Verschil
Mit heur klaaier dompeldeurnat van bragel, swait en bier kwam zai weerom van t boerenrockfestival. Dij band oet de Achterhouk beleefde zien swoanenzang en optredens waren n gekkenboudel, Ien t duuster ree zai auto ien gerazie en trok doar heur goud oet. Laifke waarkte ien dainsten en zol al wel op t nust leggen. Zo’n aander leven haren zai ienainen: zai mog nog geern aan de flitter goan en as braandweerman hielp hai mor t laifst minsen oet heur ellèn.
Ien heur onderboksem schoot zai keuken ien, woar t complete braandweercörps de leste oefening deurnam mit n pilske derbie.
