Opkrikken
n Dikke pluum veur Deputeerde Hans Gerritsen dij in het Dagblad van het Noorden (21 juni 2007, zummer begunt staark op streektoalgebied) zien gale spijt over t oetblieven van de “Europese status” veur t Nedersaksisch. Woarom wordt t Nedersaksisch nait opkrikt, zodat der Europees geld beschikboar komt? Doar kinnen dij politiekers ook nait genog op tamboeren, k heb t aal voaker zegd. Doodmui wor je dervan, en vergreld. Moaken dij Balkenende-huurlingen 100 doagen goie sier midden maank t gewone volk, mor eerlieks verstoán wat der leeft? Dat doun ze nait en asmits denk ik dat ze dat ook nait willen. Het Grunnegers, mor ook het Drents, het Twents en het Achterhoeks hemmen n knovvel in de rogge van neuden. Van Europa mag t, mor de kabbenetten tot nog tou binnen krekt zo grienderg as Scrooge in zien slechtste doagen. Aalweg drutjen, omhakkeln, nait even steveg deurpakken, dat gait je op den duur doch op de zenen waarken. Nou mout stoatssikketoares Bijleveld weer bieproat worden en dat zel ook wel weer van olden tot kolden duren. Mor Hans Gerritsen let nait lös, hai gait der op of. Streektoalen binnen “in”, n baarg volk, wie ook, hebben doar n beste kloet
“identiteit” in zitten, of hoalen dat doaroet, oet dij streektoal. Kiek mor noar aal dij streeksoops met as bovenstebeste Finkers zien “Van jonge leu en oale groond”. “Boven wotter” zit der aan te kommen, de vaalse schoamte verswindt. Aner kaante van medalje: maiste jongelu hemmen nait veul mit streektoal, dij bescharreln heur zoaken en zoakjes mit Engels of sms-toal en veur schouleksoamen doun ze t hoogstneudege aan ABN. Din stait de streektoal in schare of op de tocht, liekt der van ons kulturele aarfgoud bie lutjenaan nait veul over te blieven. Pervinzies doun wat ze kìnnen, mor vuilen zok in steek loaten deur Den Hoag. Dat mout doch aans kìnnen? Kom op, lu! Moak dij ploug van Balkenende dudelk dat der nou, loaten we zeggen veur t ènne van zummer, promootsie kommen mout veur t Nedersaksisch. Roadsleden kìnnen doarover binnen heur aigen gemainte en binnen heur aigen pertij aan belle trekken. Pervinzioale Stoaten doun der nog wat bie en loaten Hans Gerritsen nait as n mislukte Don Quichot aanklooien in t Hoagse “Armageddon”. Schiere toak veur Hans Alders, ducht mie, veurdat e van t Grunneger podium stapt: “upgrading” van de streektoal (joa asmits mout je der n vrumd woord tegenaan smieten, al is t mor oet grammieterghaaid), kop der veur! Der op of, geef ze mor apmoal n spaigelploat van Lianne Abeln, loat ze Alex Vissering zien “Geluk is nait te koop veur n appel en n aai” mor heuren! of e, willen dij bobo’s dat hailemoal nait? Hemmen ze nou al zat mondege mìnsen dij zok van t ABN bedainen? Huiven doar gain loze streektoalers bie? Gruit t ze nou aal boven de kop? Loaten ze dat dìn eerlieks zeggen dan kinnen we doar nog wat over aggewaaiern. Aal dij mooiproaterij, wat koop we doarveur. Kom kabbenet, loat Hans Gerritsen nait laanger in dij woestijn rondwoaren. Hoogste tied veur n hogere stoatus! Europa, pak t knipke der alvast mor bie!
