Remkes, komt der nog wat van??????

In t Dagblad van 23 juni lestleden ston n
verhoal van Piter Bergstra over t
oetblieven van erkennen veur de
streektoal deur onze regeren. Ploug van
Balkenende het t zo drok mit t intrekken en
weeromgeven van paspoorten, blift gain
tied over veur t optillen van streektoalen
noar n hogere “status”. JP was hier in
Grunnen n pooske leden, mor dat gong
meer om t ophemeln van Eemshoaven en
Bavaria en t ontlopen van Piet van Dijken.
t Kin wezen dat JP toal van Piet verslit
veur streektoal, mor nait in de smiezen het
dat t Nedersaksisch n groot gebied bestrikt
en dat Piet doarin n klaaine “enclave”
vörmt mit zien Stroatsaksisch. Johan
Remkes (Binnenlandse Zoaken, doar
valen we aal onder omreden t eerdgas
nog nait op is) holdt boot of en nou willen
bobo’s in t streektoalgebied n verzuik
richten aan Twijde Koamer. Of dij t minder
drok hemmen din ministers? Vaalt te
betwiefeln, mor nait schoten is aaltied mis.
In 1996 wör t Nedersaksisch deur regeren
erkend as “minderheidstaal”. Dat
betaikende promootsie oet t verdomhoukje
noar twijde devizie van t Europees
Handvest. Bobo’s binnen nou verplicht om
streektoal te beholden, nou ja, ze mouten t
in elks geval perbaaiern. En de
gebroekers maggen nait diskrimmeneerd
worden. Nou is der ook n éérste
Handvestdevizie, doar zit in Nederland
allenneg mor t Vrais in. Grunnegers willen
noatuurlek nóg n moal promeveren, zai
binnen nait minder ja, en Drenten en
Twenten helpen heur doarmit. Doar zit nou
krekt de kneep. Deputeerde Hans
Gerritsen, dij veur Grunnen
aanvoerdersbaand om zien aarm het,
vindt dat t Grunnens nou al zo staark is,
meer din eerstedevizieweerdeg. Mor
Remkes leuft doar gain barst van. Hai tou
Grunnen oet en din zol t mit t Grunnens
veul beter goan din veurheer? Bestaait ja
nait. Nee, t Grunnens mout eerst mit kop
en scholders in twaide devizie der
bovenoet steken en din kieken we mit Sint
Juttemis wel ains weer. En doar gait onze
liberoale Johan, al weer n bok schaiten in
Twijde Koamer, wat het dij man t drok.
Me dunkt, wie mouten zulf mor ains wat
meer aan de bak mit ons Grunnegers. Op
dij noam van t stadion bievöbbeld,
Euroborg, kinnen vanzulfs zunder muite
twij stippen, oftewel twij voetbaaltjes. Henk
Bartelds op Knoal kin deuzen vol
plakploatjes drokken mit “Remkes, komt
der nog wat van?” en “Remkes, steek kop
boven t wotter”. n Aksie mit haite
stroombraifkes noar Binnenlandse Zoaken
zit ook in de piepliene. Wat ook goud
meugelk is dat we koppen bie mekoar
steken en mit n aksietraain noar Den Hoag
soezen, dij superbus van Ockels ridt ja
nog nait. In traain moaken we der n
gezellege boudel van, t woord gezelleg
verstaait elkenain. (Wia Buze achter de
tap, Jungle Warriors van Jan Kuper in
veurste woagen, Deputeerde Hans
Gerritsen mit zien saksefoon of mondörgel
as begelaaidend koartjesknipper,
Groenbroek en Engels mit Boukenkist
achterin, doar is wel wat van te moaken).
Veur JP nemen we n poar ekstroa kratten
Bavaria mit, spandouk derbie: “In Grunnen
mout meer kinnen/kennen/kunnen” en op
noar t Binnenhof. Ik heb der wel
vertraauwen in, kampioen binnen we al
laank mit onze 39 punten, wie haren van
de regeren der mor 35 vanneudens. En
aans mout onze joker Simon Reker nog
mor ains op batterij kommen. t
Grunnegers gait Europa in, wis en
woarachteg. En wie willen betere arbiters,
en eernse bobo’s, dal maaljoagen mout
nou mor ains doan wezen. Kom op,
Grunnen(s), loat die nait kennen, wel
érkennen!