Zunder gelok
Ik stel joe geern veur
aan n vrundenpoar.
Baaide al wat meleur,
op leeftied is dat nait roar.
D’aine wurgt zok dagdeur.
t Dut òf en tou wat zeer,
mor vot mor, gain gezeur,
toene vragt veul beheer.
D’aander sloapt lekker oet,
dou mor rusteg aan.
Meschien vandoag sokkerstoet?
Kovviedrinken komt der al aan.
D’aine het n wat older hoes.
Mooi man, genog ommaans.
Lekker boeten, net n vrizze does!
Zaiktes hebben hier gain kaans.
D’aander het n appartment,
zes hoog, nij en gain waark.
Knuteren is e nait wend,
onhandeg en nait staark.
D’aine fietst, helmpje op kop.
Overal wat te beleven
en lopen, helderop.
n Gang! t Duurt mor even.
D’aander het n fitnessfertuut
kregen van n bezörgde zeun.
Hai pakt hom eerstkans nait uut,
aan dinken laaidt al tot gekreun.
D’aine is schier dun,
holt dat goud in de goaten.
Gezond eten is t begun!
Roken en draank? Stoan loaten!
D’aander kin gain ho.
Lekker vet eten in zien bakje,
wientje der bie, gain kokeleko.
Petatje mayo is zien laifste prakje.
Op stroat lopt aine in t swaart
mit n zaais op zien nek.
Wat n affeer, sums gaait t haard.
Aan klanten gain gebrek.
Ain van baaiden is de bok.
Op welke deur komt de klop?
Mor hai het noa n dag, zo drok,
gain zin meer aan aal dij trappen op.
