ook wat he!

Och man, ie loaten joen hond der ja nog nait oet!

Nee, mor moeke het der vast n reden veur, oppert Appie.

n Reden? Wat mout dat den wel weesn…?

Nou ja, zai het ja gain hond!

In 1944, d oorlog nog in volle gang, wazzen wie op veside bie mien Grootollen. Opa, ‘Eppie’ haar wat koien en as dij molken worden mozzen, ging hai met Wodan (n trekhond) veur d kaare zo’n drij kilometer richten t Laikstermeer noar t gruinlaand, woaras koien laipen te groazen.
Noatuur en kinder wazzen zien alles.
Tegen vaar uur wuir Wodan veur kaare spant.
‘Tied om te melken’ was zien vaste taimke, woarmit hai aangaf dat e noar t laand ging en tegen mie: “Gaist mit mien jong?”

Wies as ik was as ik bie opa weden kon, ken je joe begriepen, dat mien antwoord gain nee was…
Over t hobbelege padje (zo n 80 cm braid) langs de Roonervoart stoof wie noar t laand. In werkelkhaid was t vast nait zo haard as ik dou docht…
Moar as kind heb je voak gain notie van dat soort dingen.
Wodan haar aan t comando ‘Vot’ genogt om de sokken der in te zetten.
Noa t melken gooide opa de volle bussen op kaare, en zee dat ik t spul wel noar hoes mennen kon…

Mit n braide smail op t gezichte gaf e mie d laidsel, sloug Wodan op kont en zee: “Vooruit moar, op hoes aan!”
Dat was even teveul veur Wodan en hai bleef den ook prompt stoan…
‘Vot’ was doarom t volgende comando en doar stoof t spul hen.
Mit n bloudgang over t smaale hobbelege pad en stoef langs t wotter.
Melkbussen slingerden hén en weer, moar smakten der nait oaf…

Dou Opoe t spul aankommen zag, sluig ze d handen veur t kop en ruip: “Dij verrekte domme kerel. Hou krigt hai t in kop om luttje jong allaind mit kaare noar hoes te sturen. Hai haar ja wel verzoepen kent!”
Ik, zo trots as n paauw: “Moi opoe, ik mog zulf mennen van opa…!”
“Joa, dat zai ik” mompelde zai binnensmonds.
Zai huil zok in om mie…

Moar dou opa noa n drij ketaaier aanlopen kwam stoof ze noar dam en foeterde hom d hoed vol!
“Ik wait, dat der nait veul onder dien pedde zit, moar dit gaait ja alle paarken te boeten! t Kind haar ja wel verzoepen kent!”
Bloazend van niedeghaid stoof ze in hoes. De deure wuir mit n smak dicht gooid asof ze wol, dat hai hom veur d kop kreeg…
d Òl wuir der echter nait hait of kold van: “Dij trekt wel weer bie”, zee e glimlaachend.
“Doe kist al hail goud mennen, mien jong. Ik krieg vast wel n goie knecht an die!”
De schrik dij ik opluip van opoe heur kwoadeghaid was in ainmoal vot!
Aanderdoags op schoule heb k mien schoulkameroaden verteld hou goud ik al mennen kon mit hondekaare!
t Is nait wizze, moar ik haar wel t gevuil, dat zai gloepens òfgunsteg op mie wazzen!

Gewoon aarns aanmelden! Nait zo muilek toch? (Zol n ie ook denken vast?)

Dat t naait aait zo makkelk gait is jammer genogt ook n woarhaid….

Ik opperde moeke, da k weer ais wat doun wol. d Haile dag achter de geroaniums is ook ja niks….

Vanweke ston der n advertentie in t Nijsblad van Sint Lucas in Winschoot.

Zai zuiken luu, dei Grunnegs proaten omreden, dat oldere mensen dat t laifst heur n. En veuraal: beter snappen!

Dei mout je den begelaiden noar t stee, woaras ze wees n mouten.

Hest dei kraante nog?

Messchain wel, kiek mor bie t ol pepier!

t Was al n tiedje leden en t zuiken wuir doardeur nait makkelker! Gelukkeg haar k t old pepier nog nait vot brocht!

k Haar gelok, hai lag onder in d grode puut!

Tillefoonnumer ston der bie. Kreeg n wichje an d liene en mit heur heb k n oafsproak mokt veur n gesprek in t Zaikenhoes.

De laidster doar, bleek de vrauw van n collega te weesn en zai was duchtmie nait bliede, dou ze mien noam heurde…

t Gesprek haar ook wel wat vlotter kent! Aan t enne zee ze: wie mouten der nog eem over vergoadern. Ie kriegen bericht.

Noa n dag of tiene inderdoad n braif. Ie worden op wachtlieste zet, omreden, dat wie momentail voldounde hebben!

Wieder mor nait op reageer n… k Vin wel wat aans…..!

Ook weer in t Nijsblad, n advertensie van t Grafisch Muzeum. Zai vrougen old gedainden, om t Museum in tact te holl n…

Dat liekt mie nog mooier docht ik en vot aanderdoags der hin!

k Wuir ontvangen deur -Nou ja, ontvangen!- n Man mit n snorre en n dikke kromme piepe schaif in de mond.

k Gaf hom n haand, zee mien noam en vertelde, woaras ik veur kwam.

Heeft u veel ervaring ? wol e waiten. Nogal zee k.

Was u drukker/zetter? Ja, en snieder, binder. Wie haar n n aigen bedrief en hebben alle facetten zo n beetje had!

Oh? En hoe lang was dat? Roem vatteg joar!

Zien gezichte betrok wat. Hai haar mie bie d aankomst verteld, dat hai chef zetterij west was bie n groot bedrief! n Joar of twaalm..

Nou wil k nog geern eem n rondje deur t muzeum moaken zee k noa t gesprek.

Mien haart ging aal vlogger…. n Olle Gordon degel, n sniemechiene mit n slingerrad, letterkasten en nog veul meer..

Man, man, net as in onze beguntied! ’48!

Nou mor noar hoes. k Laip weer richting de ,kromme piepe’ en vertelde hom, da k laaiend enthousiast worden was.

Hai keek doar wat zuneg bie. Ik langde hom d haand en zee, dat e mie alvast wel inschriem kon..

Dat is goed. Den mout je mien adres ja nog hebben? Oh…. ja. kwam der veurzichteg oet.

Bie t votgoan docht ik: dit vuilt net as bie t Zaikenhoes! Zel ook wel niks worden?

Net zo as t was…. nooit ain woord of letter meer van hom heurt!

Bie de gemainte ging t wat beter. Soamen mit n poar kameroaden ging ik voak noar de roadsvergoaderns…

Op ain van dei vergoaderns zaten wie noa de vergoadern nog wat noa te proaten in de kantine en kwam van mie de vroag over vrijwilligerswaark.. Oh… mor wie kenn n nog best wat luu gebroeken as Sr. veurlichters bie Binding!

Ken k ook wel doun, k zel mie melden!

Op de eerste ontmoeting vot al wat n roare smoak…. Wie kregen n lieste mit noamen van luu, dei ve intervjoen mozzen en kieken of we dei aarns mit helpen konden. Elk kreeg vief adressen mit. En mos e de moand der op inleveren.

Ik kon t nait leum, mor t bleek dat meerdere vrijwillegers mit ,lege’braifkes trogge kwamen. ,Ik ben er twee keer geweest,

beide keren niet thuis en ik ga niet nog een keer! Deze meneer was niet geinteresserd!’

Van de vieve wazzen voak amper tweie invuld! Ik vond, dat wie wel wat meer luu bezuiken konden en stelde de laider veur om te starten mit tien/vieftien noamen? Houveul luu benn n der totoal in de gemainte, dei wie bezuiken mouten?

Zo n zeumhonderd…..! Zoveul??

Den biff e over tien joar ja nog nait kloar! Dou mie mor vieftien! De rest van mien collega s hoakten bienoa apmoal oaf in n joar. Dat kwam nait allend van mie… de organisoatie was ook aarg rommelg. Ain van mien moaten zee ook: Met ,Binding heb ik geen binding!’ en mit ons baide hebben wie onze dou mor aanmeld de Zunnebloum.

Noa vaarntwinteg joar deur de Corona ging dei in ’23 ter ziele en dat spiet mie nog aal doage!

Prachteg en dankboar waark.

Vrijwillegerswaark is net as in t waarkzoame leem, dus ook nait zoas je voak denken, mor t kin wel gloepens mooi wees n!!

Mit toal kin je speulen…
Al joaren meel ik inmiddels mit mien nicht (Bettie) oet Roon.
Vandoar de titel van dit stokje.

Zai is ook gesjameerd van dialect.
Zit hom in de genen, vast?
In t begun, dat wie besloten mekoar zo nou en den te meelen, heb ik pebaard mien Roner dialect te broeken (wat dou slim stoer was!)
k Was der al zesteg joar vot!
Bettie, alias Hunebettie, nichtoetroon en zuks meer zol den in t Grunnegs schrieven.
Inmiddels is dat n beetje verwotterd en douve net as t oetkomt.
Dit onder t mom: aal wat mout is minder mooi!

Veurege moand kregen wie in d kop om ook ais Westerkwartiers te perbaaiern… Heurt verdomt schier en t leest ook nog goud! (en.. t klinkt wat vrundelker as t aander Grunnegs) sorry heur!
Ie mouten waiten, dat wie baide op de grens van Noordenveld en Westerketaaier geboren bennen en dus van baide dialecten wel wat mitkregen hebben.
Bettie is geboren an de Heuloan -de weg noar t Laikstermeer- en ik an de Leeksterweg, 100 meter wieder.
Achter ons hoes hadden wie De Natuurschoon, geweldeg veul bos mit vievers, doevetil, hertenkamp enz.
n Woar oard veur tieners om te speulen en heur woare ‘ik’ te vinden.
Aan d aander kaante van d stroate was de weg noar t meer. (Nou Meerweg, in ons tied : Heuloan) n Kilometer of drij vaare.
In de Noordmannen van n poar weke leden, gaf Wiebe Kleinstroa aan, dat hai in zien jeugd aait mit pa en moeke kampeerde bie t meer an stadskaante. Den voarden wie mit t bootje noar Cnossen aan d aander kaante.
Dat was mien mooiste steetje op oarde! Zee Wiebe.
Heb k geweldege herinnerns aan!

Leekstermeer
Cnossen jr. aan ‘ons’ kaante van t meer mos dat beoamen. ‘Ik ben hier geboren en inderdaad: t is ook mijn mooiste plekje van de wereld!’
Over heur oetsproak was ik nait verboasd…
Wel blied!
‘Dat is mien jank west om elke bod, as ik vrij was trogge te goan noar mien geboortestreek!’ Docht ik.

Nietap t mooiste steegie in de wereld!
Gain wonder, da k zo zaik wuir, dou wie der vot wazzen!
De Natuurschoon.

Dunderdag 19 juli 2018: twijde bieainkomst 80+ flinten!

Dou ik veureg joar 80 wuir, kreeg k gedachten aan mien tied op d loagere schoule… Ik was dou tien joar en k mout zeggen, dat mie dat zeer aangrepen het. (wie verhoesden van zaand noar klaai…) Van Nietap noar Scheemde.

Zeuventeg joar loater wuir k nijschiereg welke luu nog leefden enz.
Gelukkeg haar k t adres van twije en dij heb k vroagd of zai der veur vuilden om mekoar nog ais te ontmoeten.
Dat was nait an dovemansoren zegd… Aanderdoags al an telefoon: ‘Loat we vot mor n doatum nuimen!’

Wie gingen noar t restaurant De Es in Roderesch.
Prachtege lokoatsie! En geweldige hapjes, al haren wie doar nait zoveul aandacht veur as veur mekoar, vanzulfs!
Wat n herinnerns! Bie leven en welzijn aander joar weer! Was aller vaste overtugen.
Dus vandoage vannijs. Nou was t mien beurt om t ain en aander te regeln…
Omdat je op dizze leeftied nait meer zo vereg en vlogge bennen, en wat minder auto rieden, was mien veurstel: n lokoatsie in t Oldambt?
k Rie laiver vief as viefteg kilometer, mout je waiten!

Was heur best noar de zin. Gelokkeg mor!
n Schiere lokoatsie haar ik wel! t Rozenpaviljoen of… Wedderveer…?
Dou mor in t Rozenpaviljoen, zee moeke. n Schier stee en d rozen bluien denk ik ook nog wel… (dat haar ze mis: Waarmte en dreugte haren de fleur der al oafhoald!) Jammer!
Dit joar was der n kammeroad extroa. Jacob Noord haar heurd, dat wie bie n kander west wazzen en wol dat ook geern!

En Jacob zat bie mie nog schaarp in beeld…
Op zien achtste kwam e -noa laange oafwezeghaid- mit n bain in t gips klasse instrompeln…
Juvvraauw vertelde, dat hai net trogge was oet t groot zaikenhoes en zien knije kepot had haar… (loater bleek, dat e d heupe totoal verbriezeld haar!)
Bleek, dat n mof hom aanschoten haar…!!!
Dou wie vandoage onder d boom in Sodom zaten, wuir ik aal nijschiereger… en k vruig op n gegeven moment, hou of hai dat ervoaren haar?
‘Dat emotioneert me nog steeds!’

Hai was indertied in t gruinlaand an t speulen west en poestte wat oet op zo’n olderwets holten draaihek.
Opains kteeg e n swoare klap op t bain en donderde van t hek oaf…
Gieren van de piene en dou tegen de vlakte!
‘Mien ollen in paniek en mien voar as n gekke zuiken noar vervoer hén t zaikenhoes’.
Zoas mie verteld is, het e n brandstofhandeloar vonden, dij dat wel doun wol.
Mos e nog wel even de kolen der oaf halen!! (dat kwam in de gasgenerator boven op t dak van d auto!)

‘Bie t Akkedemisch hebben ze mie in ain van de barakken legd, dij der dou nog noast stonden…
Dat was vlak veur t bombardement! Elk wuir overbrocht noar de kelder… mor dou ze bie mie stonden, zee de dokter: Laat die maar liggen, gaat toch dood!’
Net as hai haar ook ik wotterlanders in d ogen! Stel joe veur: den bin je aachte!!

Op schoule luiten zowel meester as mede-leerlingen (gain klasgenoten) hom vallen… De leste twij klassen het e oafmoakt op n aander schoule!
Soldoaten en kinder bennen voak haard!

De schutter haar loater zegd: Ich meinde es war eine Katze!!!
Ja, ja!!!
Ken mie der nog helleg om moaken, mor de aander herinnerns wazzen gelokkeg van n vrolieker kaliber!
Aander joar weer?
Geern!!

De weelde van nou gooit mie even trogge in de tied. Ie zellen wel zeggen: weer zo n olle stroek, dij maint dat t vrouger zoveul beter was … Dat is vanzulf nait zo, al kin k dat best begriepen. Joa, op oldere leeftied haar je t vrouger mooier. Ie wazzen ja jonk en den heb je gain prakkezoaties. Bie t older worden en leven in n hail aandere wereld, denk je doarom geern n moal trogge.
Veul lu binnen nou verzekerd van n goud inkommen. Elk van ons krigt zien Drees, vanòf 67, vanzulf.
Vrouger was de gulden op de maart n doalder weerd. Nou zeg ik voak: op de maart is joen euro nog n gulden weerd! Omreden dat je der nait barre veul veur kopen kinnen. As smoker oet de tied van twij kwartjes veur n pakje sigaretten geef k nou € 8,40. Nou zeg ik joe!
Mien gedachten goan noar Oostwold. Nait in t Westerketaaier, mor in t Oldambt. Doar haren wie n kraandeloper veur t bladje Midwolda-Oostwold. Ook was e boderieder, verkocht e gasvlèzzen en brocht de post rond. Twaalf ambachten … nee, gain dattien ongelokken! Aan ain boantje haar je in dij tied nait genogt om rond te kommen, paartie lu pakten ales aan om te overleven. Oh joa, grafgroaven dee e der ook nog bie! En doaroet komt ditmoal mien verhoaltje …
t Was n beetje n graauwe dag en d’begraffenisverainen wol geern dat H. n graf gruif veur n overledene.
Noa n poar uur groaven haar e der al zowat n meter grond oet en was doarmit bienoa op daipte. De wolken boven hom wuiren aal zwaarter en hai bedocht, dat e t kapke der alvast mor boven zetten mos, veur t geval der wel n zwoare bui omdele kommen kon. Net dou e dat veurkander haar, begon t al te sputtern.
Nog gain ketaar loater goot t dat t scheet! En nou, mout e docht hebben. Onder t kapke! Gainain dij mie zugt, t is ook ja nait aans. k Mout mie behelpen.
n Ketaartje loater heurde e stemmen en nijschiereg as e was, keek e mit zien moagere kopke over d’raante van t graf. n Jong steltje in zummergoud wos nait wat heur overkwam en loerden in t rond, om n schoelsteegie te zuiken. d’Ol man haar mit heur te doun en raip haard: ‘Kom hier mor heer, hier zit je dreuge!’ t Steltje keek oetzied en zag n liekwit, smaal kopke oet t graf steken en schrok zok de blubber!
In ploats van te schoelen, zetten ze t op n draf noar d’oetgang! Den mout je t zulf mor waiten, zel d’ol wel docht hebben.

Optaikend as woargebeurd deur

Albert en zien bruier kregen muite over t belaid op d oll n heur boerenstee.
Bruier docht meer in geld…. Albert in goie gewassen.
Dou Albert vernam, dat e nait tegen zien bruier op kon, het e der mit kapt.
Mit n jutezak vol goud is e de wiede wereld introkken, op zuik noar vree.
Vanoet Tolbert belande hai bie de Belt an de Ronervoart en zag doar n poaltje mit n stok karton der aan. Te koop: acht deemt grond om te ontginnen… te bevragen bij…
Het was n aarg drassege boudel. Zeg mor gerust: n Moeras!

t Leek hom wel wat! Hier kon e zien gang goan. Zien aigen kop volgen!
En wat n rust! Wel n koppel waark, mor doar zag e nait tegen aan…

Binnen n poar doage het e t kocht. Op de Belt lag rommel zat om van te baauwen.
Teerblikken, golfploaten en zuks meer. Doar het e zok n hutje van baauwd.
Gain licht, gain wotter. Van alles niks!

Mit n proam, dij e omschik kopen kon ging hai der op oet om zwaarde grond aan te hoalen. Totoal het hai d haile lappe zo’n zeumteg sentemeter ophoogd!
Meer as n joar zwoare arbaid!
Dou bleek, dat der gain oafwottern was… Nog aal kon hai nait zunder stevels over zien bezit bentern!
Rondom den mor sloten groaven…
Dat gaf locht! Nou kon e gras zaaien en begunnen mit poten van eerappels, bonen en dat meer.
d Ol jong kreeg der moud van en luip doags te zingen in zien Parredies.

Mit n zaais het hai zien eerste gras maait en heut.
Dou kwamen der schoapen. Was makkelker en brocht ook nog wat op.
n Twijde hutje wuir baauwd om zien gerief op te sloagen en veur zien schoapen, zegen, n poar pony’s, n kaalfke… De veistoapel gruide as kool! Laand zat!

Via n smaal dakgeutje vong e t regenwotter op en kon dat via n slim vernufteg systeem mit n kroantje oaftappen.
De Belt was ook hier zien leveransier! Net as veur t licht!
n Grode zaklanteern broekde om zok bie te schienen as e der s naachts oet mos om te pizzen.
Wieders haar e gain licht neudeg! Zo gauw as t duuster wuir, was t sloapen en bie t lichten opstoan en an t waark!

Albert was gek op zegemelk. Aal doage anderhaalf lieter!
‘Bitter in de mond moakt t haart gezond’ was zien leus.
Socioale kontakten haar e nait. Enkel Wim Ploug, (mien schoulkameroad van d loagere schoule in Nietap) dij zien laand an zienend haar.
Het het n mooi zetje duurt, veurdat e kontakt wol, mor dou e vertraauwen in Wim kreeg was t kloar. Eem teuten mit n bakje zwaarde joege en mekoar helpen as t zo oet kwam.
Op zien drijennegentegste is Albert oet tied kommen.
As dank veur zien vrundschop het hai Wim t Parredies noaloaten.
Mit mien voar heb ik Wim doar n bezuik brocht. ‘Kerel man, wat ja n hemels stegie’ ruip mien voar en ik was t doar volmondeg mit ains!
Wim het der nog 25 joar plezaaier van had. Ook Martje, zien vraauw, dij der eerst niks van waiten wol, ging loater mit hom mit.
Der mos den wel n karrevan kommen, want in dij oale hut wol zai nait sloapen!

Wim haar n bult gelok! Mor… ook veul malheur!
Nou is e Martje kwiet en ook zien laand mos e vanwege zien leeftied verkopen…

Mor vannijs lacht t gelok ons tou!
Soamen mit ons allerlaifste vriendinnegie van d loager schoule, Jantje, hebben wie veureg joar ons tachtegste joardag viert in Roneresch.
En…. de oafsproak moakt, dat wie, -zo laank as dat kin- doar mit deurgoan! (en dat noa zeumteg joar…)
Houveul gelok kin je hebben!

Jan woonde an de Laangeweg in Scheemde, gitswaart hoar en vlaigens rad as t om voetballen ging.
k Haar nog noeit zo n speuler zain!
Joa, loater wel vanzulfs, dou Cruiff in beeld kwam…
Volgens mie was Kiete nait minder as Cruiff, al vinden ie dat messchain gain vergelieken.
Loater, in de joaren viefteg -hai was n joar of zestien zeuventien?- speulde hai al in t eerste van Scheemde! (dou dertied daarde klasser)
k Heb ait al n moal over hom schrieven wilt, mor t bleef der bie.

Tot in 2018 t WK op t beeldschaarm kwam…
Al ben k al joaren gain laifhebber meer, de partij woarin de Kroaten speulden, brochten hom veur mie weer in beeld!
Doar zaten ok n poar Kietjes tussen, zag ik!
Al mout ik der bie zeggen, dat dat der meer op leek den as t was.

Kiete was fel en fanatiek en was nait baange om n aander baaintjen te loaten of n scholder te geven. Eelsk noar de grond omdele goan, as e t nait redden kon, dee e nait! Noeit n keer! Vechten! Nait jeuzeln!
Mor vergeten? Doar was e barre slecht in…
Bie t eerstvolgende duel tegen dij speuler, zol dij zien haile leven bieblieven, dat e tegen Jan Kiete voetbalt haar.

Dat wos zien voar Alko ook bliksems goud! Dij wol, as ze op n veldje aan d Laange weg an t trappen wazzen ook wel ais stoer doun en hoalde d jeugd den lachend onderoet…
Bie Jan was dat noa n poar keer wel oaflopen… Dij spoarde ook zien voar nait!

Jan was n echte vechter! Gaf noeit op en haar n conditie as n peerd!
In t eerste van Scheemde kwamen zien tegenspeulders hom wel drij keer tegen in n wedstried. d Bek vuil heur open van verboazen, as ze hom passeerd hadden en hom vannijs tegen kwamen.

Jan verdween bie mie oet beeld…
Hai haar waark vonden in Veendam.
Doar haar e joaren bie n boas waarkt, mor was e mit n kwoaie kop votlopen…
Dat haar veur hom male gevolgen: Gain oetkeren!
Laip n beetje bie t pad te zwindern en verveelde zok steveg!
Niks veur Jan.

‘Gaist mit noar Sodom? Doar is braand!’, vruig zien moat Wilm.
Omdat e zok toch verveelde, was hom der gain koare an hakken bonden en togen ze richten Winschoot.
In Westerlij kreeg zien kameroad n lekke baand en is Jan allend deur goan.
Zien kameroad wol nait wieder.

Aankommen in Winschoot, bleek dat de Venne oafsloten was.
NEMA ston in de fik! En wat veur aine!
Dikke rookwolken boven t centrum, d locht was der swaart van.
Mit fietse an d haand perbaarde Jan zo dicht meugelk in de buurt te kommen.

n Poar uur loater, onderweegs noar hoes het e besloten aanderdoags nog ais te kieken en dou was t gelok mit hom…
‘Zit der wat veur die bie?’ ‘Wait k nait, mag k ais kieken?’ Zo kwam hai bie n bult zaklanteerns, dij wel swaart van t rout wazzen, doch oareg nuuver in tact.
‘Mag k dit ook aal mitnemen?’
‘As t ons der viefteg gulden veur dust, bennen ze veur die!’
Jan haar sikkom gain inkommen, dus ook gain viefteg gulden!
‘k Zuik d boudel bie n kander en den kom k dammeet weer… Goud?’
Hai noar zien moeke en vraauw om geld te lainen.

Aanderdoags haar e baide an t poetsen, om de boudel verkoopboar te moaken.
Smiddoags vot op stap om te kieken of dat ‘goud’ te slieten was…
Tegen acht uur soavends kwam e mit n grijns op t gezichte en n dikke rooie kleur op kop weer thoes.
‘Super! Wat n handel! Hier hebben ie de vief sofies weer en den heb k ook nog zeuventeg gulden over! Wat n schiere dag!’
Bie zien leste klant dij dag haar e n bestellen van 150 stôk!
Mos e wel binnen n weke levern… Moeke en vraauw tot daip in de nacht an t poetsen. Lanteerns inclusief batterij veur fl…?
Batterijen kon e veur niks mitnemen haar de verkoper zegd! (omdat dij gevuileger wazzen veur hitte)

n Poar joar loater mos ik van mien voar noar Zuudwenden en De Wieke.
Volgens hom kon ve doar ook nog wel wat adverteerders vinden?
En verdold! Dou kwam k bie Jan in d winkel… (n ol bakkerijchie)
‘Ah, Klaassie, wat bist doe ja wied van hoes mien jong. Verdwoald?’

Ik zee woar k veur kwam, mor wol wel geern eerst waiten woarom hai noar d Wieke goan was en doar n bedrief start haar.
‘Goa mor mit! Wat wilst van mie kopen? n Wasmesjien, n fietse, n plof of n zak mit onderdailen? Ik heb t aal!’
k Heb mie d ogen oetkeken. Zulfs in zien hoeske en rond t berre lagen honderden onderdailen van fietsen en brommers!
t Wiefke mout der mor over hín stappen as ze op berre wil, k heb veuls te min roemte!

‘Hou wordst weer kwiet? Of beter: hou komst doar wel aal aan?’
‘Oh, dat is gain probleem! Aal zundagsoavends vlaig ik noar d maarkt in Apeldoorn en Utrecht!’
‘Ik sloap in mien bestel. En k heb voak tegen vief uur al koopluu bie deure.’
‘Jan? Ben je wakker? En den gaait de handel loos!’

‘n Poar moand trogge haar k in Apeldoorn nog n koetse kocht…
Dij heb k achter de bus knupt en ben k mit noar Utrecht voaren…
Onderweegs aanholden deur twij blauwpetten…
Mag ik uw papieren even zien? Joazeker! Asjeblieft!
Jan Mulder?
Joa!
Familie van?
Ja, das mien neef. Beste voetballer hé!
Zekers! Rijdt u maar door. Wel voorzichtig hé!’

‘In Utrecht kon k dat ding ruil n veur tiendoezend fietsbanden…
Aal swaarten zunder reflectie… (even veur de reflectie verplicht wuir!) Kl.
Heb k sleten an n boetenlander!’

Voetballen haar e overgeven. Joaren laank dee e an motorcross…
Bienoa tot aan zien dood! t Leste joar mit nummer 62 (zien leeftied)
Ook toun kwam de jeugd hom voak tegen…
Was der aine, dij hom van de boane drôkde, den ging dij gegarandeerd in de volgende race zaand vreten!
Kondietsie gain gebrek, hai trainde aal doage: 25 boantjes om zeuven uur in t zwembad en noa t waark mit de ‘jeugd’ noar Gaiten om zien rondjes te runnen in t bos.

Op zien drij-enzestegste is e oet tied kommen… haartstilstand, in d ol eerappelmeelfabriek op Zuudwenden, woaras hai dou woonde.

Zuudwenden was sikkom te klain, dou Jan zien gigantische veurroad vailt wuir! (foto: Fam. Sluis, archief O’wijk-Zuidwending)
t Febriek was wel honderd moal groter as zien eerste winkeltje in d bakkerij op de Wieke!

Daip respect!!

Tieden veraandern, en as je n beetje bieblieven willen, mout je doarin mit. Bie t older worden wordt dat aal muileker … Joen denken is boaseerd op joen levenservoaren en joen gevuil. Veuraal lu dij veur de Twijde Wereldoorlog geboren binnen, zo as ik, kinnen t anno twijdoezendtwijentwinteg amper nog biehollen!
Paartie lu verdainen mit 28 uur in d’weke al n moandloon woarvan zai zok oareg redden kinnen. Hoezen van n miljoun kiek je nait meer aans van oet. Energiepriezen vlaigen d’pane oet. n Rieksdoalder veur n liter bezine liekt hail normoal. Ik kin mie doar oareg drok om moaken en vroag mie òf hou laank dat nog deurgoan kin (olderdomskwoalen?).
De jeugd het der veul minder muite mit. Dou oma lutje Bram van d’weke vroug of e al n lieske haar veur zien joardag – hai wordt aachte – zee e: ‘Nee, maar ik kan je wel even op de pc laten zien, wat ik graag wil hebben.’ Oh?
Hai achter de kompjoeter en toonde ons zien speultjes dij e geern hebben wol.

Aine van vieftien euro, aine van roem datteg en de duurste … 263 euro!
‘Nou,’ zee oma, ‘da’s mie veuls te duur, hur, dij krigst nait!’
‘Dat hoeft toch niet duur te zijn?’ was zien antwoord en hai verkloarde: ‘Als de Mulders en de Zonnevelders dat samen doen, is dat niet zo duur. Ik hoef maar 2 kadootjes en ik doe er zelf ook wel dertig euro bij.’
Opa gnivvelde: ‘Zo kin t ook. Dij bliksem!’ En der vot achteraan: ‘Meschain is dizze tied toch zo gek nog nait!’

Al roem vatteg joar traauwd is mit Jozefias (zeg mor Jos), het t endelk veur n kander….. Heur drij daimt laand is nou ain grode bloumtoene!
Dat was in t begun van heur traauwen wel aans! Eerappels, bonen, siepels, rabaarber, kool en wat nait aal……. Jos zaaide, pootte, onderhuil en oogstte letterlek en figuurlek veur zien leven! Voak soavends noa zien waark mos hai der heer. JELSKE DEI dee veur hom nait onder.. Bonen zolten, inmoaken, wecken, dreugen en breken was heur waark. Eerappels kraben, mous strupen en appels plokken ook vanzulfs. En dat noast heur dikke hoesholden mit vief kinder woaras zai overdag handen vol aan haar!
Om vief uur kwam Jos thoes. Den haar Jelske de pot kloar en kon der aanschikt worden. As ale moagen vuld wazzen, wossen de oldste kinder oaf en muiken lutjesten op berre. Voar en moeke kropen den al laank op handen en knijen over t laand. Tegen de winter, in november as t leste gewas zo’n beetje oogst was, wuir de haarfst oafsloten mit t slachten van t swien.

d’Haile oogst kwam in de kelder. Stokken swien kwamen in t vat, gezolten en aal en wat schenken en worsten in de weme. Veurroad genogt om winter deur te komen. Zai haarn nooit gain verlet en baaide wazzen zai ter over ains, dat der goud eten op toavel mos. Kinder mozzen goud dijen en staark worden. Konden zai der loater ook goud tegenaan….
Dat was aal in de joaren 1960-1970… Nou beuren zai gain centen meer, moar Euro’s! Kinder hebben t aaltmoal goud en Jozef vrift zok aaid in handen as zien Drees weer bieschreven is.
“Wat hebben wie t goud hè, moeke!” kraait hai en bakt heur der voak nog aine veur! “Joa”, ropt Jelske den, “oareg beter as vrouger mit dij pokkel vol waark,. k Ben blied mit mien bloumtoene! Kiek toch ais, wat n bult kleuren…. En wat n vlinders!” Ol Jozef geniet van heur plezaaier, vuilt zok der zulf ook nuver bie en elke oavend bie t noar berre goan zegt hai zaacht: JELSKE DEI! Zoas hai dat heurde van zien Deense schoondochter woaras lutje jong veur t eerst mit thoes kwam…….

Leven en dood…

Bie t lees n van de titel zel n ie joe oafvroagen:
Jong Ootje… 102?
Al liekt dat wat krom veur n boetenstoander; veur ons, klainkinder, was zai aait jong ootje!
Dat kwam, omdat ons aander opoe van moekes kaante dou older was…! En… veur t gemak Ol Ootje nuimd wuir.

n Forse, stoere vrouw, recht van ziel en leden.
Aait rechtop op stoule en nooit verlegen om woorden.
As je op bezuik kwamen, haar ze maisttieds wel n taimke of verske oet vrouger tieden.
Zai was de zestiende in t gezin, woaras der dou nog vattien van in leven wazzen.
t Traauwboukje was al vol! Zuuneg as men dou was 1895… wuir heur geboorte bieschreven op t omslag!

Veur zowied dat kon in dij tied, haar ze n goud leven.
Heur bruirtjes en zuskes wazzen wies mit heur en zodounde mos ze nogal ais heurn, dat ze verwent was…
Op heur twaalfde kwam ze van schoule. Dat dee zeer, want zai mog en kon goud leren. Mie dunkt, as ze in dizze tied geboren was, haar ze vast heur HAVO mit glans hoald.

Lezen was op loatere leeftied heur hobbie.
Dou wazzen kinder t hoes al oet en was t boerenwaark veur heur finito… Doan! Wat n zegen!!!

Of t kwam deurdat heur ollen zestien haren… Zai kregen zulf, ‘moar’ drij kinder!
Gingen vanzulfs ook alle drij noar boer.
Boeren wazzen bie heur nait populair, dat ken je joe begriepen.
Zo vertelde ze ons voak, dat ze mit n stôk of 10 – 12 maaiden op t laand lagen te baiten ruden enzo en den oet volle borst laidjes zongen.
Boer haar heur verteld, dat dag den gaauwer om was…

Doar haar hai geliek aan, moar vertelde ze den cynisch: t Mes snee van twij kanten!
De luu dij langs t laand laipen dochten den: dij wichter bennen zo monter, worden vast goud betoald…!’ Joa, kom der moar om!
Noa t waark op t laand mos der nog vouerd en molken worden.
Doarnoa eten en nait te loat op berre! Dag begon weer vroug!

As boer visite kreeg zundoags, haren ze der nog n toak bie: zoas gebroekelk wuir eerst t laand en de gewassen bewonderd en was der doarnoa tied veur kovvie/thee en zukswat.
Bie binnenkomst van t spul zaten de maiden tussen dele en t veurénne te wachten mit lappen en borstels om de klaai van gasten heur schounen te hoalen.
“Heer k ben U genegen, k zal U de schoenen vegen,
want Gij zijt de wijnstronk en wij zijn de ranken.
Voor hetgeen U ons geeft, zullen wij U bedanken!”
Den kregen wie n poar sìnt en mossen dat ook nog dailen!

Ook vattien/ achttien zat heur hoog! Wat n tied! Heur man haar n oneven nummer trokken en mos vaar/vief joar t leger dainen! (jongse, dij n even nummer trokken, wazzen vrij)
Noast heur inkommen, dij ze in heur allaintje bie n kander kraaben mos, kreeg ze van de tounmoalege gemainte 2 kwartjes ondersteunen. Veur elk kind n kwartje…
‘Doar mos je den elke moal veur van Nij Scheemde noar Scheemde lopen…!’
De börgemeester dij toun aanzat, gaf loater in Den Hoag aan, dat hai gain aarmoudege gezinnen in zien gemainte haar… En promt wuir de biedroage stopt!’
‘Dat het dij gloeperd waiten! Wie hebben hom wegpest!’ (glimlaachend)
Veur heur n reden om nooit weer n ambtenoar te respektaaiern.
Net as n hail bult boeren, haarn dij t veur aaiweg bie heur verpest…
Veur mie was t gain wonder, dat heur politieke kleur vuurrood was.
Doarom schrok ik indertied van heur mainen over de nije minister-president.
Aine van de PvdA: ‘Doar hebben wie niks aan! Dat is n mitloper!’
Of t zo was, loat ik hier in t midden. Persoonlek vond ik t gain slechte…
Loater, dou e stopt was, kreeg k doar aander gedachten over.

Tot negenteg joar op zok zulf woond, mos ze mit tegenzin noar bejoardenhoes t Hamrik in Nijwolle. (Zai kreeg n hazzenblouden.)
As wie op bezuik wazzen, mos ze voak waiten loaten: ‘Ik zel mie berusten, moar k zit hier nait mit plezaaier!’
Directeur Horst schatte in, dat ze wel nait meer zo laank in t bejoardenhoes zitten zol. ‘Al negenteg? Den zel ze nait slim laank onze gast weden’, was zien mainen.
Twaalf joar zol t worden! En vanoaf heur honderdste kwam börgemeester vanzulfs ook elk joar even langs op heur joardag.

‘Moeke, mouten ie ook nog n nij klaidje hebben veur joen verjoardag?’
‘Is goud, loat Hillie mie moar n stok of wat hoalen van Uffen’, was heur antwoord.
Zai zat der schienboar dou goud bie…
‘Íe mouten der n beetje schier opstoan, want börgemeester en zien vraauw kommen ook…’
‘Wat mout ik mit dat volk…doar heb ik niks mit!’
‘Joa, ik ken der ook niks aan doun, dat komt, dat ie zo old worden’
En den: op heur joardag, mit de haile zoal vol mensken dij hail drok mit zokzulf bezeg wazzen en heur vanwege heur doveghaid n beetje links liggen laiten:
begon ze te declameren. Keersliek op stoule, haar ze al n zetje in de goaten, dat ze nait al teveul aandacht kreeg en docht: ‘ben ik nou joareg, of wat is dat!’

