Kreuze……
Vot noa d’oorlog wazzen der waaineg zwemboaden. Jongs en wichter mozzen zok behelpen mit plazzen en graachten. Zo ook in Mewolle –Oldambt-. Swinters was t aans. Iesverainen “Aigen Kracht” lait dìn n groot stok gruin laand vol lopen mit wotter en dìn kon je noar haartelust scheuveln! Bìn joaren lid west, omreden dat der in Scheemde allain op graachten meugelkheden wazzen en as t echt n strenge winter wuir: op t Zieldaip en zukswat. Dìn was t veur mie even noar Meulenstroate en bie stelmoaker Kiewiet de scheuvels onder. Over t daip noar d’iesboane…. Wat wil je meer! Zoas k al zee, zummers, as wie geern zwemmen wollen, dìn was der in de dörpen waaineg veurhanden. Wie muiken dìn n soort staigertje bie n boerengraachte en sprongen doar vanoaf t wotter in. Laggen, gieren, brullen! De ain dee t nog roarder as d’aander en as der n moal n zwemboksem in t wotter achterbleef, was t hailndaal feest! In Mewolle konden ze der ook wat van! Op n mooie zummerdag haar ik fietse pakt en muik n rondje Mewolle/Oostwold. Bie boerderij van Hermans Diekstroa was t n gedounte van jewelste. Wel twinteg jongs wazzen in de grode graachten bie de heereboer aan t doeken en springen, dat t n lust was. Even kieken, docht ik. ‘Moes’, dij bie mie op schoule zat, was der ook.
“Mag k ook mit doun?” “Joa, woarom nait” was zien antwoord. In d’onderboksem der veur! Wat n feest! k Bìn vanzulfs nait meer noar Oostwold goan. Der was n hail fien sprokkelg jonkje bie mit wit hoar…. k Zel hom nooit meer vergeten. ‘Lutje Jampie’, zoas de jongs hom nuimden, kon der gain genogt van kriegen. Hai ston nog nait weer op wale, of hai dook der al weer in. Wat n rad ventje! En elke bod, as e boven kwam, haar e n swaarde snoetje en zien witte hoar zat vol mit eendekreuze! k Heb meer noar hom keken, asda k zulf zwom!
![](https://dideldom.nu/wp-content/uploads/2023/07/afbeelding-131.png)
Aal mit aal zo n viefteg joar leden….. nooit meer wat van hom heurd of zain, totdat k bie hoes kwam (oafkeurd) en oet verveelndeghaid begon mit verhoaltjes schrieven. Via n tip eerst op Dideldom en van doaroet op KreuzeKeuze….. Al hail wat joaren mien stokjes opstuurd noar Jan Blaauw… Soamen mit Henk de Weerd oprichter van KreuzeKeuze….
Op n oavend van de Historiese Verainen Scheemde ston e opains veur mie en stelde zok veur. “Jan Blaauw!” “Van Kreuze?” vruig ik.
“Joa”, zee e en geliek zag ik t jonkje mit zien witte hoar, gruin van de eendekreuze weer veur mie bie de graachte van Diekstroa’s boerderij….
“Komst toch nait van Mewolle?” was mien vroag….. “Joa, doar bin k opgruid!” Soamen mit Henk de Weerd startte hai joaren loater de sait: KREUZE KEUZE!! Touval…….? Dij t wait, mag t zeggen. Jan, bedankt veur dien waark aan datteg mooie Kreuzes! t Gaait die goud…! En veur Bert: veul sukses en plezaaier aan nog ais datteg?