Over Krummel & krekels
Sunt kört woont der n vrumde kardinoalsvogel op nummer 100. n Rouperd mit schèle stem.
k Schrok mie lestent n ongelok, dou k noa n laange zit, deure opendee en mie vanoet onbekìnde houke n verske toufloten wuir. n Onbekìnd verske, dij mie desondanks bekìnd in oren klonk.
Noa braid overleg in de femilie bleek t n ( Engels ) telverske te wezen: This old man
t Zette dizze olde man aan t prakkezaaiern en gedachten schoten sikkom 25 joar terogge in tied. Noar onze doerak, Kruimeltje, in de buurt beter bekìnd as Krummel.
t Verhoaltje lezen ie hieronder.
t Is even noa de middag.
Krummel ligt lekker te sloapen op n handdoukje op vensterbaanke. Hai is mui, omdat e zok smörgens boetendeure al oardeg oetnavveld het. Bedenk, ook n katte het zien rust neudeg.
Hai is vandoage al haile vroug mit zien twij kammeroaden Joris en Blackie op stap goan. Dou t kattenloekje even noa haalf zeuven open doan wuir, is e as eerste noar boeten snitterd. Ontsnapt. Zo vuilt Krummel t en zo zegd’e t ook:
‘As je d’haile nacht in n òfsloten keuken zeten hebben mit twij olde taantes en n stinkende joekel, den binnen je smörgens bliede, dat je weer roem oamen kinnen in de frizze boetenlocht.’
Kammeroad Joris zat boetendeure al op hom te wachten. Nou te wachten. Joris is n boetenkatte en het nait zoals Krummel n boas, dij hom elke oavend mit n schier proatje en n lekker bakje vlais in hoes lokt. Nee, zokswat kent Joris nait. As Joris eten wil, den mout e t zulf mor opzuiken. Blackie is n hail aander verhoal. Dij het net as Krummel wel n hoes, mor krigt meer sloage as vreten. Mor as ze mit z’n drijent binnen, den tellen aal dij mìnsenzoaken nait. Den gelden kattenwetten en dij binnen hail aans as mìnsenregels.
Vanmörgen binnen zai mit heur drijent aan t vizzen west. Bie achterbuurman Jan de Wit. Dij het n viever mit haile mooie goldviskes. En dij goldviskes smoaken meroakels.
‘Veural dat wat tussen kop en steert zit,’ zeggen zai regelmoateg tegen mekoar, as t viske achter koezen verdwenen is. Restanten binnen veur dij der belang bie het.
‘Den kin Jan tenminnent ook zain, dat wie der west binnen.’
Mor van sloapen komt dij middag nait veul. Wat Krummel steurt, is n irritant geluud, dat òf en tou te heuren is in keuken. Hai kin t nait recht thoesbrengen. t Is gain zoemende mugge of n ieme, dat het e mit ain lodderoge al wel woarnomen. t Is net of der aargens dicht in de buurte aal aine mit n striekstok op n viool zit te foeken. Mui van t luustern en saggerijneg omdat sloap hom in steek let, lopt hai op t geluud òf. t Is net of t oet moekes maaidenkaaste komt. Nijsgiereg trekt e mit linkerpote kastdeure n ìndje open en komt den tot ontdekken, dat ter niks mis is mit zien oortjes. Mit n open kaaste heurt hai t nog dudelker.
‘Nou wil k toch ook waiten, wel mie doar nou al zo’n zet zit te ploagen mit zien kattengejammer.’ Hai mout lagen om zien aigen woorden en veurdat ter twij tellen veurbie binnen, klaauwstert Krummel via de braide plaanken noar de bovenste plaanke. Doar zugt hai tot zien grote verboazen dat t geluud oet n deuske komt. t Gruine deuske mit n mooie rooie, fluwailen binnenkaante komt hom bekìnd veur. t Krekeldeuske. t Het tieden veur thoes in n mooi opgemoakt eerappelbakje stoan en elke keer as der aine bie deure kwam, begonnen de krekels, as op kommando van bewegensmelder, te sjirpen.
O, o, wat haar moeke doar, elke keer as der ain bie veurdeure verboasd in t rond keek, n plezaaier om had. En nou haar moekes vervelende, mechoanische deuske hom oet sloap hoald.
En ….veurdat hai zok bedenken kon, sluig e, oet vranterghaid, mit n klap t deuskedekseltje dicht. Mor de gevolgen waren aans as verwacht. Klap was bliekboar zo haard aankommen, dat t deuske mit n sierleke boge van bovenste plaanke op grond kletterde en over keukenvlouer stoiterde. Ast doar bie bleven was, wast meschain nog wel goud òflopen, mor omdat moeke op dat zulfde mement keuken binnenkwam en behaalve n katte boven in kaaste, ook nog wat gruins deur d’locht vlaigen zag, begon zai op n menaaier te gillen, dat heuren en zain joe verging. Zo haar Krummel t in elk geval ervoaren. In zien hoast om zo snel meugelk vot te kommen, binnen de mooie Broabants-bonte soepborden mit hom mitsprongen.
En as je t geluud van brekend porselain in kombinoatsie mit t deurdringend gegil van n vraauwmìns bie mekoar optellen, den kinnen je joe best veurstèllen, dat Krummel dij dag en ook de doarop volgende nacht nait meer thoes west is.
Hai haar gelok, dat Joris dij nacht ook bie pad was. Allendeg was e dus nait.
Mor ast Krummel recht op de kat òf vragst, wat e nou t laifst het, den kaist e der toch mor veur om de nacht mit twij olde taantes en n stinkende joekel deur te brengen.