Elk wuir stil en zat aandachteg te luustern noar vannijs n taimke oet vrouger tieden, woaras ze zo goud in was.
n Grode glimlach op heur gezichte gaf veur mie heur overwinnen weer: ‘Dij heb k te pakken! Ze kwamen toch veur mie!’
As de bórgervoader en zien vraauw oafschaaid namen, was heur bedankje gemoakt zuit. ‘Bedankt, meneer de burgemeester, dat U ook even langs kwam!’
Heur gezichte sprak doarbie boukdailen en ik kon heur humor best waarderen.
Börgrmeester oapetrots: ‘Tot volgend jaar Oma, dan komen we graag weer langs!’

En dou… in juli 1997, sikkom 102 en haalf… kwam t tillefoontje van heur zeun:
‘t Hamrik het mie net beld. Of wie bie moeke woaken kennen. t Gait nait zo goud. Kinst kommen om bie heur te woaken?’
Mit zien baaidend, hai roem tachteg en ik as aantraauwd klainkind in de zesteg… mochten wie heur begelaaiden noar heur enne.

‘k Heb dorst, dou mie n beetje wotter’ zee ze soavends rond n uur of aachte.
Hai druppelde wat mit n lepeltje op her lippen en dat vond ze moar niks…
‘Dat is ja niks, dou mie t komke zulf moar.’
‘Nee moeke, dat ken nait, den verslokst die…’ was zien antwoord.
‘Ie mouten hier op reken: as ik dommeet bainen boeten berre krieg, is mien eerste loop noar t kroane en loat ik mie vol lopen mit wotter…’

Even noa negen, n uur loater was t beurd: bluis ze heur leste oadem oet…

Der is veul gedou in de wereld, woaras je joe aan aagern…
As je older worden, ‘dreum’ je t laifst vot in mooie herinnerns.
As vrijwilleger van de Zunnebloum komt mie weer n raiske te boven as ain van dij schiere herinnerns…
Wie stonden kloar om oaf te raizen noar t Noorder Daaiernpaark in Emmen.
Het is n zunnege dag en zulf ben ik in n meroakels goie stemmen.

De eerste begrouten van mien gast is doarop n toffe aanvullen.
Op d zesde verdaipen lang ik heur d haand en stel mie veur.
“Goie mörn, mevrouw, mag ik joe mitnemen veur n schier tochtje?”
“Geern”, was heur antwoord. “As je goud veur mie zörgen en behollen thoesbrengen, want ik wil groag vanoavend weer zond en wel allaind in aigen berre sloapen!”
“Komt goud heur”, zeg ik berustend, mit n knipoog noar heur buren, dij ons oetzwaaien.
“Den staait t kraande mðrn wel weer veur t venster!” zee buurvrouw en wie stappen in d’lift om oaf te raizen.
(zai is nait meer de jongste en doarom holden de buren n beetje socioale comtrole: kraande veur t roam… den is t goud!)
Aankommen bie d’auto, geft ze aan; geern veur in te willen, vanwege -zoas ze t zulf nuimt-, mien bult!
Zai het mie al hailndaal om… en geef aan dij wens dus geern geheur!
Onderweegs vertel ik heur, dat wie noar daaierntoene in Emmen goan.
“Ach, wat ja mooi. Doar was ik vrouger, vot noa d’oorlog ook al ais mit n schoulraize….”
Baide aander gasten nikten instemmend, ook zai wazzen doar rond achtenvatteg west.

Aal keuvelnd, laachend en zulfs n laidje zingend, belandden wie in Emmen.
“Dat heb je rad doan!”, zee t olske, -nait in de goaten, dat tied deur heur gekeuvel- om stoven was.

De ontvangst was geweldeg! De rolstoulen stonden in laange riegen kloar en noa de kovvie mit kouke kon de ‘safarie’ starten…
“Ie hebben t vandoage zwoarder as ik…! Ik loat mie rieden, ie mouten waarken!”
“Geern doan!”, was mien antwoord en dat was eerlieks maind, want ik zag t mit heur hailndaal zitten!

“Och, kiek toch ais, wat mooie vlinders, Klaas!” (Deur heur enthousiasme vergat ze de U-vörm, woaras ze mit begonnen was en dat dee mie slim goud.)
Zai ruik nait oetkeken bie de vlinders, mor ik gaf aan, dat der nog veul meer moois was en as wie dat aal zain wollen, toch wel wieder mozzen….
Bie de vogels kwam ze sikkom tou t stoule oet van enthousiasme…
“Och, wat mooi! Wat is de scheppen van ons laive Meneer toch prachteg! Wat mooie kleuren!”
‘Ja’, docht ik vanachter d’rolstoule heur ‘bult’ bekiekend: ‘nait elk is zo beveurdaild!’.

Op terograize kwetterde ze aan ain stok deur…. (t leek net ain van de vogels, dij ze vandoage bewonderd haar).
“Dat ik dat op mien òl dag nog beleven mag, ik ben joe aarg dankboar!”
Ik was der even stil van en was mie slim bewust van t goie doul van de Zunnebloum….

Mor dou kwam de domper…
Bie heur appartementje aankommen, dee ze deure open en raip: “Goie dag altmoal… k ben der weer, t was n hail mooie dag!”
Licht schrikkend, omdat der gain aine in hoes was en t meschain veur heur leeftied toch wel n beetje te drôk west was… reageerde ik bezðrgd: “Gaait t wel vrouw K…?”
“Joawel, mor dit is aait t zwoarste noa zo’n oetje: gain aine, woaras je joen verhoal an kwiet kennen….! Mor t is ja nait aans…!”
“Ach, en ik mout noar hoes, want Hillie het de waarme prak kloar stoan”, zee ik impulsief. “Sorrie, mor ik beloof joe, da’k eerdoags nog ais aankom!”

Deure vuil in t slöt en noa n minuut op d’overloop te stoan…. drokte ik op belle.
“Ben je wat vergeten?” was heur reaksie.
“Nee, ik wilde joe vandoage even bezuiken, mor ie wazzen der ja nait. Toch nait zaik?”
“Welnee! Kerngezond en k haar n aibels mooie dag!”
Heur oogies glommen en ondanks heur leeftied haar ze mien bedoulen vot deur: “Kom der in, komst net op tied! k Zel die vertellen woaras ik d’haile dag west ben….”

Vannijs deden wie nog n moal de haile raize mit alles der op en der aan.
t Ketaaiertje, dij ik der veur oettrokken haar wuir n der vieve!

“Waiten ie, welk vogeltje veur mie vandoage de mooiste was? IE!!”, zee ik bie t oafschaaid.
“Dank je,” zee ze zaacht: “Dat ken schienboar nait aans? Mien waigje ston noamelk op Vogelzang.”

“Zitst achter kompjoeter Opa?”
“Joa, mien laiverd, opa wil even n verhoaltje tiepen”.
“Dije, dij’st mie gusteroavend vertelt hest? Van dij baaide poeskes, dij noar disko gingen?”
“Nee, dizze gaait over Klinker.”
“Oh, joa, dat heurt bie toal he?”
“Klinkers en mede-klinkers, dat binnen letters he?”
“Joa, ol kwedel, dat hest al leerd op schoule he.”
“Joa, en even en oneven ook!”
“Dat binnen zievers!”
“Wait ik ook!”

Joa luu, toal is net as t leven; nait slim makkelk.
Wat mout zo’n luttje wicht toch nog n hoop leren, bedenk ik mie.
Lezen en schrieven zel wel goan, moar of ze t leven ooit begript?
“Oom Appie haar t doarnet ook over klinkers…?” kwam ze mie der weer tussen.
“Dat binnen stainen, dij ze broeken veur hoezen bouwen en stroaten leggen”, perbaarde ik dudelk te moaken.
“Oh” was t ainegste wat ze zee en ik zag dat ze doar stief over noadocht.
“En Klinker in Sodom gaait der oaf,” vuil mie der oet.
“Hebben wie den gain toal meer, as dij vot gaait?”
“Tuurlijk wel ol bliksem, dat is ja n gebaauw! Doar was t doe ja mit oma noar t kindercircus.”
“Oh, dije; is dat n klinker? Hou ken dat? Dat is toch n hail groot hoes?”
“Enne… doar goan oom Henk en tante Riekje toch wonen?”
“Zo wiet is t nog nait!”
“Hebben ze wel zegd! En den mag ik van oom Henk groatis noar t circus! En ook noar Harrie Potter en…”
“Hol die ais koest, doe revel! Ken t verstand der ja glad nait bie holden!”
“Bist nou kwoad op mie?” stutterde ze verongeliekt.
“Tuurlijk nait, moar opa wil t verhoaltje geern oafmoaken en as t doe der aal deur kwedelst, ken k mien verstand der nait bie holden”
“As ik niks meer zeg, vertelst mie den straks dien verhoaltje?”
“Joa!”
Weg was ze. In t keuken heurde ik heur zeggen: “Oma, opa vertelt mie straks t verhoaltje dat e aan t moaken is op kompjoeter!”

‘Zo’, docht ik, ‘en nou wieder…!’
Joa, mooi nait; t wol nait meer, mien gedachten wazzen in ware!
Toalklinkers, stroatklinkers, Klinker van Sodom, tou moar!!
Net dou k droad weer oppakken wol, – noa n kop kovvie en n pafke – kwam ze weer bie mie stoan: “bist kloar?”
“Nee, t wil nait meer.”
“Oh? Lees mie toch moar veur!”
“t Verhoaltje is nog nait oaf…” perbaaierde ik nog, moar t huilp nait: veurlezen!

Onder t veurlezen huil ze nog n moal oet: “dat hest mie zo-even ook verteld, mama zee t al: dat doun opa’s en oma’s voaker!?”
“Hou vondst?”
“k Snap nait woar t over gaait…! Dij van gusteroavend was mooier!”
“Gaait mie net zo” mompelde ik. Schrieven ken stoer wezen, net as t leven!!

Aigenlieks was t plan mien gal te oeten over t verdwienen van De Klinker.
k Besef mie nou, dat t doar gain spier aans van word!

Guster haren wie d’oldste klaaindochter Marjolein op bezuik. Zai kwam bie ons eten, omreden dat heur ollen op vekansie noar t aailand gingen. t Komt nait zo voak meer veur. Leren en scharrelderij gaait n hoop tied in zitten! Ja, dat leerderij is wat, tegenswoordeg. VMBO, HAVO, VWO en wait ik veul, wat veur O’s nog meer… k Heb der gain snars verstand meer van!
Zai is echt van dizze tied en speult ook geern mit heur mobieltje, woaras je mit bellen, filmen, en internetten kinnen.
‘Dat was vrouger wel aans’ vertelde ik in de konversoatie, dij wie haren. ‘Wie haren n kassie an de muur mit n hoorn der boven op. As je mit aine bellen wollen, mos je eerst slingern…. Den kreeg je Nonnie an de liene en gaf je deur, mit wel je geern kontakt hemmen wollen. ‘Bel joe zo trogge’ zee Nonnie den en zo’n 10 minuten loater ging de belle as taiken, dat ze kontakt moakt haar.’ “Wie haren dou nummer 66′, vertelde ik. Der wazzen dou mor waaineg aansloetens in Scheemde, Crol Vink haar nummer aine!’ Zai kon t hoast nait leuven en mos der den ook wel om laggen. Net as om n traauwfoto van ons… Zwaart/wit. ‘In ons tied was t mainst swaart/wit, meschain was der ook wel n meugelkhaid veur kleur, mor dat konnen wie nait betoalen.’ Shit, (nij woord veur verrek) denk ik nou: t Is ja de zeuvende! Onze traauwdag! k Heb nog hail gain bloumke veur moeke hoald! Dommeet om acht uur vot even noar de winkel! (dat even terziede). Ondertussen kreeg ze n berichtje van Roy, heur vrund: ‘Hij heeft het erg druk deze week…. moet van half zeven tot zes werken en vrijdag tot half elf! En hij moet ook nog op de scooter, omdat ie geen auto heeft!’, zee ze wat frustreerd.
n Poar weke trogge haren ze n ongelok: Zai achter t stuur, in de baarm en boem!… op kop in de sloot! Gelokkeg laip t goud òf, mor t autootje was noar de bliksem! Ik kon maarken, dat t heur nog zeer dee en pebaarde heur der van te overtugen, dat zai doar niks aan doun kon! Mor ja, t mout zien tied hebben. Kinder hebben t vandoage ook nait makkelk.
En weer dwoalen mien gedachten òf noar vrouger… Wubbo oet Schewòl en Luuken oet Nij Pekel kwamen in beeld. Zai waarkten bie ons in drokkerij en mozzen om haalf aachte begunnen! Elk mos wel n uur fietsen! Kin je noagoan, hou vroug dij van bèrre òf mozzen! n Scootertje was der veur heur nait bie. Om vief uur noar hoes, as der nait overwaarkt worden mos! k Zat net even te reken… de man roem 150 km in weke! Onder t waark aaid de radio aan mit gezellege meziek. En mit nkander mitzingen. Zo stoof de tied om, en was der minder frustroatsie. k Herinner mie nog goud, dat as mien voar – os boas – ais wat chagrijneg was, Luuken spontoan ‘Klokke Roeland’ inzette en d’ol zien gezichte van swaart snij op slag veranderde in n vroleke, zunnege smile!

Kinder zellen wel n aander ploatje neudeg hebben, mor ook dij zel as n medisien waarken. Ik hoop t van haarten!
Veur mie is Klokke Roeland – net as veur mien voar – meer as voldounde!

Vandoage de dag is der veul meer keus as vrouger …
Guster haar vraauw bitterkoukjes hoald, en doar ben k stoapelgek op! Elke bod bie d’kovvie mor aine was mien advies. Dreugen ze nait oet (k slurp vaar moal doags twij kopkes). De leste tied kommen wie nait tekört. Wat n weelde!
Net asdat je op joen older nog achter de computer stappen. Wat n meugelkheden! Je toetsen n woord in op ‘koegel’ en d’haile wereld trekt an joe veurbie. Bin je zaik, zuik t op de gezondheidslijn. Nait, dat t probleem din oplöst is, mor je kinnen dokter van advies dainen om gaauw beter te worden. Mooi man!
Tuurlek zitten der ook male kanten aan. Zo wil ik geern mitwaarken om t veur mien leveranciers simpel te hollen, mor zai moaken t joe wel oareg stoer. Krieg aingoal n mitdailen, dat betoalen over de pc veul makkelker is en dat je din naarns meer om denken huiven. An mien hoela! Betoalen via dat ding? Never noeit! Ter verdudelken: ik heb inmiddels de gezegende leeftied van 78 en den vaalt t des te stoerder om joen zoaken oet handen te geven. Buutse vol mit paskes is mie al slim genogt! Pincodes kin k nog wel onthollen, mor van aal dij verschillende wachtwoorden mou’k hailendaal niks hebben. Bah, kop knapt joe ja van aal dij riegen sievers en letters!
En t leste joar kommen doar ook nog koekies bie.

Hou nou koekies, wat is dat den weer? ‘Wij gebruiken cookies. Als u instemt met het gebruik ervan, kunnen we u nog meer van dienst zijn!’ En den kin je op t schaarmke akkoord intoetsen. As je nait akkoord goan, krieg je gain mitdailens meer van t bedrief, n toets mit nait akkoord zit der nait op! Dizze koekies smoaken mie hailendaal niks! As je akkoord goan, bliekt dat ze aal joen handelingen op de pc noagoan en joe den ‘van dainst binnen ‘ mit aanbaidens, woaras je gain spier verlet van hebben! Loat mor zitten! De neudege klantenservice kin je vanzulfs ook via de tillefoon of olderwetse post kriegen. Per tillefoon via n stemcomputer dij zowat n ketaar aangeft, dat der ‘nog wachtenden voor u zijn’ en per post, dij vanzulfs wel oareg laanger onderwegens is. Zo het elk bedrief zien aigen kiek op service.

Mien leverancier van gas en licht, Essent, woaras ik vanòf varenzesteg bie aansloten bin, stuurt mie in oktober n mailtje mit de vroag of mien moandliekse biedroage nog wel hoog genogt is. Zai willen veurkommen, dat je achteròf biebetoalen mouten, dat is ja zo sneu! Ja, ja! n Dikke moand loater … ”Een heuglijke mededeling, meneer van Z.: de energieprijzen zijn gedaald in 2016!’ En den bliekt op joen bankòfschrift, dat je zo’n honderd euro per joar minder betoalen. As je heuren, dat d’euliepries meer den de helfte doald is, en de pries van gas doaraan koppeld is, wordt t joe graauw veur d’ogen en heur je joen hazzens kroaken! ‘Dat is zo’n 10%!’ Bliekt dat de regeern de belasten derop mit roem datteg persent verhoogd het. De goldmien van Grunnen het Den Hoag goud in t zoadel hollen. t Ging veuls te mooi! Van spoaren of reserves aanleggen wollen ze nait waiten. Poen zat joh, Was heur devies. Nou der minder boord worden mout en de pries van t gas oareg doald is, zitten ze in de residentie mit n groot probleem? Van bezunegen hebben ze schienboar gain keze eten. Ja, op aarbaid, zörg en dat soort zoaken. Mor idiote hazzenspinsels mouten oetwaarkt worden. Stilstand is achteroetgang! In t noorden is de waarklooshaid groot en zit n groot dail van t volk in de perblemen. En dat noa roem viefteg joar levern van t neudege gas (lees: poen).

t Wordt tied, dat ze doar in de Randstad ais n koekie van aigen deeg kriegen!

As je vandoage, de dag, zain hou of t Circus in Den Hoag heur best dut om ons aan t lachen te kriegen, ken je der wel n haartverzakken van kriegen!
De blaauwkoppen lachen zulf op t haardst en trekken doarbie de bek wied open!
Oh, mag je dat nait zeggen?
‘Sorry den! Dat haar k nait zeggen mouten! Mien ekskuuses!’

Al was boer Hendrik vrogger ook nait de beste…, hai was wel aine, woaras je echt wel ais smoakelk om lachen mossen.
Ik herinner mie nog, dat e noa n laank debat opains stoan ging en raip: Erectie! Erectie!
De veurzitter schrikkend: U bedoelt waarschijnlijk interruptie?
Nee! Erectie! Dat stomme gelul hier moet nou maar eens stoppen!

Kwait nait, of e doar dou zien ekskuus veur aan boden het….?

Anno twijdoezendvieftien ben je kloar mit ekskuus, as je n stomme opmaarken moaken en n aander de grond intrappen!

Is ook nait haildaal woar: As je zwak begoafd benn n en op feesbouk zetten, dat de minister presedent n koegel hebben mout, den ben je vanzulfs strafboar!
Liekt mie logisch?

As de blaauwkoppen (sorry veur t woordgebroek)
Joa, k wait da k doar messchain nait mit votkom, omda k nait bie de TOP heur?

Toch mien ekskuses!

As zai aal mor deurbezunegen op zörg en waark, den liekt mie t nogal logisch, dat t volk in opstand komt?
Aal dij stress over wel/gain waark en dat criminele gedou in de wereld (Nederland) moakt joen natuur der nait vroleker op!

En waiten de clowns doar in Den Hoag wel, dat je zunder geld niks kopen kennen?
t Volk gain geld, zai gain brood!
Nee, zowiet is t nog nait… jammer genogt!
Mor dij tied komt veur heur ook eerder as dat ze nou denken!
Vieze … (Sorry, sorry! Ondanks, da’k t woord, dat bie mie opkwam wegloaten heb… Dit had ik niet moeten zeggen! Beetje domme uitdrukking! Mijn ekskuus!)

De gaale lopt joe wel ais over…

t Woord Labbekakken was veur mie nij.
De betaikenis is mie nou dudelk! Gelukkeg het Hans de Boer zien ekskuses aanboden… en is zien noam zuuverd?

Den is der aanderdoags alweer zo n domme kerel… (Sorry beste mensen!) dij vindt, dat de trainen vlotter weer rieden mouten noa n zulfdoding…
Sorry! Zo heb ik het niet bedoeld! Mijn ekskuses!

An mien hoela! Denk toch eerst ais noa, veur je zowat zeggen!
Kl.. z..! (sorry hur! Mor hier lopt mie de gaale even van over! Sorry!)

Rusteg! Rusteg! Moak die toch nait zo drok!
Ach, verrek om mie…! t Is ja aaldoage rötzooi!

Nou lees k net in d kraande, dat t Oldambt vannijs sikkom vief miljoun bezunegen mout! En dat noa n eerdere van 6 miljoun! Ken toch nait?

Hou mout dat wel aal… Even wachten mit de Blaauwe Loper?
Zol je zeggen, mor dat is ook gain optie. Neerndounden hebben ja verlet om aal dat volk, dat vanoet de Blauwe stad winkeln komt!

t Is aal n boudel!
Haar Imca eerst ain grode scheure… nou zit ze der vol mit!
Bevens! Doar komt t aal van! k Heb der al n haartverzakken van had!
(weekblad Vriendin)
Luu om mie tou beweren, dat dat meer kwam van heur menaaier van doun?
En… dat ze de Vicarie nait kwiet ken deur n te hoge pries?
Zai haar zok bie t zingen holden mouten! Zol kennen…
(ook van dij oetsproaken woar ‘sorry Imca’ paast?)

k Wait t ook nait aal!
Wel is mie onder t schrieven de kop goud seupel worden en is mien hartslag nuver omhoog goan…

Mörn mor ais noar d hoesdokter… n pillechie zel mie helpen?
Of heurt dat nou onder labbekakken?

Dokter ken mie t hopelek oetleggen…?
“U moet zich dat niet allemaal aantrekken, denk aan de leuke dingen!”

Dat dou k! ‘KOEKOEK!’

Reageern? Groag! Mag best ook negatief wezen…

De klaai is aaid al lukretief west. In t verleden haar n pertij ploatsen heur aigen stainfebriek. Doarnoast wazzen n der n bult stain- en strokertonfebrieken. Waark zat! Mor dat is anno 2015 aal vot. Finito!

Tieden veraandern en d’lu ook. Gelukkeg is der in t Oldambt nog zat aan kreatievelingen! De Toekomst in Scheemde wuir noa joaren leegstand vannijs opbaauwd. Plannen zat om der wat van te moaken! Vergoaderns, tentoonstellens en zuks meer zollen der in holden worden. n Goud plan! Jammer genogt nait oet t stro kommen. Volgens n dail van de bevolken haar doar n hail mooie schaauwbörg in kind.
Nee, dat was te wied van Winschoot! t Cultuurcentrum mos en zol weer in Sodom. Wie waiten wat doarover zegd is en houveul ‘ons’ dat köst het. Gain gezeur, zaand derover! (Zaand? En dat op klaaigrond? Ook weer zowat!) Dit joar zel blieken, wat of t wordt. Mag wel n beetje bie toch? t Is toch n pracht van n gebaauw worden?
Regaaiern is veuroetkieken. En dat kinnen ze in t Oldambt wel. Gerard Beukemoa en konsorten bedochten t plan veur t Oldambtmeer en Blaauwe Stad. 1800 hoezen veur d’allerrieksten! Dou der aine op n veurlichten in Midwolle waiten wol, hou of t verkeer regeld wuir (der is mor ain tougangsweg …. en elk het twij auto’s?), zee Beukemoa dapper: “Wie moaken t zo duur, dat men zok gain twij auto’s veroorloven kin!” De rillens laipen mie over d’rogge! Wat ja n logica!
Tuurlek fiets ik ook geern n moal rond t Oldambtmeer en geniet van de vogels. En mout ik bekennen, dat ons gemainte n partij mooie fietspoaden aanlegd het. Mor was men wat TE zuneg rond t meer? Doar haar t pad wel n haalf meter braider mocht!
Achteròf is bleken, dat d’allerrieksten laiver noar t zuden trekken as noar t Oldambt. Mor ja, dat is achteròf! Gelokkeg staait t pervinziebestuur vaarkant achter t Oldambt en wordt Sodom riek bedaild mit puten vol geld. Nait zo vrumd! Winschoot is ja de twijde stad van dizze pervinzie. Nait bie de pakken dele zitten, is t devies van de kreatievelingen. n Nij kenoal, n sluus ….p huppekee! De bootjelu kinnen nou op en top heur haart ophoalen en, as ze willen, zo deurvoaren van Duutsland noar de Vraize wottern. Wat ze geern doun, ducht joe?
Ja, en wat ducht joe van de Blauwe Roos en de Blauwe Loper? Zulf heb k in t begun voak n moal toukeken, hou of t verkeer de Blauwe Roos nam. Chauffeurs van t grotere materieel haren der wat muite mit, mor dat is inmiddels oplösd. En den de Blauwe Loper! (ofkeken van Knoal?) Tuurlek, hai wordt wat smaler as pland, mor is hail veul weerd veur de neerndounden! Vief miljoun is veul geld, mor wel zeurt doar nou over? t Volk? Ach wat! De nije ondernemers van n giga outletcentrum verwachten ja 18.000 bezuikers in t weekend. Nou den! Doar mout je toch op veurberaaid wezen.
Ie leuven t nait, en meschain kiek ik nou even te ver veuroet, mor ik denk dat binnen 10 joar de A7 zes in ploats van vaaier boanen worden mout en dat Sodom mit aal dat volk stad nummer ain an t worden is! Zol d’pervinzie de geldkroane den dicht draaien? Zol ja zunde wezen! Nog plannen zat!
Wie mouten t beste der mor van hopen. De wereld staait ja hailendaal wat op kop. Woarom in Winschoot den nait?
En t is (loatve eerlieks wezen) toch geweldeg, dat t volk dammeet op fietse noar Dubai kin! Inderdoad, dat binnen de leste plannen. Dut mie deugd. Dubai? Doar wonen toch allent mor rieke lu? Joa! En?
D’kraande ston der vol van. Veur mie n lichtpuntje noast aal dat negatieve nijs over aansloagen in Paries van de ‘geleuvegen’ en aal dij mainens doarover in de talkshows.
Dunderdag kwam doar nog bie, dat Ziggo ons kiekkaaste op zwaart zette. ”Verd…!” Gelokkeg smook ik nog en mos ik op tied al weer n deuske sigaretten hoalen bie Jumbo.
“Kin ie joen tv zulf programeern?’ vroug t wiefke achter de boalie. “Ziggo staait hier op t plaain en wil joe der geern bie helpen! Doar heb je al ain van heur, vroag hom mor ais.” ,Moet u hulp meneer? Wij helpen u graag, waar woont U?”
“Waar kom je weg?”, vruig ik.
“Iran meneer, ik ben buitenlander.”
“Nee! Je bent wereldburger!”
“U bent lief, meneer! Even knuffelen? Het is knuffeldag!”
“Dat was guster”, zee t wichtje.
“Maakt niet uit! We doen dat ook vandaag!” En tot drij moal tou kreeg k n dikke knuffel! Midden in d’winkel!
Doarmit kwam k even weer mit baide vouten op oarde en was k vergeten, da k mie aargerde an aal dij ‘onneudege’ geldvergraimerij! “Kan ik hier naar het toilet?”, vroug d’Iranees aan t wichtje.
“Ja hoor, hier om de hoek”, en zai opende de deur van de kluis!
Mien laive tied, schrok ik, dij docht dat doar de kluis nog zat.
“Letstoe dij man op t geld schieten?” Zai proestend van t laggen van dij opmaarken: “Nee man, dij is verploatst dou wie Jumbo worren binnen.” “Oh!”

Onderwegens noar hoes docht ik aan ons olle opa. As wie volgens hom teveul mit geld smeten, zee e voak: “Wees toch ais wat zuneger! Loater denk je: Haar k t mor weer! Al was t ook in n bescheten lapke.”

Advies: denken ie ook mor nait te laank noa over dizze zoaken. Bestuurders kinnen veul wieder veuroetkieken as wie. Doar hebben wie ook ja nait veur leerd!

Vot noa d’oorlog wazzen der waaineg zwemboaden. Jongs en wichter mozzen zok behelpen mit plazzen en graachten. Zo ook in Mewolle –Oldambt-. Swinters was t aans. Iesverainen “Aigen Kracht” lait dìn n groot stok gruin laand vol lopen mit wotter en dìn kon je noar haartelust scheuveln! Bìn joaren lid west, omreden dat der in Scheemde allain op graachten meugelkheden wazzen en as t echt n strenge winter wuir: op t Zieldaip en zukswat. Dìn was t veur mie even noar Meulenstroate en bie stelmoaker Kiewiet de scheuvels onder. Over t daip noar d’iesboane…. Wat wil je meer! Zoas k al zee, zummers, as wie geern zwemmen wollen, dìn was der in de dörpen waaineg veurhanden. Wie muiken dìn n soort staigertje bie n boerengraachte en sprongen doar vanoaf t wotter in. Laggen, gieren, brullen! De ain dee t nog roarder as d’aander en as der n moal n zwemboksem in t wotter achterbleef, was t hailndaal feest! In Mewolle konden ze der ook wat van! Op n mooie zummerdag haar ik fietse pakt en muik n rondje Mewolle/Oostwold. Bie boerderij van Hermans Diekstroa was t n gedounte van jewelste. Wel twinteg jongs wazzen in de grode graachten bie de heereboer aan t doeken en springen, dat t n lust was. Even kieken, docht ik. ‘Moes’, dij bie mie op schoule zat, was der ook.
“Mag k ook mit doun?” “Joa, woarom nait” was zien antwoord. In d’onderboksem der veur! Wat n feest! k Bìn vanzulfs nait meer noar Oostwold goan. Der was n hail fien sprokkelg jonkje bie mit wit hoar…. k Zel hom nooit meer vergeten. ‘Lutje Jampie’, zoas de jongs hom nuimden, kon der gain genogt van kriegen. Hai ston nog nait weer op wale, of hai dook der al weer in. Wat n rad ventje! En elke bod, as e boven kwam, haar e n swaarde snoetje en zien witte hoar zat vol mit eendekreuze! k Heb meer noar hom keken, asda k zulf zwom!

Aal mit aal zo n viefteg joar leden….. nooit meer wat van hom heurd of zain, totdat k bie hoes kwam (oafkeurd) en oet verveelndeghaid begon mit verhoaltjes schrieven. Via n tip eerst op Dideldom en van doaroet op KreuzeKeuze….. Al hail wat joaren mien stokjes opstuurd noar Jan Blaauw… Soamen mit Henk de Weerd oprichter van KreuzeKeuze….
Op n oavend van de Historiese Verainen Scheemde ston e opains veur mie en stelde zok veur. “Jan Blaauw!” “Van Kreuze?” vruig ik.
“Joa”, zee e en geliek zag ik t jonkje mit zien witte hoar, gruin van de eendekreuze weer veur mie bie de graachte van Diekstroa’s boerderij….
“Komst toch nait van Mewolle?” was mien vroag….. “Joa, doar bin k opgruid!” Soamen mit Henk de Weerd startte hai joaren loater de sait: KREUZE KEUZE!! Touval…….? Dij t wait, mag t zeggen. Jan, bedankt veur dien waark aan datteg mooie Kreuzes! t Gaait die goud…! En veur Bert: veul sukses en plezaaier aan nog ais datteg?

Saddam Hoessein leefde nog en haar n beheurlek grode bek! Achternoa is t aal goud kom- men: hai het zulf t loodje legd. In de joaren tachteg van de veurege aiw was t nogal reureg in de wereld! d’Amis kreeg n t oareg op d’heupen van Saddam zien geroup, dat e de wereld betern wol…. Allah is groot!’ was nait van de locht en elk mos Moslim worden!

Zoas elke weke t geval was, kwam ik dinsdagsmörns in zien neern aan de Troanendalloane langs veur n advertensie. (Manske Mulder van de verkoophallen in Westerlij). Hai haar n grode grijns om zien smoel en nuigde mie mit noar achtern in d’loods. ‘Doar moust mie even n schiere advertensie van moaken’, zee e, wiezend op n grode stoapel gasmaskers en blikken deuzen… (overlevenspaketten van Struyk) ‘Kerel’, zee ik, ‘wat hest die nou den aanhoald?’
‘Bedenk die ais, hou of ik van dat spul òfkom. Dat is dien waark ja…’
‘n Kop kovvie?’
‘Joa, ken k nog wel even wachten. Mor k snap nait, woar astoe dat spul slieten wilst!’ ‘Moak d’advertensie mor wat groter as aans, dat ken t wel lieden ducht mie’.
‘k Heb der besol veur geven.’ Hai zag schienboar aan mien gezichte, da k ter oardeg muite mit haar en mout docht hebben, dat n wat grotere advertensie mie helpen kon bie t opbedenken van n goie tekst. Onderwegens haar k aans niks in kop as dij rðttege gasmaskers! Op kantoor in Laangestroate vruig k t wichtje achter t buro: ‘Zolst doe der wat veur waiten?’
‘Nee’, zee ze. ‘Wie wil nou zoiets kopen?
Zijn ze nieuw?’
‘Nee, t is aal gebroekt spul’ mompelde ik. De kop knapde mie van de gasmaskers… t Taimke ‘as de nood t hoogst is…’ kwam veurbie en joa: ik haar n tekst! Veurop t Nijsblad van t Noorden ston mit n vedde kop: ‘Amerika verdenkt Saddam Hoessein van het maken van nucleair oorlogsmateriaal…’
Wij zijn niet bang voor Saddam! Was d’eerste regel, dij k op pepier kreeg. En op n duur haar k d’haile advertensie kloar!

n Woar gebeurd verhoal.

As t nait aal te roem is, bin je lebait.
Nou gaait t miezulven weer redelk goud. k Was weer badmintonnen en dat beurt mie liggoamelk en gaistelk op.
Zit ik dinsdag om haalf zeuven kovvie te zetten, is t opains routduuster: stroomsteuren! Gain kovvie, gain waarmte, niks! 2 uur loater: floep, aal weer kloar! Gelukkeg mor.
Twij doage loater: TV dut t nait meer! Oh? Computer ook nait … en telefoon en t mobieltje ook nait.

Verduld! Onneuzel as k bin, wor k der nog narreg van ook. ‘Wat dou k ook mit aal dij rommel!’ brom ik: ‘Je worden ja aal òfhankelker mit dat moderne gedou!’ Drij ‘vaklu’ der bie … wie kommen der nait oet!
Op t mobieltje van zeun, Ziggo belt: ‘Wij hebben momenteel geen monteurs vrij. U wordt voor maandag gepland.’
‘Moandag? Den binve vaar doage wieder!’
‘Wie goan vot!’
‘Woar noartou?’
‘Wie kinnen wel even noar Ben in t verpleeghoes.’ Zo zegd, zo doan. Ben was n moal of wat valen, en noast n broken enkel haar e ook n gat in d’kop en wat vingers broken.
Dou we net weer thoes wazzen, belt zien vraauw, dat ter in t verpleeghoes corona oetbroken was. ‘Verrek, moutve ook nog n poar doage thoes blieven,’ was mien reaksie. ‘As Ziggo d’boudel den mor weer kloar het. t Liekt ja wel oorlog!’
‘Lebait, zelst bedoulen!’ is t antwoord van vraauw.

t Kin weesn, da k joe nou eem op t verkeerde bain zet? de tiddel zol ook ja best toupasselk wees n op mien leeftied? (86) Mor dit gait weer ais over mien ondeugende tied..

Mit 86 kiek je oet noar de negenteg en in dit verhoaltje was k om en bie 18!

Wie haarn van de groafische schoul in stad bedocht, dat ve n moal n krougentocht moaken konden. Ie kenn n joe der wel n beetje bie veurstell n…….. Noar t Keldertje, De Corner. Tussendeur n beetje eten aan de Carolieweg, t Broodjeshoes aan t Damsterdaip….. enz.

Ik denk, dat ve wel n stuk of zeum krougen nomen hebben. En elke bod ain of twei pilskes, dat slagt lekker aan!

Gelukkeg wazzen wie deur aalgedureg wat te eten, nog redelk gangboar. -dat denk je zulf den he!-

Tegen elf uur, bedocht ik mie, dat t tied wuir om op te stappen. Aans zol k de leste train nait meer hoal n.

Nog eem proaten en dou de sokken der in. Op n draf noar t station!

Train ston kloar en d conducteur dei mie aankommen zag, raip: moet je nog mee?

As e noar Schanze gait wel! Dan stap maar gauw in, want we staan op t punt te vertrekken! Oh!

Muide van aal t gesjouw en t eten en ,drinken’ ben k al veur Hoogezand in sloap vaal n, ducht mie?

Der zaten n poar wichter oet Scheemde in dei ik goud kon.. Dei moaken mie wel wakker as wie in Scheemde benn n, mout ik docht hebben.

Meneer, wij zijn er. Uitstappen graag!

In Scheemde? vroug ik mit n duffe kop… Nee, bij het eindpunt, Nieuweschans!!

Oh, mor ik mout noar Scheemde!? Dat wordt dan een eind lopen!! haha!

Mien harsens kroakten as n olle Ford….. Van d schrik was k weer n beetje helderder….

Gait der hailndaal niks meer noar Scheemde? Nee, helaas niet!

Sorry, even de telefoon opnemen…

Mit n laachend gezichte: U heeft geluk!

Ik krijg net te horen, dat de Lock terug moet naar Groningen voor onderhoud…

Ik ben nu vrij. Een collega brengt hem terug.

Zin om mee te gaan? Dat ducht mie! mompelde ik.

Dan stap alvast maar in, de machinist is er zo.

