Moatjes ien e voetbalploatjes

Geert Moatjes zit ien e bisnis van de voetbalploatjes… t Is zien daarde joar en hij begunt t al oardeg te leren. Nee, hij gijt niet maank aal die jonken stoan, veur t hek bij de grootgrutter. En dan mor bulken: “Meneer! Mevrouw! Heb u ook voetbalplaatjes???!!!” Dat doet e dus niet, doar is e as 65-plusser niet flexibel genoeg meer veur. Die jonken bennen ok ja zo vlug as wotter. As Geert dan zien mond open dut, hebben zij die zilvern pakjes al laank te pakken! (En dan moet Geert der ok nog aan denken om zien mond weer dicht te doen…) Nee, Geert gijt zulf noar de Appie H. over de brug om e fietstazzen vol te proppen met bosschoppen. Niet allenneg mor beschuut, WC-pepier en kees, n poar dingen meer. Drié stukken kees as t moet, en vitaminepillen en of en toe aanbiedingen! (Al moet e doar met uutkieken, veur dat e t wiet, stuurt zien Harmke hum weerom, “heb k niet besteld!”). Bij elke tien euro op e kassabon kriegt e n zakje met vier ploatjes, as t goed is. t Allereerste zakje, doar zaten votdoadelk vijf ploatjes ien, haar hij even mazzel! (Mor n keer doarnoa haar e ien met mor drié speulers, dat leek ja nargens noar!) Dizze reis trouwens gien speulers van de EREDIVISIE! Gien Suarez, of Kubik, of Toivonen, of Granqvist, Mertens, Elm, Pelle of Bahia, of hoe aal die voaderlandse voetballers mor hieten… Nee, de grootgrutter doar bij die nijmoodse oostraand ien Zuudhörn het n ofsproak moakt met e voetbalverieneging “Zuudhörn”! Wat zegt jim? Joa, dat bedoel ik: “Zuidhorn”! Eerst zol allent de hiele jeugd van e greunwitten op e plakploatjes, en dat bennen der al honderden! Mor toen kregen die oldere lu de smoak te pakken en wollen ze ok op t portret: van e zotterdagofdeling, en e zundag, en de doames vanzulf, en de scheidsrechters, kemizzieleden, bestuurders…. Zulfs de consul, veldkeurder Feike, hebben ze n plak geven ien t ploatjesalbum.

Mooi man! Joa, t bennen der wel wat veul worden, mor t zigt der geweldeg uut! Geert is der d’eerste moal mor ies even goed veur zitten goan, bij t ienplakken van de ploatjes. Denk nou niet dat t zo makkelk is! Eerst moet je goed kieken op wélke bladziede zo’n ploatje plakt worden moet, der bennen der nogal wat! n Zegen dat ze de kebouters nog buten t boek loaten hebben… Dan moet e hiel veurzichteg de achterkaant van t ploatje ofpeutern; de noagelbieters hebben hier n groot probleem! Tja, en dan moet t ploatje n bietje recht op e goie stee plakt worden. Poeh, dat is bij die teamploatjes (ien twee helften!) gien sinecure! En dan kiekst ien t album en dan is t potjandorie net of der nog niks ien zit…. Gelukkeg bennen der ok paardij lu die zulf niet spoaren en dan de ploatjes votgeven, dan zit t mèt, nietwoar?! (Nee, niet allenneg bij t hek veur de winkel; Geert kriegt ze op n anere menier ien e brievenbus, mor doar kan e wieder niks van zeggen, das geheim… Deúrgoan, lu!)
Oflopen dunderdag is e ok nog even noar de Appie H. west, bosschoppen doen. Dat moet je onderholden, aans ben je de vörm zo kwiet… Haarm Proatjeboksem zat bij de kovvietoavel de kraant te lezen, ‘De Telegraaf’, dat wirrelt je veur d’ogen as je doarien kieken… ‘Hier moet ik niet wezen!’ docht Geert, en hij wol stiekem deurlopen, dee krekt of e allent mor noar de stoetjes keek.. Harm pakde hum zo bij de jas en drukde hum op e stoel. “Zitten! Kovvie!” Doar haar Geert niet van terug. “Mor…”stoamelde hij, “e…!” Harm keek hum ies aan. “Geert Moatjes! t Laand gijt noar de bliksem met dizze nije Rutte-regering en jim holdt zuk bezeg met t spoaren van voetbalploatjes! Wat is dit??! Kop der even bij, Moatjes, alle hens aan dek! En as jim dat iene ploatje viendt met mien kleinzeun derop, iénlevern!” n Bietje studdelnd kwam Geert weer ien t ènne en vervolgde zien AHtoer. Toen e thuus al laank weer met e Zweedse puzzel uut e ‘Kampioen’ bezeg was (Geert diskrimineert niet…), kwam zien vrouw thuus en legde n poar preien ien e greuntebak van e koelkast. “Mien God, Geert, wat hest nou ommaans had? Hoeveul pakken sukkeloa het jim metnomen???! O, ik begriep t al, biezundere voetbalploatjessukkeloa….”