Klokke Roeland
Guster haren wie d’oldste klaaindochter Marjolein op bezuik. Zai kwam bie ons eten, omreden dat heur ollen op vekansie noar t aailand gingen. t Komt nait zo voak meer veur. Leren en scharrelderij gaait n hoop tied in zitten! Ja, dat leerderij is wat, tegenswoordeg. VMBO, HAVO, VWO en wait ik veul, wat veur O’s nog meer… k Heb der gain snars verstand meer van!
Zai is echt van dizze tied en speult ook geern mit heur mobieltje, woaras je mit bellen, filmen, en internetten kinnen.
‘Dat was vrouger wel aans’ vertelde ik in de konversoatie, dij wie haren. ‘Wie haren n kassie an de muur mit n hoorn der boven op. As je mit aine bellen wollen, mos je eerst slingern…. Den kreeg je Nonnie an de liene en gaf je deur, mit wel je geern kontakt hemmen wollen. ‘Bel joe zo trogge’ zee Nonnie den en zo’n 10 minuten loater ging de belle as taiken, dat ze kontakt moakt haar.’ “Wie haren dou nummer 66′, vertelde ik. Der wazzen dou mor waaineg aansloetens in Scheemde, Crol Vink haar nummer aine!’ Zai kon t hoast nait leuven en mos der den ook wel om laggen. Net as om n traauwfoto van ons… Zwaart/wit. ‘In ons tied was t mainst swaart/wit, meschain was der ook wel n meugelkhaid veur kleur, mor dat konnen wie nait betoalen.’ Shit, (nij woord veur verrek) denk ik nou: t Is ja de zeuvende! Onze traauwdag! k Heb nog hail gain bloumke veur moeke hoald! Dommeet om acht uur vot even noar de winkel! (dat even terziede). Ondertussen kreeg ze n berichtje van Roy, heur vrund: ‘Hij heeft het erg druk deze week…. moet van half zeven tot zes werken en vrijdag tot half elf! En hij moet ook nog op de scooter, omdat ie geen auto heeft!’, zee ze wat frustreerd.
n Poar weke trogge haren ze n ongelok: Zai achter t stuur, in de baarm en boem!… op kop in de sloot! Gelokkeg laip t goud òf, mor t autootje was noar de bliksem! Ik kon maarken, dat t heur nog zeer dee en pebaarde heur der van te overtugen, dat zai doar niks aan doun kon! Mor ja, t mout zien tied hebben. Kinder hebben t vandoage ook nait makkelk.
En weer dwoalen mien gedachten òf noar vrouger… Wubbo oet Schewòl en Luuken oet Nij Pekel kwamen in beeld. Zai waarkten bie ons in drokkerij en mozzen om haalf aachte begunnen! Elk mos wel n uur fietsen! Kin je noagoan, hou vroug dij van bèrre òf mozzen! n Scootertje was der veur heur nait bie. Om vief uur noar hoes, as der nait overwaarkt worden mos! k Zat net even te reken… de man roem 150 km in weke! Onder t waark aaid de radio aan mit gezellege meziek. En mit nkander mitzingen. Zo stoof de tied om, en was der minder frustroatsie. k Herinner mie nog goud, dat as mien voar – os boas – ais wat chagrijneg was, Luuken spontoan ‘Klokke Roeland’ inzette en d’ol zien gezichte van swaart snij op slag veranderde in n vroleke, zunnege smile!
Kinder zellen wel n aander ploatje neudeg hebben, mor ook dij zel as n medisien waarken. Ik hoop t van haarten!
Veur mie is Klokke Roeland – net as veur mien voar – meer as voldounde!
