Ie kinnen der mit lezen en schrieven
Ik kiek oet t roam,
k zai n vogeltje mooi van kleur.
veur t roam goa k stoan;
t vlugt vot en k denk aan heur.
k Mis die daip bie mie van binnen,
t wordt aal kolder om mie tou.
k Stoar omhoog en denk aan die,
in t swaarde van de naacht.
k Stel mie veur, das doe doar bist
en aaldoags noar mie laagst.
mor deurdat k die zo mis,
bin k der van overtuugd,
dat doarboven mie wat is!
Geboren: 1942 in Buunderveen
Woont: op Knoal
Schrift al: sunds 1996 in t Grunnegs
Noa mien ofkeuren as directeur van n grondschoule in 1996 heb k mie as tiedverdrief wat toulegd op t Grunnings. Veur mien klaainkinder heb k n twijtoaleg boukje schreven over n hondje dat oetnaaid was en van aal beleefd. Doarnoa bin k wieder goan mit n boukje over n schouljuvver dij noa n hazzeninfarct in n verleeghoes te laande komt. Heur ervoarens stoan in: “Getwiende droaden”, woar k nog n oetgever veur hoop te vinden.
Nou bin k mien twijde bouk: “Losse flodders” aan t deurplougen om t zoakie wat leesboarder te moaken. t Bestait oet n twintegtaal lösse verhoalen en evenzoveul verskes.
