Nait noar t westen
Ik wil nait noar t westen, zai kriegen mie hier nait vandoan
Zai kinnen mie hier nog zo pesten, ik zel hier noeit votgoan
Mien waark laip op t ende, wat mout ik doar tegen doun
Wat geld kin k ja best bruken, dat holdt mie wis in goie doun
Gain boas wil mie nog hebben, ik bin ja al wat te old
Mien hoes kin k nait verkopen, wordt hoast niks veur betoald
Doar zit k mit mien ellìnde, aal gain waark en toch veul zin
Och minsken en genende, wat vuil k mie nou toch min.
Mien wiefke staait pal noast mie, dat geft nog wat vertier
k Mout mie wel aarg bedappern, mit dat waarkloze geklier
Mor noar t westen, noar t westen, is dat wel wat veur mie
Noar t westen, noar t westen, hou kommen ie doar nou bie.
Ik blief hier stil in Grunnen, zai kriegen mie hier nait vandoan
Loat aarmoude mor kommen, wie zellen der nait kepot aan goan
Ons gasbel en ons hoavens, dat mout toch staarkte geven
Loat t westen mor begroaven, wie blieven in Grunnen wel leven.
Minder eten, wat meer sloapen, minder smoken en t licht vroug oet
Gain auto, din mor de fietse, gain biefstok, wat meer stoet
Hier is gainain dij krepeert, gainain dij achterblift
Noa regen komt altied zunne, dij is din liek op ons richt.
Ik wil nait noar t westen, zai kriegen mie hier noeit vandoan
Zai kinnen mie ook nog zo pesten, mor k zel hier nait votgoan
Mien waark lopt nog aal op t ende en t is ja lang nait meer as toun
Mor ik zel mie der wel deursloagen, adinlek en mit goud fersoun.
