Een grote verzameling typisch Groningse recepten in het Gronings

Wat mout der in:

Twijenhaalf onze meelkoekjes, twinteg gram sukkeloapoeier, twijenhaalf onze botter, twij hounderaaier, twij onze widde basterd sukker.

Hou mout je t doun:

Kwengel de aaier, de sukker en de sukkeloapoeier deur n ander hén tot n smeuig gehail.
Breek alvast de meelkoekjes in leutje stukjes van omenbie n sentimeter.
Loat de botter langzoam smelten in n pannegie, moar t mag nait broen worden.
Dou de botter en de koekjes deur de sukkeloaboudel hén en moak der n mooi gehail van.
Dou nou de haile brut in n keekvörm en loat dat twij uur opstieven in koelkaaste.
Joen arretjeskeek is kloar veur konsumsie.

As tip; eet der nait te veul van, omreden t is verrekte machteg.

Instuurd deur Cor Uildriks oet Sapmeer.

Wat mout der in:

Vaaier onze rezienen, twijenhaalf onze suker, n kwart onze piepknail, n kan brandewien.

Hou mout je t doun:

Rezienen ofwasken mit laauw wotter (anders schrikken ze zuk dood).
Dou de rezienen in n pot en gait der zoveul wotter op dat ze net koppie onder goan.
Loat boudel zo eerst n etmoal stoan te waiken.
Zet pot op t vuur en breng boudel kaalmaan aan de kook.
As t kookt vot van t vuur ofhoalen en stoadegaan ofkoulen loaten.
Krieg n weckflezze van zowat twij kan en gait inhold van de pot derin, dou de suker en t piepknail der biein en gait den de brandewien der op.
Zet weckflezze goud ofsloten op n duuster stee en loat hom doar teminsten twij moand stoan, aalgedureg boudel n moal omreuren.

Wat mout der in: (veur 4 man)

Twijenhaalf onze widde bonen, twij pond sniebonen oet t zolt, twij onze deurregen rookspek, twaalf onze schilde eerappels in stukken sneden, rookworst, peper en zolt (zoveul as je lieden kennen).

Hou mout je t doun:

Zet de widde bonen n etmoal in de waike en kook ze in t waikwotter goar.
Dou de sniebonen in kokend wotter en kook ze n ketaaier. Gait ze of, as ze nog te zolt binnen dou je t nog n moal.
Dou t spek in n pot, mit eerappels der bovenop, dou t kooknat van de widde bonen der bie en nog wat wotter.
Leg de sniebonen en de rookworst op eerappels, kook haile boudel in n haalf uur goar.
Hoal worst en spek weer oet de pot, stamp bonen deur eerappels en loat ze mitwaarmen.
Moak stamppot op smoak (joen smoak) mit peper en zolt. Snie worst en spek in plakken en dain de nijjoarsstamppot op.

Wat mout der in:

Veur vaaier personen:
n Kilo grode widde dreugde bonen, 375 gram spekreepkes, 250 gram bodder of margarine, n beetje zolt.

Hou mout je t doun:

Je hemmen van dij dreugde grode widde bonen neudeg. Vrouger haren mien grootolluu pronkebonen op toen. Dij hongen ze din te dreugen op beune. Als ze der an tou haren werden ze dopt en den haren je dreugde widde bonen.
Mor tegenwoordeg hemmen je dat nait zoveul meer. Je kennen ook wel van dij bonen bie n gruintewinkel kopen. Dat binnen volgens mie gain echte pronkebonen, ze smoaken even aans, moar t is liekewel hail lekker.
Dij bonen binnen vanzulf hard. Joe motten ze wel n dag laank (24 uur) in wotter waiken loaten. En annerdoags motten ze nog wel twij uur koken. Ze motten den haildaal ien t wotter stoan.
Wie eten ze aaltied mit smolten botter en wat zolt der overhén. Mien vraauw bakt ter din wat reepkes spek bie moar dat huft nait.
Bie ons lussen ze t nait apmoal moar ik vien t ieslijk lekker.

Instuurd deur: Wim Vogel.

Wat mout der in:

Dreuge bonen, speklappen en vrizze worst.

Hou mouten je t doun:

Wie eten onze dreuge bonen zunder eerappels, mor wel mit vrizze worst en speklappen, dail bakken, dail kookt.
Hail simpel. Dreuge bonen n dag in de waike. Din minimoal drij uur of langer zachies koken. Intied vrizze worst bakken of koken, wat ie mor lekker vinden. Speklappen kinnen n uur veur t ende bie de bonen en n haalf uur veur t ende de rest bakken. Bonen òfgaiten, en speklappen mit worst der bie vlijen. Beetje zolt over de kookte lappies en…smullen mor!

Instuurd deur Roelie Maaijer oet Vledderveen.

Veur vaaier man (minder as t dikke eters binnen).
Euliekouken

Wat mout der in:

n Pond bloum, n puutje dreugde gèst, n tuutaai, n haalf kan koumelk, twij teelepels zolt, n onze rezienen, n onze krìnten, drij eetlepels fienmoakte sekoade, n appel.

Hou mout je t doun:

Loat rezienen en krìnten even wellen in n komme mit laauw wotter.
Loat ze den goud oetlekken.
Schil de appel, boor t klokhoes der oet en hoal hom over n grovve raspe.
Dou de bloum in n komme en ruirer de gèst der deur.
Moak in t midden n koeltje en breek hier de tuutaai in.
Moak de melk haandwaarm en gait t in t koeltje.
Dou t zolt der bie.
Begun in t midden mit kloppen (mag ook mit mikser) en waark noar de boetenkaant tou,
Schep de rezienen, krìnten, sekoade en raspde appel deur t beslag.
Deurgoan tot je n mooi glad beslag hebben.
Dou n schone slovve teedouk over de komme.
Zet komme op n waarm stee (bie kaggel).
Loat t beslag op zien minst n uur riezen, t wordt zowat n moal zoveul.
Moak de eulie zo hait dat damp er òf slagt.
Mit twij, in eulie dompelde, lepels (ijsschepke kin ook) ballechies van t beslag moaken en in de haite eulie glieden loaten.
As euliekouken zuch nait vanzulf keren den mout je ze noa drij menuten even helpen, loat ze den aan aander kaant nog twij menuten bakken.
Hoal de euliekouken mit n schoemspoan oet paan en loat ze oetlekken op kraant (keukenpampier mag ook).

Dou der wat poedersukker bie. Lekker man!

