Reüniefoto
Van reüniekemizzie van HBS kreeg k van week n groepsfoto oet 1965 toustuurd. Of k meschain wis wèl doar apmoal op stonden.
Joa vanzulf, dochde k, mor t vil tegen. Haalfschaaid kon k zo opnuimen, mor de rest? Gain flaauw benul hou zai haitten. Van gezicht joa, mor noamen, nee, dat wol nait.
Aanderdoags vannijs keken en verdold, k kwam weer op n poar noamen.
Week loater wis k, op ain noa, noamen van ale mitleerlingen van raais noar Peries weer.
Dat aine wichtje mit bril en laang donker hoar mout k aalvot aan denken. Hou haitte dij toch ook weer?
