12 augustus 2026
As mieghummels oet de grond
kroepen ze in t licht.
Zo in de vrouge oavendstond
op zuik noar beter zicht.
Onder dwang liekt het wel
verloat men hoes en airco.
t Is waarm, veul bloot vel,
körte boksems en zo.
Wat is hier loos?
In d’hoezen giftege dampen?
Men liekt wel roadeloos.
Gaauw vot bie aal dij rampen!
Of worden der nije goden aanbeden?
Vanoet baarms mit open deuren
smeken om n beter heden?
Of om wat aans zeuren?
Doalen der aliens oet de lucht
en hebben dai t wel goud mit ons veur?
Mouten we din op de vlucht
en mouten we der vandeur?
Hail spannend is t vast
as je vergeten t nijs te beluustern.
Zo worden je oareg verrast
deur de zunsverduustern.