Wat mout der in:

n Pond swienelever, twij dikke siepels, twijenhaalf onze podstoulen (sjampions), n haalve paprika, 5 kookte eerappels, drij onze rookspekkies.

Hou mout je t doun:

De lever in blokjes snieden,
De podstoulen, paprika en de siepels snibbeln (nait al te fien),
Dou nou n beetje broadbotter in de pane en as t hait is dou den de lever en t snibbelde gruinvouer mit de rookspekjes der in, even goud omscheppen zodat t haile spul goud aanbakt.
Den op n moateg vuur mit regelmoat omscheppen, in omenbie twinteg menuten goar bakken.
In tied kin je van de eerappels schiefkes snieden en mit n beetje botter opbakken zodat der n mooi broen körske aan komt.
As alles kloar is verdailen ie t in aale eerliekshaid over twij borden en kinje eten.
n Beetje toavelzoer zoas Aamsterdamse siepeltjes of augurken is der lekker bie.
Ie kinnen ook koulever broeken moar dat is körreleger.

Instuurd deur: Cor Uildriks oet Sapmeer.

Wat mout der in:

5 onze roggen meel, n onze broene sukker, 1 teelepel knail, 2 teelepels bakpoeier, 1 teelepel gemengde kruden, n onze gember (fien hakt), n pond stroop.

Hou mout je t doun:

Dou aal de dreuge boudel biemekoar ook de gember en even goud omreuren,
dou den de stroop der bie en n beetje wotter zodat t ain klefferege baale wordt.
Op 150 °C in oven bakken, omenbie anderhaalf uur laank.
Lekker eten!.

Instuurd deur: Albert Pinkster oet Inverloch Vic. Austroalië

Wat mout der in:

Graauw aarten en spek in dobbeltjes. Houveul te meer aarten houveul te meer spek zeg ik mor.

Hou mout je t doun:

De aarten kinje dreugt kopen, den mouten ze eerst ain nacht in de waike zet worden veurdat ze kookt worden kinnen.
Ikzulf bin aan t waark en neem maisttieds aarten uut n pot hôr!
De spekdobbeltjes lekker stoadegaan uutbakken totdat ze knapperg binnen.
Ondertied de aarten koken.
Dén: de aarten op n bord en n slaif glìndhaite dobbeltjes spek der over. Veur t gezond kinnen ie der ja nog n beetje sloa bie moaken…!

Instuurd deur: Fieneke Venema oet Adelebsen-Loedingsen, Duutslaand.

Cor Uildriks oet Sapmeer stuurde nog n aanvullen op dit resept:
"Bie ons thoes deden wie der ook altied nog wat snibbelde raauwe siepels en n schepke Grunneger mosterd deur en din kreeg we der Amsterdamse siepeltjes bie, ie waiten wel van die geeln.
Zug der vot al weer hail aans oet, nait den?"

Veur 12 mìnzen

Wat mout der in:

8 kan woater, 16 soepsapblokjes (bouillon), 12 nussies mie, 1 pond hakvlais (mag haalf om haalf), 2 wörrels, 1 lutje bloumkool, 1 grode stroeke brokkelie, 1 bösseltje veurjoarsiepel, 3 papriekoa; rood, geel, gruin, 12 aaier.

Hou mout je t doun:

Kook t woater in n roeme panne.
Lös de blokkies op in t haite woater.
Kniep de nussies mie fien boven de panne.
Draai lutje ballechies van t hakvlais.
Dou de ballechies aine veur aine in t haite woater.
Snie de wörrels in de lengte deur, snie ze din in plakkies.
Dou de plakkies in t haite woater. Reur t goud um.
Snie de rooskes van de bloemkool en de brokkelie lös.
Moak lutje rooskes. Dou de rooskes in t haite woater. Reur t goud um.
Was de siepel en de papriekoa.
Snibbel de siepel en de papriekoa, moar nait te fien.
Dou de snibbels in t haite woater. Reur t goud um.
Breek de aaier in n komme, moar loat de deudels hail.
Dou de helfte van de deudels veurzichies mit n lepel in t haite woater.
Klop de rest van de aaier mit n vörke schoemeg.
Gait de aaier in n dunne stroal in t haite woater.
Hol de komme hoog boven de panne.
Deur de zwoartekracht krigst zo n dunne stroal.
Deur de hette wort t aai vot haard en krigst flistertjes.
Dou vaaier eetlepels Grönneger mosterd deur de soep.
Loat de soep nog twij menuten stoan en t is kloar.
(Lepel mot dr in stoan kunnen)

Varioatsies:

Dou dr veur elke kan woater twij gram kerriepoeder deur.Wel eerst oplözzen in n poar lepels hait soepsap.Gien hakvlais, moar houndervlais. Kanst ook eerst marineren in mosterd of kerriebrudje. 

Dit resept, moar din in t Nederlaans, motten de jongen van de daarde klaze moaken, as ze de richten horeca kozen hebben op de Praktijkschool in Hoorn, Noord Hollaand, woar ik lesgeef. Eerst moal dat ze t muiken zee n kollegoa; “t Zug der nait uut, moar t smoakt best!”

Instuurd deur: Jos Lange oet Grootebroek, Noord-Hollaand.

Wat mout der in:

n Kan donker bier, n stukje piepknail, drij kruudnoagels, n stukje citrounschille, twij hounderaaier (koamerwaarm), ain en n kwart onze basterdsuker (lichtbroene) en ain moatje brandewien.

Hou mout je t doun:

Loat t bier mit t knail, kruudnoagels en citrounschille tien menuten uterst zachies trekken tot dat t goud hait is. t Mag nait koken!
Klop de aaier lös mit de suker tot dat ze schoemen.
Gait t bier deur n zeeve der stoadegaan aan bie terwiel je aalmedeur kloppen.
Zet haile brut op n lutje vlam en loat t goud hait worden, aalmedeur reuren blieven tot dat t n beetje begunt te binden.
Dou den de brandewien der bie in.
Opdainen in veurverwaarmde mokken.

Loat joe t goud smoaken, mor drink mit moate. Nait mit n moate!