Zo, versloapen? (t was n Finnerwolmer) Dat prait wat makkelker.

Joa, wat n kloune he! Ach, t Komt voaker veur, mor den wordt t lopen!

Ie hebben mazzel, dat de Lock trogge mout, gebeurt mor ains in de twei/drei joar!

In Scheemde zee k: wat ben k joe verschuldigd? Niks man, aal goud zo!

n Sigarettje veur de muite? Is goud, tot aandermoal?

Laiver nait!

Op n motor-bakfietse stoof e deur Nij Scheemde-t Woar…

Ko van der Veen, de ainegste krudenier dei doar n vrij roeme winkel haar.

Aait vrolek en elk groutend. Omdat e nogal klain was en in Nij Scheemde elk n bienoam haar, kreeg e al gauw de noam Ko Vietje!

Hai haar doar gain muite mit… As t kind mor n noam het en d handel mor goud is was zien devies!

Nou kreeg ik veurege weke n meel van n kameroad en omdat wie al twei joar mit longcovid zitten, was zien leste regel in dei meel: Hopelek zodemietert Ko Vietje endelk bie joe op..!

Kloar! k Heb weer aine! Hou aine…! Hol toch op mit dat geplaas aal!

Mor zowied is t nog nait, wie zitten der nog midden in en in mien gedachten vin ik, dat dat leutje kereltje nou wel oareg laank worden is… Doarom heb k hom anno 2024 Laange Ko Vietje nuimt.

As t bie ons weer normoal is en hai endelk vertrokken is, zel k hom vanzulfs wel weer Luttje Ko Vietje nuimen!

Nog nait zo laank leden het n gezin oet t Westen nog perbaart vannijs n krudenierswinkel te starten in t pand van stelmoaker Jurn ten Hove, mor de man kon zok nait recht aanpaasn en zien woar was redelk in de pries.

t Wuir gain sukses, de Hammekers kochten heur woar laiver bie de Groot-Supers!

Tieden verandern, minsken ook!

Wat hest an dien kop?

Tegen deurstiele aanvlogen!

Last van?

Nee, k haar de mazzel da k

gain ,verstand’ heb, aans haar

k vast n hazzenschudden had….!

t Is krises…
Bezuneging op bezuneging.
Dammeet komt veur t volk de bodem van t knipke in zicht en worden ze dwongen snachts op pad te goan om de neudege middeln in te zoameln?

Meer en meer heur je rondom joe gemekker over graai n, steel n, corruptie en dat soort zoaken.
Nou is t volk ook nait aait zo laif as ze der oet zain, mor as je lees n en op t kiekkaaste zain, wel der aal mit doun an t plundern en hou ze zok der den ook nog oet perbaarn te proaten, den wordt t joe ja swoar te muide! Wat n zootje!
En wel gript nou ais ECHT in?
Het schient, dat t leven aal ondeurzichteger wordt…
Van Stoatslötterij net n meeltje: ‘U heeft nog geen Oranjeloten…!’
k Haar eerder al aangeven, dat k doar veur bedankte, mor dat negaairn ze gewoon!
Kl.z.!
Op mien oafreken zagen mien vrouw en ik, dat der n bedrag over moakt was…
‘Schade inz. Volmachten’?
t Is vanzulfs aait schier, dat men joe wat oetbetoald, mor wat mag dit den wel wezen?
Schoade volmachten?
Zai k opains de letters NN! Nationale Nederlanden! Oh, dus toch t bedriefspensioun!
Woarveur is dei veraandern nou weer goud?
Is dat n begun van t enne?
Kl.z.!

Der is n bult te mekkern vandoage de dag en dat liekt nog aarger te worden… zegt men.
Der mout van Brussel nog veul meer bezuunegd worden!
Hou nog meer? En… woarvan den?
t Vingertje gaait konstant noar onze intelligente bestuurders!
‘Hou willen dij dammeet nog draaien, as wie niks meer oet te geven hebben?’ vragt moeke.
Winkels goan aal meer dicht…!
‘Da’s nait zo slim’, zeg ik, ‘Dij hemmen heur best ook wel doan!’
En proat mie nait van lonen bie dat volk!
Zo gauw as d kindertjes 18 bennen, en der n beetje meer in t puutje mout, is t beurd!
Zuik mor wat aans! ‘Overtolleg?’

Roem datteg joar leden heb k mie doar al slim kwoad om moakt…
Direkteur van de tounmoalege hoesholdschoule vertelde op n olderoavend, dat de leerlingen in de zorg maar beter konden overschakelen naar de detailhandel!
Doar was veul meer vroag noar volk!
k Heb hom dou vroagd of e wel wos hou dat kon en… woarom hai aan dij viezeghaid mit waarken kon?
Laiden ie de wichter op om veur n kwartje in t uur de neerndounden te dainen?
Kl.z.

Ja, k heb in mien leven al hail wait mekkert…
Vandoage mekkert elk! Gain wonder!

Mien mekkern het n hail goie reden…
Mien voar haar in d’oorlog 18 zegen op staal!
Aal doage haar n wie bie t brood. dus:…Zegemelk!

Scheemde juni 2013

Vot noa d oorlog -vatteg/viemvatteg- gingen wie veur t eerst op schoulraize….

Wat n belevenis! Op n boerenwoagen mit n huif der boven en n beste riege banken -Jan Plezaar-veur t eerst van de OBS Nietap mit twei klassen!!

Spanning ten top! Woar de rais noar tou ging, was n verrassen….

k Wait nog wel, dat n bult klasgenoten n zere kont hadden van t zitten op dei holten banken!

Wie waren ook ja wel twei uur onderweegs! Dou ve op de bestemming kwamen, bleek dat n speultoene te weesn in Potterwoll’. Aibels mooi! En wat groot!

Alle soorten toustell n, woarop je joen energie kwiet konden….

En op ons leeftied haarn wie dat ja meer as genogt. Schommeln, wippen, slingern… t kon nait op!

Tussendeur n stoetje mit n glaske ranja. Man, wat n belevenis!

k Herinner mie, dat meester De Jong t ain en aander regeld haar. Wie haarn t verdaind en neudeg noa vief joar krieg!

Of dat zo was, betwiefel ik… want wie vonden t aal wel interessant, wat der gebeurde!

Wel was t wel ais spannend, as der n koppel vlaigtugen over vloog en moeke nogal zenewachteg wuir, mor dat waren wie aanderdoags al weer vergeten!

Net as n poar V-ains, dei in de Natuurschoon dele kwamen…

Meester De Jong was ook de man, dei in d oorlog mit ons noar de Noatuurschoon ging om eetboare paddestouln te zuiken.

Kennis volop en noa n beste puut vol vonden te hebben, trogge noar d schoul en de boudel opsnittern!

Ie kenn n joe begriepen, dat dat smullen was! Wie haarn ze ja zulf mit meester plokt! Nou den!

En.. wie kregen al oareg kiek noa zien oetleg, welken gifteg wassen en welken nait!

Ook leerde hai ons n toentje aan te leggen en zulf bloumkes en gruinten te verbouwen!

Achter d schoule was genogt roemte veur toentjes van zo n zeum bie vaar meter…! Elk zienend!

n Aibels mooie tied, dei k achternoa nait geern mist haar!

Wat n plezaar! En t schoulraiske mit de Jan Plezaar noar Pottjewoll’ dee doar nog n schepke bovenop!

Ik ken der vandoage noa bienoa tachteg joar vannijs van genieten! en (mooie herinnerns benn n ook ja n bron van gelok!) toch?

t Is alweer wat joaren leden, mor k zai hom zo weer binnen kommen: n reus van n kerel, piepe schaif in de mond en zo te zain n zunnechie zunder zörge! ‘Goedemorgen, ik kom op uw advertentie.’ Wie haren verlet om n wisselloper, omdat nait ale geld op tied binnenkwam. Hai revelde as Brugman en noa amper n haalf uur haar e n boantje as vertegenwoordeger! Mien voar kon ook nog wel aine broeken dij goud was in advertensies verkopen, zodounde.
Zulf mos ik dij middag noar Sodom om klanten te bezuiken en wie pruiten òf, dat hai mie helpen zol en om haalf twije bie de kop van t Zandpad wezen mos.
d’Eerste klant was fietsmoaker Hoaken. Man gaf aan dizze raaize der niks bie te hebben.
Ome Bram vuilde ducht mie aan, dat der toch wel wat te verdainen was en vruig: ‘Mag ik U iets vragen?’ Op goudkeuren van Hoaken begon e: ‘U heeft niets te adverteren? Ik zie dat u dealer bent van ….olie.’ (noam ben k even kwiet, KvZ) U koop dat in voor f… (nuimde n bedrag, KvZ) en de marge daarop is erg hoog! Dat is toch een geweldig artikel om mee te adverteren?’ Hai was zo overtugend, dat e n vette advertensie mitkreeg.
Boetendeure zee ik: ‘Man, hou dus je wel?’ Wie pruiten òf dat hai d’aine kaante van de Moushörn doun zol en ik d’aander. Hai haar mie overtuugd van zien talenten. Aan t enne van de dag gaf e zien handel òf. Ik was beduusd van zien produktie: klanten dij mie deurgoans de deure wezen, haar hai inpaalmd! t Was n rasverkoper. En dat was, as je zien verleden heurden nait zo verwonderliek: hai was melkboer, haar n zuvelgroothandel, zat in d’eulie, in d’autobanden, in de tabak, haar n benzinestation groot moakt en was zulfs conducteur west bie de NS. En overal haar e de top hoald.

Bie ons zee e op n dag: ‘We kunnen nog veel meer omzet halen! Jij en ik gaan volgende week naar Amsterdam.’
‘Wat mouten wie doar?’ vruig ik onneuzel.
‘Daar heb je de grote reclamebureaus en die moet je persoonlijk bewerken om de grote landelijke adverteerders binnen te halen. We gaan met de trein, dat is goedkoper. Ik heb daar nog altijd gratis vervoer, dus hebben we aan een enkel kaartje voor jou genoeg.’ Tegen mien voar zee e mit n grijns: ‘We gaan twee dagen en jij betaalt het hotel.’
Zo zegd, zo doan. Dunderdagsmörns op tied vot. In traain bleek dat zien ‘vrijvervoerkoarte’ al n mooi zetje verlopen was. ‘Oh, hoe kan dat nou? Ik zal hem bij terugkomst direct laten verlengen,’ was zien antwoord en conducteur ging akkoord.
In Amsterdam n hotellechie besproken. ‘Hier moet je niet dronken worden,’ was zien laconieke reaksie op de staaile, laange trap dij noar ons koamer laaidde.
‘Wie willen toch wel even stappen vanoavend?’ zee k geschrokken. Ik haar mie der op verheugd om ook ais Amsterdam bie nacht te beleven.
‘Ja hoor, we gaan denk ik maar naar het Rembrandtplein, daar is altijd wel vertier,’ was zien veur mie geruststellende reaksie.
Noa eerst n poar missers kwam t gelok. Al ging t ook hier eerst wat stoer, Bram was n terriër, dat bleek! De boas zat in n koamertje achter t glas en volgens t wichtje bie de balie haar e totoal gain tied. ‘Is dat je baas?’ wol ome Bram waiten en veur ze der aarg in haar, stevelde hai mit zien laange bainen op hom òf. Noa n poar kloppen op deure stapde hai votdoadelk noar binnen. ‘Sorry, meneer. Mag ik U even storen? 2 minuutjes is voldoende.’ Meneer luit blieken dat e nait veul pries stelde op zo’n binnenkomst, moar ome Bram trok zok doar niks van aan. ‘Wij komen uit het noorden, en we willen graag goed contacten leggen met de reclamebureaus. U kunt ons denk ik goed op weg helpen hoe we dat aan moeten pakken.’ Om kört te wezen: meneer wer wat tougeefleker en noa roem n uur(!) namen wie mit n stevege handdrok òfschaid.
‘Jij bent veel te bescheiden. Gewoon doordouwen, is mijn devies.’ Hai haar geliek: wie haren n vette klant en n goie tip veur t veraandern van de titel van ons M-M-Nieuws kraantje. n Concurrent haar t plan ook n kraante in Veendam en omgeven oet te brengen en den onder n titel woarin Veendam veurkwam.
De tip dij hai mitgaf, was: ‘Maak er VeendaM-Mer NIEUWSblad van. En druk dan M-M-Nieuws in rood.
Dan blijft de oude titel in stand.’ Wat n oetleg. t Aai van Columbus!
Lest best. Wie besloten om veur vandoage mor te stoppen. t Was roem vaar uur en de mainsten zagen joe aankomen op dat tiedstip. Noa n beetje eten en wat ophemmeln luipen wie t Laaidseplaain op. ‘Zullen we starten bij Dorus?’ was ome Bram zien veurstel. ‘Mie goud, ie mainen Tom Manders?’ ‘Ja, heel gezellig,’ reageerde hai.
Bie deure wuiren wie ontvangen deur n portier. Mit n grote zwier gooide hai deure open en begon gelieks te zingen: ‘Ik ben Japie de portier …’
Dorus zulf zat op n kruk aan de bar en haitte ons welkom mit t bekende laidje: ‘Der wonen twee motten in m’ ouwe jas …’

Wie vuilden ons geliek thoes. Wat n sfeer! Ome Bram haar votdoadelk kontakt mit n man of zeuven oet West-Vraisland en begon in heur aigen dialect staarke verhoalen te vertellen…
(hoast net zo mooi as grunnegers, docht ik…)
Om n uur of negen kwam de toun net populair wordende Rudi Carrell binnen. ‘Verrek, daar heb je Rudi!’ reageerde Bram verrast.
‘Joa, nou kin t wel,’ zee ik: ‘Ie willen toch nait beweren, dat je hom persoonlek kennen?’
‘Ja jongen, ik ken hem van mijn melkloop in Alkmaar. Zijn ouders waren klant. Rudi was toen een jongetje van een jaar of tien.’ En of e t bewies levern wol, ging e stoan en ruip: ‘Ha, die Rudi!’
‘Ha, die ome Bram!’ schraauwde Rudy en kwam as n sneltraain op ons òf. t Weerzain dee hom zichtboar goud. Hai gaf mie ook n haand.
‘Dat is mijn nieuwe baas,’ gaf Bram hom te kennen.
‘Zo? En op zijn kosten is het vanavond gezellig stappen?’ Tegen haalf elven mos e vot. Haar nog n optreden op n aander stee. Veur ons zat t der toun wel op. Wie haren al oareg wat oetgeven en aanderdoags was t weer aanpakken. Dou ik wakker wuir, was ome Bram der al oet. ‘Heb jij ook zo’n jeuk?
Gatver, der zal hier toch geen temeier hebben geslapen?’
Wie hebben dij dag nog n stok of wat zoaken òflopen en binnen om n uur of haalf vieve op traain noar Grunnen stapt. t Was veur mie n haile ervoaren en t rezeltoat der noa was nait niks! Meerdere grode advertenties kwamen binnen van D.E., Philips en zuks meer. Ons concurrenten vruigen zok òf, hou t kwam dat wie dij groten wel kregen, en zai nait.

Noa n joar of drije haar Ome Bram t bie ons weer had. Hai gaf aan, dat e ‘der nait meer oethoalen’ kon en zien top bie ons beraikt haar. ‘Ik word weer tankstationhouder in Groningen.’ In n mum van tied was e doar ook weer vot. Van ain stoatsion haar e dou drije moakt en dat was veur hom op dat moment vannijs de top.
t Kontakt is aait bleven. Sums was t moeilek hom weer te vinden, want hai mog geern nogal ais verhoezen: van Veendam noar Grunnen, Azzen, Annen, Zuudloaren en … n Aarg gedreven mor onrustege kerel. In de datteg joar dat e traauwd was, was e al wel zesendatteg moal verhoesd. Dat nemt nait weg, dat ik n bulde aan hom had heb … Al is e al n tiedje oet t leven, de herinnerns blieven. Herinnerns aan waarken, leren, mor veuraal genieten!

Bigge, steernkieker, rooie, sjekkie, pond tebak…..

Huh? Noeit van heurd!

Tussen t biljarten deur, mit Tooms noar vrouger.

Hai was al op jonge leeftied lid van t bestuur van de ploatselke iesverainen.

t Was in de tied dat bienoa elk n bienoam haar. Gain schimperij, mor gewoon veur t gemak.

As veurzitter haarn wie pond tebak…. , n geweldeg mannechie mit n hoop contacten.

n Lutje kirreltje, houdje op en aait smokerij tussen de lippen!

Zo haar e vot in t begun van de Jaap Eden boan in Amstedam al geregeld contact mit t bestuur doar.

Dat ging maist mit de slinger telefoon… Olderwets, mor t waarkte goud.

Zo kreeg e op n dag t telefoontje van t bestuur, mit de vroag of de priezen in Grunn n te betoalen wazzen.

Ducht mie wel, hou dat?

Wie hebben over n dikke moand wedstrieden en hier is t n gekkenboudel. Stinkend duur!

Kin ve ducht mie wel regeln….

In stad wuir n adres vonden, woar ze oareg schappelk wazzen en wuir de raize begonnen mit n koffer vol priezen richten Amsterdam… n Hail gedou. Der mos nog deur veul ploatsen toert worden vanwege gebrek an snelwegen en de rit zol wel zo n vaar uur duurn. Dus op tied vot!

Pond haar aait de tied en dou ze langs t kefee van Wubbe en Roefie kwamen, trapde pedoes op d rem.

Wie kenn n nog wel eem vroagen hou t mit Roefie is…. (Hai luste al wel aine!)

Wel om tied denken he, t is nait bie deure! Komt goud…

Noa n haalf uurtje wieder. Mor noa dei aine, kreeg pond de smoak te pakken.

Onderweegs nog n moal of wat op d hakke en dou ze bie Jaap Eden kwamen schienboar n beetje te loat!

Doar hest t gedonder raip Tooms: Nou zai toch ais! t Publiek kwam in grote stromen al noar boeten!

Al beurt! Wie kenn n weerom!

Komt goud zee pond nuchter… t Bestuur haar begrip veur zien oetleg. We sturen de prijzen wel na…

Noa nog wat noaproaten en n poar borreltjes ging t weer opgelocht richten Grunn n!

t Begrip veur n kander was dou nog groot!

Tegenwoordeg hait moeke ma, mam, moeder en heur je bie t oafschaid voak I love yoe.

In t begun van de veurege aiw was t veuraal moeke in de volkstoal en pa was pa of voar.

Dit dee mie denken an onze vrunden An en Mar.

Baide wuirn geboren in n arbaiders gezin. An haar wel zes bruirs en zusters en Mar was ainegst kind.

Verschil mout der weesn, nait den.

An haar n bult kinder om zok tou, mor Mar was voak allaind an t speuln en mog groag vogels kieken in t veld.

Dat was der zo in gruid en dat het e zien leem laank volholden.

As je mit hom t laand opgingen, was t ain en aal verboazen. Hai kon alle daarn, en nog schaarper:

Hai zag ze al as waarn t nog mor stipkes in d locht! Zai nou ais: dei buizerd het n dikke doeve te pakken!

En doar in d sloot: twei langbainders! (raigers) Den haar ik nog hail nait deur, dat ve bie n sloot kwamen!

Kiek! n Koppel herten. Oh, woar? doargunder, zugst t nait? Nee, en k wos ook nait dat hier herten laipen.

Och God, wel zes koppels! Dit is nog mor n beetje, maisttieden benn n t wel n stok of vieftien!

Dat was zien leemsplezaar en t aander muik e zok nait zo drok om.

Dou e trauwd was mit An, kregen zai voak kovviedrinkers en mit-eters.

Den zee e voak, mout dat? Ja, zee An den: dat is mien plezaar. Doar moust ook mor aan wenn n…

Ie kenn n joe nait overal van trogge trekken!

k Wait nait of t wenn n wel ooit lukt is…. Bie An kon elk op elk moment trechte. En bie t votgoan was t ait:

Ie kenn n t ja nog wel doun, mout ik n stoetje moaken?

Zai hebben t nait altied makkelk had. Woll n geern n potje, mor dat wol mor nait! Zeum joar noa t trouwen lukde t pas.

Wel hebben zai tussendeur n jonkje as pleegkind had.

Wat waarn ze wies mit heur kereltje!

t Jonkje gruide vol laifde op en dou ook hai volwassen was trauwde hai mit n mooi wiefke.

Ook zai kregen mit heur baide weer n jonkje en ook doar wazzen de grootoll n slim wies mit.

Hai mog geern mit opa hounder vouern en aaier zuiken.

Dou e n joar of vieve was, was t veur zien moeke over mit de laifde….

En noa n tiedje zee pa, dat e de bezuikjes nait langer aankon, omdat e noeit mit d jong allend weesn kon en t aait mor eem was, dat hai bie zien zeuntje weesn mog.

t Kontakt stoakte en was zwoar! Ook slim veur de grootoll n! (zai hebben hom nait weer zain!)

Bie t older worden kreeg Mar aal meer problemen en mos e noar verpleeghoes Old Wolde.

Doar kon e mor nait wenn n….! Hai miste An vreselek.

An ging op n dag op bezuik en kreeg van n zuster de vroag eem mit te kommen…

Het gaat niet goed met uw man… hij begint te malen… Oh, wat dut e den?

Hij roept steeds om zijn moeder! Ie bedouln: ,Moeke?’ Ja!

An lachend: Dat is gain moalen, den ropt e mie! Hai zegt ait moeke tegen mie! haha!

Op advies van zien kameroad Joop (dei ait in d rolstoule oet zat te kieken, wel of der aal op bezuik kwamen) hebben ze dou n poar grode foto s van An bie t voutenend van t ledikant hongen en zowoar wuir e wat rusteger!

Joop haar meer van dei heldere momenten: Dou Mar bie hom op gaange zat en noar d wc mos, zee Joop: dat kin wel n zetje duurn! Dou mor, wat ik die guster zegt heb. Hai lichte zien billen wat omhoog ….

En nou gooi hom der mor oet! Dat kin toch nait? Joawel, d zusters hebben t te drok en zai kieken der nait aans van oet!

Tou nou mor!

Op zien staarfber mos e zien opkropte verdrait nog kwiet en was t schraiven.

En vanzulfs gingen wie en veuraal MOEKE doarin mit!

t Is benaauwd stil in de wereld, overaal zit d’boudel op n glieve. Fietsen en n stapke rond mag nog, mor wieders is bienoa alles dicht. Zundag 15 meert het ons regeren besloten dat vanwege corona ales dicht mos. Krougen, winkels, sportakkemedoatsies, d’haile wereld ligt zo’n beetje stil. Onveurstelboar! Gelukkeg binnen de supermaarten nog wel open en kinve nog voldounde bosschoppen kriegen. Dammeet goan dij meschain ook nog wel dicht! En den?
‘Joa,’ zeg ik onder t kovviedrinken, ‘den moutve op n holtje bieten!’ En woar hoalen wie dij den weer vot?’
De ainzoamhaid slagt tou. Wie binnen der baaide nog, mor as je allenneg binnen, is t nog minder. Bezuik roaden ze vanwege de besmetten ook òf. Gain verjoardoagen, kroamveziedes en begraffenizzen mit volk der bie. Veuls te gevoarlek! Doar zit je din, potje op aarm, veur t roam en d’femilie veur t venster te loeren noar weer zo’n wonder.
Tiendoezenden binnen al besmet en ook al doezenden oet tied kommen deur corona.
‘Ik kin t woord hoast nait meer nuimen,’ zeg ik. ‘Vervelen slagt tou. Wat mout je nou wel aal doun? Je binnen ja net n gevangene in aigen hoes!’
‘Kiek ais om die tou,’ bromt moeke fel, ‘waark zat! Gerdienen der veur vot, kasten leeg, stovven, zwabbern en stofzoegen. Begun vot mor!’

Bliksem, docht ik, haar k mie de bek mor holden. Nou het zai mie der veur. ‘Ast mor waist, dat k nait zo vereg meer ben!’ jeuzelde ik.
‘Ik zeg ook ja nait, dat alles tegeliek mout. Begun mor mit t aanrecht.’
‘Eerst nog n kopke kovvie,’ opperde ik, om nog wat oetstel te kriegen. Dat mog.
‘Nou ales oet de kastjes en d’boudel hemmeln. Hier hest n sopke.’ k Heb t waiten: stief en stram mos k mie boeken, draaien en keren op knijen. Aal nait zo slim, mor t weer omhoog kommen was oareg zwoar. Ain haand op t aanrecht en d’aander oetstoken noar moeke en joa verdold: nog net gain toakel neudeg!
‘Wie willen t nijs even zain,’ opper ik, om even oet te poesten.
‘Zel nog wel aal t zulfde wezen. Ik goa nog even deur!’
Op t nijs zingen en applaudisseren ze veur alle haarde waarkers, dij de coronaslachtovvers biestoan. Tof, dij lu verdainen t! Bedruifd, dat ze nog mor n zetje leden noar t Malieveld mozzen om der n beetje bie te kriegen en nou as helden bestempeld worden. Schandoaleg aigenlieks! Op heur ken je ja aait baauwen!
Zulf bin ik de leste weken aal wakkerder worden over t waark wat moekes heur haile leven oet t stro zet hebben. As ik doar mien verwondern over oet, zegt moeke: ‘Ach man, dat is ja niks, dat heb k mien haile leven mit plezaaier doan, mor bie t older worden kin k wel wat hulp broeken. Jammer, mor t is nait aans. k Heb die ja!’Al 55 joar mien grode laifde, nou mit moeke en schoonmoeke: mien heldin!

Mien leem haar n bult pieken en doalen en nou as 80-plusser besef ik aigentlieks dat dat juust t leem is!

As je allend vreugde of ellende had hem, is dat nait t echte leem, denk ik…?

t Begon veur mie in Drente. Veul roemte, veul noatuur. En veuraal geweldege buurn en kameroaden!

Wat n vrijhaid! En veuraal gain denken aan maal, omdat ve nog nait prakkezaarn huifden!

Ons olden kwamen loater wel oet tied mor wel op oldere leeftied en doar was ook mit te leem.

Mit schoonoll n was dat n stuk minder…. Voar n moagblouden en Moeke deur braand in t bejoardenhoes!

n Hail laive en oardege schoonmoeke! Wie zaten voak in t twijduustern mit ons baide…

Mout t licht al aan Klaas? Om mie nait. Doe magst ook geern in twijduustern zitten he! Ja, wis!

Heur dood dee ons apmoal aarg zeer! n Ramp! Veuraal omdat ze heur negeerden noa heur alarmbellechie! Schande!

Gelokkeg haarn wie twei kinder, n wicht en n jong. woaras wie ons aandacht op richten konden en plezaar an beleefden.

In de familie en vriendenkring ging t dou al nait te meroakel… n Nichtje in de mist deur n auto doodreden… veul kanker rondom en n kameroad, dei zien ontlassten nait kwiet kon en dat loater zulf mor perbaarde, deur zok n moal of tiene in t lief te steken en van t balkon te springen….! Nog n aander kameroad, waarkzoam bie de marechaussee in Schanze, dei bie zien moeke op oljoarsoavend nog n kopke kovvie dronk en oafschaid nam mit de woorden tot morn he..! Heur joardag! En onderweg noar zien waark deur n slippende taxi doodreden wuir….

Zo kin k nog wel n zetje deurgoan…. Mor wie beleem nou veul plezaar aan ons kinder, klainkinder en zulfs twei achterklainkinder!

Apmoal kommen zai geregeld langs en appen veul! Zeun en klainzeun lusten t eten van oma geern..

Opa zee t al: Ik vind alles wat oma ons veurzet Lekker! Ik ook! was t antwoord van klainzeun.

Veur hom is t ook hail gewoon, dat pap en mam oet n kander benn n… Wie heurn hom der nait over! Sumtieds vragt e: Ben ik morgen bij jou pap? Of bij mama? Bij mama. Dan is zien antwoord simpel: Oke!

Veurege weke kwam e der aan en langde oma n boske roosn tou….

Woar heb ik dat an te danken din? Oh, zomaar hoor en ze waren niet duur! Vier Euro!

Oma en opa benn n sunds febrewoarie 22 slim muide, noadat zai Corona hadden. Ze wazzen der nait aarg zaik van, mor noatied wuirn ze wat slomeg en haarn naarns veul zin aan. Dat is nou dus al roem twei joar! Soamen doun ze n beetje hoesholl n en boodschappen.

Bram: Ik vind boodschappen doen mooi… Zal ik ze voor jullie halen? Nee heur laiverd, dat huift nait!

Oke! Maar ik wil het wel he! (krigt n dikke knuffel van oma).

Wie hebben t geluk, dat aal onze noazoaten geregeld langskommen en appen! Dat heur ve rondom voak aans… Aarg sneu!

Ons baide klaindochters wonen t wiedste vot.. Aine in Grunnen en aine in Bennerwoll.. Ook weer mazzel mit!

Dei oet Bennerwoll waren vandoage nog eem op vezide.. mit heur baide luttje wichter. 2 en 1 joar.

Heur voar is net benuimd tot zingende doelman…. Hai is kieper en n poar moand leden weer begonnen mit zingen veur t pebliek.

De dochter van tweie zingt al duchteg mit en dei van ain wil nait minder weesn. Zingen lukt nog nait, mor lachen en kraaien zoveul te meer!

Ja, noast n serie minnen liekt t wel of nou alle plussen tegelieks op ons oaf kommen!

Wie tellen onze zegeningen, al mog ons leeftied nou wel 20 joar leger weesn!?

Ie kenn n nait alles hebben!

Luttje Bram, inmiddels 9 joar en bienoa net zo groot as opa, komt ter aanrunnen… Hallo Oma, Ik wou je een bloempje kopen, maar ik heb geen geld bij me!
Oh. zegt oma: En zunder geld ken je niks kopen he!
Nee, maar ik heb hier ja wel geld!

As e langs komt, krigde aalgedureg n poar buutscenten en dei dut e in n potje. Hai der bie, pakt 2 Euro en stoft noar de super!
Eem loater…. Die zijn voor jou! Vind je ze mooi?

Geweldeg! Woar heb ik dat an te danken? Och, doe ik zomaar!

Oma gript hom: Den krigst n dikke knuffel! Wat ja laif!

Opa krigt der troantjes van in d ogen… Wat mooi he! Negen joar en al zo omdenkend!

In de Twijde Wereldoorlog mozzen boeren heur peerden inlevern. Zo ook Pait Ploug oet Roon. Hai haar n vouermansbedrief mit drij peerden. Dij kon e beslist nait missen. Gelokkeg kreeg e n ingeven.
‘Hest ook nog knopspèllen?’ vroug e Grait. Dat haar ze.
En Pait doags van t keuren noar d’stale. Hai drokte elk peerd in t zaachte van d’voute n knopspèlle. Dat was vanzulf gevuileg en doardeur laipen ze kreupel.
‘Das ist ja scheisse!’ zee de Mof. ‘Abfahren!’

(woargebeurd. optaikend oet zien zeuns mond)

Opoe Tjaddens, n tachtegplusser oet Kloosterholt haar net weer n joar heur riebewies verlengd kregen.
t Joar der veur was heur man overleden en omdat e n schiere levensverzekern haar, kon zai zok verploatsen in n spiksplinternije Ford Mondeo.
n Roeme vaardeurs, mit n grode kovver, woaras je veul in kwiet konden.

Dou heur man nog leefde, haren ze genogt aan n Golfke zee e, waitend dat moeke geern mit t knipke rammeln mog en maisttieds meer mit nam den ze neudeg haar…
Zai mos zok aait inhollen omdat t autochie nait veul baargroemte haar.
Ja, en wat dou je den as je endelk allaind boas bennen en t geld der wel veur is…?

Op n zotterdag stoof ze deur de dreven onderweegs noar Leer in Duutsland. t Was zogehaiten n laange zotterdag en den ken je bie d overburen ook noa de middag nog trechte.
Gang zat der goud in. Zoveul te vrouger in Leer, zoveul te beter.
Winkels zat om der weer ais goud tegenaan te goan…

In Bennerwol op Rederweg, woaras je zeuventeg maggen, was t roak!
‘t Zel toch weer nait zo wezen he’, schrok ze dou ze in achteroetkiekspaigel keek.
n Gruine Volvo zat al n zetje achter heur en zai wos, dat plietsie voak in dat soort auto’s snelhaidscontroles huil.

Joa, verdorie: n stoptaiken. Auto mos op t parkeerploatse en n luttje Blauwhemke beduudde dat ze deure open doun mos.
“Mevrouw, Uw rijbewijs graag”, zee e vrundelk.
“Heb k nait, ook nog nooit had”
“Oh? Mag ik dan Uw kentekenbewijs?”
“Heb k ook nait! k Heb dizze auto net stolen. Aigenoar ligt achter in kovver, Kiek moar ais…”

t Luttje plietsiemannechie schrok nuuver. Zien hazzens kon je kroaken heuren.
‘Geen rijbewijs, geen kenteken en een man in de koffer…?’
Hier is meer aan de hand! En hai vruig via zien mobilefoon om assistentie.

Binnen n mum van tied haar t olske vief auto’s van de Hermandad om zok tou en zag ze dat drij van de acht agenten een revolver in d haand haren!
Ditmoal was t n boom van n kerel dij heur vruig: “Mevrouw Uw rijbewijs!”
Laank nait zo vrundelk as zien luttje kameroad…
“Joa heur, asjeblieft”, was heur antwoord.
“Enne… Heeft U misschien ook Uw kentekenbewijs?”
“Joa, moar noatuurlijk”, zee ze en langde ook dat pepiertje tou.

“U bent de mevrouw Tjaddens, die op beide papieren vermeld staat?”
“Inderdoad, ie kennen goud lesen!”
“Wat zegt U?” vruig de reus, die kennelk nait oet dizze regionen oafkomsteg was.
“Loat moar”, schrok ze.
“Mag ik nog even in de koffer kijken?”
“Moar gerust heur, k heb veur gain aine gehaimen.” kraaide ze vannijs.
Noadat e zok der van verzekerd haar, dat der gain kerel in lag, vruig e:
“Hoe kan het, mevrouw, dat mijn collega vertelt dat U geen rijbewijs heeft en geen kenteken en… geen e…?”
“Dat wait ik nait, dat mout je hom zulf vroagen… Hai zel wel wat in waare wezen? Straks zeg de ook nog da’k te haard reden heb vast?”

“Mevrouw, U kunt gaan. Sorry voor het misverstand en een goede reis verder!”
“Dank je, t zel wel lukken”, mompelde t olske en mit n grode grijns op heur gezichte trapte ze t gaspedoal weer in.
“Honderd Euro verdaint!”, zee ze bie zokzulf. “Dizze dag ken nait meer stok!”
Onderweegs n ploatje van Andre Rieu in de ceedeespeuler frommelnd ging ze haard mitzingend de grup over. Op noar Leer!

t Is Pinkstermaart…

Bruir en ik benn n der al vroug oet, want net as mit Ronermaart is Pinkstermaart in Laik

n geweldeg oetje! Veureg joar heff e Blauwchie doar verkocht.

n Hail mooie bonte zege mit n joar as n emmer!

Voar wol hom verkopen, omdat e mit t joar in t stiekeldroad zeten haar….

Dat wordt noeit weer goud zee e enne… ie mouten mit!

Woarom dat zee n wie, wie goan ja aait mit ons baide!

As der n koper komt, mouten ie begunnen te jeuzeln en zeggen, dat je hom nait kwiet will n!

Zo zegd, zo doan. Al veur negen uur n koper! Wie an t jeuzeln… Och pa, woarom mout Blauwchie nou vot?

Koper stonk der in! Nou goan ie d maart mor op, ik goa noar hoes…. zee voar.

Schienboar baange, dat de koper ontdekken zol, woarom voar hom verkocht?

Bruir en ik blied! Kon ve ons gang weer goan…

Eerst mor de kermis over! Noa n anderhaalf uur de maart nog eem op….

Doar eem noar tou? zee bruir en wees op n gogeloar.

Der ston al oareg wat volk en dou ve bie zien stee kwamen, vroug e net an n jonkje:

Wat moet ik voor je toveren? Een knientje!

Een mannetje of een vrouwtje? Een vrouwtje!

Zooo? en waarom een vrouwtje? Die leit eier!

Nog wat snuusterd op de maart en dou op hoes of…

Onderweegs mor aal lachen: Wat n dompie nait!

n Kiene legt toch gain aier!

Al is t al weer n tiedje leden, toch denk ik voak nog an de joaren, dat wie mit ons gezinnechie aan d raante van Scheemde in t veld woonden.

Vanoet t centrum mozzen wie wel verhoezen, dou discotheek The Corner noast ons de deuren opende! Sjonge, wat n lewaai! Vanoaf dij tied was sloapen meer overdag den s nachts n gewoonte worden.
Op d bandrecorder kon ik zo de muziek opnemen!

Boeten Scheemde haren wie al n moal of wat n òl hoeske zain an d Hoanebietersloane en op n gegeven moment zee k tegen de vraauw: ‘Wie goan n endje lopen’.
Toch ais oetvogeln, docht ik of dat steegie te koop is…
Zo zegd, zo doan.

Dou wie d boudel van dichtbie bekeken en achter t hoes struunden, kwam òl buurman De Gries aanlopen. Hai was nijschiereg, wat of wie doar te zuiken haren?
‘Och, zomor wat kieken. Zol der wel n nije op maggen?’
‘Dat wait ik nait, mor ie kennen inlichtens kriegen bie Buseman.’
Gelukkeg haar mien vraauw vanoaf heur geboorte in t veld woont in Nij Scheemde en haar ze -noa eerst wat sputterderij- toch wel intresse in mien plan!
‘Doe hest aait wat! Mor ja, nog joaren noast dat helse keboal wonen is ook ja niks!’
Wie wuir n t ains en dat dee mie deugd!

