Wie doun t mit plat

‘k Heb vandoage weer nait genog dronken.’

Oetsproak klinkt mie bekìnd in oren.

t Is gain nijs, dat wie doaglieks twij liter vocht drinken mouten en t getuugt bie spreker ook nait van onwil, mor t kin wel ais beuren, da’je der gewoon nait aan denken om te drinken. Kopzeerte en n lichtelk licht gevoul in t heufd en n onaangenoam, onbestemd gevoul in t lief kin t gevolg wezen van vochttekört.

Sunt kört dragt zai doarom den ook n opvalende, gruine flèzze mit zok mit.

‘Wotter en munt,’ zo heur k nait veur t eerst, is n ideoale kombinoatsie.

Wotter stroomt as vanzulf, mit ain slag van de pompe oet kroane en noar munt huiven wie in toene nait te zuiken. Dat gruit as kool, aarger, t roet kin der nait tegenaan.

‘Smoakjeswotter is in,’ wait ik en omdat putwotter nait meer in de mode is, sloet ik mie der regelmoateg bie aan.

t Is mor goud, dat wie onze vaste drinkmementen hebben over de dag hìn, mor mit dizze junische hittedoagen is n ekstroa slokje nait verkeerd.

En toch kin k mie nait aan indrok onttrekken, dat overdreven aandacht aan t drinkpetroon van ons, mìnsen staark overtrokken is.

t Kin bevubbeld ook, k nuim mor n dwaarsstroat, aan joen sosioalemediabubbel liggen. Algoritmes bepoalen wa’je mooi en interessant vinden en mit ain zuikopdracht kinnen je al vongen zitten in n web, woar je hoast nait meer oet kommen kinnen. Alle woarhaid is ja subjectief. Omreden dat ik nait vervalen wil in vaalkoel van ’vrouger-was-alles-beter’ en zulfkritisch blieven wil, bin k mit t haite weer van vandoag aan t surfen goan. Op zuik noar t wottergebroek in dit laand. Nait om der ‘munt’ of n sloatje oet te sloagen, mor gewoon oet nijsgiereghaid.

Nou, moak joe de borst mor nat:

Kroanwotter en bronwotter worden veur 60% oet dezulfde bron tapt.

t Idee, dat wie onze weecee mit bronwotter deurspoulen, geft toch te denken.

Kwaliteit van ons drinkwotter is t allerbeste en t schoonste op haile wereld.

Veur mie was t nijloatje:

Kroanwotter wordt strenger controleerd as verpakt bronwotter.

En den komt t prieskoartje datter aan hangt.

Mit n liter kroanwotter van € 0,0015 is n liter bronwotter 666 moal duurder.

En doar komt nog bovenop.

Mit n hoge CO2-oetstreu, produktie, plestiek en transport binnen energielasten doezenden moal hoger as kroanwotter.

Zokse oetkomsten lieken mie nait wat om trotsk op te wezen.

Woarom wie in t algemain en bie dij wie heuren wie ook net zo goud, flèzzen vol bubbeltjeswotter winkels oetslepen, is n terechte, jammer genog nait te beantwoorden vroag.

Of wel?

Kist t ook van n aander kaante bekieken en zeggen:

‘Wie proaten plat en wie drinken plat.’

‘Joa, mor,’ ….. heur k joe al denken en mottjen, ‘wie vinden dij bubbels zo lekker verfrizzend en dat krigst nait mit kroanwotter.’

Beste lu, doar is wel n oplözzen veur. Der binnen ja spesioale kroanen, dij CO2 touvougen aan t kroanwotter of aans hest ook nog n meugelkhaid mit n cilinder veur broezend wotter.

Hebben ie intussen tied al oetrekend houveul joe dit in de porremonnee schelen kin?

Nog n overnomen woarschaauwen van mien kaante:

Nait teveul broesderij in t wotter doun, dat levert soms moagirritoatsies op.

t Is op dit mement persies 14.00 uur en k bin mit thee, kovvie, n sjuutje en n flinke boemel kroanwotter sikkom op anderhaalve liter beland.

Soms kin n bepoalde prikkel goud waarken.