Wat mout der in:

Drijenhaalf onze zulfriezend bakmeel, twijenhaalf onze broene basterdsuker, ain eetlepel koukkruden, n beetje zolt, ain theelepel knail, twij hounderaaier, n onze snipperde sekoade. (koukkruden: n mengsel van gember, knail, kardamom en koriander)

Hou mout je t doun:

Dou zulfriezend bakmeel deur n zeeve in n komme.
Den de broene suker derbie.
Streu de koukkruden, t zolt en de knail deroverhèn.
Moak n koeltje der in (in t midden liekt op t schierste).
Breek de aaier, dou de inhold in t koeltje.
Dou der twij moatjes wotter bie en reur de boudel zolaank dat t glad is.
Reur den de sekoade der deurhèn.
Dou haile brud in n keekvörm dij je eerst even invet hebben.
Intied hejje joen oven al veurwaarm doan op honderdzesteg groaden.
Zet t spul der anderhaalf uur in.
Kiek veurzichteg hou t worden is (hait!).

Toustuurd deur: Thijs Eerkes, Oakville, Ontario, Canada

n Dokter in Amerikoa (Neal Barnard) zegt dat Grunneger Kruudkouke goud is tegen RSI (moesaarm), ie kennen hom leuven of nait mor eet veur aal wizzeghaid mor wat voaker Grunneger Kruudkouke.

Wat mout der in:

Twij hounderaaier, vief theelepels zolt, n pond tarwebloum, n kan koumelk (eerst deur teemze), drij onze krinten, n kloet botter.

Hou mout je t doun:

Aaier löskloppen (eerst breken).
In n komme beslag moaken van aaier, zolt, bloum en melk.
Krinten wassen, oetlekken loaten en deur t beslag doun.
n Kloetje botter in pankoukspaane smelten loaten, beetje beslag der in scheppen (as je dikke pankouken hebben willen n beetje meer) en pankouk aan baide kanten goar en goldbroen bakken.

Perbaaier t ook ais mit sikkemelk (nait doun as je al eelsk binnen).

Wat mout der in:

Netzoveul zuide appels (vrizze of dreugde appels, net wat je hebben) as eerappels, n vrizze worst en n stôkje rookspek.

Hou mout je t doun:

Eerappels en de vrizze appels schillen, klokhoes der oet hoalen en in plakjes snieden.
Krieg n pot mit roem wotter en n leutje beetje zolt.
Eerst de eerappels der in, den t spek en de worst, doar boven op de zuide appels.
Koken loaten tot alles goar is, t spek en de worst der oet zuiken en de rest ofgaiten in n gatjepaan.
Even opstomen en deur n ander hén stampen (der binnen ook luu dij der nog n beetje stroop deurdoun moar dat huift nait).
Lekker eten mit de worst en t spek der bie.
En den waarme soepenbrij mit stroop der achteraan om de goatjes te vullen.

Instuurd deur: Cor Uildriks oet Sapmeer.

Wat mout der in:

n Pond bloum, 20 gram gist, 10 gram zolt, 10 gram witte basterdsuker, 5 gram margerine, 1 tabletje vitemine C (fien moaken), twijenkwart moatje wotter.

Hou mout je t doun:

Moak deeg van t hail spul en zörg dat t goud deurkneed is.
10 minuten rusten loaten en den t deeg oetrollen in plakken van n sentimeter dik.
Van dij plakken rondjes drukken mit n deksel of zukswat.
Den 2 plakken op mekoar leggen op n spiekerplaanke.
Nog even n ketaaier riesen loaten.
Den in veurverwaarmde oven op 220 °C.
10 minuten bakken.
Kloar is Kees… of Kloas…

Zai worden ook wel scheepsbeschuten nuimt.

Instuurd deur: Dick Snoakenbörg, vrouger Olle Pekel nou in Thoiland

Veur vaaier man.

Wat mout der in:

n Stuk of zes kookde eerappels, twij dikke siepels, n paprikoa, n bakje podstoulen (champions), beetje koumelk, kloetje botter of margerine, neutmeskoat, anderhaalf pond haalf om haalf gehakt, gehaktkruden, paneermeel.

Hou mout je t doun:

De gruintes mout je mooi fien snibbeln en bakken in pankoukspaan mit t gekruude gehakt.
t Gehakt mout je even wat rullen aans wordt t ain haile groode gehaktbaale.
Veur dij stovvels dij t nait moaken kinnen: eerappels stampen mit n beetje botter zolt en neutmeskoat,
ast te dreuge is n beetje koumelk der bie totdat je der n mooi smeu prutje van hebben
Den krieg je n vuurvaste ovenschoal en dij mout je even invetten.
Ondertied zetten ie de oven op 180 groaden.
Begunnen mit n loagje van t gebakken gehakt onderin de schoal,
den n loagje lamsloagen eerappels, den weer gehakt en zo wieder
Ie mouten der om dinken dat je as leste n loagje lamsloagen eerappels kriegen,
den streuden je der n dun loagje paneermeel op en hier en doar n leutje kloetje botter.
Den schoeven ie t hail spul in de oven en loaten t der omenbie n ketaaier of twinteg minuten in stoan.
Wel even in de goaten hollen, omreden ast te haard gaait den mouten ie de temperatuur n beet leger zetten.
As der n lekker broen körske op zit (nait swaart), vot op toavel. Kiek oet, tis hait.

Wie kregen der vrouger voak sloat bie in n bakje mit broen sukker en edik.
Dit gerecht hait jachtschuddel omreden t voak eten wuir op nij-joarsdag, oljoarsdag was der voak n driefjacht west.

Instuurd deur: Cor Uildriks oet Sapmeer.

Wat mout der in:

2,5 onze waaitmeel, 2,5 onze boukwaaitmeel, 40 gram vrizze gèst, 4 moatjes laauwe melk, 2 tuutaaier, 2 eetlepels stroop.

Hou mout je t doun:

De gèst oplózzen in n beetje laauwe melk.
Aaier löskloppen.
Baaide soorten meel in n kom doun en in t midden n koeltje moaken.
Doar doun wie den de gèst, aaier, snoefke zolt en de stroop in.
Ales goud deur n kander moaken en n uurtje votzettenn mit n slovve douk der over op n waarm stee.
Doarnoa nog evenpies goud deur n ander kneden.
Stop de haile brut nou in n slovve ketoenen puut dij an binnenkaant mit bloum bestreud is.
Dichtknuppen, mor wel n beetje roemte overloaten veur t noariezen.
In n grode paan n omkeerd schuddeltje leggen, wotter derin en an kook brengen.
Leg doar de puut mit t deeg in en mit deksel op de paan in 2½ uur zachies goar worden loaten.
De klont oetdampen loaten en in plakken snieden en mit n beste loag botter besmeren.
Doar ken je den nog stroop of broene sukker op doun.

Instuurd deur: Joh. E. G. Ruiter oet Hoaren.

