Lutje Deugenait
Midden op camping stoan wat poaltjes ien t gras. Noast ain van poaltjes zit n gat ien grond. t Is n schier rond goatje, zo’n 15 centimeter ien deursnee, en as ie der ien kieken gaait t hoast recht omdeel. Bie t gat ligt wat lös zaand en der liggen ook wat ronde keudeltjes. t Gat is veurdeur van n knienefemilie.
Mit heur zeuven binnen zai. Pa en moe Knien vanzulf en vief klaaintjes.
Klaaintjes binnen n week of drij old en pa en moe doun der alles tou om klaintjes zo goud meugelk groot te kriegen. Smörgens, as t gras nog sjompenat is, zain lu dij op camping stoan, klaaine wolbaaltjes ain veur ain oet hool opdoeken. Eerst komt der n kopke oet, dij kikt even ien t rond en hup doar is t baistje boven grond. As aal jonkgoud boven is, huppeln zai eerst wat veurzichteg ien de rondte en zo gaauw zai t nait vertraauwen, doeken zai t hool weer ien. Om der vief tellen loater vannijs oet te kommen. Den is t speulketaaierke en hebben knientjes dik plezaaier. Kampeerlu hebben heur slinger der ook aan. Loater zitten wolbaaltjes rusteg ien waarme zun oet te rusten. Pa en moe zai je doagsover nait.
Elke mörgen stoan der lu mit fototoustel kloar om baistjes zo schier meugelk op n ploatje te kriegen en dij kommem aal mörgens weer krek te dichtbie en den is t eerst weer doan omreden knientjes doeken votdoadelk weg ien t hool as lu dichter den 20 meter bie t hool kommen. Holtdoef binnen knientjes nait baang veur. As dij bie poaltjes deel strikt en wat rondkuiert, blieven knientjes rusteg gras eten en runnen zai om doef tou, dij der ook nait aans van wordt.
Knientjes worden wel aal mor driester en huppeln ieder moal wat wieder van t hool of. Allain soavends, ien twijduustern, goan lutjekes mit pa en moe wat wieder van t hool of noar raand van camping tou, doar t gras vanzulf t lekkerst is.
Vanmörgen was der al n klaaintje allenneg aan raand van camping, wel vatteg meter van t hool òf. Doar huppelde hai wat ien t hoge gras rond. Mor dou opains runde t klaine baistje mit n voart stroalrecht over t veld noar t hool terug. As n speer ging e. Wat kon dat baistje al allergodsbenauwdst runnen!
Reden van paniek wer al gaauw dudelk. t Runnend wolbaaltje was nog nait ien volle voart t hool iendoken of dikke roofvogel, dij as n kenonskoegel oet lucht deel viel, was der ook al. t Lutje baistje haar t nog naauw red. Roofvogel ging der weer gaauw vandeur
Lu op camping hebben der nog haile dag over noaproaten doan. Vaaier knientjes huppelden al gaauw weer rondom t hool. Viefde kwam pas veul loater weer veur n dag. Dij haar zien leske leerd. Eerst ien twijduustern zagen lu pa en moe knien mit heur vief lutjekes vannijs noar raand van camping huppeln en ging t knieneleven aaldoags wieder. Dou wie n week loater vot gingen van camping waren der mor twij lutje knientjes meer. Of lutje deugennait ain van dij twij was, doar binnen wie nait oetkommen.
19-10-10
