Ie kinnen der mit lezen en schrieven
Ik wait, ik hol t nait tegen,
al wol k t sums zo groag,
dien zacht en stroalend gezicht,
dien ogen ain grode vroag.
Zo klain as t nou nog bist,
k wol t aaltied mor zo bleef,
doe lutje, lutje jong van mie,
zolaank as’k nou nog leef.
Straks bist doe veul groter
en veul meer op die zulf,
doar kinst ook niks aan doun,
dat gait apmoal vanzulf.
Mor hou die t ook vergait,
ik wait hou of t begon,
bewoar toch veur die zulf,
dat lutje, lutje jong.
Roelf Meijer. Mit aander woorden, t is bie de aangifte op t gemaintehuus al misgoan. Ik hait ja nait van Meijer mor Maaijer, zoas t in Grunnen hait. In 1956 geboren in Stad (Ik wol der nait uut) mor vanòf mien vaarde dag groot worden op de Wieke. Sunds 2013 woon ik nou in Vledderveen of zoas ze hier zeggen, op de Vledder.
Mor goud, bin nou mit Drees en heb de pènne weer oppakken doan noa nogal wat joaren aander hobbies. Holtbewaarken, smeden, toentjen en zokswataal. Joaren leden was der n boukje van mie uutkommen mit körde verhoaltjes en n dail doar van maggen hier nou wel ais n moal te lezen wezen.