Wat mout der in:

Aanderhaalf moatje wotter, twijenhaalf ons bloum, ain aai, 125 gram botter, 2 ons sukker, n haalve theelepel knail.

Wat mout je hebben:

n Woafeliezer. n Zeef.

Hou mout je t doun:

Moak t wotter waarm, nait koken.
lös de sukker in t wotter op.
loat de botter in t sukkerwoater smelten.
klop t aai lös.
dou de bloum deur de zeef.
Reur t aai, de knail, en t sukkermengsel deur nkander netzolaank dat je n mooi glad deeg kriegen.
Loat boudel n nacht stoan mit n douk der overhén, kiek oet veur kat en hond.

Aanderdoags:

Moak t woafeliezer goud hait. woafeliezer goud invetten.
moak koegeltjes zo groot as n dikke knikker van t deeg.
leg n koegeltje deeg in t midden van t woafeliezer.
woafeliezer stief dichtdrukken.
ain tot twij menuten wachten.
woafeliezer open, kniepertje omdraaien.
dit doun je net zolaank tot kniepertje goud goar en mooi van kleur is.
hoal t kniepertje der veurzichteg oet en leg t vot.

Kiek, tegenswoordeg is t ja nait meer aal doage stamppot broene bonen, dikke ries mit aaier of dreuge bonen mit speklappen vrizze worst. Pizza, nasi en shoarma binnen nou aan de dag ook zoaken worden doar hoast elks wel ais mit te doun krigt. En benoam veur de shoarma of veur bie barbekjoe is onderstoand resept.

De Saus.

Knoflooksaus, dat is ja n makkie,
gewoon wat prutjes in n bakkie.
Aldereerst, majenaize kin t nait zunder,
aans din wordt t wel hail biezunder.
Verdunnen dust nou, nait loater en
din mit melk en wizze nait met wotter.
Din veuraal de bieslook nait vergeten
en perselie, wilst toch smoakelk eten.
Waineg peper en n snuffie zolt
zörgt dat de saus zien smoak behold.
En joa, zolst ja nog vergeten ook,
noamgever van de saus, de knoflook.
t Liekt mie goud om dat ter in te doun
en besloeten met een druppeltje sitroun.
Hol gehaim wast nou moaken doan hest,
t is een old en weerdeg kookrecept.
Op zo’n menaaier laifdevol en lekker kruud
komt d’aander doags de lof dien porieën uut.

Eet ze lekker.

Wat mout der in: (veur zes man)

n Kwart swienekop (in stukken zoagd), anderhalf pond rund- of swienevlais, anderhalf òfstreken eetlepel zolt, ain theelepel peper, n haalve theelepel moalen kruudnoagels, n haalve theelepel neutmuskoat, wat augurkies oet het zuur, edik.

Hou mout je t doun:

Bözzel de swienekop in laauw wotter goud schoon en spoul hom òf.
Dou hom in n paan, mit zoveul wotter dat hai veur de helft onderstaait,
loat hom in aanderhaalf uur goar koken.
Dou t swienevlais der bie en loat hail boudel nog n uur koken.
Hoal t vlais van de bonken en moal t mit t swienevlais in n vlaismeulen fien.
Doe twij kopkes kooknat der bie,
kruden, zolt en augurkies der bie,
goud deurreuren.
As ie t maggen, reur der den nog wat edik deur.
Dou de kopkees in kommechies, òfdekken mit perkementpepier dat ie nat moakt hebben mit edik, gait doar weer wat edik op.
Loat boudel goed kold en stief worden en geef t in dunne plakkies sneden bie t broodeten.

Mit daank aan: P.J. Horst oet Veendam

Wat mout der in:

2 kan wotter, n haalf kan bosbeern sap (oet reformwinkel), 2 puutjes krinten, 2 puutjes rezienen, 4 piepknail, twij haandjes vol görde, 4 onze sukker.

Hou mout je t doun:

Krinten en rezienen wellen loaten.
Zet de twij kan wotter op stel in n pane en moak t aan de kook.
Dou de sukker d'r bie en de piepknail.
Dou de welde krinten en rezienen d'r bie en de görde en loat dai haile brut koken tot t zo'n beetje goar is.
t Leste ketaaier t bosbeern sap der bie in.
Nog even en joen krentjebrij is kloar om te eten.

Instuurd deur: Cor Uildriks oet Sapmeer, der ston bie "Krentjebrij zoals mien moeke t muik."

Wat mout der in:

n Pond kruuddoorns, n half kan melk, vatteg gram waaitmeel, n onze sukker.

Hou mout je t doun:

Kruuddoorns goud wassen en steeltjes der of.
Kook ze mit n beetje wotter tot smots,
din zeven en mit de sukker op smoak moaken en din ofkoulen loaten.
Vaaier moatjes melk aan de kook brengen,
t meel mit de rest van de melk aanmoaken en dat aal ruirende deur de haite melk mengen.
Dit onder of en tou ruiren, zachies tien menuten koken loaten.
Ofkoulen loaten, en din de kruuddoorns der deur.
Op smoak ofmoaken mit nog n beetje sukker.

Instuurd deur Joh. E.G. Ruiter oet Hoaren.

Wat mout der in:

Vaaier dikke hounderaaier, pakje laange vingers, 65 gram sukker, 65 gram kusterd, n kan koumelk, klain snibbeltje sitrounjenever..

Hou mout je t doun:

De hounderaaier mout je schaaiden van de deudel,
den t aaiwit opkloppen totdat je n stieve massa hebben,
dit kin je even votzetten.

Van de kan koumelk dou je n beetje in n komme,
de rest zet je alvast op t stel.
Bie dat beetje koumelk in de komme doun je de sukker en de kusterd en je reuren t goud deur n kander.
Intied dat de koumelk op t stel aan de kook komt krieg je een grode schoale mit rechte kanten,
je zetten rondom in dij schoale laange vingers rechtop.
Den besprengeln je de laange vingers mit sitrounjenever. Intied kookt joen melk ook en doun joe dat mengseltje sukker en kusterd deur de kookende melk.
De pudding onder nou en den reuren even deurkookn loaten,
den de pudding van t vuur pakken en even stoan loaten.
As de pudding wat haandwaarm begunt te worden den dou je der ain (nee gain twij…) eetlepel sitrounjenever deur doarnoa kinje t opsteven aaiwit der deur hén scheppen.
De haile brut gaiten je hail kaalm in de komme mit de laange vingers,
zet je de komme n poar uur in de koulkaaste.