Op noar Buseman… De aigenoars wazzen femilie van hom en noa laank over en weer bellen en proaten, kon k t stee n joar loater, op noam kriegen.

Dou kwam t echte waark! Gemainte wol nait zo as ik en ik nait zo as gemainte!
Ik wol op t midden van de kochte vattien rou baauwen, mor zai wollen, da k op de fundeminten van t ol hoeske bouwde!
k Zel joe n laank verhoal bespoaren… ik kreeg veur tachteg persent mien zin en net veur de kerst in zeuvenzeuventeg konnen wie ons nije stee betrekken.

De eerste nacht gain oge dicht doan… konnen van de stilte nait sloapen!
Mor as luttje kinder zo blied, dat wie van t lewaai oaf wazzen!

Al gauw kreeg we deur, dat der hail wat vogels rond t hoes wazzen. Prachteg!
Elke mörgen luipen de fazanten over d loane t veld in.
Wiefkes (n stok of tiene) veurop en even loater de mannechies.
Zai kwamen oet de hoge bomen, veur an d loane.
Aine der van kreupelde en dat was in onze ogen ‘opoe’. Zai het nog joaren de roete lopen, en achternoa heb ik voak docht: dij hevve te old inschat!

Wieders veul muskes, roodborstjes, merels, liesters, kraaien, oksters…
k Heb zo’n datteg soorten teld! Ook holtdoeven vanzulfs en… spechten!
Soavends op t terras heurden wie ze voak hoamern! Klop, klop, klop!
Op n dag, soavends rond zeuven uur kom ik aanfietsen en staait vraauw mie op te wachten… Vinger veur de mond. Moust doar ais kieken!

In boom boven sloot zaten drij oelen… Dou ik stoan bleef en noar heur keek, deden twije n oge open en geliek weer dicht. n Knipoog, zeg mor!!
k Haar t idee, dat ze zok wel vaileg vuilden en dat dee mie goud!
Omdat ik roemte zat haar, heb k ook nog wat hokken baauwd veur wat hounder en doarnoast n viever an legd veur eenden.
k Haar t idee opvat om Grunneger Maiwgies te kweken en k vond kwakereenden en Mandarijnen ook wel wat om te hebben.

De hounder en de kwakereenden was gain probleem!
Mor de Mandarijneenden wazzen schienboar van n hogere soort?
t Eerste nuske, drij jongen… Alle drije gingen dood!
‘Moust even noar Kloas Nijland in Nij Scheemde goan’, was goie road van mien moat Maarten. ‘Dij het zien haile leven al vogels had, ook eenden! Dij ken die wel perzies zeggen van hou of wat’.

Maarten haar geliek. Dou ik Nijland t probleem veurlegde was t votdoadelk: ‘Joa, dat probleem ken ik. As der genogt tiekjes in locht vlaigen, is t gain probleem. Doar happen zai op. Mor as dij der nait bennen wordt t n probleem!’
Wat ik oeit oetvogeld heb, is meel op d veren streuen. Zai perbaaiern den, dat der oaf te hoalen. k Heb der ook wel ais hounderkukentjes bie zet. Dij vreten wel oet zok zulfs… en d eendjes kieken dat den oaf!’

t Joar der op, haar k bie twij wiefkes vaaier jongen!
Inmiddels haar k hier en doar al keken, of der in mien omgeven aine was, dij n klokke haar te bruien… Gain aine!
Den mor n puutje meel hoalen en kieken, of dat de deurslag geven ken.
Gelokkeg zat dat joar de locht vol vlaigjes en was k t meel nait neudeg!

Tot mien grode verboazen zwommen ze n poar doage loater apmoal al in d viever! Ik ruip mien vraauw omdat k wol, dat zai der ook van genieten kon!
Zegt ze inains: ‘Pak tou! Zai verzoepen!’
En inderdoad, zai zwommen nait meer mor zakten noar de bodem…!
‘Verrek, hou ken dat den? Zai kennen toch zwemmen?’ docht ik.
‘Ja, mor t wotter is nou nog veuls te kold! Doar bennen zai ja nait op berekend!’

Inderdoad! Dou ik mit opstreupte maauwen de jonkies der oet haar, wazzen zai meer dood as levend!
Wikkeld in handdouken op radiator, kwam t leven der endelk weer in…!
‘Verduld! Hebben ze genogt te vreten, heb je dit! k Haar ja noeit docht, dat n eend verzoepen kon!’

Noa n poar joar gelok, heb k ze vot doan. t Bleek dat rötten op eendestront oaf kommen!
‘Hest vast n sloot in de buurt?’ opperde Kloas.
‘Joa, vlak achter t hoes. Op n anderhaalf meter van viever!’
‘Den dou ze mor vot! Rötten kommen aingoal trogge!’
t Was nait aans! Mor t muide mie slim!
n Joar eerder haar k mien kwakers ook al vot brocht. Dat op aandringen van mien dochter… Zai wuiren rebels, as der wat bie heur in de buurt kwam en veuraal s nachts. Ons dochter kon der den nait van sloapen en gaf aan, dat as ik ze nait vot dee, zai vertrekken zol!

k Was der wel n beetje sneu onder, mor gelokkeg kreeg k der dat veurjoar n kameroadje bie! n Klain vogeltje mit n schier rood borstke.
Hai wupde op t onderenne van mien schop en elke bod as k der n spoa grond oet mieterde, zat hai der op kop in om de wurms te pakken!
In eerst instantie docht ik an n roodborstje, mor dat kon aigenlieks nait… Hai was dikker en nait schichteg!
Soavends t vogelbouk der bie… Was t n grasmus! Haar k nooit van heurd!

De Hoanebietersloane, n prachteg stee…
Inmiddels zitten wie al weer vieftien joar boven Jumbo (eerst C-1000) en ook doar is t goud toeven, al zain wie doar minder vogels en meer mensken.
Ook nait verkeerd, mor wel n reden om zo nou en den even -mit ogen dicht- trogge te goan en vannijs te genieten van aal dat mooie gevederte!

n Simpele noam, mit n fantastische oetstroalen.

Het is vandoag 20 jannewoarie. n Hail biezundere dag.
Obama, n swaarde, is om 18.00 uur, Nederlandse tied de vaarnvattegste president van Amerikoa worden.
Hou is t meugelk!!! Wel haar dit oeit docht!!!
Zel t din toch nog goud kommen mit dizze wereld, woarin je t gevuil kriegen, dat t aans naarns om gaait as om geld en macht?

Rillens luipen mie over rogge, dou hai zien eed oaflegde.
Hoop dut leven…

“Wost Knevel ook nog zain”, vragt vraauw.
“Hé, wat?”, vroag ik verbobberaard.
“t Elfde uur, waist ja wel!”, mompelt ze.
“Joa, mag wel”, antwoord ik en zai schoakelt over.
Andrais is in gesprek mit n schriefster over heur nijste bouk.
t Gaait over n verhoal, dij zai optaikend het oet de twijde wereldoorlog.
Ik luster moar mit n haalf oor. Ben nog aal bie Obama.
As de vraauw even loater oetleg geft over t ontstoan van heur bouk en de hoofdpersoon beschrift, (aine oet t verzet) kom k weer hailendaal bie!

Twijde wereldoorlog!!!

k Was n kirreltje van n joar of zes-zeuven en wie zaten der nog midden in.
De V-ains gierden deur de locht en zo nou en den smakte der aine bie ons omdele. Roamen noar de finoaters, pannen van t dak en aal zukswat meer.
Ons ollen haren t der stoerder mit as wie.
Doags noadat der n V-ain in de buurte noar beneden donderd was, mossen wie waiten hou n groot gat of e sloagen haar.
Zoveul te daiper, zoveul te mooier! Ons fantasie ging op loop en voak haren wie der in n mum n schiere hut van baauwd.

Ondaanks de tieden, aait wel diemdoatie!
Ook mit ons voar. Al was e veul van hoes, -mos deur de weke puttjes scheppen in Dieverbrug- wos ons aait bezeg te holden. Zo mossen bruir en ik achttien zegen melken en vouern. Zwoar waark veur n poar van dij keudels, moar wie wuiren der goud veur beloond…!
Dou ons hondje, Foxie jongen haar, muik voar ons n vij-woagentje mit n ainspan, woaras wie de pubs in vervuiren konden.
Foxie der veur en den noar buurvraauw.
Wie n koukje of n pepermunt en de jonkies n slokje melk.
Even kwedeln en den weer retour.

Wat n herinnerns!
Veuraal an buurvraauw Boer. Wat n golden wief!
Heur aigen noam was Knot, Anje Knot.
(Zai de tuddel van dit verhoal. n Knot(s) van een vraauw.)

n Zaachte stem, aait n glimlach en o zo goud veur elk.
Veuraal veur luu dij onderdrukt wuiren. In dij tied de jeuden.
Vanoaf drijenvatteg tot t enne van d oorlog haar ze drij jeudinnen onderdak verschaft om aan de gaskoamers te ontsnappen.
Wieders haar ze zulf ook nog drij zeuns dij nait veur de moffen waarken wollen, en onderdoken waren bie t olske.
Buur n haren wel wat in de smiezen, want de landwacht luit heur nait mit rust. Dij haren ook deur, dat ‘der wat zat’ en zollen köst wat köst dat ‘rapalje’ vinden!
Bie tieden kwammen zai wel zes moal op n dag langs! Mit n man of zes zeuven.
Mit t geweer in aanslag stonden zai den rondom t hoeske…
Ook snachts kreeg ze gain rust. Mien ollen zaten voak moal achter t gerdien.
Haren aarg mit heur te doun, moar wazzen ook nijschiereg vanzulfs.

Op n dag kwam ik even bie heur langs en zag, dat ze n bord op toavel haar mit n poar vermecelli-sliertjes der in.
“Hebben ie soep had”, vruig ik nijschiereg.
“Nee, ik mout nog eten” was t antwoord.
‘Dat was n dikke floater’, mout ze docht hebben.
Mor ik steurde mie nait en ging weer speulen.

Zai wos hou ze t aanpakken mos. Zeuven personen in hoes, en mor ain bord op toavel!! (noa mien ‘overval’ zel dat aait wel n schone west weden!)

De razzia’s wuiren aal feller. Zai kreeg gain rust meer. Elk onverwacht moment stonden dij broenhemden bie heur veur deure…
“Ja, roak!” fluusterde mien voar, “zai hebben aine te pakken!”
“Kinst zain wel t is?”, wol moeke waiten.
“Nee, t is routduuster”, sprak voar en stapde mit gemengde gevuilens weer onder de loakens.
Aanderdoags vertelde zai an moeke, dat ze heur oldste zeun mitnomen haren.
De broenhemden hebben heur wieders mit rust loaten. Gelokkeg moar.

In viefenvatteg kwam heur grode verhoal: drij wichter en twij jongs kwamen op ains veur t droad. Buren keken heur mit open mond aan.
“Haren ie zes onderdukers, en mor aine, dij oppakt is?”
“Joa, Haarm kon t nait langer verkroppen, dat ze mie t zo stoer muiken. Hai het zok vrijwilleg aanmeld.”
“Nog wat van hom heurd?”
“Ja, hai leeft nog. k Goa eerdoags noar hom tou in Bergen Belsen. Hai is slim zaik en mout broodmoager weden. k Hoop dat e t red!”

En dat dee e! n Moand noa heur bezuik was e zo wied opknapt, dat e noar hoes mog. Nog slap as n schuddeldouk, moar moeke haar veur hom genogt te eten om hom weer in t enne te kriegen. Loater is e directeur worden van de ploatselke baank.
Dat dee heur slim deugd.
Heur belonen was groot. Elk von zien stee.

Dat Gonda, ain van de jeudinnen, de moud haar noa aal de ellende, les te geven aan NSB-kinder woarvan d’ollen in t gevang zaten, was heur mooiste. Dat was heur bonus, boven op heur toch al goie belonen!

Obama dee mie vandoage weer staark aan heur denken:
“Wie willen mit joe proaten en nait omzain in wrok!
Of ie nou christelk, katholiek, jeud, Palestijn, moslim of nait geleuveg bennen…’

Endelk betere tieden?
Wie wachten oaf.

Berichten in kraande doun mie alweer twiefeln…
Grunnegers verkopen heur gas an Duutsers!!!
Nou zeg ik joe!

Anje Boer-Knot krigt postuum de Yad Vashem-onderschaiden van de stoat Israël. n Vertegenwoordiger van de ambassoade van Israël overhandigt mörgen (11-08-2009) aan Hindrik Boer de eremedallie en oorkonde dij heuren bie de onderschaiden.

Ja, hou kon t dat men rond 1900 leven kon van zo’n 80,- /90,- gulden per joar? Ie lezen t goud: per joar! Wijlen mien opa was van 1881 en ging in zien jonge joaren aan t veensteken. Aal doage twij uur sjaauwen. En op trograaize hier en doar nog n klant scheren veur n haalfke.
Loater, dou e n joar of twinteg was, het e n stokje laand kocht (tou-aigend?) en doarop n plaggenhutje baauwd.
Veurege weke kreeg k van nichtoetroon.nl* n mailtje mit d’òfdrok van n verhoaltje + foto van hom. Dat stokje laand bleek te liggen op n haile baarg zaand en al gaauw kreeg e deur, dat doar geld van moakt worden kon. Onder de foto ston: De zandgroaverij van Ep van Zonneveld, de grootste zandboas van Roon.

n Man of zes mit pedde op kop en n schuppe. Ain man mit n houdje … Eppie? Was k slim blied mit! k Haar al hail veul heurd over zien leven, mor nooit n foto van zien groaverij zain.
Dou ik geboren wuir, was hai keuterboer aan de voart in Roon, in 1937. De foto was van 1907. Datteg joar loater dus nait meer op schuppe, mor achter de koien en in t heu. Hai was n echte kinderpuut en doarom(?) gingen wie geern noar ‘opa en opoe van de brug’, zo as wie heur ait benuimden. Oet de verhoalen dij ons voar en zien zusters vertelden, het e t slim goud had mit zien zaand! Per proam ging t over t Laikstermeer noar Hoogkerk, woaras dou haarde wegen aanlegd wuiren. Meerdere van zien bruiers en zwoagers wazzen kenoalgroaver in Daam (Damsterdaip?) en vonden dat ze onderbetoald wuiren: n kwartje in d’weke veur Drìnten en twij kwartjes veur de Grunnegers. Da’s ja nait normoal,’ zee Ep: ‘Kom mor bie mie, waark genogt.’ ‘Wat kinve verdainen den?’ wollen d’jongs waiten.
‘Gain kwartje. Mor ook gain twije!’
‘Nee, dat kinve begriepen, mor houveul den wel?’
‘Zeuventeg sìnt!’
‘Zeu… zeu… Huh? Eerlieks?’
‘Joa, en ie kinnen moandag vot wel begunnen.’
Dij mouten wel n gat in d’locht sprongen hebben, bedocht ik mie: gain twij keer in d’weke meer roem vatteg kilometer sjaauwen noar Daam, nait d’haile weke van hoes en meer as twij keer meer verdainen!

Hail aander tieden as nou! Ain van ons klaaindochters zee van d’weke, dat ze t toch wel drok haar: ’28 uur in de week werken en dan nog de zorg voor de kleine!’
‘Joa,’ mompelde ik, ‘mit d’auto noar t waark en zo n € 2500,- in de moand vast?’ Bin der nait wieder op ingoan. Wel was k in gedachten an t rekenen houveul verschil dat dat gaf in goud honderd joar … n Kwartje in d’weke, n gulden in de moand (zo’n 45 eurocent)! En 48 uur in d’weke waarken … Wat n verschil! As dat mor goud komt.
Hou kin t?

(*n nicht doar Klaas al joaren e-mailketakt mit het, vandoar nichtoetroon.nl)

t Was weer zo wied. Zunnebloum Scheemde stoan kloar om te vertrekken noar Emmen.
Mien gast van dei dag was GAIT. Ik kon t nait loaten -k ben van mien oard aibels neischiereg- om gewoar te worden of hai n Grunneger was of n Tukker?
“n Rasechte Grunneger” was zien antwoord op mien vroag. “Trouwes, der zit wel Overiesels bloud in t familie”.

Gait was keuterboertje west en haar n waarkzoam leven had. Van oetgoan en vakantie haar e gain keeze eten. Gain tied en gain geld, moar ook noeit behuifte!
“Hest der vandoage wel zin in den?”, vruig ik.
“Joa, deur mien roffel in kop, k haar n zwoare infarct, ken k nait veul en zit k veul thoes. Mien vrauw zit dus weer opnij mit n kind! En veur heur dou k dit. Zulf moakt t mie nait veul oet. Nou k ainmoal van hoes ben, liekt t mie wel schier… Het Trien even dagje rust he?”.
“Wat hest pesies?”, wol ik waiten, “dien proaterij is goud?”
“Joa, n aarm en bain willen nait meer. Doarom wil k geern, dast mie dommee bie haand holst.”
“Kinst ook in n rolstoule”, opperde ik, moar doar wol hai niks van waiten.
Onderweegs in daarntoene ging t oareg nuuver.
“As k n beetje steun heb, gaait t wel.”

As je older worden heb je wat minder kontrole over spieren en zuks wat. Gait kwielde. Haar dat noa zien roffel nog wat aarger as veurtied. As e in stoule zat haar e grode rooie buusdouk onder beriek, moar doar kon e nou nait bie, omdat e mie bie d haand haar…
Zunder dat e der bewust van was, streek e mit dij haand, woarmit hai mie vasthuil even onder neuze deur en … vot was t!

Dat doch de! Mien haand zat boven en joa, ie begriepen t al wel. Nait, da k vies van hom was moar lekker was aans…
“Wachtstoe hier even? Ik mout even pissen”, zee k en stoof t toiletgebougie in. Kloar! Gain probleem!
Zien neuze paasde zok aan aan ons ritme: Even stoppen en den weer lopen.

Noa n moal of vieve wuir e klouk: “kerel man, wat moust doe ja voak pissen! Kenst wel last van dien prostaat hebben… Goa doar toch ais mit noar dokter!!!”
“Zek doun”, zee k. “Joa, doe konst wel ais geliek hebben.”

Deur zien opgeroemde humeur en de grappen en grollen dij over en weer vlogen, was de dag zo om.
“Aander moal geern weer!?” zee e vroagend bie t oafschaid.
“Is goud”, zee k. “k Zel mie melden. MOI!!!”

k Zel hom zeker weer nuigen veur n oetje! Inclusief zien neuze… Ons plezaaeir van dij dag haar k veur gain geld missen wild!

De zunne stait hoog aan de locht, de temperatuur 21 groaden! t Ken nait beter!
Van de Zunnebloum goan wie vandoage mit zo’n 20 man noar Odoorn. Het zogehaiten Volkloristisch Dansfestival. Wie kozen doar indertied veur, omdat wie vonden, dat t Noorder Daaiernpaark veur onze doelgroep oareg priezeg wuir.
De organisoatie in Odoorn is geweldig en hail klantvrundelk. Elk joar goan wie ain op ain. Dat wil zeggen: ain vrijwilleger op ain gast. Veur de gasten betoalen wie intree en de vrijwillegers bennen groates!

SIVO hait de organisoatie en stait veur Stichting Internationoal Volksdansfestival Odoorn.
‘Slim Interessant Veur Ollen’ moak ik der van.
Doezenden ollen, moar ook n hail bult jeugd is de vaaier doagen dat t holden wordt ‘ain’. En dat al geft n geweldege sfeer.
Joarlieks kriegen wie den ook de vroag: ‘Goan wie ook weer noar Odoorn?’

Dit moal waren Dick en zien vraauw mien gasten. Zai zunder makementen, hai in n rolstoule.
“Parkinson”, vertelde zai mie bie t ophoalen.
En dat was zichtboar! Aal zien leden schudderden en wat mie t maist zeer dee, was, dat zien heufd zo aarg ‘beweegelk’ was.
Kerel man, wat mouten ie doar ja muide van worden! Het aanzain dut mie al zeer…
Zo nou en den gaf e den ook aan, dat e slim muide in de nek wuir.
Den zette zien vraauw hom ‘vast’ aan de kopsteun van zien stoule.
De wieze, woarop zai dat dee en de laifde, dij ze doar bie oetstroalde deden mie zo goud, da k de eerste schrik al weer n beetje te boven kwam.

Ondanks, dat e ook slim muite haar mit t proaten, en ik hom voak nait verstoan kon, kreeg ik veul infermoatsie deur van zien vraauw.
Zai zag aan zien ogen, wat e wôl of bedoulde.
‘Hij geniet erg, Hij moet naar het toilet’ en dat soort dingen, gaf hai op veur mie onbegriepelke wieze aan.
Zai begreep hom as gain aander.

Twij podia en zo’n vief groupen wieder, kwamen wie aan op maarkt.
“Hij wil nu lopen”, vertelde zien vraauw.
“Kan dat?”, vruig ik bezörgd.
“Ja hoor, een klein stukje is nog best mogelijk”.

Al was ze orreg wat mans, het haar wat om hakken om hom tou ‘kaare’ oet te kriegen. Hai haar n staarke wil en perbaaierde op alle kanten mit te waarken, mor veur 99% was t waark veur heur!
Tuurlek luit ik mie nait onbetuugd en stak ook mien handen oet.
“Dat doun ie alle mörns en oavends?”, vruig ik onneuzel.
“Ja”, zee ze mit n glimlach. “Maar dat is niet erg hoor, k ben het gewend he.”

t Schudden in kaare was niks, bie wat wie nou zagen. Slingern en stunteln. Of e zo omsmakken zol…
Oet veurzörg ging ik dicht achter hom lopen. Ken k hom opvangen, as e vaalt, docht ik.
“Dat hoeft niet hoor Klaas, hij red het wel”, gaf ze mie mit heur vertraauwde glimlach te kennen.
Zai kon beter tegen n poale proaten. Ik bleef op hoog oet n meter achter hom en haar zo mien twiefels over heur welgemainde advies.
Hai luip mor deur. Alle luu, dij ons veurbie kwamen gaven aan net zo te dinken as ik.: de bezörgdhaid stroalde van de gezichten en as ze ons veurbie wazzen, kon je der steevast oprekenen dat ze heur kop 90 groaden draaiden. Hou bestaait t ! Heur je ze dinken.
‘Hou ken n mensk zo worden…’, docht ik en besefte mie, dat ik mit n joar of zeuven older as hai, wel oareg gezegender oet was…

Noa ongeveer n haalf uurtje en zo n twijhonderd meter wieder zee ze: “Hij wordt moe, houd jij de kar even vast, dan zet ik hem er weer in”.
“Gaf e dat aan?”, vruig ik. “Hou zag je dat?”
“Ik zag het aan zijn ogen. Hij heeft daar dan nog minder stuur in, dan anders.”

“Bie lutjen aan mouten wie noar hoes”, zee ik en langzoamaan luipen wie noar d’oetgang, woaras wie mit de aander raaisgenoten oafsproken haren.

Op weg noar hoes haar mien gast zien ogen sloten.
‘Hai mout wel slim muid wezen’, docht ik.

Zoas maisttieds was t oafschaaid wat emotioneel.
“Bedankt, Klaas, we hadden een fijne middag en mijn man heeft ook erg genoten”.
As bevestiging kreeg k n dikke smok op rechter waange.

In mien jongere joaren wol k niks waiten van vrijwillegerswaark… Waark mout betoald worden was aait mien devies. Dou wos ik nait dat ‘betoalen’ ook op n aander menaaier kon.

n Haalf joar loater het e net as onderweegs noar hoes, zien ogen sloten, mor nou veur goud…
Mien herinnerns an heur baide blieven. k Haar ze veur gain doezend euro missen wilt!

t Is weer november … slachtmoand!
De tieden veraandern: nou koop je joen vlaais bie de super, vrouger haren veul lu zulf ain of twij zwienen op t hok. Mien herinnerns goan trogge noar dij tied … En k nuig joe, mie doarbie te vergezellen. Pait en Grait hadden t plan opvat om op heur 25ste traauwdag n groot feest te hollen. Zai haren de pech, dat ze midden in d’oorlog zaten en de Movven hail wat verboden haren. Zo ook t slachten van daaiern.
Pait was veur de duvel nait baange en der mos en zol n schoap slacht worden veur heur jubileum.

En der zol ook gain verlet wezen om staarke draank. Wie kinnen t ja mor ainmoal vieren! was zien remedie. t Schoap haar e al op staal en hai vouerde hom om t leven … der mos ja goud wat vet op de ribben!
Mor dou kwam de CCD, de kontroleurs van de Movven. Vaar NSB’ers wollen geern even in d’schure kieken, zeden ze. Bie binnenkomst laipen ze geliek noar t stee woaras t schoap ston … t was veur heur totoal gain muite (verroad?). t Schoap wuir invorderd en Pait kreeg t van dat gedou op d’heupen: ‘Wel het mie dit nou flikt? k Hoal mie votdoadelk n nije!’
‘Zolst dat nou wel doun?’ was Grait heur reaksie. ‘Bist der nou nog schier òfkommen. Aandermoal kinst t hok wel ingoan.’ t Huilp heur nait … Pait haar nog wel n adreske woar hai n aander hoalen kon en was al vot. ‘Wie zellen t vieren!’
Dou t zowied was, gingen zai mit zo’n tachteg man noar Jans Meek in t Olveen. Jans haar regeld dat de neudege draank op toavel kwam. d’Lu wazzen glad en wozzen best wel hou of zai t ain en aander regeln konden en … zwiegen konden ze ook!
Bie binnenkomst lag d’schoapekop in t midden van de zoal op n toavel … en net as alle gasten, kreeg hai n hoge houd op mit de letters CCD. Elk haar zien kniepkadde mitnomen en ging noa middernacht voldoan de duusternis in.

Veul oltjes denken, -deur t doageliekse gejammer in de media over gezond leven-, goud eten, veul bewegen’ en dat soort ‘welgemainde’ adviezen, dat dat wel mout, as je n beetje schier old worden willen.

“Denkst derom, dat wie vannoamiddag n rondje op t rad goan!
Moust dien pillegies mor n haalf uurtje eerder innemen, kin best!
Kikst ook nog even of de banden wel haard genogt bennen?
Wie willen op tied vot, dus dien middag sloapke moust mor n moal over sloagen!
k Heb n schiere route in d kop.”
“t Is goud”, zeg ik en loop alvast noar beneden om d banden nog wat op te pompen.

Moeke en ik bennen nait aans as aandern…
As moeke heur zin krigt, wil ze aal doage wel op t rad… gezond!
Zai leest aal dij bloaden, dij t goud mit joe veur hebben.
Zond eten en veuraal bewegen!!

Net as bie mie dat t geval is, wordt t lopen der nait beter op en dat zel veur heur d reden weden, dat ze zo geern fietsen wil?

Om twaalf uur haren wie t waarm eten op en noa t oafwasken greep ze wat keeze en worst oet koelkaaste veur t geval je onderweegs ‘geihonger’ kriegen zollen…
Nog n poar deuskes met energiedrankjes (aal zuker!) mor… gezond. En wie wazzen kloar veur vertrek.

“Ik docht: over Nij Scheemde – t Woar, t Evert Kloosterpadje op en den langs d linker kaante van t Hondshalstermeer richten Zibboeren?”
“Prima!”, mommelde ik.
Alle routes bie ons in de buurt hevve al wel honderd moal fietst, dus, t was mie om t even: linksom of rechtsom!

t Was dij middag oareg waarm. Wie zaten in t bloeske op fietse.
Op t pad langs t meer zit n oplopend brôgje en an t enne mout je zowat hoaks noar rechts…
“Ik stap oaf heur”, ruip moeke achter mie.
Vraauwluu bennen veurzichteger as manluu!
Kerels mainen voak, dat ze nog n kwoajong bennen… (ik nait minder).
Fiets over t brôgje en draai t stuur noar rechts om de hoakse bocht te nemen…
MIS!!!
Mien veurrad komt an d linker kaante van t padje in de baarm en… woeps!
Mit n enorme zwaai -of k an t judo’en was- noar rechts en in de plomp!

Dou k bie d waale omhoog kroepen wol, bleek dat dij stail omhoog luip!
Verd… doch ik, hou kom k hier oet? Konditie was ook ja nait te roem!
Gelukkeg lag k oareg dicht bie t brôgje en overzied kroepen ging mie beter oaf den omhoog!
k Greep mie vast aan n baalkje van d brôgge en joa verduld!
Noa n ketaaiertje wurgen, poesten en klaastern kwam k op d bovenkaante van d waale.
Kreeg doarbie nog wat hulp van n passant.
Dou k fietse omhoog rieten wol, bleek dat dij haailndal vast zat in t gras.
Asof e kompleet vastbonden was!
Gelokkeg haar de passant alle tied om mie doar ook in bie te stoan.

“Bist slim nat?”, vroug moeke…
“Allend d vouten en d onderenden van bainen”, laachde ik wat zoer.
“Mouve noar hoes?”
“Nee heur, t is ja mooi en waarm weer, dij dreugen onderweegs wel”, wol ik mie nait kennen loaten!

En net zo as t was. Dou wie Zibboeren inreden, wazzen sokken al sikkom dreuge.
Lekker op n bankje ons keeze en worst schier moakt en ons, zo neudege energiedrankje, nuttigd.
“Kinst der weer tegen?”
“Joa zeker!”
Moeke veuraan… Gelokkeg mor! Want bie t opstappen glee mie t veurrad oetzied en lag k bienoa alweer op bek!

“Mor nait wieder vertellen”, zee moeke bie thoeskomst, “het ja gainaine wat mit te moaken!”
“Net!”, mommelde ik.

Krieg k n poar doage loater n meeltje van nicht Frederieke oet Sodom…
‘Hoi! Wat hoor ik? Ben je aan t oefenen voor de triatlon? Fietsen, zwemmen.
Goed afgelopen? Had erger gekund!’
“Verrek, hou ken zai dat nou waiten?”, zee ik verboasd…
Kreeg der vanzulfs gain antwoord op!

Zulks humor slim waarderend, heb k heur onmiddelk antwoord:
‘Joa, en noa t zwemmen nog 50 (k)m lopen!
Hast nait docht vast?’.

Old worden is mooi, mor nait elk blift zo vereg as wielen Jan Oetham!

Wilm en Grait, n oerdegelk en zuneg stel, mit n aigen hoeske aan raande van Scheemde zaten wat versuft bie d holtkachel kovvie te drinken. “k Heb slecht sloapen”, zee Grait. “Doe wilst mit kaarst kalkounen in pot, moar wel mout dij slachten?”
“Ik nait”, schrok Wilm dij van zokzulf wel wos hou omhandeg as e was. Op toene, joa. Moar n hoane kon e nog nait doodmoaken, loat stoan n kalkoun! “Andrais dut dat al joaren, vroag dij ais”.

“Dat ken. k Zel hom vroagen. Mor vandoage wordt dat nait. k Heb nog n bulde waark. Waske ligt der nog en k mout t eten nog kloarmoaken. As t doe nou de mous ais stroepen gaaist, den scheelt mie dat weer n beetje. Mörn goa k den wel noar Andrais. t Mout ook wezen, want mit n dag of wat is t al Kaarst en zai mouten ja ook nog n tiedje in t wotter…”.
“Dou was t zegst, den logst nait”, zee Wilm en muik zok op om mous te stroepen.

Aanderdoags sprong Grait op fietse en ging noar Andrais.
“Moi, moust es heurn…”, begon ze verwilderd.
“Man, wat bist ja wild”, zee Andrais zien vraauw Haarmke. “Goa eerst ais zitten, den schenk ik die kovvie in en kist doe dien aai kwiet”.

Grait lusterde nait. In heur kop spookten de kalkounen.
Zai nam n slok kovvie en spijde t sikkom oet… “Mens, wat is dat ja waarm!”, ruip ze verschrikt.
“k Heb t ook ja net inschonken, wat mekaaiert die wel nait! Wor doch ais kaalm! Hier, eerst nog n sigaretje, den komst wat tot t schandoal.”

n Stief ketaartje loater vruig Andrais wat ze op heur lever haar.
“k Zit mit dij verrekte kalkounen. Wilm het ze goud vetmest, doar ligt t nait aan, mor k wait mie gain road hou of k ze slachten mout!”
“Och mens, is dat t aal? Dat dou k al joaren. As je t waiten, het t niks om hakken… Wanneer mou t weden? Den kom k wel even.”

“As t ken mörn, den ken k boudel op tied aan zied moaken. Zai mouten ja ook nog n tiedje in t wotter!”
“Mörn kin k nait, den mout ik eerappels sortaaiern n bie bruier Lammert. Wonsdag heb k wel tied, den kom k tegen n uur of tiene..?”
“Dat is goud, ken k doar op reken?”
“Tuurlek, moak die mor nait zo drok, t komt aal goud. En kiek oet bie t pad, t is oareg drok!”
“Moi”
“Moi, tot wonsdag!”

Wonsdagsmörns. “Doar komt e aan”, zee Wilm. Hai het n emmer bie zok, wil zeker ook n beetje mit hebben…?”
“Hest ja n emmer bie die?” was Wilm nijschiereg. “En der is n loch in den Eimer.” zee e gnivvelnd dou e zag, dat der n gat van zo’n zeuven sentimeter in bodem zat.
“Joa, dij mou k broeken bie t slachten! Wils t ook nog n poar op t hok hollen, of gaait de rest in t vraiskiste?”
“Nee, wie willen geern alles in ainmoal aan zied, den bennen wie der ja oaf.” antwoorde Wilm hoasteg bie de gedachte; as t nait lokt…

t Vangen was makkelk. Wilm haar t hok nait te roem. Der mos ja gewicht op wollen zai der wat aan hebben.
“Dat bennen besten.”
“Mout ook, den heb je der laanger wat aan”.

“Nou dou ik de eerste en den nemst doe t van mie over…” zee Andrais en ging striedewiets over t kalkoun stoan.
“Ik”, ruip Wim verschrikt, “Grait zels t bedouln!”
“Ook goud”

De kop van t daaier, dij orreg tekeer ging huil e mit baide handen vast. “Nou d emmer over kop.”
t Gat was net groot genogt om kop en d haals der deur te hoalen. As n echte chirurg gaf e zien commando’s. “t Mes!”
Wilm langde hom n groot, schaarp mes tou en mit ain hoal har Andrais t kloart. “Wat heb k zegd: n kind ken de was doun! Nou doe” en langde Grait t mes tou.

Grait, deurgoans in dit soort dingen wat konsekwenter as Wilm haar der toch wel wat muite mit. Mor ja, as zai t nait dee, zol ze aait oafhankelk wezen van n aander en dat noeit!
Zai sluig t bain over t kalkoun en was der kloar veur. “d Emmer” dee ze Andrais noa.
Wilm langde hom aan en Grait stak baide aarms oet om hom over te nemen…
Mis! Ondanks heur gewicht, zag de kalkoun kans om t op n loop te zetten!
Mit Grait nog op rogge stoof e over t laand!

Wilm en Andrais eerst schrikkend, kon t lachen nait loaten…
Wat n gezicht! As n cowboy stoof ze over en deur t swaarde laand, dat Wilm net winterkloar haar.
t Lief dee heur zeer van t laachen!

Graitje stuiterde der op n duur òf en lag plat op t lief in de blubber.
Kalkoun stoof over t sloot en kon n zetje genieten van zien vrijhaid.
Foeternd en voel as de nacht kwam Grait aanlopen.
“Wasblik!” was veur dat moment heur leste commando…

Wilm het soamen mit Andrais t karwai oafmoakt.
Ook de oetnaaide kalkoun ontkwam der nait aan.
Aanderdoags hebben ze hom mit veul muite te pakken kregen en mos hai der net as zien ‘hoesgenoten’ toch nog an leuven.

Grait en Wilm hebben noeit gain kalkounen meer op t hok had.
Zulf slachten? Noeit van mien levensdoagen weer!
En aait n aander lasteg wezen was veur heur ook gain optie!

(dit is n woar gebeurd verhoal, moar noamen bennen vanzulfs wiezegd!)

Der wuir al veul over roddelt in t dörp.
Weer n stel westerlingen, wat zuiken zai hier?
Wat ducht die! Goudkope hoezen!
Goudkoop? Man, zai binnen ja nait te betoalen! En mit dij euro is t er ook nait beter op worden.

Drij april kwam verhoeswoagen. n Stel groten, drij kinder, vaaier honden en ook nog n poar katten. Doar kinwe mit veuroet!
“Goeden morgen, mogen we ons even voorstellen? Wij zijn de nieuwe buren. Jaap Westers, Lia Westers en onze kinderen; Rob, Michael en Wendy.”

“Oh… wie binnen Naantko en Lieske Blokziel.”
“Ja, ja, nou we moeten maar gauw uitpakken want de weerman voorspelt regen.”
“Hier nait”
“Wat zegt U?”
“Mien man denkt dat het hier wel mee zal vaalen, meesttijds koomen wij er goed af hier”
“Oh?”

n Goie moand loater stait Lieske t wasgoud op te hangen en zugt ze buurvraauw achter t hoes.
“Moi.”, ropt ze, as taiken dat ze heur zain het.
“Ja, mooi he?” antwoord Lia, die denkt dat buurvrouw haar planten en vruchten bewondert.
“Pure zelf-werkzaamheid, hebben mijn man en ik samen gedaan. Moet je die aardappelen zien groeien” -wist doarbie noar de vrouge boontjes.
“Bonen zel je mainen”, sputtert Lieske.
“Oh, zijn dat bonen? Sorry hoor, wij boeren voor het eerst en we weten nog niet precies hoe de benaming van de diverse groenten en zo is.”
“Haar k al schoten!”, zee Lieske mit n stiekom lachie om heur smoel.
“Mag je der wonen?”, vruig ze nog even nijschiereg.
“Ja hoor. Jaap heeft nu alles geregeld. Vorige week moest hij nog naar het gemeentehuis. Hij was vergeten ons over te laten schrijven van Nieuwkoop naar hier. Maar nu is volgens ons alles rond en mogen we hier dus wonen.”
“Net”, zee Lieske. “Kom, k zel t eten opzetten want Naantko komt zo thoes en as hai wachten mout, den zwaait der wat!” En vot was ze.

