Koatje
(n verhoal van Rolf )
Vroger, n joar of sesteg leden, is ter ais n koatje van dörp moakt van lucht oet. Sentrom staait ter ien swaart-wit op mit kerk, kroug, gemaintehoes en luddek börgje boven ien beeld. Dat koatje hemmen wie noa laank zuiken vonnen op n rommelmaart ien n stad wat wieder vot.
Is ainegste koatje, en n hail schiere ook, dat ter ooit van dörp moakt is en no hemmen wie hom.
Ien tied is ales veranerd. Gemaintehoes is nou n dubbeld woonhoes. Kroug staait aal tiedstieden leeg. Ons hoes staait n beetje noar veuren tegen kerk over en ie kinnen ziedgevel en dak goud zain. Kerkplaain nummer 6.
Tussen hoes en kerk stoan twij minsen, n man en n vraauw, te proaten. Auto veur deur is van veurege aigeners. Dij woonden der dou krekt. Ien dat hoes brochden ollers heur zès wichter en n jong groot. Ien hörn van ale koamers slaip wel n kwoajong, heurden wie ais van n lougster. As ie no deur t hoes hìnlopen kinnen ie joe nog veurstèllen hou of dat was. t Kon amperaan.
Ien 1999 begunden drij dochters te proaten over heur pa en hou dij zien aigen wichter nait òfblieven kon. Aner drij wichter en jong waren glìn ien hakken west dat ter over proat wer, dij wollen ja nait dat anern der wait van kregen. Nee, gainain mog t waiten vanwegens schande ien dörp, nait om heur moeke en ook nait om heur pa. Mor kwoad was aal steukeld en t werren duustere doagen veur t volk. Kerel, dij vroger soldoat west haar, besloot op n bidderlieke menaaier n ìn aan schande en straf dij op hom òfkwam te moaken. Dou dainders hom hoalen kwammen en op deur stonnen te beuken, runde hai bie trap omhoog noar zoller en gooide hom, kop noar veuren, tou bovenroam oet omdeel. Meer dood as leventeg wer hai òfvoerd noar zaikenhoes en zulfde daag nog haar hai ter tou doan.
Paardie lu ien t dörp waren doar ien tied nait raauweg om; anern mainden dat wichter der nooit gain proat over holden haren mouten. Mit tou tied oet kommen van dizze kerel was vree ien dörp zekerwoar nait weeromkeerd en ook was ellèn van dij misbruukte wichter nait over.
Kiener binnen tot op dizze daag verdaild ien zulfde twijspaalk as dörp. Van dood oaf van heur pa hemmen drij wichter van bruier en zusters en n kobbel lougslu verwiet kregen dat ter bloud aan heur hannen bakte omreden zai haren proat. Schoal is veur aiveg oet evenwicht.
Wedevraauw het heur leste vief joar ien rolstoul op onnerste verdaipen deurbrocht. Dat haar nait makkelk west. Benoam nait omreden ales ploatsvonnen haar boven heur kop, onner heur dak en op plaain veur t hoes.
Der wordt zègd dat zai n hail oarege vraauw west het en dat hemmen wie ook wel vuild. Dou wie ien 2009 t hoes veur eerste moal bekeken, stonnen heur spultjes der nog. Tot aan hoarspèllen op bozzem tou noast petret van aal heur volk. Mor dat aigenste volk kon t deur dij drokte ien femilie nait opbringen hoes leeg te hoalen. Vremd genog stoan baaide grafstainen op kerkhof even boeten dörp der schier bie.
Ronnom bluien blomkes.
(30-12-10)