Je kenen dit best n dag veurtied al moaken. As dij lekkere pudding op toavel komt zel mie t nait verboazen dat ze der roezie om moaken wel de komme oetslikken mag.

Instuurd deur: Cor Uildriks oet Sapmeer.

Wat mout je bie de haand hebben:

Schone flezzen

Wat mout der in:

Twij pond eerdjebijen, zeuven moatjes wotter, viefentwinteg gram sitrounzoer (Apthaik), sukker

Hou mout je t doun:

Eerdjebijen wasken en in n kom doun.
Wotter op de eerdjebijen gaiten.
Sitrounzoer derbie doun.
n Etmoal stoan loaten.

De vruchten op n douk doun in n gatjepaan en t sap opvangen in n paan, zunder op de vruchten te drukken!
t Sap meten en per kan (liter) sap, ain kilo sukker nemen.
Dizze zo kold mogelijk oplossen (hail even tiedens goud reuren waarmmoaken).
De flezzen mit limenoadesiroop vullen en ze òfsloeten met n stukje sellofoanpepier.

Instuurd deur: Korrie Reints oet Hengelo (Ov), zai schreef der bie 'Dizze siroop muik mien schoonmoeke altied'.

Wat mout der in:

n Kan koumelk, n beetje zolt, drijenhaalf onze boukwaitenmeel, spekvet, stroop.

Hou mout je t doun:

Breng de melk mit t zolt aan de kook.
Streu t meel derin en loat de brij n haalf uur koken, t vuur nait te hoogop en aalmordeur reuren blieven.
Krieg n slaif en schep de brij in borden, moak in t midden (dat stekt naauw) n koeltje en dou doar wat spekvet in, nog wat stroop derbie en kloar is t loie wief.

Roos Slim oet Hoogezaand schreef ons nog n aanvullen op dit resept:
"Zulf moak ik t altied mit wotter i.p.v. melk. Ik loat t ook zeker gain half uur opstoan. Meel deur t haite water reuren en op n bord scheppen, t mout zo vast wezen dat je der n 'baargie' van moaken kinnen woar je n koeltje in moaken veur de (smolten) botter en dan gele basterd suker of stroop derbie."

Wat mout der in:

Drij pond morellen, n kan brandewien, drijenhaalf onze sukker, n stokje piepknail.

Hou mout je t doun:

De morellen wassen, steeltjes der of en goud ofdreugen.
Dou ze soamen met t piepknail in n weckfles of zokswat en gait de brandewien der bie.
Zes week op n waarm donker stee votzetten.
Bring din n haalf kan wotter an de kook en lös doar de sukker in op, loat t daails inkoken en din ofkoulen.
Din bie t aander spul in de weckfles doun en nog ais drij week stoan loaten, mor nou op n kolle duustere plek.
Grunnegers? n geduldeg volkje!

Instuurd deur: Joh. E.G. Ruiter oet Hoaren.

Wat mout der in: (veur 4 man)

n Haalf onze botter, goud n haalf onze bloum, ain en n kwart moatje room, n kan vleesnat, twij eetlepels Grunneger mosterd.
Mosterdsoep

Hou mout je t doun:

Loat de botter smelten, mor mok t nait zo hait dat t gaait verkleuren.
Dou de bloum derbie in en reur mit n holten lepel (gain waaibomenholt), de boudel deurmekoar.
Zet de roux * op n klaain pitje en loat hom tien menuten goar worren.
Verwaarm t vleesnat, gait dij bie de roux * en reur d haile boudel glad.
Loat boudel tien menuten koken, aalmedeur reuren blieven.
Hoal de soep deur n zeeve en dou de mosterd derbie.
Net veur t opdainen dou je de room derbie.
Loat de soep nou nait meer koken.
Veur de smoak ken je der oetbakken spekkies en praai biedoun.

• Loat joe nait van de wieze brengen deur dij Franse noam zeg mor gewoon 'roe' tegen dizze saus-verdikker. n Roux is mokt van twij zowat gelieke dailen bloum en vet en wordt bie hailwat resepten broekt. As ie zomor wat bloum deur joen soep of saus doun zollen den wordt t algaauw n kloetenboudel.

Wat mout der in:

150 gram zulfriezend bakmeel, 150 gram bloum, 250 gram widde basterd suker, 125 gram botter, twij hounderaaier, n klain beetje zolt (even tussen vingers), beetje vannillesuker.

Hou mout je t doun:

Reur de suker, vanillesuker en aaier deur n kander hén.
Den de botter der deurhén en denk der om dat der gain kloeten in kommen.
Doarnoa de bloum en de bakmeel deur n ander hén zeven.
Dit dou je in n komme en den beetje bie beetje de bottermassa der deurhén kneden, dit dou je net zo laank tot je n mooie deegmassa overholden.
Den dek je t deeg òf met n stok aluminiumfolie ofzo en zet dat den minstens n haile dag in de koelkaaste om tot rust te komen.
As je aan t bakken tou binnen din mout je t deeg nog even weer smui kniepen, den mok je der n rol van en snieden der plakjes van twij centimeter of.
Nou komt t luu, krieg joen olderwetse kniepertjestaang en vet hom in, moak hom hait op t stel, dou der n plakje van t deeg in en kniep hom goud dicht din weer op t stel leggen en in omenbie n minuut aan baide kanten mooi broen bakken.
Nou pak je de stoale van n holten lepel en draai dat waarme kniepertje der om tou, braan joen vingers nait hòr.
Rollechie van de holten lepel ofschoeven en ofkoulen loaten.

As leste nog even n tip: zogauw ze kold binnen mout je ze votstoppen veur de kinder, want aans hebben ie mit old en nij nog gain nij-joarsrollechies op toavel.

Instuurd deur: Cor Uildriks oet Sapmeer.

Wat mout der in:

Vaaier hounderaaier, paprikoa (dou moar n rooie), ain klain siepeltje, tomoatje, n onze rookspekkies, peper, zolt en stoet natuurlijk mit botter en ham.

Hou mout je t doun:

Snie de tomoat, de paprikoa en de siepel klain.
Intied dat ie doar met aan d'loop binnen zetten ie alvast n pankoukspaan mit n kloede botter op t stel.
De sneden gruinte in de paan mit de spekkies en de haile brut mooi broen bakken.
Nou de vaaier hounderaaier der op, wel n beetje kaalm aan, de deutels mouten hail blieven.
Intied smeren joe n beetje botter op de plakjes stoet en den n plakje ham der op.
As de aaier kloar binnen loaten ie d'haile brut veurzichtig oet de panne op joen plakjes stoet glieden.
n Beetje peper en zolt noar smoak der bie doun.
Eet ze.

