Kou op toneel

Over caféholder Hamming (Bôlle) deden vrouger de vrumdste verhoalen de ronde. t Was n olle sjacheroar dei noast zien cafébedrief ook handelde in koien. Dat hebben wie waiten. Ainmoal in t joar werd der in het buurthoes repeteerd veur een toneel oetvoeren. Ik haar mainsttied de hoofdrol en soms zelfs een dubbele rol. Ik kon goud onthollen en dus waren de laange verhoalen veur mie. Klinkt misschien wel n beetje snakkeg, mor t was wel zo.
Als het den weer zo wied was, den was de oetvoeren in de begun joaren altied bie Hamming in de grote zoal. ’t Was altied hail biezunder en der hong altied een biezundere geur. Ale inwoners van Hörn konden wel in de grote zoal, zo groot was het. De zoal zat altied vol en dat vonden wie noatuurlijk geweldig mooi. Der was een hail groot toneel en op de veurgrond zat den de toneelbakke woar de souffleur in zat veur het geval sommigen de tekst kwiet waren. En dat gebeurde nog wel ains. Op een gegeven moment begon de souffleur te roupen dou ik wat zeggen mos. Ik vond het roar dat hai wat zee, want ik was mien tekst nait kwiet. Mor hai bleef mor proaten en geboaren moaken. Ik ging mor n beetje improviseren en deed net of ik vol. Dou ik veur de souffleurbakke lag vroug ik wat der aan de hand was. ”Doar zit mie aal wat bie de vouten” werd der zegd. Ik docht eerst dat hai n borreltje te veul op haar, want dat gebeurde wel ains bie zo’n oetvoeren, mor dat was nait het geval. Tiedens de haile toneelveurstellen bleef de souffleur mor roare geboaren moaken en dou de veurstellen oflopen was vroug ik: ”was is hier aigenlieks aan de hand”? Hai zee weer: ”doar zat mie aal wat bie de vouten”. Wie binnen mit n aantal jonkse onder het toneel goan om te kieken wat der was en dou bleek dat doar n poar jongbaisten stonnen. Wie konden dat nait allain zain mor ook wel roeken en vrougn aan Hamming hou dat kon. ”Dei heb ik onder het toneel zet, want ik haar gain ruumte meer in de schure en onder het toneel konnen ze makkelk stoan”. Ain van dei jongbaisten het de soufleur aalgedureg mit zien laange tonge tiedens de veurstellen aan de bainen slikt.
De lu vonden de oetvoeren geweldig en wie haren ook grote lol. Het stond dan wel nait in het boukje, mor de koien van Bôlle hebben ongevroagd wel de hoofdrol speuld.