Zeg ijs van nich en jaowol en wat schôl mie dat dan?
Sierlek mooi weer waas t op dunderdagmirreg 4 juni ien Zèlgn.
En dóár haren wie verlet om, want nou kon prizzentoatsie en opening van ons Neuteboomprojekt ien boeten. In de SHC De Oude Stelmakerij kinnen nait n bult minsen haarbaargd worden. En dij waren wel ofkommen op prizzentoatsie van ons roeteboukje en opening van tentoonstellen. t Boukje het de titel mitkregen: ‘’In de Westerwoldse sporen van meester-schrijver J.H. Neuteboom. Een fiets- of wandelroute in en rond Sellingen”. As eersten kwamen der zo’n viefteg bovenbaauwers van drij Westerwoldse schoulen mit t laid ‘WalingWubbe’ op t pebliek aanbroezen. Leerlingen van CBS Het Gebint ien Zèlgn, OBS Meester Neuteboom van Knoal en OBS Plaggenborg ien Jipsenhoezen. Soam mit zanger-laidschriever Alex Vissering laiten ze Neutebooms balloade Waling-Wubbe heuren. Alex haar t gedicht spesioal veur dizze gelegenhaid op meziek zet.
En dou kwam prizzentoatsie van t boukje aan bod. Zo’n boukje oetgeven, dat het hail wat om hakken! Ien 2014 mozzen wie doarveur zulfs eerst n stichting ien t leven roupen. Toaken mozzen verdaild worden. Wel wol veurzitter, wel siktoares en wel puutholder worden? Wat mozzen wie as doul omschrieven? t Geluk dainde ons. Geert Luth, ons veurzitter, von n Grunneger netoares dij ons helpen wol mit de oprichtensakte. Ons nijbakken puutholder stokblied! Dij akte mos ’vanzulf’ ien t Nederlands: “De stichting heeft ten doel om het literaire werk van Jan Hendrik Neuteboom en voorts de streek Westerwolde bij een zo breed mogelijk publiek bekend te maken.”
Nou mot ik eerst nog even wat oetstukken over J.H. Neuteboom (1865-1929). Hai wer geboren in Vlagtwedde. Neuteboom waas van 1884-1896 onderwiezer in Zèlgn. Pas noa zien vertrek naor Den Haag begon e gedichten en verhoalen te schrieven in t Westerwoldse dialekt. En hou! Lees zulf mor. n Digitoale versie van ‘De Verzamelde werken van J.H. Neuteboom’ is te vienden op www.webloug.nl/jan-hendrik-neuteboom/ Omdat wie Neutebooms verhoalen gloepend schier vienen, opschreven ien n hail aigen, levensechte stijl, bedochten wie dat wie dij promoten wollen.
Hou? Wie konnen niks beders bedenken as n handzoam roeteboukje dij de lezer bie plekken bringen zol oet de verhoalen van J.H. Neuteboom. In t eerste begun vil t nait mit om Westerwolders waarm te moaken veur ons plan. Wat wollen dij vremde strosnieders mit heur plan veur n zoveulste fietstocht in Westerwol? Mor mit ons aalgedurege oetleg dat t gain aaldoagse fietstocht wezen zol, mor tougelieks ook n kennesmoaken mit ain van de grootste Grunneger schrievers, en dat de fietser vanoet t heden t Westerwoldse verleden ienkieken kin, kregen wie aal meer lu over meet.
Goie moud is t haalve levent en stoaregaan, d.w.z. mit n poar honderd mailtjes, kwam boudel op rit en hulp van ale kanten, mit as eersten Marijke & Alex Vissering, meester Panman (CBS Het Gebint), Ria van Gerresheim/Biebeltaik Vlagtwedde), Helen Kämink (Streekhistorisch centrum Stadskanaal), enz. enz.
t Eerste eksemploar van t boukje, n haile schiere oetgoave van Profiel Uitgeverij (Beem), kon op 4 juni door ons veurzitter oetlangd worden aan eregast Henk Neuteboom, klaainzeun van Jan Hendrik.
Henk Neuteboom en kiender van de Neuteboomschoul. Foto: P. Ottay.
Henk Neuteboom en zien vraauw waren veur dizze gelegenhaid spesioal haildaal oet Bergerac/Frankriek noar Zèlng overkommen. Henk haar zien dochter en heur man oet Hoogkerk ook mitnomen.
Eerst nog even wat over t boukje. Tiedens n fiets – of wandeltocht kinnen in en rond t dörp Zèlgn tien plekken aandoan worden dij in Neutebooms verhoalen n rol speulen. Op dij plekken kinnen biebeheurende verhoalfragmenten in t twijtoaleg boukje lezen worden.
Zóveul gelukzegen, doar mot n slag op kommen, zol mien moeke zegd hemmen. En ze kreeg geliek. Van te veuren haren wie overaal rondzegd dat ter ook n meugelkhaid wezen zol om de verhoalfragmenten te beluustern. Westerwoldse dichter Hanne Wilzing haar ze doarveur spesioal ienlezen bie Radio Westerwolde en ze zollen via n Geo Layar app te beluustern wezen. De Layar app zol vergees deellood worden kinnen deur omslag van t boukje te skennen. t Zol deur n Amsterdams bedrief beschikboar moakt worden. Zo waas ons verzekerd.
Véúr de prizzentoatsie wollen wie t vanzulf eerst even oetperbaaiern. Mor niks hur! Gain duvel te heuren! App waas nog onder konstruktie, wer ons op mirreg van prizzentoatsie luchteg verteld! Noa even wat sloeken en goud wat hikhakkerij wer ons touzegd dat de app zo gaauw meugelk waarken zol. Of dat zo is, hemmen wie op t mement van dit schrieven nog nait oetperbaaiern kind.
Genog der over. Gelukkeg ben-we nou aanbeland bie opening van tentoonstellen: Meester Neuteboom, schrijver van Westerwolde. Noar t leek haar t eerste dail van ons pergram zó laang duurt, dat ain oet t publiek, dij noast wetholder zat, bezörgd aan ons vroug, of wie vergeten waren dat wetholder ook nog n woordje doun zol! “Nee hur, wie hopen zulfs dat wetholder nog hailtied tentoonstellen openen wil!’’ Mit veul flair wer dat doan deur wetholder Giny Luth (gain femilie), van gemainte Vlagtwedde. Tentoonstellen is meroakels ienricht deur t Streekhistorisch Centrum Stadskanaal. Der is o.a. n leutje 19e aiws klaske ienricht, mit zo’n ol twijzitsbankje, n telroam, n leesplaank en aal zukswat. Minsen oet Westerwolde haren o.a. grivveldeuzen oetlaaind.
Der waas veur de bovenbaauwleerlingen ook nog n taikenwedstried organiseerd: Onze school in Westerwolde, vroeger en nu. Jury haar n schildersezel opsteld en doar de prieswinnende taikens, inliest en aal, achtersteveuren op hinzet. Ain veur ain werden ze onthuld. Prieswinnoars waren:
- Marc Linden van OBS Plaggenborg. 2. Esmee Smit van Meester Neuteboomschoul. 3. Andria Meendering van CBS Het Gebint.
Tentoonstellen over meester Neuteboom en t onderwies in Westerwolde is te bezuiken in SHC De Oude Stelmakerij, tot en mit 31 augustus 2015 van wonsdag tot en mit zoaterdag van 10.00-16.00 uur en op zundag van 13.00-16.00 uur. Entree is vergees.
Noamens de J.H. Neuteboomstichting
Jan Sleumer (siktoares)