Instuurd deur: Cor Uildriks oet Sapmeer.

Ollerwetse Avvekoat:

Wat mout der in: Acht vrizze aaier, twij onze sukker, n haalf kan branwien, 2 puutjes vanillesukker.

Hou mout je t doun: Krieg n weckvlezze van n kan. Moak de weckvlezze goud schoon.
Dou de aaier en de sukker en de vanillesukker in n komme en klop dat mit de klopper goud lös.
Goa t mengsel au bain marie (dus joen kom in n aander pan met hait wotter) waarm moaken.
Ondertied aalweg kloppen en beetje bie beetje de branwien der bie doun.
Deur kloppen tot t spul de dikte van vla het.
Dou de haite avvekoat in de weckvlezze, sloet hom goud of en den in de koulkaast.
Nait te laank bewoaren, doar hejje t ja nait veur moakt...

Nijmoodse (en makkelke) Avvekoat:

Wat mout der in: Vaaier aaier, anderhaalf onze sukker, puutje vanillesukker en twij moatjes branwien.

Hou mout je t doun: Dou hail boudel in n komme en klop t goud deur n kanner zodat t n mooie aingoale massa is.
Den twinteg sekonden in de magnetron, even kloppen en weer twinteg sekonden in de magnetron, den weer kloppen.
Nou goan ie zo laank deur dat t spul de goie dikte het.
Den in weckvlezze en in de koulkaast.
Ie waiten nait wat ie pruiven. Net of n engeltje joe over de tonge pist. Zo ollerwets lekker.

Instuurd deur Joh. E.G. Ruiter oet Hoaren.

Wat mout der in:

n Onze waaitmeel, n onze boukwaaitmeel, n tuutaai, twij moatjes melk, n onze krinten en rezienen, n snoefke zolt, n beetje reuzel.

Hou mout je t doun:

Meng t meel met d'aai, snoefke zolt en de melk tot n mooie gladde massa zunder kloeten der in,
dou er din de krenten/rezienen deur.
Smelt de reuzel en vet de vörm doar mit in.
t Haile zwikkie in de vörm.
Zet de povverd in n oven met veul onderwaarmte (veur t deurgoaren) omenbie n uur,
woarvan t leste ketaaier bovenin om broen te worden.

Instuurd deur: John. E.G. Ruiter oet Hoaren.

Wat mout der in:

n Onze dreugde proemen, 3 moatjes thee van normoale staarkte, n haalf onze rezienen, n stokkie piepknail, n eetlepel stroop, n haalve eetlepel botter, eerabbelmeel.
Veur de brij: drijkwart kan melk, n puutje vanillesukker, ain citroun, drijkwart onze papriest, 30 gram sukker, n haalve theelepel knail.

Hou mout je t doun:

Waaik de proemen ain nacht in de thee.
Ruier din de rezienen en t knailstokkie der deur en breng t mit de thee an de kook.
Loat de proemen in 8-10 menuten waik worden zunder dat ze oet n kanner vaaln.
Hoal t stokkie knail der oet, ruier de stroop en de botter der deur en goa t nat binden mit t eerabbelmeel.
De riezenbrij.
Schil de citroun dun of en breng de schille mit de melk an de kook.
Streu de riest derin en moak t goar.
Hoal de schille der oet en ruier de knail mit de sukker der deur.

Instuurd deur: Joh. E. G. Ruiter oet Hoaren.

Wat mout der in: (veur vaaier man)

n Pond pronkebonen, twij pond hamschieven, n pond praai, twij dikke siepels, n vrizze worst, zeuven maggiblokjes, twij ons papriest.

Hou mout je t doun:

Pronkebonen n nacht waiken loaten in n paan schoon wotter.
Moak praai en siepels schoon.
Snie praai in stukken.
Snie siepels in schiefkes.
Dou siepels en praai bie de bonen in paan.
Hamschieven en maggiblokjes der bie in.
Goud reuren!
De riest der bie in.
Weer goud reuren!
Vaaier uur zachies koken loaten, wel aalgedureg reuren aans gaait t mis mit de riest!
Leste twinteg menuten de vrizze worst der bie in koken.
Net veur t eten de worst der even oethoalen en in plakkies snieden, den der weer bie in doun.

Wat mout der in: (veur 4 man)

Drij onze dreugde appeltjes, vaaier pond eerappels, vaaier onze vrizze worst, anderhaalf onze botter, n eetlepel stroop, zwaarte peper, zolt (as ie gain zolt hebben maggen den nait).

Hou mout je t doun:

De dreugde appeltjes wassen en n nacht onder wotter waiken loaten.
Eerappels schillen en in plakken snieden.
Dou appeltjes mit t waikwotter in n pot, dou eerappels en vrizze worst der bie, loat hail boudel goar worden.
Hoal de worst oet de pot en gait t wotter der of, t wotter nait weggooien!
Krieg de stamper en stamp eerappels en appeltjes fien en moak t smui mit wat van t wotter dat wie net opbaargt hadden.
Dou stroop der bie en moak t op smoak mit zwaarte peper en zolt.
Snie de worst in plakken en leg de plakken op de stamppot.

Veur vaaier man.

Wat mout der in:

Anderhaalf onze boukwaitenmeel, n kan melk, stroop en botter of reuzel.

Hou mout je t doun:

Breng de melk aan de kook,
streu den t boukwaitenmeel der in
Aalmordeur reuren, n ketaaier koken loaten.

Elk dut noar aigen smoak stroop en botter of reuzel in n koeltje in de pap.

Dit resept is veur omenbie 140 spekdikken.

Wat mout der in:

n pond snelkookriest (8min.)
twij pond bloum
twijenhaalf onze botter
n pond gele basterdsukker
n pond stroop
twij puutjes vanille sukker
snoefke zolt
zes aaier
acht dreuge worsten
twij pond vet spek.

Hou mout je t doun:

Eerst de riest goar koken,
as de riest nog laauw waarm is, de botter en de stroop der deur doun.
Den de vanille sukker en de basterdsukker der goud deurreuren.
Doarnoa de aaier en de bloum.
Verdunnen met laauw wotter tot t zo dik is als joggurt.
t Iezer invetten, spek en worst der inleggen, den t beslag der opgaiten.
Kaalm aan bakken, aans worden ze nait goar.

Instuurd deur: Vrouw Frikken.

Nog n resept veur Spekkedikken.

