Smookgevoar

Nait dat Johan hom veul van rookverbod aantrekken dee. Der binnen ja zo aibels veul dingen dij ongezond binnen, nait maggen. Ze kinnen hom nog meer vertellen!
Hai het n drok bestoan, viendt e zulf, en sums nou en din mout hai toch ook even relaxen kinnen mit n sigretje, nait din? Ain sigretje ien t haalf uur en hai blift stress boas. Dat is zien ervoaren en doarmit zien overtugen.
Gelukkeg hebben zai veur hom en zien mitsmokers op ketoor n smookhool ienricht ien n vrougere opslagroemte. Roamen zitter der nait ien, mor wel n òfzoegienstelloatsie.
Mit aandere smokers, apmoal van dij gezellege lu, hebben zai der heur home van moakt. Muren binnen volplakt mit posters doar smokende filmsterren op stoan. Pronkstuk is vanzulf deur Johan ophongen klassieker mit daip ien kroag van overjas wegdoken Dean Martin, sigret tussen lippen, der op.

Op grote òfdaankte vergoadertoavel n poar joepsterds van aaskebakken vol mit stinkende aaske en oetdeufde peuken. Swaarte braandplakken ien plestieken blad. Òfzoegienstelloatsie broen en plakkerg van nicotine aan zolder. Atmesfeer rokerg, houstaanjoagend. Olle stoulen mit braandvlekken ien sleetse beklaiden. Vergeten voele borden, kopkes en lepels en vörken ien n slordege stoapel op toavel ien houk. Van hoesholdelke staf komt hier gain ain meer. t Kin Johan apmoal niks verschelen. Hier vuilt e hom thoes en hai zel gain seconde laanger as neudeg ien rookvrije kantine blieven om hom doar zien etendrinken tou te stellen. Ien hol kinnen smokers grammieterge wereld aan. Gain prekende anti-smoker, gain nait-smoker, het ter tougang. Dat hebben dij lu wel òfleerd ien tied. Proberens van boazen om bruinust van tegenwaarken van t ienstelde smookverbod dicht te kriegen binnen tot nou aan tou mishottjed. Onder aanvoeren van Johan is t zulfs n moal sikkom op n wilde stoaken oetdraaid dou boazen heur hool dicht doun wollen.

Dou op n moal, haildaal onverdachts veur hom, vuilde Johan hom onder t smoken nait goud worden. Hai kon sikkom gain oam meer kriegen, swait brook hom oet en stoef derop zakte hai ien stoul onderoet.
Zien sigret lag vergeten n nije braandplak op plestieken toavel te smeulen.
‘t Is zien haart,’ ropt n pazzipant en vlaigt noar kantine om beheerder dij BHV’er is, te hoalen. Aandern leggen Johan ien tied veurzichteg op vlouer en 112 wordt beld; reaniemoatsie wordt begund.
Even loater dut zien haart t weer ook al is t onregelmoateg, mor hai dut t weer. Deur maanse iengriepen van zien pazzipanten is Johan vief menuten loater ien goie haanden en mit ale toeters en bellen ien zaikenauto op weg noar Groot Zaikenhoes. Mor Johan zel nait op tied op ploats van bestemmen aankommen, omreden zaikenwoagen lopt vaast ien n grote, oet klaauwen lopen, demonstroatsie deur smokers onder zaikenhoesvolk, dij heur smookroemtes dij mörgen deur n oetsproak van rechter per votdoadelk kwiet worden waren.