Dörpkes

· Detmers, Ab

Zai binnen der nog
dij dörpkes, klaain
maank stroek en raait
hoast nait te zain
t leeft hier ja vree
deur elk begeerd
de grond zo swaart
deur ploug omkeerd.

Zai binnen der nog
dij dörpkes, klaain
mit d’olle kerke
van haard rood stain
deur weer en wind
zo stil vertraauwd
doar op dij bulde
veur aiweg baauwd.

Ik loop ja groag
deur dij olle stroat
bie t diekje omhoog
noar dij vlode voart
t is der stil
gainain dij steurt
mien zörgen binnen vot
mien winsen verheurd.

Bie vreugd en lied
vuil k mie hier thoes
maank aal dat schiere
om t haile hoes
k wait mie beschaarmd
t is de beste stee
ik blief hier wis
hier bin k pas tevree.

• Facebook
• LinkedIn
• Email
• Print

Gedichten

Meer van t zulfde:

• Laifde is in t veurdail

• De Grunneger boer en … Dynasty, van tv

• Pronkjewail in golden raand

Woont in: Delfziel
Schrift al: joaren

Joa, op t heden is schildern weer n luk bietje in bie mie, mor der is n tied west dat ik as ain van d eersten van de Grunneger Schrievers nogal drok bezeg was mit schrieven verhoalen vertellen en dichten.
Toal en Taiken hebben toun hail wat van mie opnomen. Kunstgang Kaampe in Steem bin’k ook nog bie d oprichten west.
Zoas eerder zegt, k heb t nou drok mit schildern en tentoonstellens. Kiek mor even op mien Web-log, din krieg je n beeld van mien doun en loaten. Der stoan ook wat verhoaltjes op in t Grunnings. Dij toal mout der inblieven en smis tot groot verdrait van elk en ain proat ik (lel ik?) lekker deur. t Gait aal zo makkelk.