“Wie kriegen der nait veul aan, ik ken der nait mit proaten”, zee ze onder t eten.
“Hou bedoulst?”
“Nije buren. Zai snapt mie nait en van toene het ze haailndaal gain verstand”
“Nou en…, loat heur, zai zitten ons ja nait op rôgge”, zee Naantko, dij best zunder buren kon, as ze hom moar nait in weege laipen.

Op berre begon ze der weer over: “Hest al zain dat knuppels n takke van peereboom broken hebben? Baale hadden zai der in schupt”.
“Zel k mornvroug wel bekieken, wie willen nou sloapen, want t is weer vroug dag; sloap ze”, zee Naantko en draaide zok op aander zied.
Lieske sputterde nog wat, moar zai wos bliksems goud, dat Naantko aanderdoags slim vranterg wezen kon as hai zien sloap nait kreeg.
“Welterusten.”

n Roar woord!

Wat mout je doar nou weer mit…..

Aalgedureg zit je wat tou t roam oet te loeren…. en opains komt der aine veurbie, woaras je mit op schoule zeten hebben!

Oaflopen vraidag zag k opains Jan lopen. Verrek, dat is Jan!

Drei joar mit op ULO-schoule goan. Joaren nait zain en zo opains zai je mekoar noa zo n zeumteg joar trogge!

Noast rekenen en toal kregen wie doar ook Engels, Duuts en zulfs Frans!

Goud veur loater dochten ze..

En inderdoad heb k doar veuraal profiet van had, al was mien Engels en Frans nait echt meroakel.

Dou d kinder van ons wat groter wazzen, dochten wie om eerst mor ais Europa in te goan mit vekansie s.

Reden? As wie older wazzen, kon t wel ais te wied veur ons worren?

Bivve op n moal noar Frankriek en Itolie en mout ve vanwege n laange tocht eem op d hak.

n Pitstop zogezegd. Beetje eten, daarms legen en zuks meer.

Bie de ober wat lekkers besteld en veur moeke en mie n kopke kovvie.

Vragt dei ober in t Frans of der ook zuker en melk in de kovvie mos?

Ik mit mien toalenkennis van d ULO zeg doarop: Nainnolet!

Kinder smalend: dat is ja in drei toalen pap… Kinst dien Frans nog wel goud?

Ik, onneuzel: Hou zo? Doe pratst Duuts, Engels en Frans deur n kander! Hahaha!

Verrek, zai hebben geliek!

Nain (nein), no , let (lait)!

Hou kwam k doar nou zo gauw op?

t Was koetjewaals. En al hadden wie dat nait leert op schoule, wie hadden n hail mooie

zunnege vekansie en d kinder haarn der de rest van de raize nog aaldoage lol om!

Bram Wiekens zien verhoaltje vraidag gaf mie endelk wat inspiroatie om te reageern!

Dank je Bram!

Ons opoe van 91 wol geern op Noord en zee, dat ik dat mor eem regeln mos…!

Hou dat? vroug ik. Doe waarkst ja bie d kraante!

k Wil t wel perbaarn, mor k beloof joe niks! stutterde ik.

Noord belt. Wie hebben dat nait, perbaar t ais bie Drenthe?

Huh? Den ben k der kloar mit!

Houzo? Nou, zai wil dat en as t nait lokt, krieg k hom van veurn!

Oh, wil zai dat zulf? Hou old wordt ze? 91!

Den goa k veur joe op zuik!

n Weke loater: Moust ais kieken, k heb bericht van Noord… Dunderdag komt der aine langs!

Oh? Wat schier ja en wanneer wordt t oetzonden? Dat wait ik nait!

Dei kwam n poar weke loater en wat heffe genoten! t Refelbekje ston nait stil!

Alle waarkzoamheden op t laand woaraan zai mit doan haar, kwamen veurbie! Prachteg!

n Weke der noa zegt ze glimmend tegen ons: Mout je ais kieken, houveul koartjes ik kregen heb!

Der is ook ain bie van n poar vrauwluu, dei vrouger bie deure kwamen mit houdjes!

k Heb mie voak aine van heur koft…

En nou kom k eem op Nij Comp Nij…. Der zat ook ain bie, dei ze noar heur zeun Epie stuurt haar, dei joareg was…,E. van Koldam, schipper bie dat febriek in Nij Comp Nij!’

Gain adres, gain postcode! Mor de postbode dee doar nait moeilek over! Brocht t koartje mooi op stee!

Tieden verandern, zol je nou ais perbaarn!

(Bie t Grunneger archief is d haile boudel beland, Kieken of lustern is dus meugelk)

n Joar of wat leden vruig Lineke Dekker oet Blijham mie of k n noam bedenken wol veur heur nije boot op t Oldambtmeer…
Zai wazzen d eersten, dij wel wat zagen in rondvoarten op t meer.

Van t ain kwam t aander…
Mien bedochte noam: ‘Windschere’ wuir oetkozen en as dank kregen mien vraauw en ik n schier dagtochtje aanboden.

Vanoaf Wedderveer mit boot over de Oa en t Boelo Tiedenskenoal noar Rhederbrug.
Onderweegs vertelde Alex Visschering over de noatuur. Iesvogeltjes, rötten vangen en zuks meer. Hai haar zien gitaar ook mit nomen en laidjes as ‘Lenin en Stalin’, ‘boeren bedankt’ schalden over t wotter.

‘Hollanders’ dij ook mit wazzen keken heur ogen oet!
“Wat prachtig! Het lijkt wel de Mississippie!” kraaiden ze in t Boelo Tiedens kenoal.
Jammer, dat ze nait alles mitkregen van Alex zien verhoalen…
Zo as t verhoal over Nij Stoatenziel. t Eerste stee in Grunnen, woaras de zunne opkomt!!
Zien enthousiasme dee ons besloeten, om dat ais te beleven.

Oaflopen zummer zee ik op n nommerdag tegen mien buurman: “Zellen wie mörnvroug noar Nij Stoatenziel?” (mien vraauw was t te vroug, mor hai hapte gelieks tou)
Om kwart over vieve vot. t Was oareg diezeg en t leek der nait op, dat zunne veur n dag kommem zol…

Dat was ook zo!
d Haile tied gain zunne zain! Jammer, mor t dee niks oaf an ons plezaaier.
Deur de raiten noar t vogelkiek-hoeske. Wat n pracht, wat n rust en stilte.

“Mooi he!”, mompelde buurman.
“Joa, asof der gain mensk op de wereld is.”, was t antwoord.
Mit ons baidend was t volop genieten.
“Kiek doar ais”, raip ik enthousiast. Aan t kaande van t wotter luip mouderziel allaind n mooie Ree. “En wie mor dinken, dat we hier mit ons baiden bennen!”
“Joa, zol hai der net zo over dinken? k Wol zien gedachten wel ais heuren!”

Tegen tien uur opperde ik, dat k ook nog wel ais bie de punt van Raide kieken wol.
k Was der nog noeit west! Buurman von dat n gemis en vertelde honderd oet over aal dij vrachtwoagens puun, dij hai doar stört haar en over de floater van Joop den Uil mit zien boeten- en binnendiek!

Thoeskommen vertelde ik moeke, wat n prachtege dag wie had haarn en nog dezulfde zummer bennen wie n moal of wat op fietse van Stoatenziel noar Termunten en noar Ditzum west…
Achterof vroag ik mie of, woaras ik mien verstand joaren leden haar.
Wie stoven mit caravan deur hail Europa! Stress en keboal wazzen voak ons dail.
En dat, terwiel t dichtbie zo mooi en stil is…

“Der gaait niks boven Grunnen”, heur ik Henk Vonhof op Noord zeggen.
En zo is t mor net!

Joa, loatve mor gewoon doun! Wie binnen gain Engelsen of Fransozen. Wie proaten Grunnegs, en zo is dat!
k Las in d’kraande, dat Niemeyers tabaksfebriek dicht gaait. As je smoken is dat nait mooi. As je tegen smoken binnen wel. Mor as stravve smoker liekt mie t nait verkeerd. Ie kennen de sigaretten en zuks meer wel aal in pries verhogen, mor dat helpt gain sodemieter! t Is n versloaven, hè! Ik las dat ons regeren der aal joar 2,8 miljard beter van wordt. En nog ais 500 miljoun aan aksiens beurt. Wat ducht joe! En mor roupen, dat je der mit ophollen mouten. Beetje schienhaaileg?
De fabrieken sloeten? Bin je nou hailendaal …? Nee, gain verlet om nog meer waarklozen noa dij mieterge Ko Rona. Mien idee? Verbaiden dat ze dij smerege versloavensstovven toudainen! Ja, mien denken is in de loop der joaren oareg biestèld. Roem viefteg joar leden, in 1969 was k nog oareg begaisterd. Dou kregen wie as oetgever van t Veendammer Nijsblad n nuigen om bie t honderdviefteg joareg bestoan van Niemeyer aanwezeg te wezen. Prachteg om te zain dat dij wichter mit ain greep in de tebak persies 50 gram in t shagpuutje deden, n meroakel!

n Prachteg bedrief mit hail veul persenail. Kon ja nait beter. k Mog zulf as aanwezege wat van heur handel oetzuiken. k Heb kozen veur n sigaret van n meter. Eerlieks woar. Mor hou haard k ook zoegen kon, ik kreeg der gain rook deur. Achternoa, haar dat n reden wezen kind om te stoppen? Meschain wel, mor doar was k dou nait mit bezeg en anno 2020 huift dat veur mie – noa 75 joar – ook nait meer.

De schoa van de beem s is nog nait oafhandeld of der hangen ons al weer nije buien boom kop?

Oardgas oet de grond gaf n hoop verdrait! Nait veur Den Hoag, dei kon veur de miljarden inkomsten oet t gas hail wat oetgeem… Nait verkeerd vanzulfs, mor Grunnen wuir dou zo n 60 joar gain Nummer Ain!

Inmiddels n beetje went aan alle commotie s, lees ik, dat de zee nou leverancier is en blift? Is der al onderzuik doan den? vroag ik mie oaf…..?

Of, krieg ve over zo n viefteg joar straks zee-beem s? En wat benn n de gevolgen doar den van?

Is de wotterkeern den staark genogt om dreuge vouten te holl n? Of…? Of….?

Der is nog gain onderzuik doan deur de neudege instanties, mor dat komt wel goud….!?

De euliemagnoaten zeggen dat der gain gevoar is!

Nou bliekt volgens de kranten, dat der al WEL onderzuik doan is! En dat de natuur onder wotter al doaneg oet t lood is! Ach, wat moakt t oet! Over viefteg joar zai ve wel weer!

En nou kommen der ook nog n poar politieke partijen, dei denken an n atoomcentrale in de Eemsmond…..

Schone energie, doar mout ve noar tou!

En woar mout dat honderdjoar gevoarleke oafval den noar tou?

Oh, dat is geen probleem hoor! In de Groninger bodem is daar ruimte genoeg voor toch?!

Nevver noeit! Breng dat geern noar de Randstad…. Desnoods mieter je der n Metro mit vol, mor hier nait!!

Kan toch niet? Ten eerste is het vervoer daar naartoe levens gevaarlijk en ten tweede kunnen we de Metro niet missen!

Wat ja n logica! Mor reken der mor nait op dat je ons vannijs in de stront zetten!! Wat zeg je?

Dat ie dikke egoistische koukoppen benn n!

t Benn n gain woorden, dei ik geern broek….

Mor zai verstoan t ja nait en ik ben veur eem mien gram kwiet!

t Is 1950, As dattien joarege mag k mit mien oldste bruir en nog n stok of tien jongs mit noar de TT in Assen.

Wie hebben oafsproken dat ve vraidagoamd om 24.00 uur vanoaf de Scheemter toorn op fietse vertrekken….

As mien bruir goud op mie paasde, haarn d oll n gain probleem da k mit ging. Wat n vertrouwn he!

Via Westerlei, Veendam, Gaiten en Rolde – eem op de hak bie Hofsteenge- noar Assen.

As wie onder de poort -twei grode T-T s in d Rolder stroat deur fietsten kregen wie t gevuil van euforie! Yes!

Wat n drokte! Zoveul volk bie b kander haar k ja nog noeit mitmoakt…

Twei kameroaden woll n vot doadelk t centrum in, mor ain van de oldsten zee: Nee, wie goan eerst noar t bos… knie n kieken!

He? docht ik, knienen…. wie kommen toch veur de TT-nacht!

Mor dou wie t bos in laipen, kreeg k hom deur…. Gerammel deur t haile bos! Net as t Boltjesfeest in t bos bie Nienoord doch ik. Doar was t veureg joar net zo! Veuls te veul veur n jonkje van dattien! Mien oll n haarn schienboar n roem gewaiten?

k Von t in t centrum veul schierder! Maart, kermis en zowoar wel twei zweefmeulns, en autoskoeters. Mien lust en mien leem!

t Publiek haar t in dei tied al over de nacht van Paries in Drente.

En ook bier was der vanzulfs volop… en doar heb k ook -noar mien denken- wel vieve van had!

Om n uur of aachte noar de boan. De fietsen op n lappe graslaand op de kop zet (dat mos vanwege de zunne?) Lekke banden haarn wie ja laiver nait! In dei joaren was t mit TT ait nuver waarm… Ainmoal zulfs zo slim, dat je bie de aanliggende boerderij wotter aanboden wuir… n Glaske veur n gulden!! Nou zeg ik joe! (n entreekoartje Fl. 3,50!)

Langs de boan ain laange riege stropakken. t Pebliek haar der verschaiden van oet n kander ropt en lag der in te sloapen.

Ook ain van ons kluppie dook der vot doadelk in. Hai haar n bult sloap neudeg. En as t rezen begunde om tien uur slaip e nog!

Ondanks t lawaai van n ploug Broabanders, dei nogal haarde meziek speulde. Mooi he zeden wie.. Mor n wat older mannechie steurde zok zo aarg, dat e der wat van zee… n Zwoare grauwe hoornbloazer ging stoan en raip: vijf van die mannekes!

Op n geem moment wuir t stil.. Zai haarn verlet om n pilske. Tot onze verboaz n draaiden ze alle instrumenten oet n kander en vleiden de onderdail n op n grode loaken. t Oldere mannechie dook in t stro en mompelde: gelukkeg, eem rust!

Onder t snurken vloog hom t kunstgebit haalf oet de mond!

Noa t innemen van de neudege benzine (bier) wuir n de instrumenten weer hersteld en begon t lawaai vannijs en was t pebliek bliede.

d Ol mannechie nait… Hai naarde wat, pakde zien spultje op en vertrok… Op zuik noar n rusteger stee op de ,brandende’ diek.

t Spektoakel ging toun nog deur tot zes uur. Noast de 250, 350, 125 kreeg je de Koningsklasse en de ziespans..

Febrieksmesjienen wazzen dou nog nait op de maart. Elk haar zien aigen opgefokte motor en as e vast laip, zetten ze hom gewoon tegen n boom!

Langs de boan stonden dou nog riegen bomen en t gebeurde, dat de omrouper melde, dat der n kou of peerd op de boane laip!

Loater ook nog de brommers mit zo n 16 versnelln s. t Wazzen net iemen, aans niks as gejank en schoakeln,schoakeln, schoakeln! mooi man!

Dei dingen vlogen mit n gang van wied over d honderd over t asvalt! Ik herinner mie nog n poar Nederlanders, dei mit n Jamati reden…

n Aigen produkt, woaras de maiste rieders n beste kluif aan haarn! De noam van Jamati was van de drei kameroaden, dei hom oetdokterd haarn.

k Wol joe de noamen geern nog nuimen, mor zai kommen eem nait boven… Leeftied, ducht mie.

Ook Duke en Masetty: de ain goud in de bochten , de aander op t liek enne. Een hail spannende race!

Wieder veul spanning as t ging om de Hollanders…. De witte reus, -Wil Hartog-, Boetje van Dulmen, Jack Middelburg, Driekus Veer, enz. enz.

Prachteg, prachteg! En…. ait waarm en mooi weer!

Noa n joar of vaar op fietse kon ve loater mit de auto, en nog loater op n aigen motor -ik op n zeumenhaalf Honda-.

n Poar moal was t parkeerlaand zo zoppeg, dat aal d luu holpen wuir n deur n sleepauto. Ain mit n dikke Chevrolet, docht dat zien slee t zulf wel kon en… woarimpel hai schoot mit n bloudgang tou de poele oet en belande in de koffer van zien veurganger!

Wat n lol! En wat stoer! Joaren loater ging k mit n kameroad. Onder de hoofdtribune aal Chinees n, dei Loempia s verkochten veur n gulden!

Mien moat: nou moust zain! Zaii benn n hier net en…. Nait jeuzeln zeg ik: Doe komst hier al wel 25 joar… Woarom staist doe der nait?

t Joar der op mossen ze 2 gulden kosten! Was in opdracht van d organisoatie, dei t veuls te goudkoop vonden!

Machinus oet Maiden, postbode en in zien vrije tied ober, was ook van de pertij. Hai kreeg n tribune aanwees n mit aal Noorn en Zweden!

Hai verstoan gain snars van dei toal en naarde, dat t n klotendag worden zol……. Ropt zien collega van de tribune noast hom:

Jij zit gebakken vandaag! Hai wos, dat ze in dei landen zwoare drinkers wazzen en dat zai in t boetenland goudkoper zoepen konden…

Houdat den? wol Machinus waiten…. Nou, als ze je roepen stuur je t bier naar boven en dan maak je een handbeweging ter betaling.

Als je het geld dan in handen hebt en het is -vaak- teveel, steek je je duim op en loopt gewoon verder!

Machienus haar inderdoad n ,golden dag!’ Volgens zeggen, was e nog noeit zo blied west!

As je noar hoes gingen en je bleven zitten tot t leste, was t ait wel n uur of tweie, dat je op de snelweg kwamen.

Op mien Honda ging dat n stok beter…. Langs aal de auto s deur de baarm en ainmoal op de snelweg t gas der op!

Zo gauw as t kon, t gas open en in ain gang (150?) zes , zeum bolides wieder….!

Gelokkeg aal goud oaflopen! Mooie herinnerns benn n ook n bron van gelok!

De hoge intreegelden hebben t veur mie nait moeilek moakt om der noa –tig joaren mit te stoppen.

Mit dit schrieven was k nog eem trogge en dat vuilt ook goud!!

Hou krieg je t en hou kom je der oaf?

Oaderverkaalken? Wat is dat? Heur ik nou mainegain denken…

Doar heb je t weer! Vuil je vanneis, dat je bie de grieze groep heur n!

En den besef je opains, dat der tegenwoordeg proat wordt over dementie, Alzheimer, Parkinson enz.

Tieden verandern en oldjes kenn n dat moeilek behappen…. Dat ist!

Onlangs mos k noar d aptaik veur n nije deuze vol medezien n.. Kom in hoes, zai k dat der veur de zoveulste keer weer aander deuskes bie benn n! Verduld!

Mit n gramnietege kop weerom! Wat heb je mie nou weer flikt? vroug ik t wichtje dei mie te woord ston.

Hoezo/ stoamelde ze en kreeg n vuurrooie kop. Doar kinst doe niks aan doun heur schrok ik…

Is de boas der zulf ook?

Boas kwam der mit n lachend gezichte aan en wol mie d haand langen…

Loat mor! Wat bin je van plan? Benn n der nog nait genogt demente oldjes?

Hoezo? Nou, elke bod as ik mien medezienen hoal, is der weer wat aans bie!

Woarom dou je dat? Ik ben nog redelk bie t verstand, mor mit dit gesodemieter krieg ik t idee, da k dement an t worden ben! Hol doar nou ais mit op!

Zell n vast wel weer goudkoper wees n?

Inderdaad, dat moet van de zorgverzekeraar! De oude waren echter ook niet meer verkrijgbaar…

Zel wel! Gain winst genogt! En den ook nog eem in t puutje kieken en aanlangen veur acht Euro!

Schoam joe! Mien vertrauw n in de minsk is al nait groot meer en nou doun ie doar nog n schepke boven op!

Dank joe!

Mit n franterge kop noar hoes achter d olle rollator!!

Wat n wereld!

In de bouw.

Berend koekak, Fobbe moaze. Jans nakke, Gele Durk, Moos Nijland, Karel pinda, Jan Popije, Sam bukken, Haarm kniene, Tjump Nijland, Jurn Nakke, Gerrit piggo, Jan bee… Aal bienoamen, dij bie mie opkommen, as ik trogge denk aan joaren zesteg in Nij Scheemde. Ook wel Scheemterhammerk nuimd.

Moos is veur mie ain van de kleurrieksten, woarvan ik mien herinnerns geern mit joe dailen wil.
As Moos bie mien schoonvoar kwam, den nuimde hai hom in t begun bie d achternoam. Noa n glaske bier of n kloare ging e over op zien veurnoam en noa t twijde borreltje was t den Popije veur en Popije noa…!

Ik haar doar in t begun n roare kiek op, mor t was gain schelden… Hai vuilde zok den thoes en gaf dat mit t benuimen van de bienoam aan. t Was ook aait n sigoare, dij hai van t rooktoafeltje snapte. Nou is roken betuun, mor dou stond der in elke hoesholden zo’n ding in t koamer mit sigaretten en sigoaren, n asbakje en voak ook nog n puut pieptebak.

Moos was bouwvakker, net as mien zwoager en baide waarkten bie d zulfde boas. Der was n bult waark in de pervinsie. Maist nijbouw in dij tied.
In t begun mozzen zai op fietse, loater mit heur baide op n plof en nou was t al mit n buske. Zai haarn n put in de buurte van Zuudloaren, n groot nij hoes veur n meneer, dij t nogal nauw nam en nait echt gul was.

Al n moal of wat wuir der over proat en zegd, dat e gain kradde bier brocht. Moos von, dat t nou tied wuir om dat mor ais te regeln!
“Dat lukt die nait bie dizze kerel”, docht mien zwoager.
Moos docht doar anders over en haar aanderdoags al n goud plan…

“Moi!” Moos stapde in t buske en zette n grode platdrôkte deuze achter de baanke. “Nait tegenaan steuten”, was zien woarschauwen. “t Is nogal breekboar!”
“Wat zit der den in?” wollen jongse waiten.
“Dat zai je dommeet wel” dee e gehaimzinneg en smeigelde wat.

Aankommen bie t bouwwaark, luip e votdoalek deur noar t heerdstee.
Oet t keton kwam n groot stok helder glas, dij hai in de schöstain metselde.
Zien moaten wollen waiten, woarom dat was, mor Moos zee niks.
“Bek dicht, as dij kerel straks komt!” woarschouwde hai.

Om n uur of vaare kwam meneer aanreden in zien bolide. Even kieken, hou of t der bie ston.
“Zo, heb je de open haard al klaar?” maarkte hai op.
“Joa”, antwoordde Moos kört.
“Enne, doet ie het?”
“Dat zel wie even oetperbaaiern”, zee Moos en luip mit n poar olle kranten noar d heerdstee.
Vlam der in en in d’open heerd onder schöstain.
Gain trek…!!

Meneer kwoad en sputterde, dat hai docht mit echte bouwvakkers van doun te hebben!
Moos op rogge onder t schöstain: “Ik zai t duchtmie al. Dat hebben wie al voaker had. As meneer ons n kratje bier mit n liter jenever brengt, komt t wel goud”.
De man broesde wat over assosioal gedrag en stoof mit n dikke rooie kop vot.
“Zugst nou”, zee zien moat, “k Zee die ja, dat e dat nait dut!”.
“Wie zeln t zain”, was t antwoord, “zellen wie deuren der in hangen?”

Mit zien baide haren zai der vief deuren in, dou zai n auto heurden.
“Nou zelst hebben”, zee mien zwoager, “doar komt de boas!”
Dij was t nait. Mit grode stappen en nog aal rood om kop kwam meneer aanbentern en zette n kradde bier onder t venster.
“Zugst dat?”, glom Moos, “Ik krieg geliek!”

n Poar doage loater kwam meneer weer aanrieden.
“Hest dij glasploate der oet?”, vruig mien zwoager benaauwd.
“Aal op stee, loat hom mor kommen!”
“En…? denk je dat ie het nou gaat doen?”
“Ducht mie wel, joa, wie haren t mankement nogal gaauw vonden”, zee Moos.
Hai stapte noar d’heerdstee en stak vannijs de brand in n kraande. Dij vloog mit n bloudgang deur t schöstain en gaf meneer aanlaiden om zien gezichte weer wat in de plooi te trekken.
“Is meneer nou tevreden?”, vruig Moos laconiek.
“Zo hoort het…!!!!”
“Joa, mor t ken nait aal mitlopen in t leven hé. n Leven zunder hobbels is ook mor saai, vinnen ie nait?”
Op terograaize noar hoes was der van muieghaid niks te maarken.

“Mit Moos mog ik altied geern waarken”, vertelt mien zwoager voak op verjoardagsvesides.
En as je doar den noa viefteg joar nog om laachen kennen is dat hail begriepelk.

Berend Koekak, Fobbemoaze. Jans Nakke, Gele Durk, Moos Nijland, Karel Pinda, Jan Popije, Sam Bukken, Haarm Kniene, Tjump Nijland, Jurn Nakke, Gerrit Piggo, Jan Bee…..Aal bienoamen, dij bie mie opkommen, as ik trogge denk aan joaren zesteg in Nij Scheemde. Ook wel Scheemterhammerk nuimd.
Moos is veur mie ain van de kleurrieksten, van wel ik mien herinnerns geern mit joe dailen wil.
As Moos bie mien schoonvoar kwam, den nuimde hai hom in t begun bie de achternoam. Noa n glaske bier of n kloare ging e over op zien veurnoam en noa t twaide borreltje was t den Popije veur en Popije noa…! Ik haar doar in t begun n roare kiek op, mor t was gain schelden…Hai vuilde zok den thoes en gaf dat mit t benuimen van de bienoam aan. t Was ook aaid n sigoare, dij hai van t rooktoaveltje snapte. Nou is roken betuun, mor dou ston der in elke hoesholden zo’n ding in koamer mit sigaretten en sigoarn, n asbakje en voak ook nog n puut pieptebak. Moos was baauwvakker, net as mien zwoager en baaident waarkten bie dezulfde boas.Der was n bult waark in de pervinsie. Maist nijbaauw in dij tied. In t begun mozzen zai op fietse, loater mit heur baaident op n plof en nou was t al mit n buske. Zai haren n put in de buurte van Zuudloaren, n groot nij hoes veur n meneer, dij t nogal naauw nam en nait echt gul was. Al n moal of wat wuir derover proat en zegd, dat e gain kradde bier brocht. Moos von, dat t “Nait tegenaan steuten” was zien woarschouwen. ‘t Is nogal breekboar!’
“Wat zit der den in?” wollen jonges waiten.
‘Dat zai je dommeet wel’ dee e gehaaimzinneg en smeigelde wat. Aankommen bie t baauwwaark, laip e votdoalek deur noar t heerdstee.Oet t keton kwam n groot stok helder glas, dij hai in de schὄsstain metselde. Zien moaten wollen waiten, woarom dat was, mor Moos zee niks.

‘Bek dicht, as dij kerel straks komt!’ woarschouwde hai.
Om n uur of vaaier kwam meneer aanreden in zien bolide. Even kieken, hou oft der bie ston.
‘Zo, heb je de open haard al klaar?’maarkte hai op.
“Joa”, antwoordde Moos kὄrt. ‘Enne, doet ie het?’
“Dat zellen wie even oetperbaaiern’ zee Moos en laip mit n poar olle kraanten noar de heerdstee. Vlam derin en in de open heerd onder schὄsstain. Gain trek…….!! Meneer kwoad en sputterde, dat hai docht mit echte baauwvakkers te doun te hebben! Moos op rogge onder t schὄsstain: “Ik zai t ducht mie al. Dat hebben wie al voaker had. As meneer ons n kratje bier mit n liter jenever brengt, komt t wel goud’. De man broesde wat over assosioal gedrag en stoof mit n dikke rooie kop vot. “Zugst nou”, zee zien moat. “k Zee die ja, dat e dat nait dut!”.
‘Wie zellen t zain’, was t antwoord. ‘Zellen wie deuren derin hangen?’
Mit zien baaident haren zai der vief deuren in, dou zai n auto heurden.
“Nou zelst hebben”, zee mien zwoager.
“Doar komt de boas!”
Dij was t nait. Mit grode stappen en nog aal rood om kop kwam meneer aanbentern en zette n kradde bier onder t venster. ‘Zugst dat?’ glom Moos. ‘Ik krieg geliek!’ n Poar doagen loater kwam meneer weer aanrieden.
“Hest dij glasploate deroet?” vruig mien zwoager benaauwd.
nou tied wuir om dat mor ais te regeln! “Aal op stee, loat hom mor kommen!”
“Dat lukt die nait bie dizze kerel” docht mien “En……? Denk je dat ie het nou gaat doen?”
zwoager. “Ducht mie wel, joa, wie haren t mankement Moos docht doar anders over en haar aan- nogal gaauw vonden” zee Moos. Hai stapte derdoags al n goud plan….. noar de heerdstee en stak vannijs de brand in n kraande. Dij vloog mit n bloudgang deur de schὄsstain en gaf meneer aanlaaiden om zien gezichte weer wat in de plooi te trekken.
‘Is meneer nou tevreden?’ vruig Moos laconiek.
“Zo hoort het…..!!!!”
‘Joa, mor t ken nait aal mitlopen in t leven hè. n Leven zunder hobbels is ook mor saai, vinnen ie nait?’
Op trograaize noar hoes was der van muieghaid niks te maarken….
‘Mit Moos mog ik aaltied geern waarken’ vertelt mien zwoager voak op n verjoardagsverziede. En as je doar den noa viefteg joar nog om lagen kennen, is dat hail begriepelk.

In Coronatied was t oareg stiller.. Om ons badmintoncluppie bie n kander te holl n mainde ik elke moand n meeltje te mouten stuurn… Omdat nait elk dialect lees n kin, dee ik dat voak in twei toal n… (haha)

Dankzij de snijjacht (Dank zij de sneeuwstorm)

Heb ik nou eem de tied vonden (had ik nu even tijd)

Om de oetslag van de competitie (om het overzicht van de competitie)

op pepier te zetten (bij te werken en te publiceren…)

t Gait hier vanzulfs om t oaflopen joar 2020!

Dit betreft de competitie van het jaar 2020!

Noa n slechte start in janewoarie (Gesienus n beste roffel…)

Na een slechte start (hartstilstand Gesienus)

Kwam t gemoud der weer n beetje in…

Ging het na enige tijd toch weer ietsjes beter.

De partij n wuirn sportief speult en gain ain, dei op n aander raagde!

(we speelden sportief en er werd niet gescholden)

Zowel d wichter as d jongs haarn der lol in!

(Zowel de dames als de heren hadden er plezier in!)

Bie de wichter wuir Joke nummer ain… (speulde heur hoar hier n rol?)

Bij de dames werd Joke nummer een…( speelde haar haar hier een rol?)

Hillie twijde, Trijnie daarde en Itie vaarde.

(Hillie (2), Trijnie (3) en Itie (4).)

Noamens de club kreeg elk n dreuge worst van Bert..

Bert overhandigde ieder een droge worst….

t Mout n oardeghaidje bliem,… nait den?

(we houden het bescheiden, nietwaar?)

Bie d jongs was t voak n gehouw van jewelste…

Bij de mannen ging het er vaak fel tekeer!

Omdat t hier aal dubbelspel was, elke bod twei winnoars…

Zij speelden ,enkel’ dubbel, dus twee prijswinnaars….

De Berten sprongen der boven oet (361 punten!)

De Berten speelden het best (361 punten!)

t Gait hier om Bert v.d.L en Bert v.Z…. (den wait je t wel!)

Het betreft de Berten v d L en v Z… (u kent ze wel!)

Mie aid wat te fanetiek? (spelen mij soms te fanatiek)

Mor wel schier om te zain! (wel leuk om te zien!)

d Aander jongs deden ook goud heur best, mor hoalden nog gain 300!

De andere heren speelden ook wel goed doch hadden nog geen 300 punten!

Ken ook ja nait! Zo voak kon ve ja nait speul n!

Kon ook niet, we speelden maar enkele keren!

Dou kwam Ko Rona! (Toen kwam Corona!)

En nou…. zit ve der nog midden in en hfff ook nog n bult snij!

(En nou zitten we midden in de winter, een echte!)

t Gemoud lopt joe bietieden ja over! ( t Gemoed wordt er niet beter op!)

Gelokkeg heb k nog n pc en n bult vrije tied! (Ko Rona en Drees)

Gelukkig heb ik nog mijn pc en veel vrije tijd! (Ko Rona en Drees)

En…. n poar dikke doemen, woaroet k n bult zoegen kin!

(En een paar dikke duimen om te fantaseren….)

361 punten! Dat leuv m ie toch nait?

(361 punten! Dat geloof je toch niet?)

Nou den! Kom op! Baide poten weer op de grond! Aal dat geplaas!

(Nou dan, beide voeten op de grond en hopen dat we gauw weer ,vrij’ zijn!)

k verveelde mie vanmiddag en doarbie was k ook nog franterg! sorry!

(ik verveelde me nogal -verveling en slecht humeur, sorry!)

Das nou weer over! Woar fantasie bie helpt he!

(k Voel me nu weer goed… n Beetje fantasie is dus ook als een medicijn!)

Groutnis en n elleboog op oafstand: Klaas

(Groetjes + een elleboog op afstand!: Klaas)

Belevenissen mit de Kapitein…
k Zol der nog even op trôogge kommen…
In n veureg verhoal konden ie lezen, hou as k aan de Kapitein kommen ben.
Nou t ain en aander tussendeur, en doarnoa de leste: t òfschaaid…?

As wie t aits wachten konden, smoandags, den gingen wie geern richten t Damsterdaip in Grunnen, noar d automaart.
Mien kameroad haar n olle Austin kocht van Pijp oet Boertange. Omdat e nait an de proat te kriegen was, en mien kameroad doar nogal nusteg over was, zol Pijp hom dij moandagoavend trogge nemen en perbaaiern om hom in Stad te slieten. Mien kameroad zol zien betoalde geld den trôgge kriegen.

Berend haar mit veul muite t ding an de proat kregen en Pijp zol hom rieden…
“Gas geven blieven! As e die oafslagt, lopt e nooit weer!”
“Ie kommen achter mie aan he”, ruip Pijp oet t openstoande roampie.
“As e mie stoan let, reken ik op joe!”
“Aal op stee”, ruip Bé, en wie sprongen in t aander òl ding, woaras Pijp mit kommen was.

Nog veur Zuudbrouk zagen wie Pijp al in de baarm van de weg stoan te zwaaien.
“Hest n stuk taauw?”, vruig Bé.
“Nee, mor messchain kinst hom wel drukken?”, kwam nogal benaauwdereg oet Pijp zien strödde…
“Schoade veur die!”, zee Bé en stapde in zien grode Ford Custom.
“As dat mor goud komt”, was onze reaksie.
“Dat leuven ie toch nait? Veur dat wie in stad bennen zit k in zien kovver!”, laagde Bé.
En n lol dat wie haren!

Noa n poar kilometer, rolde t bumper over t stroade en even loater zwaaide Pijp nogal hefteg mit zien linkeraarm, dat e stoppen wol!
“En nou?”, ruip Bé.
“Wacht mor even”, antwoordde Pijp en sprong over t sloot richten n kwekerij.
n Zetje loater kwam e trogge mit n laank stuk taauw.
“Dat liekt mie nait veul beter as dien ol brakje”, gaf Bé hom te kennen.
“Staark genogt”, was Pijp zien mainen.
De Custom der veur, taauw der tussen en doar scheet t weer hén…

In opdracht van Pijp reden wie rusteg de maart op en dou hai docht, dat e wat aargens n steegie vinden kon, trapde op rem en draaide wat noar rechts om hom tussen t aander òl rommel te stallen.
Zien tactiek was, dat koopluu den mait zain konden, dat e sleept worden was!
Veur de Custom was ook al gaauw n steegie vonden en noa hier en doar wat snuustern zagen wie Pijp bie n ol Renooltje stoan.
“Ik stoa veur de gebreken’, was zien proatje en inderdoad, hai ston an veurkaante!
“t Austinnechie al kwiet?”, wol Bé waiten.
“Joa, en ook nog schier aan verdaind”.

Loater vertelde hai ons, dat e der n poar ,’redelke’ accu’s in zet haar veur n vlottere verkoop.
Onderweegs noar hoes kwam d geldbuul teveurschien en vertelde hai ons, dat e dij oavend 9 auto’s verhandeld haar en der 100 gulden beter van worden was.
“k Leuf, dat k aander weeke weer goa”, zee ik. “Den wil k perbaaiern of k de Kapitein verpatsen kin…?
Jongs wazzen ter nait mit ains, mor beloofden wel weer mit te goan.
“De mazzel en tot d aander weeke”, was t oafschaaid in Scheemde.

