In t spoor van Scheepstroa
Nog nait zo laank leden zag k n foto van olde Scheepstroaschool veurbiekommen. Onmiskenboar n foto oet olde deuze. n Klaain schooltje aan Kaalkwieke, dou Kaalkwiek nog n wieke was.
As k in feberwoarie ’75 in Hoogezaand op Scheepstroaschool/Multatulistroat aan t waark kom, krieg k regelmoateg verhoalen te heuren over de mooie tieden op olde Kaalkwiekster Scheepstroaschool. Dijzulfde kollegoa’s waiten mie te vertellen, datter op t stee van olde school nou n mooi hoes staait.
k Rie der in mien Simcaatje op weg noar Pekel veur oardeghaid n moal langs en trek n zulfde konkluzie.
Tot n dikke weke leden haar k gain beeld van olde Scheepstroaschool en tougelieks besloet ik n kollegoa, dij doar nog n aantal joaren veur klazze stoan het, foto veur te leggen. Zai herkent de school, t hoes datter noast staait – t schoolmeestershoes? – nait. Te oordailen noar t opschrift, is de foto van 1939.
t Is n loate, mor wel n eerste stap op weg noar ontdekken van de echte Scheepstroa, Hindericus Scheepstroa, zeg mor Rieks. Onderwiezer én schriever. t Besef, dat dij man mien schoolleven vanòf dag ain, dou’k bie juf Hulzebos in eerste klazze veuraan in n ongemakkelke twijzitsbank kwam te zitten, veur n belangriek gedailte bepoald het, is aiglieks aaltied slumernd aanwezeg west.
Alsof de duvel der mit speult, krieg in dijzulfde periode n schier filmke veurschuddeld van de reünie van mien legere Geertsschool. 1993, 33 joar leden. t Liekt n aiweghaid en k vroag mie òf, woarom t zo laank duurd het dizze film aan t publiek te vertonen. Of heb ik n eerdere vertonen mist.
Foto en film levern genog vroagtaikens op. Doarom wordt t langsoamaan tied om antwoorden te zuiken op de vroag, hou ik in t spoor van Scheepstroa terechte kommen bin.
k Bin n kind oet de vrouge 50-er joaren. Mit n volledege, twij-joarege oplaaiden aan kleuterschool op Komnijsterwieke, t holten gebaauwtje staait achter VGLO-school van meester Prins op n hoanetree van mien hoes, bin k begun augustus ‘58 der wel aan tou om aan t echte leerperses te begunnen.
Mit de methode Hoogeveen, van t bekìnde holten leesplankje, leer k binnen de körtste keren deur hakken en plakken woorden moaken. Ploatjes op t leesplankje binnen taikend deur Cornelis Jetses en kommen oet de boukjes van Ot en Sien, schreven deur …..Rieks Scheepstroa. Benoam t eerste joar leef k in n mie onbekìnde wereld. Eerste oetgoaves binnen van vlak noa 1900 en behaalve de teksten binnen ook taikens redelk gedateerd. Desondanks leer k snel lezen.
Dat Hindericus Scheepstroa in Roden geboren is, was veur mie n nijloatje. Tiedens zuiktocht noar de bekìnde hoofdpersoon van dit verhoal kom k te waiten, datter in Roder Scheepstroaschool ook nog n Scheepstroa-museum is. k Wor enthousiast. Omreden dat zai allendeg in t weekìnde open binnen, blift de weg noar Roden veurlopeg nog sloten. In ploats doarvan vlaig k over t internet op zuik noar kennis over Scheepstroa. k Vind n mooi filmke mit n komieke presentator, Beno Hofman, dij n eernsachteg verhoal vertelt over soamenwaarken van Scheepstroa en n aander schriever/pedagoog, Jan Ligthart. Dat Ligthart wel ideeën aandroagen het veur leesboukjes, mor dat Rieks Scheepstroa toch de ainegste, echte schriever is van kinderverhoaltjes, moakt indrok. Net as Beno’s opmaarken, dat de echte Ot en Sien in Stad Grunnen woond hebben. Dat heur hoes in ’45 votbombadeerd is, is jammer, dat der in nije flat op t zulfde stee gain klaain herdenkensploatje inmezzeld is, geft te denken.
Sunt drij joar woon k in t prachtege dörp Kiel-Windeweer.
k Bin in mien leven aaltied dicht bie hoes bleven. t Het niks mit tripfobie of haimzaikte te moaken, mor boeten drijhouk Pekel – Veendam – Hoogezaand bin k nooit kommen.
As k tegenswoordeg in mien veurtoentje stoa, zai k hoge windmeulens achter Maiden draaien en òf en tou begunt den ook mien levensverhoal te draaien. Den kiek ik over Kielsterachterweg hìn noar Kaalkwieke en k wait, dat op n poar kilometer noar t noorden d’olde Scheepstroaschool stoan het. Net as op Kaalkwieke is ook Hoogezandster Scheepstroaschool vot en verdwenen. In n groot, goapend gat. k Rie der nog wel ais langs, mor herinnerns kist nait òfbreken.