Veur vaaier man.

Wat mout der in:

Twij tot vaaier noavelappelsienen, ain rooie siepel, drij tot vief eetlepels euliefeulie, ain eetlepel edik, wat peper en zolt oet meulen, twij eetlepels sloatdeurmekaanderhen van pienboompitten of aander pitten, n haalve theelepel rozemarijn vienhakt, ain theelepel vienhakte munt, ain theelepel hunneg en noar wensk swaarde olieven.

Hou mout je t doun:

De rooie siepel ien dunne ringen snieden,
ien n bakje de eulie, edik en wat peper mengeln,
de siepelringen der bie doun.
Dit n poar uur of laanger stoan loaten,
den de appelsienen ien plakjes snieden,
(gait haail makliek, kapke van onner en bovenkaant ofsnieden, den rechtopzetten en van boven nooar ondern schillen, wit mitnemen, schaarp meske bruken)
De sloatmiks of pienboompitten op n leeg vuur kleuren tot t lekker roekt,
den over de appelsienen streuen.
Siepels mit eulie en edik en aal t aander spul mengen mit de appelsienen.

Lekker bie opbakte eerappels.

Instuurd deur: Roel Steenhuis.

Veur vaaier man.

Wat mout der in:

n Pond borstlappen, n pond pelde en in ringen sneden siepels, n pond rooie kool (fiensneden), zes onze botter, zes kruudnoagels, drij laurierbloadjes, twij eetlepels edik, zes gram suker, vief onze koatenspek in plakjes, peper, zolt, maizena, stip (*).

Hou mout je t doun:

De borstlappen in klaine stukjes snieden en kruden mit peper en zolt
Botter smelten in n grode paan
As de botter broen is den de stukjes borstlap broenbakken
As t vlaais broen is de siepels der bie in
As de siepels gloazeg worden der zoveul stip biedoun dat hail brut der net onder staait
De edik en de suker der biedoun en goud omreuren
De kruudnoagels en laurierbloadjes der biedoun
Mit t deksel op paan twijenhaalf uur zachies pruddeln loaten
Hoal de kruudnoagels en laurierbloadjes der oet
Snie t koatenspek fien en dou dij der bie
Loat t hail spul nog n haalf uur pruddeln
Dou de rooiekool der bie in
As kool goar is den ken der nog wat maizena bie om boudel te binden (kiek oet veur klonten!)

Ie kennen t eten mit eerappels of eerappelprut.
As ie t wat schaarper hebben willen, den kenje ook wat sambal deur de botter bakken veur dat ie t vlaais der in doun of veur t opdaainen der wat tabasco over kwengeln.

(*) As ie gain stip hebben, den ken t ook mit stip oet n puutje.

Wat mout der in:

n Kan jonge jenever, twij sitrounen, twij ons klontjesukker (gruus).

Hou mout je t doun:

Schil de sitrounen haile dun, dus zunder t wit.
Dou de schille in n stopflezze, mit de sukker en de jenever.
Loat dat drij week op n kôld en duuster stee stoan.
Noa dij drij week eefkes goud deurruiern om de leste sukker op te lözzen.

Instuurd deur: Joh. E. G. Ruiter oet Hoaren.

Wat mout der in:

n Pond splitaarten, n stukje rookt spek, twij vrizze worsten, n pond speklapkes, n dikke praai, 3 dikke siepels.

Hou mout je t doun:

Zet n grode pot op t stel en dou der wotter in.
Intied dat t wotter aan de kook komt goan ie de praai en de siepels snieden, nait te klain, aans vinnen ie der niks van weer.
Intied snieden ie de speklapkes en t stukje rookspek in stukjes en doun ze mit de vrizze worsten ook in de pot.
Loat dat koken en dou noa omenbie n uur de splitaarten der bie.
Loat alles koken totdat ie vinden dat de snert kloar is.
As t deur de worsten en t spek nog nait zolt genogt is kinnen ie der nog n beetje zolt biedoun.

De pot op toavel, mit n poar snee roggenbrood der bie woar t spek op kin, en eet ze.

p.s. Vrouger deden ze der ook wel n swieneknij of swieneoren of swienesteert in, dit heb ik vervangen deur spek omreden de nijmoodse Grunnegers dij liekt dat moar niks.

Instuurd deur: Cor Uildriks oet Sapmeer.

Wat mout der in:

n Pond roggenmeel, n pond waitenmeel, 3 aaier, 2 onze broene suker, 1 onze stroop, wat zolt, n lepel moalen anies, 2 onze rookte spek, anderhaalf onze dreuge worst, omenbie 8 moatjes wotter.

Hou mout je t doun:

Alles deur mekoar hén reuren, behaalve spek en worst.
Din mit t wotter mengen tot n dik pankoukbeslag.
t Iezer goud invetten, 2 plakjes spek en 2 plakjes worst der inleggen, en hierop t beslag.
Nait te haard bakken, want aans worden ze nait goar.
Eetze.

Instuurd deur: Kitty Buurke-Jansen.

n Resept veur Riest-Spekdikken.

Wat mout der in:

Vaaier onze dreugde bonen (inregen en op zolder, moar gewoon op kraant gaait ook), drij pond eerappels, n vrizze worst, zolt en peper.

Hou mout je t doun:

De bonen eerst n dag veurwaiken,
Wotter aan de kook bringen, din de bonen der in,
Eerappels schillen en in blokjes snieden,
Eerappels koken.
Eerappels en bonen deurnkander stampen (nait te slim).
Zolt en peper noar smoak der bie doun.

Instuurd deur: Jan Niemeijer.

Wat mout der in:

Drij a vaaier pond mous, n beetje zolt (as ie t geern zolt meugen n beetje meer), n onze rookspek, vaaier pond eerappels, drij onze rookworst, anderhaalf moatje kookde melk, zunegaan n onze botter.

Hou mout je t doun:

Mous streupen (haarde naarven deroet hoalen) en ofwasken.
Krieg n pot mit wat kokend wotter dou t zolt en spek derin en de mous.
Loat boudel zo'n beetje twinteg menuten koken.
Intied kenje mooi even eerappels schillen en ofspuilen.
Dou eerappels mit spek en worst onder t mous (zol doar oetdrukken onder t mous stoppen vot kommen?)
Hail boudel goar koken loaten (zowat n haalf uur), nait te veul wotter derop!
Worst en spek oet pot hoalen (dat wordt even zuiken), t kooknat ofgaiten (nait votgaiten) opbaargen.
Wat nog in pot zit deur n kander stampen (mit n stamper) de kookde melk de botter en as t neudeg is wat kooknat der deurreuren.
Worst ofwasken en op t vuur zetten in laauw wotter, t wotter kaalmaan waarmer moaken tot t sikkom kookt, worst der n haalf uur in liggen loaten.
Aanschikken en bikseln.

