Een grote verzameling limericks in het Gronings

Ain visboer op de Brink in Nörg
Staait veur zien rekloame börg
Doar zien aanbod is:
"Mörgen groates vis!"
Ligt zien lozeghaid hierin verbörgen:
Guster was vandoag nog mörgen

n Kniezebieter oet Westerlee,
Was aldernoast aan de diarree.
Dokter zee: moag is joe op riddel,
Din is vasten t allerbeste middel.
En verder:…..hôl deur open van joen plee.

Ruip n koopman noar t volk op Adrillen:
“Koop hier joen vermoageringspillen!
De vraauw super-slaank!
Wat minder geld op de baank,
mor ie kinnen joe der nait aan vertillen!”

n olde vraauw oet Zuudloaren,
wol ains heur bainen onthoaren.
mor wos nait wat zie dee,
kreeg n saaize van stee.
t bluiden kreeg t volk sikkom nait tot bedoaren!

Ain bakker oet Luukswolle
Dij ken mor min tegen de kolle
Veur d oven het hai gain last
Mor bie t venten zain ie hom vast
Mit n pedde op, t is al n hail olle.

n Dikke bakker oet Seballeburen,
krigt rondom Kerst aaltied male kuren.
t Wief zugt, hou t heur ok verdrait,
heur vint in bèrre sikkom nait.
Gelokkeg zel t mor n poar weke duren.

Der was ains n beer op Taange
Dij was veur motten doodsbaange
Zien waark dee hai nait
Tot boer zien verdrait
Zien 'dinges' hangt nou in de gaange.

Der was ais n boer in Schaarmer
Dij kreeg t hier aal aarmer
Hai ging noar Canada emigreren
En Engelse toal leren
Noa n poar joar was hai doar faarmer.

n Boerenaarbaaider oet Pekel
haar aan waarken bot hekel.
Boer dei moal zag
Dat e op luie rogge lag
Gaf hom n pak op ribben mit strekel.

n Dikke boerenvraauw oet De Moaten
holt priezen aaltied goud in de goaten.
Zai vruig maarktkoopman: "Dai BH's, wat kosten dai?"
"Vief gulden"."Vief gulden? Geef mie dan moar twai.
Veur dat geld ken k ze nait hangen loaten".