Overdrieven….

Geert Moatjes zit op e stoel, bekertje kovvie ien e haand, om zuk hèn te kieken ien e grootgrutterij van Appie H. Wat n weur! Mor ja, wat wil je, Kerstdoagen kommen deraan en dan votdoadelk ok nog Old en Nij. Asmits denkt e dat Piet Paulusma barre tieden veurzegd het, der kommen karren veurbij, zo vol dat de bestuurder der hoast niet meer over hèn kieken kan. Zol dat nou hamstern wezen of doodgewoon verlet om wat hebben? En joa, hij haar t wel docht, doar komt Harm Wommels, Harm Proatjeboksem ien eigen persoon, muts van Santa Claus op e kop. Wat dut e nou? Hij het n bordje en hij lopt bij ale steeën laangs woar wat te hoalen is: poar stukjes vlees, worst, stukjes kees, koek, banket, kerststol, wat niet al. O, nou krigt e Geert ien e smiezen. “Moi Geertjong”, zeit Harm, “man, man, man, dit is me wat, mor zo komt Harm Splinter deur de winter….” Harm loat zuk deel valen op e stoel stoefbij Geert. Hij zet zien bordje op e luddek toaveltje, woar ok al aner eterij te vienden is. Geert is al ien t enne om n bekertje kovvie ien te schenken, mor Harm blieft t niet. “Nee, Geert”, zeit e, “even geen kovvie meer, k vuul me krekt zulf n kovvieautomaat. As jim op mien navvel drukt, komt der zo n bakje joegelebom teveurschien, echt niet meer!” Hij pakt n homp kerststol en propt dat ien zien mond. Even is t stil, mor dat duurt niet laang. “Wat n pandeponum is dat hier, wat n pandeponum! Mensen bennen kompleet gek, aldernoast! Goa mor ies buten kieken, hier bij de parkeerploatsen. Nog even en ze sloagen mekoar de hazzens ien, huven ze ien elks geval gien bosschoppen meer te doen. Man, man, man, wat n pandeponum! En kiek hier ies ien e zoak. Ziet jim nog wat der ien e winkel stijt? Swaart van t volk, en mor graaien. De blikjes vliegen je om de oren, de koekkrummels zitten je ien t hoar en veur de winkelkarren kunnen ze mor beter de verkeersplietsie ienschoakeln. En Aksma, die jentege bedriefsleider, kompleet ondersnijd, onder de voet lopen, as dat mor goed gijt. Ale kassa’s bezet en nog stoan der riegen van vier of meer. Wat bezielt t volk doch…” Harm nemt n stukje olle kees en loat dat ien zien mond verdwienen. Hij pruuft met n gelukzalege blik op zien geloat.
“En kiek ies noar die gezichten! De zörgen liggen der met dubbeldikke vollen op, de ogen stoan glad verkeerd, nog even en der groeien klauwen uut de jasmouwen. En dat apmoal deur twij deurdeweekse Kerstdoagen. Kiek, wat ik doe is t betrachten van de soberheid, zo numen ze dat. Wel t kleine niet eert, is t grote woarachteg niet weerd!” Harm nemt n plakje boterhamworst tussen duum en wiesvinger en brengt t theatroal noar zien langzoam opende mond: Hap en hmmmm! Hij groalt vannijs. Geert zit m met open mond aan te kieken, vergeet hielemoal zien bekertje leeg te drinken. Of en toe krigt e n drukker van n kar die uut de koers roakt is. Sums buugt der iene over hum hèn om n stukje stol te pakken, mor das gauw oflopen. Harm zet t bred pontifikoal veur zuk hèn en dan duurt der niemand meer n poot noar uut te steken. “Jim moet ook veul attersiever worden, Moatjes, aans griep je overal noast. Niet overdrieven, mor der wel bie wezen!” En doar gijt weer n haalf plakje kerstcake…. Geert schudkopt. Hij ziet n goatje ien e file bij de zuvel en perbeert ien t enne te kommen. Op t zulfde moment krigt e n klap op e scholder van Klaas Kontje die ok al met zo’n SantaClausding op e kop lopt. As Harm hum niet opvongen haar, was Geert zo met stoel en aal op e vloer beland, t zoveulste winkelkarverkeersslachtovver. t Roast mor deur. “Ah, jonje, letst die voeren deur Harm Wommels? Bordje is nog niet leeg, zitten blieven!” En vot is Klaas, op pad noar de Kerstkransjes en de flezzen “Glühwein”. Veurzichteg dut Geert n twijde poging, nou lukt t. “Hier, neem n stukje stol Kan jim wel bruken, tis kold buten!” Harm holdt hum t bred met lekkers veur. Geert tast toe en nemt per ongeluk twij stukjes, die aan mekoar vastzitten. “Ho, ho!” zeit Harm, “niet votdoadelk overdrieven, Kerstfeest is t feest van de soberheid, hol die doaraan! En vergeet dien körfke met beschuten niet…”
Met n rooie kop leit Geert ien stukje stol terug op t bred, stekt t anere ien e mond en dut even haand omhoog, veur Harm Proatjesboksem. Die het geliek, niét overdrieven. Hij kiekt om zuk hèn. Nou ja, die hamsterzucht drift ok wel weer over…..