Van Veendam ……noar Olle Pekel!!

k Was vanweke op bezuik bie bruir in Clockstede, Nij Pekel…

Hai zit doar vanwege Parkinson dementie en dat is beslist nait mooi.

Aalgedureg eem n helder moment, mor den holt t weer op en kikt e mit stoaln ogen en de mond wied open -as n vogeltje in de waarmte- liek veur zok oet….

As ik bie hom kom en hom begroet krieg k n smail van herkenn n en ist: Ha, bruirtje…. leuk!

Dat vin k den vanzulfs wel mooi mor t dut ook slim zeer.

t Schient dat deur giftege stoffen, der veul soortgenoten benn n…?

Op zien bruloft zong e t laidje ,So ein Tag’ en dat heffe voak n moal soamen zongen, twei-stemmeg.

As k nou bie hom ben perbaar k t nog wel ais, mor proaten lukt hom nait meer, loat stoan zingen!

Wel weer n herkenn n: n Smail en n bevesteging van herkenning.

Niks aan….. Wie hebben betere tieden kend.

Zoas mit zien trauwen…in ’89. Twei mooie koetskes en n Jan Plezaar…

Zulf haar e n koetske en n poar peerden. Omdat e laiver op de peerden zat den op d koetse, haar e zien koetske oetlaint an Orvelte. Doar konden d luu n rondtochtje mit moaken.

Net as mit de Jan Plezaar.

Dou e trauwen ging, hadden zien kameroaden t regelt, dat hai twei koetskes en de Jan Plezaar broeken mog.

Gelukkeg was t hemels mooi weer en kon ve in t zummergoud dailnemen.

Starten aan t Oosterdaip en over Zuudwenden noar Pekel…

In Pekel t bruidje en heur moeke en d aandere gasten oppikken en dat noar t Gemaintehoes.

Mit zo n 35/40 gasten op trograize noar Veendam.. En onderweegs n bult bekieks, veuraal omdat t laidje ,Van Veendam noar Olle Pekel ‘ nait van de locht was! Prachteg!

t Bruloftsfeest haar n ze bie Veenlust. Noa n stok of wat pikskes kwam e op gang.

Mit t vrouwtje noar t midden van de dansvlouer en dou der genogt luu de wals dansten, zong e oet volle borst: , So ein Tag, so wunderscheun wie heute… ‘

Eem in de tied trogge…. en je hebben vannijs n schier ogenblikje!