Gain feestbouk meer

Noodgedwongen ben ik van Feesbouk verlöst. Ik ken der gewoon nait meer ienkommen.
Bie t kontroleren van ienstellens kwaam ik op t lest bie de vroag om de nije veurwoarden te aksepteren en doar zat bie mie nou net de kneep, ik haar zo veul berichten heurd op televisie over wat der allemoal nait goud zit, ik haar der gain goud gevuil meer over, dus ik heb de nije veurwoarden nait aksepteerd en nou ken ik der nait meer bie. Tougang is òfsloten. Ik ken mien account nait ophevven, gain nije berichten meer ploatsen, gain reakties meer geven want ik kom der gewoon nait meer ien, tenzij ik de veurwoarden aksepteer.
Dus zuik ik aander vertier. Ienmiddels ben ik nou een week zunder feestbouk (want dat was het wel n beetje veur mie), en ik heb weer tied om wat nijs te schrieven, mien huus gezelleg te moaken, bouken te lezen, vriendinnen te bezuiken, te fietsen en wandeln en ik verneem ienains dat er n last van mie òfvalen is zunder dat ik dij last vernomen haar.
Mor ien mien postvak komt nog wel aal post van Feesbouk. Ik heb n baarg mist, wel 3 berichten, 39 meldings en 1 evenement. En dizze week kommen aal berichten of ik dij wel ken en dij en of ik ze vrund moaken wil. Nou, ik ken der gainain van en al zol ik willen, ik ken ja naargens meer bie.


As mensen mie zuiken, mien profiel is der nog want ik ken t ja nait vothoalen en mien gedichtenpagina’s bennen der ook nog, komt allain niks nijs meer bie. Nou, lu vernuvern zich der mor mit. Is nog genog te lezen en te dailen en te bekieken en ik ben weer wat meer te vienden op mien blogs, want doar kwam ik nait voak meer aan tou. Ik zel der feestblogs van moaken.

Coby holdt verschaaiden blogs bie, dij binnen te vinden op:

https://dichteningroningen.blogspot.com https://cobypoelman.blogspot.com https://schriftgedichten.blogspot.com https://christelijkefeestdagen.blogspot.com https://literatuurgedichten.blogspot.com https://grunnegerbiebelgedichten.blogspot.com/

Meer van t zulfde:

0 0 stemmen
Schier?
Berichtje bie n nije reactie?
Stuur mie n e-mail bie
0 Reacties
Achtergrond info:

Coby Poelman-Duisterwinkel, geboren in Grunnen ien 1955, woont met heur man ien Aduard.
Ze schrieft gedichten, verhoalen en columns, het 12 bouken uutgeven woarvan 2 kienderbouken.
Heur leste bouk, een kienderbouk is ien 2019 uutgeven deur Kok/boekencentrum.
Ze droagt veur uut aaigen waark veur verschaaiden verenegingen, is vaste columnist bie Welkom in Zuidhorn vanof 2011.
Ze mag groag schrieven over wat heur roakt ien t leven, ze schrieft bie foto’s, bie bouken die ze leest veur de literaire kring.
Ze waarkte meer dan 10 joar met aan biebelse dagbouken, uutgeven deur Jongbloed en enkele van heur gedichten bennen op muziek zet deur componisten.
Ien de Erasmusuniversiteit ien Rotterdam is n deel van heur gedicht ‘Diploma-uitreiking’ deur NEON-kunstenoar Toni Burgering (de kunstenoar die ook de bekende dichtregel van Lucebert ien Rotterdam ien NEON moakt het) ien een Neon kunstwaark verwaarkt en dat beslacht een groot dail van de wand van Sanders Law library woar rechtenstudenten studeren. Dat dail van heur gedicht is ook ien 200 minikunstwaarken graveerd die de rechtenstudenten uutriekt kriegen as ze de bul hoalen.
Bie de opening van Sanders Law library het Coby heur gedicht doar veurdroagen. Doar kreeg ze zelf ook t mini kunstwaark overhandegd.

E-mail bie wat nijs?