In de joaren viefteg haar ik n Opel Kaptän van t geboartejoar 52.
Zoas ik in n veureg verhoaltje al schreef; n lekker ding! Hail rustege motor, Fl. 12,50 belasten in drij moand en veur n tientje n volle tank.
Mout je nou ais om kommen!

t Is moandag en zoas ofsproken bennen wie onderweegs noar d automaarkt in Stad.
Wie, bennen dizze raaize Derk Puck, Bonzo en mien persoontje; laifhebbers van alles wat mit auto’s te moaken het.
Veur mie wordt dit n zwoare raaize. Ik heb besloten om mien ‘traauwe Kaptein’ te verbatsen en omdat e hier en doar wat goaten in t pokkel het, is d automaarkt n oetstekend stee om te sloagen.
“Aiweg zunde, dast hom vot dust, hai lopt as n naaimesientje”, zee Bonzo en ik wuir der nait zekerder op, of k hom wel weg doun mos…

Mor dou wie in Stad, t Damsterdaip op reden, wos k t weer wizze: Hier mout t weden. Wat n volk, vandoage! Dat gaait lokken!
Aalgedureg kreeg k bezuik van n sjacheroar, mor zoas aait, braaken ze hom tot op t droad òf en begon ik te twiefeln, of k der wel goud aan doan haar…
In elks geval, wos ik, dat pries oareg zakken mos, wol ik hom hier slieten.
Van vaarhonderd den mor noar drije…?
Dat scheelde wel. n Òl voelderd, mit n board van zeuven weeke was al drij moal langskommen en dee zowoar n bod van honderd doalder!
“Dat is veuls te min”, zee Puck, dij ondertied n olle plof kocht haar en an t oetzuiken was of dij in de koffer paasde.

t Wuir elf uur, haalf twaalm en wie dochten der over om noar hoes te goan…
Puck pakte zien plof op en schoof hom mit t achterende in de koffer.
“As t n stukje taauw hest, zet ik t stuur vast, den kin der niks mit gebeuren…”
Pijp haar t der nait op begrepen, dat e n omraize moaken mos over Scheemde…
“Hou laank ben k den wel nait onderweegs!”

n Poar handeloaren gingen op de voeste. t Ging der gewoapend an tou!
Pijp kreeg t der benauwd van en zee: “Vot den mor. Instappen en wegweden. Doar komt dij draanksteern weer aan… nait meer op ingoan…” was zien remedie. Hai zag t aankommen… Auto vot en den…?
“k Geef die twijhonderd gulden”, zee de draanksteern.
Dou ik zag, dat e sikkom nait op zien bainen stoan kon, zag ik mien kaans…
“Twijhonderdviefenzeumenteg”, was mien antwoord, en der vot achteraan: “As t n kerel bist, den pakst nou deur… dit is dien leste kans!”
“Twijhonderdviefteg den”, sputterde hai.
“Gelok!”

“Dat ken nait”, ruip Puck, “leste bus en train bennen al vot. Hou kommen wie thoes? Enne. Woar mout ik mit dij plof hén?”
“Pijp is nog nait vot, regel t mor mit hom. Zeg hom mor, dat e over Scheemde rieden mout”.
Wie konden maarken, dat t al oardeg loat was… Hoogoet nog zo’n twinteg sjacheroars stonden nog wat te kwakken en haren lol mit n stok of vaaier wilde wieven, dij nog geern n poar buudscenten pakken wollen.
Twije luipen op ons of en haren al gaauw deur, dat wie gain sjoege gavven.
Wel kregen zai de Garribaldi in de smiezen, dij ik aait op d houdenplaanke liggen haar.

En dou ging t loos! Mit t houdje op kropen zai op t dak van de Kaptein.
‘Draanksteern’ kreeg nou n auto, woaras hai wel n volkstoentje van moaken kon.
In n deuk van rond 80 centimeter kon hai, mit wat swaarde grond der in, zo zien praaien poten.
De sfeer wuir der nait beter op. Puck haar zien plof bie zien bruier stald, mor mos hom doarveur eerst oet bêrre bellen!
Wie blied! Al was de roemte in de Hilmann nait om over te snaren.

Gelokkeg konden wie der onderwegens aalgedureg n moal oet.
Wotterslaange lekte. En t motortje sluig aalgeduureg oaf.
Mit n fleske evem noar t sloot en ‘Even steuten’ was Pijp zien devies.
Vlogen wie normoal in zo’n drijketaaier noar Stad, dizze raaize wuir t wat laanger.

Om vaaier uur reden wie Scheemde in! “k Goa nait meer op berre”, zee Bonzo, “mout om haalf zesse de kroane al weer draaien loaten! k Leuf da’k mie n oetsmieter bak en den mor richten Delfziel goa.”
“Ik doek der nog wel even in, ken nog wel drij uurkes pakken”, zee ik.
“Tot vrijdagoavend MOI!!!”

Oflopen wiekenne was aarg graauw. Gelokkeg haar k van n poar kameroaden wat boukjederij kregen van o.a. Wim Kan (‘Soms denk ik wel eens bij mezelf’), ‘Tussen t Zieldaip en t Grootmoar’ (400 joar Nij Scheemde – t Woar) en ‘Weerzain’ van Chris Kiel. Hail biezunder om te lezen hou Wim Kan t woordje ‘denken’ gebroekt in zien spinsels! En hail mooi om te waiten hou t verleden was in Nij Scheemde – t Woar.
Zwoager Haarm vertelde over Kaspel en Kerkenwieke en dat Wia Buze heur moeke bie Ol Ootje in bedstee geboren was. Doar mos k meer van waiten! t Boukje van Nij Scheemde der bie, en joa, op bladziede 174 was oetgebraaid oetstokt, hou of dat tot 1945 der oet zain het. Wat nou Kerkenwieke hait, was vrouger n ziedtak van t Zieldaip. Aan weerszieden laip n smaal padje veur t volk en de scheepsjoagers. As t hail aarg modderg was, wuir doar stro over mieterd zodat t nog n beetje begoanboar was (kin je joe t indenken?). De schepen konden zodounde tot in t centrum kommen om te loaden en lözzen. Raint en Riekoa (Ol Ootje) van Koldam, dij der tegenover woonden, haren der n bult dievendoatsie aan. Veuraal Riekoa, dij de kwedel gain minuut stil ston! Zulf haren zai ook kinder, dij schipper wazzen en zodounde kon zai de mainste lu dij aanlegden wel. “Voar, doar komt Kier Diekhoes aanvoaren mit törf, hoalst mie dammeet even n koare vol?”
Zulf laip ze den alvast veuroet om bie te kwedeln mit Kier zien vraauw. Schippers wazzen de mobieltjes van dizze tied! t Duurde wat langer, mor zai haren koaren vol nijs!
“En waiten ie den wel …. dat Wia Buze heur moeke bie Ootje in bedstee geboren is?” Wia heur opa en opoe wazzen ook schipper. Zai lagen as t woare bie Ootje veur t hoes. Baaide vraauwlu stonden op wale te kwedeln, en dou kreeg vraauw Koeper (opoe Wia) aarge krampen in t lief.
“Kom gaauw mit in hoes!”, zee Ootje verschrikt. Veegde heur mit n nadde lappe over t gezicht en in d’nekke. “Komst wat bie?”
“Nee.”
“Kroep den mor even in d’bedstee. n Beetje rust en even van bainen òf is goud. Hier, nog n pepermuntje.” En zo is t kommen, Wia heur moeke wuir geboren.

“Woar gebeurd?”, wol ik waiten. “Joa wis! En Epie en Gradus, dou nog lutje jongs, vertelden in t dörp, dat ze der n zuske bie kregen haren! Doar was Ootje nait blied mit. Zai haar zulf al tiene!”
“En wait je den ook wel, dat tante Trien altied mooie klaidjes veur Wia muik, dou ze as lutje
wichtje mit zingen begonnen is?”

“Doar zit n schier verhoal in”, zee k soavends op bèr tegen moeke. En nou, op moandagmörn staait dat op pepier. n Voldoan gevuil bekropt mie en achternoa was t wiekenne toch nait zo graauw as t leek!

Op t moment is t nog oareg duuster en zunloos …. k Kin mie der nait drok om moaken. Zinloos wordt dizze dag zeker nait …. Dammeet biljarten in Nij Vredenhoven!

Net as Engel was ik dou gramnieteg, dat ze baauwlaand onder wotter zetten wollen. Hou kriegen ze t in de kop?
Engel en zien moaten protesteerden bie d’ingang en dailden pamfletten oet!
Oet gramnieteghaid schreef ik: ‘Guster n schiere dag had. Hou …? Bie d’opening van Blaauwe Stad. Oh, dat! t Was aal modderman!’
Wiebe van ‘Noord’ was d’ainegste op stevels.
d’Keunegin heurde ik zeggen: ‘Ik hoop, dat dit de laatste keer is, dat ik land onder water moet zetten!’ Net zo, docht ik. Blied, dat zai net zo docht. t Meer is mooi, mor t groan nog ‘meer’!

In de joaren zesteg was ik advertensie verkoper in Veendam-Muntendam e.o. d Olle ambachtschoule in Veendam was opholl n te bestoan en haar roemte moakt veur meubelzoak Intermeubel.

De directeur legde mie noa binnenkomst n poaginoagrode advertensie veur (dou ca Fl 800,-) en wol dei geern op d achterkaante van t kraante. Ik zag, dat der aal artiekels in stonden, dei je op dat moment an de stroatstain n nait kwiet konden en vertelde hom dat.

Hai ston der op, dat hai dat, ondanks mien betoog toch wol, woarop ik zee: Sorry, dat ken ik nait doun! En heb de advertensie nait mitnomen!

Beetje aigenwies het e dou mien voar beld en dei het hom ophoald… Ik dus de weke derop hoast nait noar hom tou…. Wat zol e wel nait van mie denken?

Stoa bie d winkeldeure nog eem stil en twiefelde…. wel? nait? Toch mor verdriesten!

Mit n lachend gezichte kwam e op mie oaf en langde mie d haand. Doe bist mien man! Op die ken ik aan! Oh? zee ik schoamelnd, Houzo? Doe was t messchain gain koopman veurege weke, mor wel gloepens eerliek!

k Heb der veur gain deubbeltje op verkocht!! Mor k was wel aigenwies!

Ja, ie ie hebben mien voar wel beld? Ja, en dei haar der wel belang bie…. Hai is koopman en dat is ook ja goud en…. logisch!

Doe sneest die eem in d vingers, mor wekdest mien vertrouwen. Ploats dizze poaginoa vanweke doarom mor! En zeg tegen dien voar, da k hom aarg waardeer, mor da k allend mit die dit soort zoaken regeln wil!

Ondanks dat mien voar de weke der veur nog pisseg op mie was, kreeg k nou n dikke pluum! Hai snabde mien besloet en dat gaf moud!

Bram, Eppo en Jantje speulden op Gasthoesloane … zagen zai bie Vredenhoven twij ooievoars op t nust! Mit heur drijen derop òf.

‘Ooievoars brengen popkes, hè,’ zee Jantje.
‘Joa,’ zeden d’jongs: ‘Zelve vroagen of zai ons ain brengen willen?’ Zai raipen in koor: ‘Ooievoar, willen ie ons n popke brengen?’ Thoes vertelden zai blied wat ze doan haren.
Bram zien moeke was nait enthousiast. ‘Hou konst dat nou doun? k Bin nog aal muide van mien pleuritis. Dat kin ja nait!’
Bram, zwoar onder d’indruk van moeke, runde weerom en raip: ‘Gainent bie ons brengen, heur! Moeke kin t nog nait aan!’
d’Ooievoars hebben goud luusterd: Eppo en Jantje kregen n zuske, mor Bram nait!’

(woargebeurd in Scheemde, optaikend van ‘Bram’ zien vraauw)

Wat is oorlog….! Tachteg joar noa de tweide wereldoorlog wordt der nog aal over schreem en over proat, opdat dat noeit weer zel gebeurn!. As ve nou trogge kieken, bliekt dat partie luu doar nait veul van begrepen hebben….. Op schouln leern kinder wel wat over oorloog n.

Zulfs dei van Batavieren, Romeinen, De Tachteg joarege en nog meer.

Den proat ve over oorloog n, woarbie doezenden minsken omkommen benn n.

Barboars, onminselk en nait te begriepen!

Anno nou zit ve doagelieks te kieken op tv en aandere moderne media hou of complete steden verwoest worden , luu vermoord, oethongerd en…. ie waiten t aal wel!

Nou ben ik n versloafde roker en perbaarn ze mie en mien partisanten mit kanker te besmetten!

Joa, eerlieks! Op de verpakking van alle rookwoar stait, dat der meer den 70 kankerverwekkende stoffen touvougd worden…… en sieren enge ploatjes de deuskes en puutjes om joe te stimuleern tot stoppen….

Om joe extroa te helpen, wil n ze (regeerns) joe ook nog wel helpen mit gigantische verhogens van de pries!

Geweldege luu toch?

Deur gainain wordt der proat over de gifstoffen, woaras je aan staarm kenn n!

Dat is gewoon legoal! Net as nog veul meer rommel, dei in vapes stopt worden en woarvan zegd wuir, dat je deur dei te smoken van t tabaksmoken oafkikken konden! (kreeg toustemmen van Den Hoag en is legoal)

De boeren, dei gif gebroeken worden flink aanpakt!

Of is dat aans? Kenn n zai ook deurgoan as der op heur produkten meld word, dat je der kanker van kriegen kenn n?

Miljounen worden der oetgeem om joe der oaf te kriegen? Hol mie der over op!

Kom op! Vandoage n artikel in t Dagblad: Duizenden kopen hun tabak in Duitsland!! Schade staatskas al ruim een miljard!!

De gebroeker is nait gek toch? Zulf tabak verbouwen zunder gif deden ze tachteg joar leden toch al!

Schienhaileghaid! Niks aans! De producenten nuim ik moardenoars en zai, dei toustemmen geem mitlopers! Niks aans as de broenhemden in 40-45!

Zo zai ik dat. Ie meugen der vanzulfs gerust aans over denken en mainen, dat ik t woord moardenoars nait broeken mag…den wil ik dat hier wel eempies verandern in poging tot moord! Houwel dat in mien ogen op t zulfde deelkomt…..?

Reageer groag, as je t mit mie ains of onains benn n.

B.v. DANK!

is uw euro een gulden waard!

k Mag der geern noar tou goan, de dunderdoags maart in Scheemde.

En dat t knipke aalgedureg troanen in d ogen het, ken ik ja nait helpen!

Goie woar en oareg lekkerder as van d Supermaart! Allent al d eerappels….

Gain blauwe of zaike plekken ! Gain gesmiet, zoas dat bie de Supers en de verloaders gebeurt.

En veuraal hail vrundelke luu in de kroamen. Dei waiten dat de klant nog wat weerd is.

Mor dat nait allent, ook de bekenden, dei je doar tegen kommen en eem mit kwedeln kenn n is mooi!

Der eem oet en n beetje maaljoagen vuilt ait goud!

Veurege weke trof k Kees… n Dikke proatjeboksem mit n golden haart!

Lopst ook al achter d schoefkare?

Joa, en dat gait oareg beter. Ik slinger as aine, dei veuls te veul op het en de oafstanden, dei k den loop lieken naarns meer op! Das ja nait zo moi zee e en zien gezichte kreeg noar zien lach opains n ernstege blik.

Ach, zeg ik: dat mout je gewoon acceptaarn he… zunder gebreken wordt ja gain minsk old!

Nee, dat wait ik mor aaltegoud… ben al n moal of wat onderoetgoan. -epilepsie!-

Hou wordt dat dameet mit gladden, glid e die nait overzied? Wait k nait. k broek hom nog nait zo laank!

Zel wel mitvaaln denk ik, k heb der net winterbanden om kregen!

Den overkomt die der niks! k Hoop dast hom gauw oetperbaarn kinst! Hahaha! Moi!

Op n ol fietse mout je t leern…

Dar was zo, mor dat is vandoage de dag wel eem anders!

Dou k n kwoajong van n joar of zesse was kreeg k mien eerste fietske, n deurtrapper!

Achter d schoule lag n lappe grond, woarvan t achterste stok zo n meter hoger was as t veurste.

Mit fietse an d haand laip ik in t begun noar schoule, kroop op t hoogste grondstok….

Bain over t zoadel en den noar beneden. Omdat t n deurtrapper was, mossen de baintjes mit in tronne en noa n haalf uur kon ik fietsen! Wat was k in de wolken!

Van d schoule noar hoes om votdoadelk moeke zain te loaten, hou goud ik t al kon!

k Haar n beste gang op de kette en draaide mit dezulfde gang dam op….

Doar ging t goud mis! Ons voar haar an baide kanten van dam n muurtje van zo n vatteg centimeter hoog metseld.

Ik vloog der mit n smak tegen aan an d linker kaande en smakde in d sloot!

Fietse boven op d kop en dou k mie der oet worstelde, t hoar vol kreuze!

Mien voar zien jongste zuster, dei op vesite was, kwam nait bie van t lachen. t Zel wel n bizunder gezicht west weesn?

Doar zag ik de lol noatuurlek nait van in!

Loater kreeg k voak de fietse van mien oldste bruir, woar ik maisttieden nait aarg bliede mit was… Oafdankertjes hè!

Op mien vieftiende kreeg k mien eerste nije! Wat n luxe! En wat kon ik doar haard mit!

Mit kameroaden noar Winschoot, d Laange stroate op en dele achter d vrauluu aan…

Om n uur of tiene noar hoes.. Bie garage Brons in Heiligerlee begon mien licht t roar te doun. Lawaai en aal mor flikkern!

Gauw eem der oaf en de dynamo van t rad!

In n mum der weer op en in n sprint trogge noar d jongs… Net dou k vlak achter heur zat, zwinken ze noar links en rechts…en ik…. Boem! Achterop n olle A-Ford mit n dicky-seat. Ik stoof deur de locht en lag boven op d kappe!

De chauffeur der oet en kieken, of e schoa haar… Gelokkeg nait! Ik kon weer deur….

n Poar moand loater opa en opoe op vesite…. Opa bekikt mien fietse en zegt: Wat is dat ding ja opjacht!

Holt joe stil! was mien schrik reactie, mor voar haar t al heurd en wol vot waiten, wat ik der mit oetspoukt haar..

Noa n haile reeks tweiwielers zunder, kochten mien laiverd en ik n joar of wat leden elk aine mit n accu.

k Was al n zetje poesteg en dat was n bult makkelker, haarn wie onnaierd.

En hou! Vot d eerste dag, dat ve ze broeken konden was t idee van moeke: Noordbrouk, Zuudbrouk, Muntendam in tronne? Kin dat? Ducht mie toch wel!

En inderdoad! Der ston n beste haarde wind, en ook nog op d borst op d laange weg noar Brouk…

Mit ain haand an t stuur vlogen wie mit achttien kilometer in t uur tegen de wind in!

As kinder zo blied, konden wie ons vreugde nait op! Dat is nog ais wat raip moeke en zai zette der nog n tandje bie!

In Zuudbrouk bie Kuper n poar worsten kopen vroug ik? Wat din, krigst honger?

Nee, t liekt mie lekker, dammeet in Muntendam eem op de hak en n stokje worst?

Doe dien zin! Mit twei frisse metworsten kwam ze noar boeten… k Heb ook vot mor n rolloade mitnomen veur zundag en Kuper dee der n schier stok leverworst bie!

Op n bankje veur t gemaintehoes lekker smikkeln…. Wat lekkere worst het dei man hè!

Noa n haalf uurtje en wat nostalgische proat van mie over mien tied in Muntendam zee moeke…

Nou wait ik t wel weer! Dat hest al wel doezend moal verteld!

Dat was ook zo, mor as k t over Muntendam haar, wuir k nait oet proat… Prachteg volk, mien mooiste stee woar ik ooit lopen heb.

k Hail mie stil en wie stapten weer op fietse. Achter Maiden langs , nait over de drokke Hoofdweg!

t Was al etenstied west, dus gauw n stoetje mit n kop kovvie en de pc aan om te kieken, of der nog aine wat stuurd haar.

Ook t mobieltje nog mor eem controleren… Och, nou kiek ais…. d luttje jong het zien eerste stapkes doan.. Wat mooi hè!

Ja, wie hebben t goud. n Hail schiere dag vandoage!

Joaren hevve genoten van onze elektrische fietsen! Tot en met mien viemtachtegste, dou heb k noa moal of wat onderoet besloten te stoppen. t Vallen ging nog, – aal in t gras! En… ainmoal in t Homdholstermeer!

k Wuir doarnoa wat schuddereg bie t opstappen en heb der mor n punt achter zet…

Klaindochter in Stad gait der nou op noar heur waark….scheelt 20 minuten opa! Dank je!

Elk noadail het zien veurdail!!

Mit de ziedwieltjes deraan kin klaainzeun Bram al n beetje fietsen. t Is zowied: hai is vare en gaait mit pa en moeke richten schoule om veur t eerst kennis te moaken mit de juf. ‘Hoi,’ zegt juf, ‘ik ben Ineke, hoe heet jij?’
‘Bram!’ En hai gaait geliek deur mit reveln: ‘Ik ben op de fiets, wil je hem even zien?’ ‘Ja hoor, graag!’
‘Oke! Moet je wel je jas aan doen, hoor!’ t Is ja kold boeten.

Wat kenn n wie nou ais bedenken, zee kameroad Be.

Zo nou en din bedochten wie wat en peraaierden dat oet.

Mit de scooter (n Heinkel) haarn we al perbaard hou haard of we deur n krappe bochte konden.

Onder t viaduct tussen Maiden en Muntendam stoo m wie mit viemtachteg deur de bochte…

De treeplaanke vonkte as n sliepmesjien! (Mooi he! schatterde Be. Dat komt omdat stoe mitgefst!)

n Weke noa t autorees n , in de tied van Nikkie Lauda, stoven wie mit de olle Kapitein van Zuudloaren noar Noordloaren. Het bandenwisseln leek ons super om ook ais oet te perbaarn..

Aalgedureg raip Be: Pitstop! Banden wisseln!

d Auto aan d kaante van d weg, krikke der onder en mor sleuteln! In n minuut of vaar/vief was de klus kloart!

t Ken nog gauwer zee Be. Dei vaar minuten mouten seconden worden!

Joa, dat hast docht vast!

Noa zo n vief pitstoppen haar ik t had. Wie stoppen der mit!

En nou zat ve te prakkezaarn. wat t volgende ,project’ worden mos…

Ik wait wel wat! Wadlopen! Dat wait ik nait heur…. Deur t sliek ploetern?

Noa n dag of wat noadenken en proaten kreeg e mie zowied.

Wie mossen veur de eerste tocht noar Paiterbuurn. Wadloopcentrum Diekstroa.

Eerst n soort proeftocht en den loater n complete.

Kerel man, wat ja n drokte! Zol aal dat volk mitlopen? t Was n uur of vieve en t Ploatske ston vol mit auto s!

Onze ploug was meer as 200 man. Apmoal lopend noar de diek en den t wotter in.

Dat was de bedoul n, mor t wuir oareg zwaart in d locht en de gids von t beter contact op te nemen mit Laiwoorden.

Heur advies: Nait wieder goan, der komt n zwoare bui aan mit onweer! Mit n kander zoveul meugelk onder aan diek liggen! Heb jij de sedomieter? n Beste regen! Met donder en bliksem! Bah, waar ben je begonnen? Ik vroeg me af.

Pas n uur loater weer in de bainen en t sliek in…. God nog an tou, wat n geploeter!

Elke bod joen vouten oet t klaai rieten! Dit is d eerste en d leste moal jeuzelde ik. t Kin joen dood ja wel worden!

Be vond t prachteg! Hai haar genogt conditie, ik veul minder.

Goud en wel op t wad vertelt de gids ook nog, dat ve der n treetje bie doun mouten omdat deur t oponthold nou ook de vloed n uur eerder opkommen zol! Heb je dat weer, ook nog runnen zeker! Bah!

Ankommen bie de boot, dei ons ophoalen zol, -net op tied!- Wie zagen t wotter rap omhoog kommen en wie as lesten stonden der al tot aan d scholders tou in! Poeh! Bienoa verzopen!?

Trogge in Paiterburen bie n bord soep en zuks wat zee Be: doe moust wat doun aan dien conditie!

Zal wel zee ik, mor k goa nait weer!

Be, n deurbieter het mie de weken dernoa goud bewaarkt mit as resultoat: de twaide!

En de…. en de… totdat we alle tochten had haarn!

Dank zij Be was k begund mit aal doage lopen. Eerst n rondje Scheemde en loater laip k hinneweer Winschoot!

t Het mie goud doan. Heb alle tochten oetlopen!

Mooie tochten en herinnerns! Wat n rust! En dat in Noord Nederland!

Achternoa slim blied da k deurzet heb! t Is naarns mooier en rusteger!

Der gait niks boven Grunn n!

P.S., Noa onze ,barre tocht’ wuir t aantal deelnaimers oareg inkrompen! Veuls te riskant mit zoveul volk tougeliek!!

Jan en Iepke waren nuigd deur heur buren. t Was op n waarme zummeroavend en dou ze dam op laipen, zag Jan dat buurvrouw de roamen wiedwoagen open stoan haar. Hai bedocht zok nait en greep mit glundernde ogies n schiere bloume van d’vensterbaanke. Buurvraauw haar heur al aankommen zain en ston in deure. Jan langde heur de bloume tou en mompelde, dat dij heur wel toukwam. ‘Och jong, dat is ja nait neudeg! Veuls te veul!’

Nait, da k n echte laifhebber ben van t Köningshoes…
Mor k dink, dat wie beter oet bennen mit n monarchie as mit n republiek?
Trouwes, wie hebben t ducht mie wel troffen mit onze Oranjefemilie!
Gain jiddelderij of zowat.
Je mouten der toch nait an dinken, dat wie aal vaar joar n nije president kaizen mouten en doar miljarden aan oetgeven!

Ook nait, dat k wat mit voetbal heb…!
k Mag t naait aanzain en nait aanheuren.
Net zo’n geldsmieterij! En dat nuimt men sport!

Nee, mien Oranje gevuil is boven kommen deur t dörp Oranje!
Wat n menselkhaid, wat n soamheureghaid!
Gain ego-gedou, mor omdinken, om luu, dij verjacht worden oet aigen laand.
t Zel joe mor gebeuren!
t Is vanzulfs nait aal aarmoud en verdrait, der zitten ook luu bie, dij aander bedoulens hebben!
Je mouten t wel realisties bekieken…
Mor 99,5 persent zit knap in de stront!

In Geldermalsen wuir t opvangen van 1500 zielen op 15000 inwobers n hail groot probleem… Doar gingen ze op voeste mit de overhaid…
Nait zunder resultoat… t gaait over! 10% was te veul!
Oranje kreeg 700 op honderdvatteg inwoners (500%!)
En… zol doar bovenop nog ais zeumhonderd kriegen!
Dat was ook doar teveul van t goie! En terecht!
Nait op de voeste, mor n börgmaister, dij achter zien volk ston en heldin Hilde, dij pontifikoal veur d auto van stoatssikketoares sprong!

Wat n gemainschapszin!

t Verhoal wil, dat Den Hoag docht, makkelk over n handje vol bewoners hín te walsen …
Mor doar was de krachtege soamheureghaid! Felesiteerd!!

Ook wuir der proat over n deal tussen Mark en Hennie…
Mie ducht: nait zo vrumd? t Gebauw van Oranjestad ston ja leeg!
En volgens Hennie was der roemte veur 1800 luu!
Mit zien Oranjestad haar e t dörp n dainst bewezen en nuuver op koarte zet.
Dat Mark hom tegemout kwam, nou t park sloten was, liekt mie doarom nait verkeerd?
De menaaier, woarop t goan is was slecht en bepoald nait sympatiek tegenover n gemainschop, dij al slim tougeefelk was!
Woar vind je dat?
t Woord misbroek was hier op zien ploats!! Nooit meer doun!!

As genougdounen organiseerde COA n gezoamelieke Kerstmiddag…
Vannijs stonden de 140 bewoners doar achter!
De financieren van dij dag was vanzulfs mor drupke op n gloeiende ploate…
mor wel n geboar dij noavolgen verdaint!

Soamheureghaid, doar gait t om!
En dat is der in Oranje as naarns aans!?

Veur mie reden tot veul respect, meer as veur t belaid van Den Hoag en COA!
Honderdvatteg lintjes van d köning zol hier messchain op zien ploats wezen, mor huift veur mie nait! Ik heb niks mit hokjeploatserij… Bah!
Trouwes worden zai den hoogoet ‘lid van Oranje Nassau’ terwiel Officier veur heur nog te leeg is!

k Ben nou in mien leven veur t eerst ‘Oranjefan!’ en dat vuilt goud!

In Veendam op de vergoadern van de handelsverainen wuir drok noadocht over de kommende winkelweek..

Elk joar hadden ze doar n aander idee onder welke titel dat gebeuren mos..

Aine van de aanwezegen stelde veur om nou es n titel van n buurland te broeken?

Bevubbeld: Die Deutsche Woche of De Engelse week….?

d Luu wazzen op n poar noa geliek enthousiast! En den apmoal de boord of snorre stoan loaten!?

Noa t stemmen bleek dat de maisten kozen veur de Engelse week…

Het leek heur wel schier om ook ais mit n boord of snorre rond te lopen, ducht mie?

Kloar! En wat wuir t n mooie winkelweek! In d etalages ain en aal Engelse pracht!

En ,bienoa’ alle middenstanders mit veul hoar om de kop en n bolhoudje op!

Veendam was hailndaal aans en dat hebben ze waiten….

De haile weke ontieglek veul volk op d bain…. oet alle windstreken! Super!

Omdat wie n filejoal haarn op Promenade 31, dee ons voar ook dapper mit!

Hai von t zo mooi, dat e n haalf joar loater nog ait n dikke grieze boord haar!

Moeke haar der mor n hekel aan en haar hom al voak n moal de road geem om dei nou mor ais oaf te scheern…

t Lokte heur nait! Totdat zai baide eem bie bruir op Promenade langs kwamen veur n proatje..

Der stapt n klant de winkel in. Hai zucht voar en zegt lachend: Ha! Paulus de Boskabouter!

Mis! Onderweegs noar hoes mos hai t wel tien moal aanheuren!: En nou gait e der oaf!!

t Is ja gain gezichte . Hest nou ja wel heurd, woar ze die veur aankieken…! Der oaf!!

En zo kwam ook veur hom t enne van de Engelse weke..

t Was in joaren viefteg, dat k ze kennen leerde.
Job en Martje.

Heur hoeske, nait aal te roem, ston aan raande van dörp.
Hai n luttje gedrongen kereltje en zai n potert van n wief.
Baide wazzen ze slim spierd.
Dat kon ook nait aans, zai dainden baide bie boer en in heur tied was dat ploetern en zwaiten. Smörgens om 6 uur der veur!
Zichten, binden, dórsen, vouers vlijen, baiten op aine zetten, plougen, eggen, cullien, ja, wat nait.
Job in de viefteg dee al mit vanoaf zien twaalfde, Martje haar eerst nog n poar joar hoesholdschoule doan om koken en naaien te leren.
Doar kon ze loater mit veuroet vonden heur ollen.

Zai hadden geliek. Veuraal dou t oorlog wuir, kwam Martje der goud mit oet.
Sokken stoppen, borstrokken braaien, boksems en hemden verstellen, nuim moar op. Mos aal noa t waark gebeuren.
Zundoags wuir der wozzen. Den zag je in t haile dorp waske op liene en op blaike.
Zeuven doage in t enne! Mout je nou ais om kommen!

Job nait minder. Noast 20 rou toene haar e nog vaaier koien en twij zwienen op t hok.
De vaaier koien veur de melk en de botter, ain zwien veur de slacht en d’aander veur t neudege geld.
Ondanks d’oorlog haren zai t goud. t Neudege was aaltied veurhanden.

In zessenvatteg wuir t oareg aans. Zai kregen n settel van belasten oet Winschoot: of zai even langs kommen wollen.
Job der hén, nait waitend, wat hom te wachten ston.
“Neemt u daar maar even plaats meneer”.
n Stief ketaaier loater: “U bent aan de beurt meneer”.
‘Wat ja bekakt’, docht Job, ‘nuimen mie aal meneer?’
“Gaat u zitten meneer” zee d’ambtenoar en dou kwam t.

“Wij kregen te horen, dat u koeien houdt?”
“Joa”.
“Wat doet u daarmee?”
“Vouern en melken vanzulfs”, zee Job.
In gedachten dochde: ‘bis t toch nait onneuzel?’
“Dat begrijp ik, maar wat doet u met het geld wat u voor de melk beurt?”
“Geld?”, koien geven gain geld!”
“Maar u verkoopt toch wel melk?”
“Nee!”
“U wilt me toch niet vertellen, dat u dat allemaal zelf nuttigt?”
“Nee, swienen kriegen der ook van”, zee Job, dij deur aal dat gevroag toch wel wat onrusteg wuir.
“Heeft u geen spaarbankboekje?”
“Wat is dat?” vruig Job dreuge.
“U weet niet wat een spaarbankboekje is?”
“Nee!”
Ambtenoar trok n loa open en huil Job n mooi zwaart boukje veur.
“Dit is een spaarbankboekje. Daar zet men geld op en dan krijgt men van de bank rente.”
“n Mooi boukje, hebben aarbaiders dij ook?”
“U kunt gaan meneer!” was t nog ainegste wat ambtenoar zee en Job het der nooit meer wat van heurd…

n Joar loater op n zundagmiddag zee e opains: “k Wil mie n plof kopen.”
“Woarveur?” wol Martje waiten.
“k Wor aal stiever en strammer en den huif k nait trappen”
“Wat kost zo’n ding wel nait? k vindt t nait neudeg” zee Martje mieterg.
“Haarm en Jantje en Gittje en Gerrit hebben ook aine en zai bennen der meroakels over te broeken” perbaarde Job t op n aander toer.
“Doe most t waiten, veur mie huift t nait”.

Kloar was t. Moandags sprong Job op fietse en n uur loater vloog e noar hoes, dit mos Martje votdoadlieks zain!
“Wat ja n dik ding!'”
n Zundapp mit drij versnellens, mit n dubbeld zoadel; “kinnen wie baide op.”
“Leufst toch nait…” sputterde Martje, moar Job haar hom al keerd en zee: “Nait baange wezen, stap op!”
“Martje bedocht zok nog ais, moar zai haar Gittje ook al bie Gerrit achterop zain en verdriestte zôk.
“Zits t goud? Hol mie moar omzied.”
Martje sluig d’aarms om hom tou en zee: “kloar!”

Job trapte hom aan, zedde hom in d’eerste, gaf gas en…
t Veurrad ging omhoog en PLOF!!!, doar lag t hail spul tegen t hoes.
“Hes t die zeer doan?” vruig Job benaauwd!
“Vaalt tou, moar zo kin t nait!”
“Nee, perbaar doe t ais.”
“Ik?, kons t wel nait wie wezen!”
“Ben ik ook nait, moar t liekt mie beter!”
Noa nog wat oarzeln bedocht ze zôk, stapte veur op en zee: “tou den moar”.
t Gong meroakel. Twijde versnellen haar ze in t begun nog wat muite mit, moar op trograaize haar ze alles goud in de smiezen.

Job haar der gain muite mit, dat e achterop zat. Ook nait as buren hom voak beschimpten as kwoajong bie moeke achter op plof.
Hai haar der vrede mit. t Was naist aans.
In stilte genoot e wel as n kwoajong!

Noa t lezen n van t overliedensbericht van achterneef Theo oet Roon (in t DvhN van 2 juli 2011) belanden je morzo weer in t verleden. En wat n verleden …!

Theo zien voar en mien voar haitten baaide Egbert (Ep) en wazzen volle neven. t Was de tied van de Twijde Wereldoorlog en wie woonden op körde òfstand van nkander. Baaide ‘Eppen’ haren zowat t zulfde noatuur: nait muilek doun en …. nogal wat roeg! Zodounde haren wie as kinder n bult vrijhaid en plezaar. As laifhebber van t boerenwaark was ik voak n moal op bezuik bie t keuterboertje en mog ik mit helpen heuen, eerappel kraben en mit honnekare achteroet om te melken.

In vievenvatteg, dou Theo geboren is, gaf zien voar toustemmen om twij grode poasbulten in zien gruinlaand te baauwen. Of t aan zien vraauw Oamelie heur zwangerschap lag, woaras Ep slim blied mit was, of de geruchten over d’aankommende bevraaiden is mie nait meer bekend. Wel, dat Ep ons goud oppeerdjede om meroakels grode bulten te moaken. En dat was vanzulfs nait tegen dovemansoren zegd. Mit n man of tiene, vieftien sleepten wie alles wat braanden wol aan en ontstonden der op t lest twij bulten van zo’n zeuven meter hoog! As wie n partij holt en takken vonden haren, dij wat te wied vot lagen om aan te slepen, kwam t peerd veur de woagen en brocht Ep persoonlek de ‘handel’ op de bulten!
Twijde poasdag soavends om n uur of aachte zol de fik der in. Wie haren t glad op d’heupen en wazzen nait van t laand òf te sloagen. Ep kwam volgens ons ook veuls te loat! t Zel wel nait vanzulfs, mor dat was onze spanning. Ging e mie ook nog eerst langs de walen (haar je in dij tied nog om zowat elk lapke graslaand in Drenthe) en mieterde doar wat op oet n jerrycan…? “Doe huifst de walen gain wotter geven … t gaait mörn ja regen”, grapte ain van ons voaders.
Endelk en aal was t den zowied: Hai stak n toppe stro in braand en laip noar d’eerste bult. In ain moal goud! n Steekvlam van wel n meter … Hou kon dat? Zo’n vatteg man in t ende: “Ep, wat was dat?”
Mor Ep steurde zok nait en was al onderwegens noar de twijde. Ook dat lukte in ain moal: Sjonge, wat n vuurzee en wat was dat hait!

