Verloofd

Het is tweide Pinksterdag ’23 en t zunnegie schient alweer volop. Zwoager Foppe start veur de 25ste moal zien Elfstedentocht op fietse! Ook het e drei kruuskes van de leste 3 scheuveltochten.

k Mout der nait aan denken, en al hailndaal nait op mien oll n leeftied! Ben van veur de oorlog en den vuil je t older worden. Moeke en ik benn n sunds febreworie veureg joar bere muide noa n Corona aanval en t lukt mor muilek om doar van bie te kommen. Jammer! Mor t is nait aans, der benn n aargere dingen!

k Wuir om 5.55 uur wakker en ben der geliek mor oetstapt! Lekker rusteg en weer ais tied veur de p.c. Ik goa eem mit joe trogge noar de joaren zesteg/zeumteg…..

Noa twei joar verkeern wuir t tied vonden wie om te verloom. Baide wars van feestjes as t ons zulf betrof, kregen wie t idee om dat den mor in Denemarken te doun!

Zulf de verloomskoartjes drokt, en dou op stap. t Leek ons n aibels laange raize, mor noa ain dag rieden stonden wie al op n kampeerploatse bie de oversteek noar Kopenhoagen!

Aanderdoags mit de boot richten Kopenhoagen… Doar vot noar d hoaven, noar t Zeemeerminnegie woaras wie ons plan mit n ringe bezegeln wollen. (1 Augustus 1962).

t Weer was nait te roem…. nogal dokeg….. Reden om de ceremonie n dag oet te stellen.

In t centrum n beetje eten en dou vroug t wichie: Woar sloap ve vannacht? Onneuzel as wie waarn, en d kop vol dreumen, hadden wie doar totoal nait over noadocht!

Gain mobieltje of Tom Tom, zoas vandoage de dag! En in n hotel leek ons baide ook mor niks… t Is mie te loat, zee ik om nog noar n camping te zuiken… In de Kever den mor? Dat kon nog best in dei tied!!

Liekst wel gek! En de glimmers open zeker?

Doar kin ve ja wat veur doun? t Is mor veur ain nacht, wat moakt t oet!

Sputternd gaf ze tou, dat ve gain aander keuze hadden mor t ston heur laank nait aan…

In n ziedstroatje vonden we n rusteg plekje. Handdouken en n poar hemden veur de roamen..

Wat n kiek! sputterde ze….Doe mor op d achterbaanke, mompelde ik. Ik red mie wel op veurbaanke!

Of we goud sloapen hebben, wait ik nait meer. Wel haarn wie wat lawaaieg gechiegel om de kare.

Wie hadden oafsproken dat wie ook Tivoli zain mozzen en dat was dei dag ons eerste gang. Wat heffe doar genoten! n Prachteg paark, woaras van alles te doun was, acrobetiek, meziek, koren enz.

Nog noeit zowat beleefd. En binnen in n grode hal apmoal koamers woarin je joen haart ophoalen konden. Joen eemwicht verlaizen zodat je net as astronauten zwevend veuroet kwamen! In n aander koamer was t net aansom…. asof je n baarge op laipen. Te veul om op te nuimen!

Vanoet Tivoli noar de hoaven. Soamen mit n schoulklasse in n bootje en op ons verzuik eem ho holl n veur t meerminnechie.

Foto s moaken mit ons Clack tousteltje, ging nait recht goud.

Dat haar de meester van d klasse ook deur. Hai vroug wat wie woll n?

Wie will n verloom veur de zeemeermin stutterde ik. Hai pakde mie t tousteltje oaf en begon te knippen!

Dou ve de ringen om haarn, wuir der op zien geboar oet volle borst deur de leerlingen zongen.

Wie hebben nait verstoan wat t was, mor genoten mit volle teugen! Dat kin je joe wel begriepen.

Noa ons trauwen kregn wie twei kinder. Dou dei n joar of tiene twaalm wazzen, woll n zai wel es zain woar dat zeemeerminnegie was en ging de raize vanneis noar Denemarken.

Dou ve de grode zoal van Tivoli binnen stapte, kreeg ik sikkom n haartverzakk n!

De boudel was hailndaal veranderd in n gokpaleis! Wel 80 gokautomoaten!

En abmoal bezet deur maist olle vrauwgies! Zummegen hadden heur tazze op zied van d automaat hangen en reten as gekken an de hefboom, in de hoop, dat der n kaore vol geld in heur tazze rollen zol!

Zwait veur de kop en heur ogen spraken boukdailn! Wat n verval en wat n aarmoude!

Weer boetendeure haarn wie t volgens ons wel zain in Denemarken en biffe richten Noorwegen goan.

n Haile opluchten! Rust, rust en nog ais rust! Sums was t net of je allaind op de wereld wazzen

Den ree je wel uren zunder n minsk te zain. Hail apaad en ook wel ais n beetje angsteg!

Want as de bezinetank nou leeg is……? Vrauw: messchain is hier hailndaal gain bezine meer te koop!

Woar brengst ons wel hin! Goa mor weerom!!!

Gelukkeg is t aal goud kommen en toerden wie honderden kilometers deur Noorwegen.

Haalverwege overstoken noar Zweden …. Ook prachteg! Prachtege noatuur en veul meer leem!

As k de tied nog krieg, wil k dat ook nog ais verhoalen…… Doar haar ve veul pech mit t autochie!