Zolde heerns
Wie haren weer Canadezen op verziede.
Ik haar hinter en twinter wat kontrakten veur Rik Barron en Perry Williams regeld en wie bounderden Nederland deur om meziek te moaken.
Zai, Rik, zong en baaident speulden op de gitaar en banjo en ik, ik speulde op mien lutje concertina.
Zo zaten we op n dag middenmaank t volk in Hoorn en Enkhoezen en speulden shanties en seasongs en aander laidjes oet Canada en ‘s oavends zollen we in Emmen weer wat aans doun.
t Belangriekste was dat we mit mekoar n bult pelzaaier hadden.
Rik, groot, braaid n board as n bunzelhond en n grode swaarde bos hoar, kon zuk nog gain twij menuten bedappern en gain vief menuten stil holden en rabbelde aan ain boksem aan deur.
Perry, n iepenkrietje en dunne slinger om de mast, was de rust zulve en haar ook nog slim wìnst noar hoes. Hai was veur eerste moal in Europa, zoas ze dat doar nuimen. Nederland, loat stoan Grunnen wordt aal nait nuimd. Ain ding ging aalgedureg goud en dat was eten. Elk anderhaalf uur mos der eten in dizze jongens. Alderbenaauwst. Hamburgers, patat, pizza der kwam gain ìnd aan. Eten en nog ais eten. Ik haar der toes aal mit verstand noar keken. Ze vraten ons de oren van de kop. Ik en mien Gezientje, wie kwamen sikkom keuken nait meer oet. Mor t zol wezen! En nou stonden we bie n heernkroam. t Was weer tied veur n snack zeden de Canadese boetenlanders. Wie haren wel zin in n heerntje en dìn kon Perry dat ook ais perbaaiern. Rik haar aal eerder kennis moakt mit heerns eten op stroat. Hai kwam oet n old vissersgeslacht , dus hai vrat heerns as n zeekoap. Perry zien ofkomst was beslist nait aine van vissers en dat zol blieken.
Visboer greep in n grode plestiken emmer mit graauwgrieze braggel en viste der n heern oet.
Perry zien aandacht was trokken. Hai stook handen in buuts en keek. Heern kwam op n soeterg holten bredje en de kop ging der of. Der luip wat blouderg wotter omdeel.
Heernkop bleef verbilderd in t ronde kieken mit zien broene dooie oogies. Visboer pakte de rest bie t steertje en huil om op.
Van zien doem en wiesvinger muik e n ringeltje en hai knirsde de heern der deur. De jirre luip hom van de handen of. “Ze binnen weer zo goud van t joar meneer”, zee e tegen Perry. Dij gnees wat en trok n maal gezicht.
Heern kwam weer op t bredje en de groat wuir der oethoald.
De heernkop keek nog aal noar zien aigenste steert.
Nog n keer wuir de heern deur n ringeltje van doem en vinger hoald. “Oh bliksem wacht even, der zit n knizzel in”, sprak visboer opgewekt. Perry nikkopte en ik begon te lachen. Weer kwam t zilvergrieze liekje op t plaankje en wuir der nog wat microchirurgie op toupaast. Perry dee zien pet of en kraabde zuk op zien koale kop.
Visboer trok ook nog wat donkerbroene frutseltjes oet de heern. Der wuir, woardat kop zeten haar nog wat roafels wegsneden.
“Siepeltje derbie heren”, vruig visboer en hai veegde zien handen of aan n nait aal te fris doukje.
Wie kenners, wie nikkopten. Tuurlijk der mos n siepeltje bie.
Perry draaide zuk om en ging deur de knijen en ging zien veters strikken. Of ston e te kokhaalzen?
Eefkes loater lagen der vaier heerns middenmaank n bult siepels.
Wie ruipen Perry.
“Hee doe, kiek zo most dat doun”, zee ik. Mor den in Canadees Engels vanzulfs. Wie huilen de heerns aan steert in lucht en luiten ze zo noar binnen zakken.
“Yes”, ruip Rik.
En hai hoalde zien overbleven heern deur de siepels ofdat t doagelks waark was.
Wie huilden Perry t pampieren schoaltje veur.
Visboer stak zien mes in de heernkop en speerde mit de kop noar ons. “Nou binnen ze goud of binnen ze goud?” vruig e.
Perry keek noar t schoaltje en noar de heernkop op t puntje van t mes.
Hai schudde, hai kronkelde. Wie luiten ondertussen t leste ìndje heern wegglieden.
Hai kokhaalsde, de aarme jong.
“You dirty bastards”, zee e.
“Joa, ook smoakelk eten”, zeden wie.
