Vot ien tied
Der was nait n bult volk op kremoatsie ofkommen en k kon der ook gainent van. k Haar al n zetje te wachten stoan ien ontvangstroemte tot wie aula ien moggen veur leste eerbewies aan mien olle taande.
Keek wat noar aander lu om te zain of der zekerwoar gain bekìnden maank wazzen. Omreden der was gain ain dij mie wat bekìnd veurkommen dee, rouk k aan t fantezeren wel of dizze lu apmoal weden konden: femilie, noabers, kammeroadskes?
Pebaaierde veurzichteg wat aan proat te roaken om t oet te figelaaiern mor dat mishottjede. Lu wollen nait even proaten.
Ging der bie zitten en overdochde leven van taande en wanneer k heur veur leste moal, al weer joaren heer, zain haar.
Dook ien mien herinnerns, noar mien omke dij t ter al joaren heer tou doan haar, aan heur twij kiender, dij k domt mainstekaans nait ins herkinnen zol.
Dou dochde k aan verhoalen dij taande mie ais, dou k om en bie twaalven was en bie heur logeren dee, vertelde over tied dou k nog mor nijskes geboren lutje potje was. Dou was ol nog n verege vraauw west, doar k goud mit proaten kind haar over vrouger. Hou of zai mien moeke doudestieds n joar laang holpen haar en k deur heur boakerd was. Hou aibels veul pelzaaier zai mit mie had haar en mie biekans vetmest haar. Zai haar mie ook veul verteld over mien jonkhaid. Hou of k as lutje jonkje west haar en over mien oaventuren; mit wel of da’k speuld haar. Zai wos t as gain aander. Mit deur heur paailen was k staark en groot worden.
Dou k noar groot schoul goan was, wazzen zai wied vot verhoesd en zaag k heur bloots nog ais op n traauwerij of loater bie n begraftenis. Zai was dou al old en strampelg en haar last van n bult zaiktes en kwoalen dij bie leeftied heurden. Zat voak mit kop tussen bainen. k Stuurde heur òf en tou n koartje. k Haar der nou spiet van dat k heur nait ais n moal opzocht haar.
Dìn staarvenswoar zai k rompslomps taande liek op mie òf kommen ….
Mor dat kin ja nait en as k beder kiek, zai k dat t mien oldste zuster is.
”Wat hestoe nou?”, vragt ze, ”Wat kiks ja verbilderd.”
Miemeringen binnen veurbie. Mitain goan ook deuren van aula lös.