“Nait te dicht bie jongs, da’s te link, dammeet stoan ie zulf in de braand!”
“Wat wil e nou den?”, vruigen wie ons òf, dou hai mit grode stappen noar d’raande van t laand laip. Mit in baaide handen n dik bos stro stevelde hai noar n stroekebos, stak baaide strobozzen in braand en laip zo mit twij fakkels rond t laand en stak aal t stroekgewas in de fik. Ale bezuikers keken zok d’ogen oet. Wat n vuurzee! Te mooi om woar te wezen … mor tougelieks ook wel n beetje baange! Nait zo slim vanzulfs as dou de V1’s achter t hoes in de bozzen dele kwamen, mor toch … Ep gnivvelde wat en vertelde loater, dat hai ‘mit t oog op …’ n partij benzine en wat vlèzzen Fladderak bewoard haar. n Prachtfeest, dij wie ons nog goud heugen, Veur Ep was de geboorte doar achteraan van zien zeun Theo vanzulfs nog mooier, mor doar haren wie kwoajongs gain wait van.

n Nog groter feest veur mie persoonlek was de bevraaiden… Wat n ainhaid onder de lu! Theo was dou nog nait geboren. En nou, 2 juli 2011, zo’n vievenzesteg joar loater, lees ik t overliedensbericht van Theo … t Leven is nait enkeld vreugde.
Mor Poaske blift wel n fees

In herinnern aan Theo zien bruier Geesinus van Zonneveld, dij lestdoags oet tied kommen is.

Hou wor je miljonair … Gebroek moaken van t coronavirus? Kin! Deur joe as christen veur te doun en ‘kammeroaden’ dij mitspeulen. Negen miljoun ‘verdainen’ aan rommel is nait elk geven. Syvert wel! Mor wat t woord ‘christelk’ inholdt, het e gain keze van eten.

dut verkopen!!!

Dei de jeugd het. het de toukomst!

Onder dat mom wordt de jeugd aal mor weer happeg moakt op n dikke bankrekening.

De Nederlandse regeern veurop mit: moak kans op miljounen’ .Meerdere meugelkheden om an mit te doun!

In Grunnen will n ze dat t Casino in Stad blift omreden dat dat n gezelleg en ontspannen bezeghaid is……?

Wel zetten ze in heur rekloame: Stop op tijd!

Den heb k t nog nait had over de mobieltjes. Al om n uur of haalf zeum gait dat ding piepen en melden zai zok mit n nije game….!

En mor jeuzeln over de jeugd van tegenwoordeg!

Bah! roup ik den: Hol doar toch mit op! Ie moaken ze ja hailndaal kapot!

t Is ja net of je aans nait meer gelokkig weesn kennen as mit veul, hail veul geld….

In de artiestenwereld, voetbal of autorezerei, het moakt nait oet: ie kenn n der schat-hemeltjeriek mit worden.

Woarom zol je den noar de super goan om vakken te vullen?

Zulf heb k der ook wel gebroek van moakt, mor ben nog aal gain miljonair!

As advertensie-verkoper wos k ook wel van wanten. In de joaren zeumteg/tachteg moggen neerndounden nait eerder mit oproemen

adverteern veur n deur de regeern vastgestelde doatum….. Partie zoaken zaten te popeln om der as eerste bie te wees n, mor

t mog ja nait! Den vroug ik: Hou wied woon je van d toorn oaf?

Ik denk zo n vatteg meter? Nou zee k den: Den zet ve in joen advertensie: OP RUIM veertig meter van d Winschoter toorn, koop je

de mooiste en beste meubels voor een prikkie!

Anno 2000 is t nog veul gekker worden! Psiegologen en aander experts worden inschoakeld om oet te zuiken hou of de harsens van t volk waarken

en speul n doar op in! Te gek veur woorden, mor t waarkt super! Veur niks is der aal oavends nait de zulfde rekloame op tillevisie!

Herhalen doet verkopen!

C en A is toch voordeliger! Was joaren laank n topper… En vandoage de dag lopt dei van t Kruidvat as n train!

steeds verrassend, altijd voordelig! Kort mor krachtig en t leste woord lokt ze veuraal noar de winkel!

Manske Mulder op Troanendalloane in Westerlei haar n grode partij gasmaskers en overleemspaketten van ,Struyk’ veur n schijntje op de

kop tikt en wol dat geern verkopen: Moust mie der mor eem n mooie advertensie van moaken….. t Mag wel wat groter as aans!

Wie hebben t waiten! In n mum van tied was e de rommel kwiet! Zulfs an journalisten! En tv Noord wol waiten of hai echt docht, dat

Sadam Hoessein n oorlog begunn n zol?

Ik haar noamelek n tekst bedocht van: Laat Sadam Hoessein maar komen! Wij zijn er klaar voor! Gasmaskers en voedsel pakketten

voor een zachte prijs! Op=Op!

Oldern, mor veuraal de jeugd is slim gevuileg veur dit soort slogans en doar mag ons Intelligente kabnet wel ais wat tegen doun!

Der is vast nog wel wat te bedenken om veuraal de jeugd op aander spoorn te zetten inploats van hebzucht en smakken geld te promoten!

De criminaliteit geft ook de minder loze luu meugelkheden om riek te worden…. Doarom zai je op tv en aander media aal doage

de veule overvallen, plofkroaken en doodstekerij en nijs over geestelk verstoorde luu ! STOPPEN! NOU!!

Ènde joaren negenteg kwam bie ons de gedachte op, dat verhoezen meschain n optie wezen kon, om van aal dat waark rondom t hoes òf te kommen. n Beetje kaalmer aan leek ons schier tou.
“Den begun alvast mor om dien rommel op te roemen”, opperde moeke.
“Houzo? Zoveul is dat toch nait?” “Nou, kiek mor ais goud om die tou! Doe hest wat bie nkander zōcht in dij 25 joar, dat wie hier wonen.”

Aanderdoags heb k vot mor heur road opvolgd en bin k van boven noar beneden t haile hoes deurkommen ….. Tjonge, dat haar k nait docht! Wat n verzoameln! Woar loat ik dat, as t zowied is, dat wie hier vot goan?
Zundags derop, wazzen kinder op bezuik mit heur twij dochters.
“Op kare mietern en noar rommelmaart”, gaf mien dochter heur mainen. “Mogen wij dan ook mee opa? Wij willen ook graag wat speelgoed, knuffels en zo verkopen.” Dat muik mie enthousiast … mit mien baaide oogappeltjes n dag oet. “Dat douve!’

n Week of wat loater wuir k moand om ais wat op te schaiten. Mien dochter haar t wel had mit dij deuzen vol rommel, dij d’wichter kloar zet haren: “Wanneer bist zowied? Ze stoan mie al n zetje in d’wege!”
“Aander weekend mor den? Den mout je der wel vroug oet, want wie mouten der om n uur of zeuven al wezen!”
“Waar gaan we heen dan? Heb je al iets opgezocht?”
“Joa, van der Valk Zuudbrouk, dat is t dichtste bie.”
Zai wollen laiver wieder vot, mor ik hail pode stief: “Zuudbrouk!”

“Waar moeten wij nou zitten opa?” Noast n aanhanger vol, haar k d’auto ook oareg nuver vol staauwd en dat ontging heur nait. “Aine op veurbaanke en d’aander ken doar nog net tussen?”, zee k vroagend. k Haar zulf ook mien twievels, of dat nog meugelk was! Mor t ging gelokkeg goud. Zai wurmde zok tussen de voelnisputen en de deuzen en doar scheet t hen. “Is Zuidbroek ver weg?”, wol d’lutje achterin nog waiten.
“Nee hoor, 10 minuten rijden.” Bie de Eurohal was t oareg rusteg … n Stok of zeuven handeloaren veur mie. “Nait te roem vandoage?’ wol k waiten van de man, woaras ik t stoageld aan betoalen mos.
“Komt nog wel”, zee e. En hai kon t ja waiten!
Mit t haile spul konden wie zo de hal in tufken. “Woar mag ik stoan?”, was mien vroag aan n mitwaarker.
“Moakt nait oet, zuik joa mor n mooi stee op.
Roemte zat!”

Inderdoad, de haile hal was nog bienoa beschikboar. “Opa denkt niet, dat we veel zullen verkopen, te weinig standhouders”, opperde ik aan mien klaaindochters. Tegen half negen haren wie d’boudel kompleet oetstald en ik mout zeggen, da’k dat redelk mooi doan haar. Alles was goud zichtboar en alles was priesd. Kinder nog n poar aanwiezens geven over de menaaier, hou of ze heur woar aanpriezen mozzen en zukswat en de kopers konden kommen. Dat duurde nait laank.

“Wat wilst doar geern veur beuren?”, vroug d’eerste klant en hai wees op de deuze autobloaden.
“Hail geern n beste prane geld! Mor om dastoe t bist gefst mie mor 60 gulden.”
“Doe waist ook wel wat ofst beuren wilst. Vatteg!” “Hest der al even inkeken den? Der binnen bloaden bie oet de joaren viefteg!” “Vievenvatteg den!’
“En dat Solex-blikje?”
“Dat is n haile olle! Vroagen ze vatteg gulden veur”, plaasde ik. “Kist hom mitnemen veur twinteg. En deuze bloaden der bie, den gefst 75.” “Ik kom dammet wel weer, hol t nog mor even vast.” n Ketaaier loater was e der inderdoad weer en langde mie 75,- tou!
“Dat was wel veel geld toch?”, wol de oldste klaaindochter waiten. “Ja, maar hij had het er graag voor over hè?”
“En ik heb die grote beer, die oma gemaakt heeft ook al verkocht,” vertelde d’lutjeste: “voor 6 gulden! Is dat genoeg opa?”
“Ja hoor, leuk prijsje.”

t Was haalf tiene. Der was al wel wat reuring, wat t pebliek betreft, mor de hal bleef wieders oareg leeg. Inmiddels wazzen der twij kooplu trogge kommen en mien autobloaden en Solex-blikje haar k verkocht. Dou k in t rondte keek, zag k al meer lege plekken. Veur de wizzeghaid even tellen … Deksels, al veur roem twijhonderd gulden kwiet! “k Heb al n schiere stuver beurd”, zee k tegen buurman.
“Joa, ik ook. Ben al meer as d’helfte kwiet en t pebliek mout nog kommen.”
“Haar k nait op rekend! t Is ja net n bos zunder bomen.”
“Joa, t schient overal rommelmaart te wezen. Mor ik bin al tevreden.”
“Mogen wij wel even met de rolstoel spelen opa?”
“Joa heur, roemte zat. Goat joen gang!” Asof ze op t circuit in Zandvoort wazzen, zo stoven ze deur de hal! Lutjeste in d’stoule en d’oldste der achter. Gain mensk, dij last van heur haar.

“Moi Tammo!”, raip k, dou k n olle klant van mie lopen zag.
“Ik zai t nait! Zet dij pedde mor eerst ais van de kop!”
“Och laive tied! Bistoe dat? Bist al zowied zakt, dast hier nou stoan moust?” Hai kwam oet Muntendam en ik ging aal moandoagen bie hom langs veur n advertensie. Zowel hai as zien vraauw zaten nait lekker in heur hoed. Hai was opgeven, vertelde hai mie. Prostaatkanker mit oetzaaiens.

“Meneer Mooi!”, heurde ik n vraauw roupen:
“Meneer Mooi!” k Haar d’pedde van Derk Bosscher weer op kop en dou k overzied keek zee ze: “Ja, U! Meneer.
Mooi! Wat kost dit beeldje?”
“Veur joe 7 gulden.”
“Wat zegt U?”
“Zeven gulden mevrouw enne … dat wat op mijn pet staat, betekent geen mooi, maar MOI! En dat betekent ‘goedendag’, ‘tot ziens’, ‘hoe gaat ie’ en nog veel meer!”
“Ik geef vijf”, was heur ofpingelproatje.
“Geluk mevrouw en veel plezier der mee.”
“n Schier beeldje hè?”
“Wat zegt U?”
“n Prachtig beeldje.”
“Ja, enig!”
“Ben je nait aan bekocht, ducht mie.”
“Wat zegt U?”
“Dat je een mooie koop hebt gedaan. Moi!” “Ja, ook mooi.” En doar huppelde zai hin. Of ze t begrepen het? k Wait t nait. Muik mie ook niks oet … Soam haren mien twij klaaindochters en ik n buutse vol geld en wazzen wie n bult rommel kwiet! Doar ging t om.

Begun zesteger joaren van de veurege aiw, tiedens t Schǖtzenfest in Metjendorf, kregen Henk
en ik t plan om vattien doage op vekansie te goan. Hai zol de proviand regeln en ik n auto…
Dat was rap rond! Dou k mit Be en Kootje noar de TT-nacht in Azzen ging, kwam de vroag van
mie of ik van d’jongs aine huren kon. Gain probleem: ‘Kinst de Ford wel mitnemen veur hon-
derd gulden!’
t Klonk mie as meziek in d’oren! n Roeme 6- of 8- cilinder mit n mooie ronde kont! In de kleur zo as Henri Ford ze oetgaf… zwaart! t Verhoal over Ford ging dou, dat je ale kleuren kriegen konden, as t mor zwaart was!
n Prachtege tied! Men keek lang nait zo naauw as tegenswoordeg! Banden glad? Den luit je ze
covern of opsnieden! Rieden mor weer!
Dou wie t zo wied haren en ik de bolide ophuil, haar Ko n grijns op t gezichte van d’smoel tot aan d’oren.
‘Wat staaist te grijnzen?’, vroug ik.
‘Doar komst loater wel achter’, was t antwoord.
Inderdoad, hai loog nait. Noa roem honderd kilometer in Duutsland begon d’ol juvver wat zwoar te sturen.
‘k Denk, da’k n lekke baand heb’, zee k tegen mien moat en stopte. Inderdoad! Twij banden
wazzen haalf leeg! ‘Bie n Tankstelle mor voljoagen’, opperde ik. Noa n ketaar was t regelt. Hai
stuurde weer as nij. Vot mit de geit! Veur ons gain enkel probleem, dat wie aalgedureg (elke 50
-100 km) bievullen mozzen. ‘Dat was t, woarom hai zo grijnsde’, zee k. Alle vaar banden bleken der last van te hebben! Noa d’eerste nacht was mie dat goud duudelk. Eerst noar d’pompe veur de banden en den… rieden mor weer!
Bie de Bodensee in Bregenz wuir t kaantje boord. Wie wazzen mit n koabelboane de baargen op goan en gingen loater lopend trogge. Dit, omreden dat t mie t te link was mit de koabelboan. De kebine was zo groot as n roeme keuken en haar ploats veur 15 lu!
Aal mit aal n wazzen wie doardeur n oareg tiedje onderwegens. Henk wol eerst wat eten en opende de kovverbakke al om de doagelkse kost (broodje tomaat mit roombotter en sandwichspread) te smeern.
‘Eerst gaauw noar n pompe’, zee ik paniekereg. ‘Kiek ais noar de slovven! Alle vaar binnen ja sikkom leeg!’ As de weerlicht joug ik noar de eerste de beste Tankstelle en pompde de banden vol. ‘Net op tied! Nou mor n stoetje!’ En Henk opende de provisiekaaste al…
Loater in Zwitserland haren wie minder gelok. In Reutlingen wat rondreden, op zuik noar n schiere bar, dij naarns te vinden was. Op n duur beland op n kampeerterraain woaras t der goud heer ging aan de bar. Walti Plǖsz, zo zat as n zwien, nuigde ons om bie hom thoes ‘Hase zu essen!’ ‘Wat dat wel wezen mag?’, zee Henk.
‘Wat kin t verrekken, mit!’, zee ik en in de Ford tuften wie richten zien hoes. n Schier optrekje. Aanplaaisterd mit gelege kaalke. Beneden, woaras wie noar binnen kwamen, haar e n dele mit knienehokken. Trappen omhoog haren ze heur woongedailte. Zien vraauw, wakker worden van ons lawaai, muik gaauw n grode kane vol koffie. Walti stoof mit zien doene kont trappen weer noar omdele en raip even loater Henk om hom te helpen. Bleek, dat e n kniene an t slachten was (hai haar ons ja nuigd om Hase zu essen)! Om vaar uur aan de bak om Suppe zu essen! Henk zat der mit n verwrongen gezichte bie en kon sikkom gain hap eten. Hai zag aal mor dij mooie knieneogies. t Wuir riekelk loat en aanderdoags was t roem elf uur veurdat wie d’ogen opslougen. Walti was om zes uur noar zien waark (Bobstdrokker) goan en haar zien vrauw op t haarte drokt, dat hai nog òfschaid van ons nemen wol: ‘Du läßt Sie nicht gehen!’ Tegen vaar uur zol e thoeskommen. Tussentieds kregen wie van t olske n lekkere waarme hap, knieneboutjes, en docht ik opains aan de Ford. ‘Verrek, de banden’, schrok ik en stoof noar boeten. Alle vaar leeg! Gelokkeg was der op n poar honderd meter òfstand n lutje Tankstelle en doar konden ze de banden wel lappen! Tegen zes uur namen wie òfschaaid en startten n nij oaventuur.

n Poar doage loater in Stuttgart, d’auto in t centrum stald en op zuik noar n schiere gelegenhaid. Henk bleek n neuze te hebben veur klasse en zo kwam t, dat wie noa n uur zuiken de Kőnigshof in strompelden. De portier gaf aan, dat t vol was, mor Henk kreeg t kloar om mit n schiere smoes noar binnen te kommen. Wie keken ons d’ogen oet! Sjeiken mit mooie stoten… (nait letterliek vanzulfs). Echte sjeiken, mit tulbanden op kop! Internatsjenoal!
‘Nou mouten wie eerst de boas vinden, t is hier nogal priezeg’, docht Henk haardop. ‘Loat n wie mor vot goan, n pilske viefenhaalve maark!’, zee ik schieterg.
Via n ober contact mit de grode boas! Henk roemde hom in alle stoaten! En haar geliek n schiere binnenkomst. ‘Wunderbar!’, zee e mit n smile van hier tot Tokio, dou meneer zok veurstelde as Herr Kőnig.
‘Kőnigshof an der Kőnigstraße und Herr Kőnig! Wie will man es besser haben?’ d’Kerel stonk der vot in! Wie kregen zien koartje en achterop schreef e 50%! Dat huil in, dat wie veur elke verteren d’helfte van de pries betoalden. Tot daip in de mőrn keken wie ons d ogen oet! De Ford hadden wie tussentieds ophoald en veur Kőnigshof parkeerd. Dat gaf nog n spektoakel, dou wie der instapten. Twij smeressen, dij ons waggeln zagen, sommeerden ons: ‘Nicht fahren!’ ‘Nein, machen wir nicht. Wir gehen schlafen!’, en vlijden ons laankoet op de veur- en achterbaanke.
Was schienboar gain probleem. Zai gingen heur weegs en laiten ons mit rust! n Poar doage loater leverde ik de Ford in bie Kootje. ‘En.., hou ging t?’, vroug e mit n grijns.
‘Best’, zee ik en langde hom 90 gulden tou. ‘n
Tientje der òf veur t banden lappen!’ ‘Wie kwammen mit dij lekke slovven tot in Zwitserland!’, Hai trok n smoel as n schietemmer mor ging, as n echte kammeroad, akkoord mit n tientje minder.

Gelukkeg is t vandoage de dag beter steld mit de vaaileghaid, mor t oaventuur van dou haar k nait geern missen wilt!

t Was weer eem op tanden biet n, oaflopen weke…

Roner maark!

Vanoaf ons jeugd mit besmet. As kwoajongs oo tied bie d weg (Leik-Roon) en kieken noar dei laange riegen boeren, dei mit heur peerden noar Roon gingen…

Wie keken ons d ogen oet! En dou ve wat older wazzen, gingen wie mit voar en moeke der noar tou.

Bienoa n leem laank elk joar t Roner maark-feest! Dou ve in achtenvatteg noar Scheemde verhoesden wuir de traditie deur zet…

d Ol luu en d jongs oafzunderlek. En loater allend Voar en zien vaar knuppels.

Bie de start wuir oafsproken wel rieden mos. De aandern konden den n pilsje pakken..

Ons voar was wied en zied bekend en wie mossen hom voak moanen om deur te lopen, as e weer ais n bekende tegen kwam.

En dat wazzen der nog al wat! k Heb ze aal nuigd om bie van der Molen n bord soep te eten zee e den smeigelnd!

En, -ie kenn n t leum of nait- Ze wazzen der apmoal!

Ik herinner mie nog, dat wie achter in de zoal zaten . Van der Molen haar t specioal veur ons indailt… (haar d ol mit hom n akkoartje?)

Zo n twinteg man haar n n stee, woaras gain ober kommen kon. As dei langs kwam wuir t bie de eersten op toafel zet en schoven dei t deur noar achtern.

Kommen der op n geem moment twei Heilsoldoaten in… n Oldere en n jong wichie…

Ik griep de pette van voar en raip: Apmoal geern n biedroage veur t Leger des Heils!

Elk gooide der n haand vol in, mor n stoere bink nait. Kom op zee k: schokken! Gain sjoege!

Noa veul aandringen: Oke, mor den wil ik n handtaiken van dat wichie op bille!

t Kind kreeg der n kleur van en waigerde… Geliek haar ze!

Den geef k ook niks!

Dat von d oldste hailsodoat ook moe niks en zai opperde: als ik die handtekening zet, is dat ook goed?

De bink sputterde nog wat, mor ging der in mit.. Boksem noar beneden, n grode handtaiken mit n viltstifte en..langde t wiefke n joet tou! (n Joet was n tientje!)!

Dei dag bin ve nait wieder kommen as van der Molen.. De maiste soepeters haarn hom nuver om..

Wie goan noar hoes zee bruir, dei d hail dag koffie en limenoade dronken haar. k Ben der broert van!!

Nog eem pissen zee ik. Bie t toilet raip n olle vrijgezel: Wel wait woar mien bruir is? Wel wait woar mien bruir is?

Hol die de kop toch zee zien buurman; k stoa ja noast die!

En al was dit n verhoal oet n ver verleden…

k Was vannijs nog eem op Roner Maark!

Nog duf in de kop van n zwoare sloap, pak ik mien olle sporttasse en racket om dammeet noar d sporthal te goan…
Tegen haalf negen komt moeke d koamer in en vragt verboasd: “wat wist doe nou den?”
“t Is toch dinsdag? Den mout ik ja badmintonnen!”
“Ach man, vuil die ais veur de kop… Dat is ja al stopt in 2020!”
“Oh, is dat al zo lang over? Joa, den wor ik wel haard minder he!”

Smiddoags vertelt ze luttje Bram (al weer 36!) hou dom opa was…
“Wol noar d sporthal om te badmintonnen!”
“Wat is dat?”
“Waist dat nait meer? Doust doe viefe wast ging st ja wel ais mit dien pappe en opa mit!”
d Jong kraabt zok achter d oren, mor komt der nait oet.
“Den slougen ze n pluumke over t net!”
“Oh… nou begint het mij te dagen!
Ja, dat vond ik leuk… maar ook erg stom!
Veel te vaak bukken, om dat pluimpje van de grond te pakken!
Niks aan toch!”

Opa: “Nee, veur joe nait! Mor veur ons was t elke weke n oetje, woaraan wie veul plezaaier beleefden!
Ik wil nait zeggen, dat t leven van nou niks meer is, mor wie hadden vrouger veul meer sosjoale kontakten en… meer omkieken!”

Joa, tieden verandern en t verleden komt noeit weer…

k Mos der guster even an denken, hou of t mit datteg joar weden zol?
Wuir de leste sport bedreven in 2020? Of is dat te zwoar op d haand?
Oafwachten mor!
Staarkte mit n kander!

Van d’weke kwam Christy weer ais langs. “Wie kriegen veziede”, zee moeke. Zai ston veur t venster en haar al zain, dat ze noar ons deure laip.
“Schier ja, kom der mor gaauw in!”, raip ik blied deur d’intercom. Even loater, onder d’kovvie zaten wie al gaauw weer in t verleden, dou zai bie ons in drokkerij as mesienezetster aansteld was.
(Joaren zesteg!)

Elke bod as wie n kander zain, kommen der nije anekdotes veurbie. Zo ook nou. Veur t eerst heurde ik over heur avances mit heur grode laifde….. “Wie gingen voak n moal soamen noar Schützenfesten hè!”, laagde ze. “Wie?”, vroug ik verboasd. k Wos doar ja niks meer van! Olderdom vast?
“Joa, waist dat nait meer?” En heur oogjes glommen as dij van n jonge maaid van achttien! Herinnerns doun leven! “Joa, ik haar scharrelderij mit Joke en doar wazzen d’ollen nait blied mit. Niks op hom tegen, mor ik was ja nog veuls te jonk!” “Doe haarst t voak over dien oetspattens T mit n jong oet Ulsde? …noar Duutsland.”
“Joa, verdold: Henk! Henk Hindriks! Dij wos persies, woaras wie sweekends hen mozzen! Nou, dat muik ons nijsgiereg. ‘t Aankommend weekend ook mor ais kieken, wat dat inholdt?’ En wie genoten al van de gedachte, dat wie weer bie nkander wezen zollen. ‘Ik goa wel richten Kerkloane, hoal mie doar mor òf.’ ‘Woar gaait t noartou?’, wol mien voar waiten. ‘Ik goa mit Klaas en Hillie noar Duutsland’, loog ik.
‘Kiek mor oet! Woarom doar haile?’ ‘Klaas het t aaid over Schützenfesten en dat wil k ook wel ais beleven.’

Zunne scheen volop en ik genoot mit volle teugen achterop de motor. k Zat stief tegen hom aan! Vlinders in t lief! En wat was t n mooi feest. k Hol ook van dat hoempa gedou. En wat n bier! t Kon nait op! Aal van dij grote potten, hou kregen zai t der in. Loater nog even over d’kermis, woaras Joke nog twij mooie beeldjes veur mie schoot. Dij heb k nog aaid. Ze stoan op t nachtkastje bie t bèrre. Aal oavends as k der noar kiek, bin k nog weer even op t Schützenfest. Dou k thoes kwam wol voar vot direkt waiten, hou of k doar aan kwam. ‘Het Klaas veur mie schoten’, loog ik …..” “Dat hest mie ja nooit verteld …… en k heb ze ook ja nog nooit zain! En nog wel zulf veur die schoten!” “Krigst ze ook nait te zain! Zo as ik zee: zai stoan op t nachtkastje in sloapkoamer. En doar wil k die nait hebben!” Heur oogjes glommen. Dat dee mie deugd.
Dou ze op hoes aan ging was t al roem noa etenstied! ‘Mooi hè?”, zee k tegen moeke. “Zo spontoan even langs kommen en soam olle herinnerns ophoalen!”
“Hest nog n schier 3D-koartje? Zai is zundag joareg en moandag noar t zaikenhoes veur n nije knije! Dat logt der nait om!”
“Dat ducht mie! En over n poar doage mout zai zok mor weer redden …….Allaint, Joke is al n joar of wat oet tied, n staark wicht! Moust t koartje vraidag nait vergeten te posten!”

“Veur de wizzeghaid zel k heur zundag op tied ook nog n mailtje sturen!”

Wie hebben weer genoten!

t Is mor n noam, mor wat ken zo n noam joe wat te doun moaken!

Mien zwoager hait Hubertus, Jacobus Maria (roupnoam BEN)

n Haile beste man, en al woont e twei honderd kilometer bie ons vot, ik kom hom doaglieks tegen!

BEN eem noar Jumbo, moakst doe alvast kovvie? As ik den weer thoes BEN, kinve lekker op t balkon n bakkie drinken!

Joa, as k den nog thoes BEN, dou k dat wel eem…. Ol wief der bie?

Is goud, k BEN der zo weer want k huif mor n poar bosschoppen hebben!

Noa t eerste kopke: k Wil nou eerst eem BEN en Rika bell n, BEN is al n poar doage nait fris!

Dou wast zegst, den logst nait!

Den goa ik eem noar beneden, k BEN guster vergeten wat of k oet de berging hoalen wol, nou wait ik t weer. t Is mor eem, k BEN zo weer trogge!

Ie maggen t leum of nait, mor mien veurnoam heur ik nog amper!

Is ook ja hail gewoon Klaas! Mor wat is BEN den wel? Dat BEN nen ja mor drei letters…

Toch mout ik aaldoage tig keer BEN heurn! k BEN nait jaloers, mor k wor der sums wel n beetje weemoudeg van!

Nou was k net n zetje allend in hoes, zet de kiekkaaste an en t eerste wa k zai: BEN, Simply de Best!

k Heb t nou wel eem had… k BEN t bie luttjen aan zat!!

Dat was ik noa t leesn van Jan Boer zien verhoaltje over n Barmhartige Muntendammer!

k Heb t aait al zegt: Mien mooiste ploatse woaras ik zoaken doan heb is Muntendam.

Noeit zeiken over de pries van n advertensie, noeit hoatdroagend en aait hail sosioal.

Wel zeggen woar t op stait, as heur wat nait aanston, dat wel! En recht veur de roap!

Duudelk en kloar . En noeit ain woord der weer an besteden, as je t begrepen haarn.

Pracht luu. In mien verhoaltje ,Bie Manske heur je nog ais wat’ kreeg ik n verhoal te heurn, dei

mie nog aait bezeg holt. Egyptische Zigeuners strieken deel in Heilegerlee..

Dou ik t moandag op Dideldom las, docht ik vot ,Dat is n Muntendammer!’ ken nait aans.

Dei domie en ,broeder’ zell n wel Veendammers west hebben?

En baide zwoar geleuveg? Vot doadelk van oordail, dat de man in kwestie wel n zundoar weesn zol en… nait aal zundoagen noar d kerke ging!

Van dat soort luu wor ik slim rebelsk! En omdak mit zoksen voaker in de clinch lig, heb k der veul muite mit!

Tuurlek zitten doar ook wel haile goi n tussen en dei luu meugen bie mie ait n bakje leut hoalen…

Nou hoop ik nait, dat je mie zain as n ongeleuvege Thomas, want dat is nait zo!

Ik leuf ook echt wel, al is t op n aander menaar… IK LEUF IN MUNTENDAMMERS!

En as dat zigeuners benn n is t mie ook goud!

‘Vrouger … vrouger …’ n Schier verske, dij wie voak mit nkander zongen en dij bie t older worden weer op joen haarde schief noar boven komt … t Was 1960 en ik was net weer wat hersteld van zes weke geelzucht. Nog wit om de kop as n liek, ging k veur t eerst weer ais op stap mit Bé.

‘Woar wilst hin? Beijering, Struvee, t Kraaienust? Zeg t mor!’

‘t Kraaienust liekt mie wel schier, n tied nait west.’ n Danskefee op poalen an t Schildmeer, prachtege lokoatsie. En, nait te verwoarlozen: over t algemain wel schiere wichter. Was ook belangriek! Paartie lu zeggen, dat joen leven al oetstippeld is. Mien aigenwieze hazzens wollen doar noeit van waiten. Gelok, ie mouten gelok in t leven hebben!

En ik mout zeggen, dat k dij oavend goud wat gelok had heb. Ie maggen der om mie wel aans over denken. k Vroug n wichtje te dansen en dat lokte. d’Haile oavend bivve mit nkander optrokken en ik haar wel t idee, dat t tussen ons echt wel klikte. Onderwegens noar Nij-Scheemde in d’Opel – heur fietse in d’kovverbakke – hebben wie hail wat òfproat. Bie d’achterdeure kreeg k zulfs n kuske! En wie spraken ook vot òf veur t aander weekend. Hailendaal in de roze wolken, heb k van Nij Scheemde noar hoes oet volle borst zongen. Wat kin t leven toch mooi wezen, mout k docht hebben … Mainst Duutse schlagers, dij k opdoan haar op Schützenfesten an d’aander kaante van de grup. n Kammeroad van mie haar doar n neuze veur. So ein Tag was doar aine van en kwam dij oavend t mainst aan bod.

Inmiddels binnen wie 59 joar wieder en t verveelt nog niks. Twij joar verkeren, twije verloofd (olderwets hè?) en dit joar 55 joar traauwd. k Bin der slim wies mit. En ik blief dat gelok nuimen. Mit ains of nait, moakt mie nait oet!

Mit schoonollen was t idem dito. Veuraal schoonmoetje en ik konden t meroakel vinden. As k snommerddags kwam en zai nog gain licht aan haar, zee ze voak: Nog mor even wachten mit t licht aan doun, hè? Doe holst ook wel van twijduustern … Ik stemde doar geern mit in. k Vond t aaid prachteg en k haar t idee, dat wie den nog dichter bie nkander stonden (zai ducht mie net zo).

Eerappelkraben

Zai haar ook bie boeren daind en doar alle facetten as koien melken, heu vlijen en eerappel kraben goud in de vingers kregen. Tegen september/oktober was t taimke van schoonvoader: ‘Eh, denk je der om dat d’eerappels der aander weke oet mouten?’

Hier en doar wat gemor van de jongs: ‘Dat kin ja wel n weke loater!’

‘Ik reken op joe apmoal!’ En doar was t mit oet. Gainaine, dij t weekend doarop nait aanwezeg was. Ook voar zien bruir en zwoager mit zeuns kregen kond en den ging t loos. Moetje dee ook mit en wie stonden elk joar paf van heur snelhaid. Zai was elk wel n meter veur!

‘Doe letst mie gain eerappels liggen, hè,’ grapte voar.

Mit n man of tiene op knijen over t laand. d’Haile dag, tot aan t oavendeten tou! Elke bod veur n nije riege, en elke bod mor denken: mien laive tied, hou komve der deur!

Mien vrauw dee t hoeslek waark: kovvie op t laand, tussen middag n stoetje mit n komme kovvie en tegen d’oavend de waarme hap. En noa t òfwaarken kreeg elk zien wintergerief mit noar hoes. Dat was t loon noar waarken.

Ondanks dat t zwoar en bandeg waark was, was de sfeer aait goud. Zo kocht ik bie Jan Henderk de Grooth, krudenier bie de toren in Scheemde, n tiental vlèzzen wien. Hai stopte mit zien neern en ik kon ze veur n schont kriegen: twij kwartjes de vlèzze. Even veur de schaft raip ik: Jongs, t is tied! Schaften!

Mit kopkes veuroet hollend in d’haand, schonk ik heur wien in.

‘Wat dust nou man! Wie mouten d’kop der bie hollen! Nait meer as aine! Wie binnen ja nog laank nait kloar! Doe weer mit dien fratsen!’

Voar was barre serieus en kon zoks grapkes mor muilek verwaarken.

Wat loater op dag, as d eerappels ons sikkom tou d’neuze oet kwamen, begon neef Kees ook nog te mietjen: ‘God, voar, k wor laank nait goud!’

Zien voar, schrokken: ‘Wat hest, jong?’

‘k Wait t ook nait, mor k kin gain eerappel meer zain,’ dat ten taiken, dat e der goud flaauw van was! ‘Nait jeuzeln, elk nog n poar riege en den noa t eten nog n uurke, din hevve t wel had, ducht mie,’ zee schoonvoar, dij de bui al hangen zag. De wien speult heur paarten, mout e docht hebben.

De weke derop wuir de rest van d’oogst op boerenwoagens loaden en op stee brocht bie d’òfnemers. Noast partekelieren ook hotels/restaurants. De opbrengst was veur de twij bruirs en heur zwoager. Wat t waark en tied betrof, kon t meschain nait oet, mor t was n schiere bonus op heur arbaidersloontje.

Ainmoal haren wie n bar natte haarfst en dou mos je de eerappels ain veur ain oet de klaai kniepen.

‘Man, wat mout je doar nou nog aan verdainen?’ vroug ik aan schoonvoar.

‘t Is nait aans, aander joar is t vast wel weer beter!’

Tussen t oogsten en t aan de man brengen gingen der ook nog n poar doage vot mit t sorteren en t selecteren van poters.

Praaien

Vandoage de dag, as moeke wat praaien kocht het, nuimen wie t nog elke bod: zo lekker en zokse joekels as in Nij-Scheemde kriegve noeit weer! As onderaarms zo dik en blaauw om de kop van de kunstmizze. Mor lekker! Mainsttieden ook n poar bunder. Behaalve noar t gezin, gingen dij in bozzen van 10 noar t Esso-stoatsion van Janssen aan de Zuudwenden bie Scheemde. Wuiren ze om n uur of aachte brocht, den belde Janssen tegen n uur of elf al, dat e nog wel zo’n vrachtje broeken kon. Zai stoven vot. Veuraal Duutsers waren der gek op.

Anno 2023 lees je in meerdere bloaden, dat sokkeloamelk gezond is!

Nou drink ik dat al joaren en ik mout zeggen, dat mie dat oareg beter bevaalt den bier!

Tuurlijk benn n der nou partie luu, dei smeigeln en zeggen, dat dat n ol wieven drankje is…

Dat let mie kold. Elk het zien mainen en dat mag.

Op mien tachtegste ben k wel hail eem schrokken en wuir ik kwoad, omdat de haile familie mainde da k nog aal n draanksteern was en mit zeum lieter jenever aanzetten kwam….

Tenminste, dat ston op de verpakken!

