Gasgrefieken in de gevel
Joekels van turbinemeulens. Bie bunderboeren op t achterhaim of in t laand en veuraal in de roemte bie de dieken. t Is t nije geleuf; boer is nou n domie van dizze tied, hai wiest noar de hemel mor preekt veur aigen perochie vanzulf. Nog mor körts waiten wie van turbinewindmeulens, toch wieken der nou, net as bie Refermoazie, twij geleufstromen van nkander òf, rekkelk en òfgeschaaiden.
Rebulie omreden ain van de wind leven kin en d’aander vot waait. Vrouger haar gain mensk hinder van n meulen! Dij wazzen schier van baauw, laank nait zo hoog en neudeg veur meel, veur eulie en veur aan- en òfvoer van wotter. Volk wer der allinneg mor beder bie. Mor nijachtege meulens moaken ook wotterstof aan. Deur wind, dus vergees. Kin niks op tegen wezen … zol je zeggen. En zun gaait ook veur niks op, doarom zunnepeneeln. Riek worden deur netuur. Luchtkestailen? Volk wordt gek mokt deur gladde proatjeboksems dij boudel aanproaten veur hoger opbrengst. Zulfde as veur joaren heer bie boeren; ‘bruuk kunstmis din wor je riek.’ Eerst zain, din leuven, want wat krigst op dien dak of in de toen? Vrouger zag je pannen of rait op dak. Nou waiten studielu dat der gras en mos op dak mot. Goud veur miljeu, zeggen zai. Hebben der ja veur deurleerd. Boer Boon uut Kolham kreeg in de joaren viefteg ook ‘deskundegen’ op zien haim. Hai kreeg wat senten mit en t gas vloog onner zodden vot. Grefieken op t bero van Gasunie vlogen ook omhoog. Wel wer doar riek van? In els gevaal nait de Grunnegers dij nou gasgrefieken in de muurstainen hebben. Vraauw Heite poest t schoade-ABC van t CVW stoer tegen d’ambtelke meulens. Dij draaien … mor … bewegen nait. t Is ‘Aldersnoaste’ sneu. Freek pebaaiert de codes van de NAM te kroaken mit n laid van Ede. t Laand zakt onner vouten vot mor mot vanzulf ophoogd en verstaarkt worden. En gemainten worden vannijs indaild mor ook doar is nog aal n bult lewaai om. GRUNNEN VRAGT OM VREDE! Mor wat zong Ede? ‘As vaaier woorden joe niks meer zeggen, het t ook gain zin om t uut te leggen …’.