Volgens vrouw van Stainwiek oet Emmen mout der gort ien de mous om t smui te moaken.

Zuit anies zeupke.

Wat mout der in:

n Kan kloare jenever (t laifst Hooghoudt), viefteg zukerklontjes (of netzoveul gewone widde zuker), sterrechies anies (te kriegen bie n krudenwinkel).

Hou mout je t doun:

Dou de viefteg zukerklontjes (secuur tellen) in n vlezze.
Den dou je der tien tot vieftien aniessterrechies biein.
Gaait vlezze vol mit de kloare jenever.
Loat de vlezze zowat twij weken stoan (langer mag ook), aalgedureg n moal schudden.
Gaait de inhold deur n zeeve (kovviefilterpuutje).
Kloar.

Wat mout der in:

1 kan koumelk, mestipke zolt, n haalf piepke knail, n haalf puutje krinten, stok of vief òlle plakken witstoet, suker.

Hou mout je t doun:

Breng de kan melk langzoam aan de kook mit dat stokje piepknail der bie en t mestipke zolt en de krinten.
Snie ondertied dat olle stoet in stokjes en dou dat ook in de paan, suker noar smoak der bie doun en je kinnen eten.
(zo huif je ook gain òl stoede meer weg te gooien) eet ze!

Instuurd deur: Cor Uildriks oet Sapmeer.

Egbert de Jonge oet Muntendam schreef ons:
As wie vrouger gain vla of yoghert meer hadden, ging wie ook welains 'Beschuutjebrij' (Melkentwijbak) moaken, inploats van stoetjebrij.
Mok n bord melk waarm, dou der ain of twij beschuten in en moak dij klain mit n vörke dou der suker over, n beetje knail eventueel en moar eten.
Wil best veur n moal.

Wat mout der in:

n Kilo eerappels, n pond broene bonen (mag ook oet blik), n pond vet spek, n beetje zolt.

Hou mout je t doun:

Eerappels schillen, op t stel zetten met roem wotter en goar koken.
De broene bonen waarm moaken.
Ondertied t stokje vet spek in plakjes snieden en oetbakken.
De goare eerappels ofgaiten in n gatjepaan en de broene bonen net zo.
Bonen en eerappels stampen en der spekvet deurhén doun om t smui te kriegen,
eventueel n beetje zolt der bie.
Stopvaarve is lekker met oetbakken vet spek en zuit-zoere robaiten.
As t zo dreuge is dajje der in draaigen te stikken din kinje der n beetje koumelk deurdoun.

Instuurd deur: Cor Uildriks oet Sapmeer.

Wat mout der in:

Vaaier onze kipfilet, n pot witte bonen in tomoatensaus, twij zachtzoere appels, twij siepels, twij tomoaten, vaaier gemberbollechies, drij tonen knoflook, twinteg gram zaachte kerrie.

Hou mout je t doun:

De siepels in nait te klaine stokken snieden en even lekker aanbroaden,
den de tude in klaaine stokjes der bie, even kruden en goar bakken.
De tomoaten heur vel oettrekken, (pitten votsmieten), in stokjes snieden net as de appels en even metbakken.
De boontjes der bie en den nog de kerrie, fiensneden gember en gepaarste knoflook.
Loat alles nog n ketaairke suddern.
Ie waiten nait wat ie pruiven, of joe n engeltje over de tonge pist.

Instuurd deur: Joh. E. G. Ruiter oet Hoaren.

Wat mout der in:

n Schiere ol hèn (van leg oaf), twij tot vaaier bouillonblokjes (of vrizze kruden), n kan wotter, n haalf onze botter, zolt.

Hou mout je t doun:

Bring ol hèn met t wotter en de blokjes aan de kook,
goud laank suddern loaten.
as t vlaais van de bonken vaalt, van t vuur ofhoalen,
hèn der oethoalen,
kold worden loaten,
vlaais van de bonkjes hoalen,
van de bouillon kin soep moakt worden,
vlaais in pankoukspanne mit wat botter rusteg 'opsnittern',
Veul eters, din der wat praai en siepels biedeurdoun.
Nijmoods? dou der wat bamikruden bie deur…

Instuurd deur: Hilda Schipper oet Wirdum.

Wat mout der in:

Twijenhaalf moatjes koumelk, acht plakken ôlle stoet,
twij hounderaaier, drij theelepeltjes knail, botter, broene suker.

Hou mout je t doun:

De aaier löskloppen in n komme en de melk en knail der bie doun, alles deur n kander hén reuren.
Pankoukspanne op t stel zetten mit n kloetje botter der in.
De plakken stoet waiken in t beslag en op n kaalm vuur om en om mooi broen bakken.
n Beetje broen suker der op en ze binnen kloar.
Eet ze!

Instuurd deur: Cor Uildriks oet Sapmeer.

Wat mout der in:

60 gram bloum, beetje zolt, n kan zoepen, sukker of stroop.

Hou mout je t doun:

Dou de bloum de zoepen en n snufke zolt op stel en breng de boudel langzoam aan de kook.
As t kookt nog 10 minuten deurkoken loaten en de brij aalmordeur reuren blieven.
As t n beetje lobbeg wordt kenje t eten.
Dou der sukker of stroop noar smoak bie.

Instuurd deur: Cor Uildriks oet Sapmeer.

Wat mout der in:

Twij pond moagere speklappen aan ain stuk, mag ook meer weden. (Ien klaine stukken), n vlezze edik, zolt.

Hou mout je t doun:

Spek n haalf uur tot drij ketaaier koken (t mout nait deur en deur goar weden).
As dat kloar is den ofkoulen loaten.
Ondertied nog n kan wotter aan kook brengen en doar zoveul zolt in doun dat n houderaai lös komt van bodem.
Ook weer ofkoulen loaten, den der zoveul edik bie doun dat het knap zoer is.
n Gloazen vlezze of pot goud schoonmoaken mit hait wotter.
Eerst t spek der ien en den bievullen mit dat pekelwotter.
Twei tot drij week in duuster opbaargen,
en den op n brug of bie boeskool en as ie dat nait lussen smoakt t zo ook wel…

Instuurd deur: G. Heerema oet Gramsbergen.