Omdat k doar schienboar n proelderege kop van kreeg, zee ain van de schoonzusters…

Wat kijk je zuur? Maak ze nou es open!

Wat bleek? Zai haar apmoal n meeltje stuurt mit t verzuik om mie sokkeloamelk te geem in draankverpakken!

En zokse grapkes ken ik slim woardeern! De stemming zat der vot goud in!

Jammer genogt ligt de geinpomum nou in t zaikenhoes…

n Aanrieden had mit n scoeter… Zo n datteg breuken, woarvan acht ribben!

En dat op joen vaarntagtegste! Wie kenn n aans nait as veur heur doemen.

Ook nou in harmonie, net as zes joar leden mit sokkeloamelk!

Anno 2020 wordt de jeugd bezeghollen deur d’industrie … zeg mor gerust manipuleerd! Zai kennen gain siddeltoppe, houpel en dat soort speultjes meer oet vrouger – ons – tied. t Nije speultje hait tegenswoordeg ‘mobieltje’. Beter zegd: nije versloaven. Zulfs groten kinnen der nait zunder, zo t schient.
Wie wazzen aanwezen op meer aigen kreoatsies, zeg mor. Zo bedochten wie in d’oorlog ‘pakje leggen’: aan n laange, dunne droad bonden wie bieveurbeeld n knipke en den doken wie in d’sloot … wachten op aine, dij nijschiereg of hebberg was en t ding oppakde. Op n dag haren wie oet toene van ons ollen n goare komkommer snapt en dij aan t droad knupt. Noa n zetje wachten komt der n Mof op fietse aan. Oh, bliksem … dat is nait best! As dij kwoad wordt, gaait ter om spannen! Ons hartjes gingen te keer as n vaartaktmotortje. De Mof sprong van d’fietse en wol de komkommer pakken. Schienboar haar e dou ook al deur, dat dij nait te vreten was. Hai knitterde n moal en raip: ‘Das ist ja scheisse, Mensch!’ En trapde hom over d’stroate. t Laip veur ons goud òf! Pfff! Vot mor stoppen en aans wat bedenken. ‘Ik wait wel wat,’ raip Jannes, ‘wie binden Klaas aan n boom en kroepen zulf in d’sloot.’
Kwam n man op fietse van Roon … en joa, hai stapde òf. ‘Wat hebben zai die flikt, mienjong?’ En hai knupde t taauw deròf. ‘Zeg mor tegen d’jongs dij dat doan hebben, da’k ze nait in d’handen kriegen mout!’
‘Goud meneer, bedankt meneer! was mien ‘gespeulde’ gestuntel.
Wie aan t daanzen en springen.

‘Wat n goud idee, t is lokt! Mooi, hè?!’ Doarna lokte t n nog n moal of wat.
En dou, n uurtje loater, kwam dij eerste man trogge oet Laik. Hai zag mie, grijnsde en kwam overzied zwenkend d’stroate over. Dou e veur mie was, spijde e mie in t gezichte. Bah! Mien kammeroaden haren nog noeit zoveul lol … Hai haar mie zien sloatje tebak in d’snoete spijd!

Autorieden in t duuster wuir der nait beter op..

s Oavends nog eem vot, was der nait meer bie, te link!

Nou gaist mor ais noar dokter om n oafsproak te moaken veur n operoatie.

Joa, t zel wel mouten he?

Ook dokter von, dat t wel neudeg was! Stadskanaal of Winschoten?

Dou mor Winschoten dokter, mit Stadskenoal heb k gain goie ervoarns…

Oh? was je daar dan al eens bij de chirurg?

Joa, mor nait veur mie zulfs, mor veur mien moeke en dat is ons slecht bekommen!

Zai is doar mit n tussentied van roem 2 joar aan baide ogen opereert.

Dat was nog in de tied van dokter Worst. Zol n haile goie weesn.

Dou k heur weer ophoalde zag ze der oet as aine dei in d oorlog west haar!

Heur haile gezichte rood, blauw en geel! Man, wat ja n boudel, was t zo zwoar?

Proat mie der nait van, rie mor gauw noar Veendam,den zel k joe wel verslag doun!

Onderweegs bleek, dat ze goud oafmat was, zai vuil direct in sloap!

t Begunde al bie de veurberaiden… Zai legden mie op n brancard en schoom mie d gaange op….

Noa n uur nog gain minsk, dei k zain heb! n Uur? Heb je doar n uur wachten mouten?

Nog veul laanger! Noa bienoa drei uur docht ik: k stap der oaf en k goa noar hoes!

Dou kwam der endelk n zuster langs… Mag k joe wat vroagen zuster? Ja hoor mevrouw!

Wait n ie wat t plan mit mie is? Nee, mevrouw hoezo?

Ik zol tegen twei uur opereert worden an staar, mor nou is t al twei uur loater en ik heur of zai gain minsk!

Oh… schrok t wichtje: Ik zal gelijk vragen en zorgen dat de chirurg hier kennis van krijgt!

t Zel ook tied worden!

n Aander verpleegster komt eem loater aanrunt en bud doezend moal excuses…

Doar heb ik niks aan, Dou laiver, wat je doun mouten!

Ok! en zai schoof heur noar d operoatie-koamer.

De chirurg wol ook nog wel excuses moaken, mor moeke raip: schait nou mor op, aans goa k noar hoes!

n Joar of dreie loater net zo n verhoal! t Begunde al bie de balie. Naam, geboortedatum graag.

Was U hier al eerder? En of!

Ik kan daar niets over vinden, weet U het zeker? En tegen mie: klopt dat wel?

Ducht mie wel! Mor ie kenn n rusteg tegen heur zulf proaten heur! Zai is wel old, mor nait dement!

t Zel wel weer net zo goan as veurege moal! mopperde t olske.

En net zoas t was! Vanneis wuir ze vergeten en zag ze der nait oet noa de operoatie!

Dus…. doar beslist nait noar tou!

Belt ons dochter soams: al wat regeld? Joa! Stadskenoal? Nee, Winschoot!

Dat mout je beslist omzetten! Suzan (n kennis van heur) Waarkt doar en dat is n haile goie!

Nou…, eh…. stutterde ik. k Zel kieken. Nee! gewoon doun!

Toch mor mit n smoes oafbelt en mie opgeem veur Stadskenoal.

Doar kon k om 8 uur trechte. t Was nog routduuster en veuls te veul verkeer!

Kop dee mie zeer van t licht van aal dei tegenliggers!

Noa t inschrieven zee d zuster: dat is uw bed vandaag!

Wat? Mout ik op berre? Woarveur? Ja, we doen allerlei metingen voor we opereren! Oh!

Niks mis mit. Kovvie, n stoetje en n kop soep all in! Prima.

Tegen twei uur noar de chirurg. Gezelleg. U bent de vader van Karin he? Ja.

Affijn, eem kennismoaken en dou der veur. As je begunnen dokter, zeg je dat den eem?

Zai laagde: De lens is der al uit hoor! He……? k Heb ja niks vernomen!

Nee, dat moet toch ook niet? Laiver nait! Wat n veuroetgang!

Intied zet ain van d assistenten n cd-tje op mit n Duutse schlager. Veur mie n bekend laidje.

Begon ze ook nog mit te zingen…. Doar moak ve n duet van zee k en begon mit te zingen.

Dou t ploatje oaflopen was, was d operoatie ook bienoa kloar! En wie mit n kander vrolijk.

Van n aander dokter (n Hongaarse) ook nog n schiere mitdailn over n hassenscan, dei tussendeur moakt was.

Als u last van dementie krijgt, zal dat pas op latere leeftijd zijn! Oh? hou wait je dat?

U hebt kleine witte plekjes in uw hersens. Dat betekent, dat dat bij u heel lang zal duren!

Oh, bedankt! In tegenstelling tot moeke, haar ik n …. n prachtege dag!

Mien nichtoetroon.nl is der nou an tou…. en zucht der ook aibels tegenop.

k Zel heur dit verhoaltje ook stuur n, hopelek help t!

Tot aandermoal!

Gezelleg keuvelnd mit n stok of zes bezuikers, en de pappegoai op kaaste drok mitproatend, komt t gesprek op n zwaart kovvertje, in d’hörn van t ketoortje. ‘Wat is dat, Manske?’
‘Joa, dat zel k joe vertellen … n Poar weke leden stapt hier n zunderling old mannechie t ketoor in mit dat zwaarde kovvertje in d’haand. Noadat e n kop kovvie dronken haar, en nog wat snuusterd haar in d’loods, stapde hai op. Jampie zag opains, dat d’ol zien kovvertje vergeten haar. ‘Wie konden d’ol man nait en haren dus ook gain adres en zukswat.’
‘En nou den?’
‘Misschain zit der wel n adres in, den kinnen wie hom ja wel noabrengen?’
‘Dou hebben wie hom mor open moakt … en ie willen nait leuven, hou of wie schatterd hebben!

Dat is net wat veur Sunterkloas, dochten wie en doarom staait e nou te koop veur de hoogste baider! Dou mor n bod en schrief joen noam op d’lieste, den brengt Sunterkloas hom bie joe thoes, as je de hoogste baider binnen.’ ‘Baiden op dat ding? Konst wel gek wezen!’ ‘Nou ja, t huift nait! Mor t is hail biezunder! En ie hebben der aaltmoal wel mit waarkt, volgens mie!’
‘Oh, loat den ais zain?’
‘Nee, den is t ja gain verrazzen meer!’ ‘Baiden en òfwachten! Enne … vief december weerkommen! Den gait e open!’ ‘Oke den, n tientje!’, zee ain van de gasten. Weken loater stond t bedrag al boven d’honderd gulden.
‘Is dat genogt?’ vroug ik Manske. ‘Nee, man, t is veul meer weerd!’, zee e grijnzend.
‘Hest ook al n bod doan?’
‘Nee, k zet der n geeltje boven op!’, zee k hail heldhafteg.
‘Hest geliek! As t oetpakst, hest wel veur doezend gulden lol!’
t Ging nait echt van haarten. Manske kennende wos ik, dat e weer ais n stunt oet hoalde en in stilte hoopte ik dat aander weke, as k weer langs kwam, mien bod weer overboden was. En joa, 245 gulden!

5 Decenber, op noar Troanendalloane. t Ketoortje was sikkom te klaain! Wat n volk! t Is drij uur. ‘Kovvie staait op toafel en koukjes stoan op t aanrecht. Veul plezaar!’, laagt Trijn, Manske zien vraauw.
‘Der kommen nog n poar, dus ie mouten nog even wachten’, laagt Manske. t Lopt tegen vieven, tied dij òfsproken was dat de kovver opend wuir. t Ding staait inmiddels op toavel en elk zit vol spannen te wachten …..’t Is vief uur heur!’ Inmiddels haren wie ook elk al n pilske en was Manske aan t heerns slachten. ‘Lus je ook wel, vast?’ t Hoogste bod was 325,-. Haren wie te leeg boden? Of zol de hoogste baider dammeet op zien bek goan? De spannen steeg en veul fantasieën deden de ronde. Hai kin wel vol zitten mit kepotjes! Joa, of mit vismoaden! ‘Kerel man, moak hom nou open! Wie kennen ja nait laanger wachten!
De ainege dij nog lagen kon was Manske … ‘Ie kieken net oet, of der n oorlog op komst is!’ Bie tieden laip e blaauw aan. ‘Elk nog n heerntje?’ ‘Verrek toch kerel! Moak open dat ding!’ ‘Tou den mor, k heb ook al weer genogt oetgeven! t Wordt tied, da k weer n beetje verdain!’ Hail veurzichteg, joa uuterst taargend opende hai ain van de slötjes ….. En dou: ‘Goud kieken! Dit vergeet je noeit meer!’
Twijde slötje kwam lös, t deksel omhoog en …….Tientallen gloazen inktpotjes oet de joaren vatteg/viefteg laagden ons tou! t Geproest was nait van de locht. Aine verslook zok nog in zien zolde heern!
‘Nou, wat heb k joe zegd? Hebben ie hier mit waarkt of nait!’

Mit gemengde gevuilens ging ik noar hoes. Onderwegens nog aal schatternd …

WAT N KOOPMAN!

“Wie kennen nog wel n rondje fietsen”, zee moeke zotterdagmiddag onder t eten.
“Houveulsten is t vandoage?”, wol k waiten.
“De zesden”
“Den ken k nait. k Heb beloofd, da’k in de kroam van DIO stoa in d Eextahal”. (DIO is mien badmintonclub en wie konden nog wel wat leden broeken, zodounde.)

Om goud twij uur wuir k begroet deur Gezienus en Hillie. (collega-leden) k Was even te vroug volgens heur en dat gaf tied veur n proatje…
“Wat hest doe vrouger doan?”, wol Gezienus waiten.
Ja, en den krieg ik t op d heupen. Bekje staait mie nait stil, as k in t verleden doeken ken.
t Bleek, dat zai baiden bie de ritssloeten febriek van Optilon in Sodom waarkt hadden in d joaren vieteg/zesteg…
“Dou kreeg n wie Optilon as klant!”, ruip ik.

En ik vertelde van de wel aarg biezundere menaaier, woarop dat goan was.
In dij tied haren wie veur t eerst stanzmessen, dij wie in de drokpaarsen inbouwen konden en den alle meugelke figuurn oet t pepier stanzen konden.
As boetenmitwaarker was ik voak an t oetdinken, hou of wie nije klanten ‘vangen’ konden… en dou op n moal bedocht ik mie, dat wie n kloaver vaar oet stanzen konden.
Hai wuir zo groot as nou ongeveer n a vaar en as tekst drokten wie der op: ‘Uw geluks klaver vier?’. En wieders, dat de geadresseerde overwegen kon of e an n nije drokker tou was…
Van de zesteg verstuurde kloavertjes kwamen der twije trogge.
Bruir haar al aangeven dat e t mor niks von, dus was ik mit dij twij reakties nait slim blied.
De eerste wol stenselwaark veur n verainen… doar ging mie t nait om!
De twijde was Optilon… “YES!!”, was mien reactie.
Of wie langs kommen konden?

Bie mien bezuik, doarnoa, gooide de tounmoalege directeur mie wat drokwaark veur en vroug, of wie dat moaken konden.
Gelukkig kon ik doarop volmondeg joa zeggen.
Binnen n weeke haar e zien ‘proef’ opdrachten kant en kloar in hoes.
“Hoe kan dat? Hebben jullie wel genoeg werk?”
Ik legde hom oet, dat wie vief snelle mechienen haren en dat wie nog wel wat meer wend wazzen.
Kreeg geliek n stok of tien nije orders mit en dou ik dij oafleverde, vroug hai zok haardop oaf: “Als jullie dat allemaal kunnen drukken, waarom zitten wij dan bij een drukker in Eindhoven?”
Ik mos hom t antwoord schuldeg blieven. Van laiverlee kwam t zo wied, dat wie alle drokwaark kregen en kregen zai aal meer service van van Zonneveld Zonen.
Mozzen de priezen van heur produkten wiezegd worden, dan wuir dat wied van teveur n aangeven en kregen zai n haile weke laank de beschikking over aal t raive wat wie veur handen haarn…
Aander klanten mozzen den mor even n weke laanger wachten en haren doar gain muite mit!

Noa zo n anderhaalf joar kregen wie ook d aander fabrieken in Oostenriek/Zwitserland/Luxemburg en Duutsland as klant. In alle toalen vloog t drokwaark tou t kerkje in Meulen stroate in Scheemde der oet.

“Den hemmen ie de stoaken dou ook mitmoakt?”, wol Gezienus waiten.
“Nou en of, dat was mie n boudel… t Manvolk was op n gegeven moment over deur n geweldege vernijen. De vakbond mos der heer en kreeg t kloar, dat der gain ontsloagen vuilen. Zai mozzen den beraid wezen, om tegen behold van heur loon, t zulfde waark as de vrauluu te doun.
Manluu gingen akkoord, en elk was tevreden.
Dou, roem drijkwart joar loater, begonnen vrauwluu te sputtern, dat zai onder betoald wuiren -manluu kregen oareg meer as zai veur t zulfde waark- omdat oafsproken was, dat zai heur veurege loon beholden konden… d Aine jende d aander op en dou brak der n wilde stoaken oet! Dat het nogal even duurt. Zo laank, dat n ‘Hoge Duutser’ dij as tussenpersoon dainde veur de directie meldde: “Her n direktor hat gemeldet, die tuure zu schliessen, wen dasz zo durch geht!!’
“Of dat de deurslag geven het, dat men weer an t slag ging wait ik nait”, zee Gezienus.
“Nee, ik ook nait… Mor vanoaf dat moment wuir t der nait beter op in Sodom en brokkelde ons Geluks kloavertje stokje veur stokje oaf”, zee ik mit n kloede in d haals.

“Den is t nou dien beurt”, maarkte Hillie op en ik kon vannijs perbaaiern nije klanten te winnen. Mor nou veur D.I.O.
k Leuf nait dat der veul animo was.
k Heb nog nait heurt, of hier ook n kloaverje vaare zien waark doan het.

Herinnerns an mien tied in Nijtap 1937-1948 kommen bie t older worden aal meer noar boven. Zo as de Drachtster tram, t Laikstermeer en veuraal ook t Noatuurschoon achter t hoes. Veur kinder n woar speulparredies! Hail wat aans as achter de teevee of de peecee… Tussen de biels goaten groaven en as de tram langs kwam der in kroepen om dat ding van ondern te bekieken. In t Laikstermeer zwemmen en speulen bie t wottergemoal van Sip van der Haaide.

Net as mit de Drachtster tram gingen wie ook bie t meer nogal ais wied in onze fantasie. As t gemoal oet ston, kropen wie deur de schroef dij t wotter aanhoalde en verwaarkte. Ik ken mie veurstellen, dat der onder joe nou lu binnen, dij roupen: gelokkeg zitten dij van mie achter de peecee! En den heb ik t over t bos nog hail nait had… Wat wie doar aal deden en konnen.., k Zel joe t bespoaren! As wie noar t meer gingen, mozzen wie aaid langs t hoeske van mien oom en taande an de Heuloan. ‘Goa j’an t zwemmen?’ raip mien taande voak, as ze ons zag. As zai ons nait zag, muiken wie zoveul keboal, dat zai wel boeten deure kommen mos.
‘Kom gauw even, krieg je elk n appel mit! En aander week moj’ook kommen op t feessie van ons wichter.’ Zai was slim wies mit kinder, haar ze groag om zok tou en as t heur te stil wuir, organizeerde zai n feessie (veur dizze tied: n kinderparty)!
Oompie was meziekant, kon meroakels harmonikoa en mandoline speulen. Speulde rond d’oorlogstied in de Bekketrekkers en haar an hoes n leslokoal kompleet mit n podium woaras hai meziekles gaf. Zien leerlingen mozzen al noa n haalf joar les t podium op om veur publiek te speulen. Deur zien geduldege en kaalme oetleg bleef elk kind geern kommen en kreeg hai der oet wat volgens hom t hoogst hoalboare veur zo’n kind was! Taandes feessies haren veul inhold. Zowel kreatief as meziekoal. Wie begunden voak mit wat lekkers en n glaske ranja. Oet de stoapel goud dij ze kloar legd haar, konden wie kaizen wat of wie aan hemmen wollen, om doarnoa, elk mit n aigen kozen instrument meziek, of laiver zegd keboal te moaken. As wie ons goud oetleefd haren, den gingen wie mit nkander nog n boswandeln moaken in t Noatuurschoon. .
Oetroust en voldoan gingen wie den op hoes an. Tuurlek mozzen wie wel ons verhoal nog an d’ollen kwiet, mor dij haren wieder gain kind meer an ons. Wie slaipen as ozzen!
Trogge kiekend op dij tied, besef ik dat wie aan heur n geweldige leermeester had hebben. Aarg jammer, dat zai heur leste joaren slieten mos in Zuudhörn, vanwege n te loat ontdekte zaikte!

Dat heur je voak bie de geboorte van n kind…

En den benn n d oll n mor wat bliede! Gelukkeg!

Mor t ken ook aans….

Wie stonden begun joaren 2000 veur de Zunnebloum op n joarmaart lotten te verkopen.

De boaten doarvan broekten wie om oetjes, muziekmiddoagen en dat soort dingen veur onze gasten goudkoper te moaken of gratis aan te baiden.

Komt der n dame aan, mit heur moeke in n rolstoule. Noa n zetje proaten zeg ik tegen moeke:

Is t nait wat veur joe? n Middagje of n dag oet mit de Zunnebloum? Wie hebben veul meugelkheden, en der is vast wel wat veur joe bie? Muziek, bus en boottochten en zulfs vakantieweken!

Zai docht n zetje noa en zee op zachte toon: Nou eh…. nee, doe maar niet.

Heur dochter reageerde: Ja, moe, gewoon doen! Je kunt er altijd weer mee stoppen als het niet bevalt. Toch?

En ze keek mie aan. Ja hoor, geen probleem! Mor ik denk, dat der vast wel wat moois veur joe bie is!

Nou eh… toe maar dan. Ik gaf heur dochter pen en pepier en vroug of ze doarop t adres en telefoonnummer schriem wol…. Noa t leesn zee ik: Dat is ja n bekende noam… Femilie van … en ik nuimde de noam van n klant van ons.

Ja, dat zijn mijn schoonouders!

Dat is ja biezunder….! Doar kwam ik geern, dou ik n joar of dattien was! As mien voar vroug: Wel wil t drokwaark van…..noar ….. brengen, den zee ik vot: IK! t Was n oareg endje fietsen, mor dat dee mie niks… As k aankwam was t aait: Och, mien jong, bist op fietse? Den moust ja wel n deuske sigaretten hebben!

Dat wos ik en doar ging mie t om!

Joa, k was al sunds mai viemvatteg laifhebber! En dat was dou hail gewoon!

Wie keuvelden nog wat deur en de ,klik’, woaras men nou, geern over prat was der!

Om binnen de 1000 woorden te bliem dei t reglement van Westerwoll aangeft, mout ik mie nou n beetje inholl n….

Moeke ging mit noar muziek middoagen, t volksdansen in Odoorn, boottochten mit Pieter Dekker en nog veul meer!

t Aine was veur heur nog mooier den t aander. Mor ook n poar keer ging der oareg wat mis!

Ik besloot om heur as mien gast aan te hollen en geregeld n moal te bezuiken.

Dou kwam ons baider leem boom wotter en ontdekte ik, dat ik wel n hail gelokkeg leem had haar…

Zai was nog mor n tiener, dou ze al slim last haar van heur baintjes.. Loater wuir dat aal aarger en bleek, dat ze al t begun haar van MS!

Inmiddels is ze roem negenteg, dus doar kin je wel old mit worden…

Onze gesprekken wuirn aal persoonleker en zai vertelde mie, dat heur zeuntje op achtjoarege leeftied overleden was..

Noa n auto-ongelok, woaras heur man bie om t leem kwam en zai twei joar laank in zaikenhoezen en revaledoatie ging, mog ze endelk noar hoes. Bliede en baange! Bliede, dat zai deur mog mit heur kinder en baange, of ze t aankenn n zol!

Noa n dikke joar begon heur zeuntje mit kopzere… Zaikenhoes weer in en oet! Haar t jonkje n tumor an zien hassenstam…!

Operoatie nait meugelk! Hai mocht t nait redden!

Dou zai mie dat vertelde, kon ik t nait dreug holl n… Sorry hoor, moar dit wordt mie eem te veul, stutterde ik.

Geeft niet! Ik zou graag met je mee doen, maar mijn tranen zijn al lang op!

n Zetje leden belde ik heur; Goud, da k dunderdag langs kom?

Dat is goed, maar ook binnen komen he!

k Heb de koffie al klaar staan hoor! Schenk jij even in? Geern! Kon je dat zulf al weer doun?

Je mag toch niet uit de stoel? Nee, daar heb ik mijn personeel voor! lachte ze.

Ik mag enkel nog naar buiten en naar het plafond kijken… Ook niet gek toch?

Verder wordt ik nu volledig verzorgd! Wat een verwennerij he!

t Zol niks veur mie weesn… zee ik. Nee, voor mij ook niet, maar wat heb ik nog te willen?

Ie hebben nait echt n mooi leem had he?

Nee, n ROT leven!

Ja, wie benn n sunds twei joar hondsmuide. Da s kommen deur Corona en wie frantern ook wat of..

t Is ook nait mooi, mor IE hebben t oareg minder!

Nou, ik mout weer vot. k Zel perbaarn nait zo laank vot te blieven heur!

Ik hou je der aan, maar ik begrijp het ook hoor!

Onder t haandlangen zegt ze mit n smile: der mag ook weer gekust worden hoor!

In de Corana-periode was t nait verstandeg en dat het ze nait mooi vonden docht ik…

k Griep heur om d haals en bak heur op baide wangen en op heur mond n dikke smok!

En woarliek: Zai glom van alle kanten!

Wat is der mooier! En dat al roem twinteg joar! woar blift de tied he!

t Weer liekt wel n minsk…..

Aal mor hinneweer!

d Aine weke roeg, en den opains weer prachteg zummer weer!

Minsken roupen bie t ain: Bah!, wat n hondenweer! En.. Zo waarm huift veur mie nou ook weer nait!

t Is mor, hou of je der noar kieken, en hou je t vuil n.

Mor n enkeling past zok an t weer an en is blied mit de vaar joargetieden in Nederland.

Mooi man! De veurjoarszunne? Heerlijk! Zummers as t wat te waarm weer is, kroep je mor in de scha toch?

Veur de haarfst mout je joe beter inpakken om de kilte tegen te goan en regengoud, veur as t weer wat natteg word.

In de winter ken t wat hefteger worden vanzulfs… Snij, iezel, gladden. Mor tegenwoordeg kin je den weer mit winterbanden en specioale winterschounen der ook wel weer tegen!

Mooi man! Gain 300 doage waarmte of kilte, mor elke bod weer wat nijs..

Woar wil je t weer beter kriegen?

Kold he!, Ja, der kon wel n poar groadjes bie! zeg ik den mit n smile..

Kloten weer! Och, t vaalt wel mit toch? t Is nou toch wel gezond weer?

Meechain wel, mor ik heb laiver wat waarmer weer!

Ja, den kinst mor beter emigreren noar n aander laand!

Ja, mor dat is mie den weer te wied van hoes! den mis ik de Scheemter toorn…

Zo komst wel wieder! Geef mie t weer in ons kikkerlandje mor…

De vaar joargetieden brengen ons grui en blui…. Beter kin t volgens mie nait!

Dat is veur mie t betere weer!

Of aal stress?

De eerste joar n van ons trauw n was t aans niks as waarken.

Tussen de middag gauw noar hoes, rad n beetje eten en den weer an t waark.

t Stroatje van d Meulnstroate noar d Hoamstroat was net verboden veur fietsers.

Oafstappen en lopen dus! Ik vloog der maistens mit n gang deur en gooide t rechterbain over t zoadel..

Mit t linkerbain ston k den op t pedoal en aan t enne van de stroat sprong k gauw weer op t zoadel…..

Bie Grietje Buur op d houke stonden twei Jekken…. Halt! afstappen!

Verrek, ook nog n bekeurn…? Jij mag daar niet fietsen, ik moet je bekeuren…

Oh? Maar ik fietste daar niet hoor! Ik zat er net weer op! Ja, zal wel!

Nou ja, ik kan het net zo min bewijzen as ie t bewiezen kenn n, dat ik fietste!

Verrek om mij! Sodemieter op! En zo haar k weer n beetje verdaind!

In de joaren tachteg noar n aander boas…. Ging k vannijs noa n joar rusteg aan weer as n haalfmale tekeer!

Kom bie Larmoieur oet de winkel, dou d deure dicht en doar ston ik… gain gevuil meer in de bainen..

Komt n winkelier aanlopen… Lopst mit mie op? Geern, mor k wait nait hou! Huu….?

t Kontakt van boven noar onder was finoal vot! n Ketaartje mit de man proat en dou vuilde ik de bainen weer.

n Weke rusten volgens de hoesarts. n Braifke van t Gak: U moet zich maandag op ons kantoor melden.

Binnen bie de arts, zat e mit zien poten op toafel en hong in d stoule asof e doodop was….

Zeg het es! k Was vot misselk. Hou bedoul je? Wat is er aan de hand?

Mout ik dat mit joe deurnemen? As ie de kost zo verdainen, denk ik nait, dat je mie helpen kenn n!

Ik ging weg en laip de koamer oet. Maandag weer aan t werk! raip e mie noa. Ik draai mie om en zeg: dat leum ie toch nait!

Noar de balie: Zeg tegen t wichie: Zijn er hier ook nog andere artsen? En vertel heur de situoatie.

Jawel hoor, maar dan moeten we wel een nieuwe afspraak maken! Oke!

Volgende week woensdag 3 uur? Is goed, tot dan!

Och God, was mien schrik dou de dokter zok veurstelde…: nou n kwoajong! dat zel helpen. zeker…

Mor k kon mien achterdocht direkt voar n loaten! Wat zijn de klachten?

Ik legde hom de boudel oet en halverwege zee e: Ik denk, dat ik te jong ben om de situatie te beoordelen, wilt u wel naar het UMCG? Daar werkt nog een arts van in de zeventig… enz. Graag was mien antwoord. Resultaat: Je hebt teveel je hoofd gebruikt en je lichaam vergeten! Ga genieten van je vrijheid!

Je kunt best genezen, maat ik denk wel, dat je dat tien jaar kost! Oh? Nou, dank U!

Nog n moal noar de jonge dokter van t Gak en dou… Oafkeurd! Ik leg uw dossier achter in de kast, doe rusteg aan en geniet van de vrije tijd! k Was 52!!

Kreeg n poar moand loater piene in de borst…. Maar even naar t Martini zee dokter…

Kom bie de dokter doar en dij zegt: Als ik je wat vraag, graag antwoorden met ja of nee…..! Oh

Hai drokt mie op de borst en vragt: Doet dit pijn? Niet echt, maar het is wel gevoeleg.

Dat vraag ik niet! Ja of nee? Oh, eh.. NEE! Geen pijn? Nee, ik ga weg! Als u geen tijd heeft, moet je minder patienten aannemen! Tjeu!

Mien nare gevuilns, dei k haar noa mien oafkeurn was der geliek mit vot… Loat ze toch verrekken mit n kander!

Elk noadail het zien……. En zo is t mor net!

Het zel ook joe nait ontgoan ween, dat TV Noord melde, dat Tik Tok Tammo

de Haide bliksem pries wonnen het..?

Ik schrief hier bewust ,pries’, omdat k mie slim aarger aan aal dat Engels in de Nederlandse toal

en veuraal as n Grunneger RTV-station doarin mitgoan mout!

Nait weer doun!

Guster op de verjoardag van ons klaindochter wazzen kinder van klain tot groot drok dounde mit heur mobieltjes…
Ik zat dat wat mit gemengde gevuilens aan te kieken.
Zo van: mout dat nou? En toch wel schier, dat ze nait boven d’ollen oet kommen.
Even loater zat k mit mien gedachten in t verleden.
Aan achtenvatteg, dou wie noar Scheemde verhoesden en ons aigen telefoon hadden.
Nummer 66!!

In t kantoor hong n kastke mit n slinger der aan en bovenop t kaske lag d hoorn.
Wol je mit aine bellen, den gaf je n slinger aan dat ding en kwam Nonny van t postketoor aan d liene. “Wilst mie even verbinden mit…?”
Vief tot tien minuten loater ging den de belle en vertelde Nonny, dat ze kontakt haar en kon je t gesprek aan goan. Wat n weelde!

Ons overbuurman zat der dou nog zunder en kwam voak n moal langs mit de vroag of e even gebroek moaken mog van nummer 66.
As dank legde den n dubbeltje op t buro!

Net as kinder der nou spelletjes mit speulen, deden wie dat ook in dij tied.
Wel mozzen wie ze zulf bedinken!
Op t waark haar Christien mie n geintje flikt…
Onderweg noar hoes, bedocht ik mie hou ik heur weerom pakken kon.
Ik belde heur vanoaf hoes en gaf heur n advertensie deur van n gruinteboer oet Muntendam, woarvan wie wozzen, dat e geern n moal stunten mog…
“Hofman. k wil even n advertensie zetten. Spruten, n kwartje de kilo, fijne Gold renetten datteg sìnt, n emmer eerappels, dizze weke twij kwartjes, mit gratis n dikke praai. Enz.”
k Gaf heur n beste labbe tekst deur, zodat ze wat te schrieven haar.
Dou k weer op kantoor kwam zee ze: “Zol dat aal wel goud weden?” en luit mie de tekst lezen.
“Dat ken nait, gooi dij mor vot”, zee ik en scheurde hom stok.
Zai schrok doar nuver van en sputterde, dat Hofman dat echt zulf deurgeven haar.
Ik laachend: “Hast nait deur, dat ik dat was?”

Op zetterij bie t Nijsblad in stad was t ook voak roak. Doar waarkten meerdere doofstommen.
Voak as ik binnen kwam, was t: “Zon-ne-veld… te-le-foon!”
As k de hoake den overnam, was der vazulfs gain aine an d liene…
Deur de stress vergat ik den even, dat e doof was en dus nait telefoneern kon!

Op mien route Muntendam-Veendam was t bie slager Braauwer aait t zulfde laidje…
As e mie zag, reageerde hai nait op d winkelbelle. Lait mie rusteg tien minuten wachten en zee den voak: “Vandoage niks”, en kon k asnog mit lege handen votgoan.
In n proatje mit n PTT mitwaarker kreeg ik van hom n nummer, woaras je joe zulf mit bellen konden om joen telefoon te controleren.
Dou was t kloar!

Elke bod, as ik binnen kwam, toetste ik op t toestel, dij op teunbaanke ston, dat codenummer gauw in en legde d’hoorn weer op t toustel.
Mit rogge noar hom tou laip ik den wat hinneweer.
As t ding begon te rinkeln, kwam e mit n rooie kop in d winkel en greep d hoorn…
“Verd… weer loos alaarm!”, foeterde en vroug den, wat ik wol.
In twij menuten was ik den weer boeten deure! En mor laachen.

n Kollega van mie belde oet jiddelghaid zo mor n nummer en kreeg der n Chinees veur:
“Goeden morregen… PTT hier. We willen graag even uw telefoon controleren… Ik ga u een paar vragen stellen en als u die met ja kunt beantwoorden, wil u dan ‘tok’ zeggen?”
Noa drij vroagen zee e: “Wilt u eens achter u kijken? Ligt daar nu een ei?”
“Nee….?, dan is er goed wat fout! Ik stuur een monteur langs! Goeden morgen.”

Zulf wol ik n klant bellen… Nam d’hoorn op en wol t nummer draaien: Kom k midden in n gesprek van n moeke en dochter:
“Wat hest den?”
“Zwoar verkollen en wat broert.”
“Aigen schuld! Ligst ook ja noakend in toene!”
“Hou komst doar bie, doar komt t nait van…”

Doar dou k an mit, docht ik en zee…:
“Ie hebben geliek! Doar komt t wel van”.
Moeke verschrikt: “Wel hest doar bie die?”
“Gain aine, k ben haildal allaind in hoes.”
“Lokst! k Heur t ja wel ! Wel is dat?”

Dit komt nait goud… Ingriepen! Docht ik:
“Sorry wichter, woar zitten ie?”
“In Finnerwol”, zee moeke. “Blijham”, zee heur dochter.
“En ik op ketoor in Winschoot…!”
“Hou ken dat den?” wol moeke waiten.
“k Wait t ook nait, mor joen dochter het geliek, k ben nait bie heur…”
“Gelokkeg mor”, zee moeke, “k Mout der ook nait an denken.”
“Wie proaten mörn wel wieder!”, ruip ze heur dochter tou en smeet d’hoorn der op.

Dou de stemkompjoeters kwammen en je voak aaiweg in de wacht zet wuiren, kwam k op n keer in de verlaiden om ais net zo te reageern.
k Nam op mit: “U bent verbonden met het antwoordapparaat van Klaas van Zonneveld. Wilt u Klaas, toets 1, wilt u Hillie, toets 2, wilt u…”, en zo ging k nog even deur.
k Heurde an aander kaande, dat e n toets in drokte en zee dou: “Da’s nait neudeg jong, wat wolst mie vertellen?”
n Aander moal zee k der nog bie: “U kunt na de pieptoon uw boodschap inspreken…”
“Verrek! Dij begunt ook al mit dat gedonder…”
Woarop ik ruip: “Doe begunst nait te schelden he!”

Mor der kennen noatuurlek ook maale berichten deur kommen…
Zo kwam ik s mörns n moal op ketoor en was der n tillefoontje van n collega: “Willie heeft zich vanmorgen dood gereden!”
Ik ston aan de grond noageld: k Haar doags der veur nog mit heur lol trapt…
“GvD” was mien spontoane reaktie, woarop mien boas ‘zwoar christelk’ mie doar streng op aansprak.

Moandags op t biljarten krigt ain van d jongs aait n belletje van n annonieme:
“Teelefoooon! Pak hom nou op! Teelefooon! Heurst t nait? Pak hom nou op!”
Evert Babtist schient aan d aander kaante te zitten….!

Schier speulgoud! In de hudege tied is t nog makkelker… Ken je ook sms- n.
Is goudkoper. Stuurde mien klaindochter n berichtje mit felesitoaties veur heur 17e joardag. Kreeg k as antwoord: “k ben morgen pas jarig! Haha!”
Ik votdoadelk n nij berichtje: “Nog maar 75 en nu al vergeterig”.
Woarop zai weer: “geeft niks joh! Dikke kusss, Daphne!”

De meugelkheden bennen aans… De lol is nog aal t zulfde!