Wotterdik
Nee, zien overtuugen op t vlak van zond eten en veul bewegen, belidt Joakob nait ien stilleghaid. t Is en blift zien laimeneerstuutje en hai wait eerlieks woar hail veul van dij dorie òf. Tot vervelens aan tou proat e der over en ie kriegen noa zo’n prevelement eerder zin om t ter mor ais goud bie te zetten ien snackbar den over te goan op zien eet- en bewegensleer. As e joardag het traktaaiert e lu dij der nog aal kommen op nog meer wiesheden en op appelsienesap mit stukjes temoat en komkommer. Ain dij noar Joakob zien leer leeft, mout den ook wel hoamel en smui wezen.
Joakob het ain dorie. Zulf is e dik; nait aaldoags dik mor eerlieks dik. Ontronteg dik!
![](https://dideldom.nu/wp-content/uploads/2023/07/afbeelding-231.png)
Aaid mor gezond en n luk beetje eten en doarbie veul ien bewegen wezen en den toch veuls te dik! Kin ja hoast nait!
Gainain snapt hou of t kin en veur homzulf is t ook n pienlek onderwaarp.
As ie hom vroagen hou of dat t kin, zegt e dat e allenneg van wotter al dik wordt en dat t te moaken het mit n oetzunderleke en aarfleke stofwisselndorie. Doarnoa veraandert e gaauw van onderwaarp.
Achter zien rug nuimen ze Joakob Wotterdik. t Is nait zo dat e, noast zond en waineg eten, nait veul dut om òf te vaalen.
Zo fietst e elke dag dik datteg kilometer noar Stad hinneweer en bie schier weer zulfs twij moal doags.
Nooit het e gezelschop; hai fietst of lopt aaid allain. As e muid is van t fietsen, stapt e òf en lopt e n ind mit fiets aan haand en zo kommem lu hom voak tegen op weg van en noar Stad tou. Lu dij hom kinnen, hebben mit hom te doun; lu dij hom allenneg mor kinnen van hom tegenkommen, vienden hom n wat apaart koegelrond kereltje op of noast fiets.
Der is gain ain dij wait wat of e dut ien Stad. Zit e doar op n baankje ien n paark wat oet te rusten? Dut e ienkopen ien Reformwinkel? Zuikt e femilie op? Het e meschains n kammeroadje?
Gain ain dij t wait.
Antwoord ligt, zoas veul lu al wel ais grinnikend zegd hebben, veur de haand.
Elke dag fietst Joakob over n bult omwegen noar n stille, wat òflegen wiek.
Tegenover n modern kantoorgebaauw van drij verdaipens zit n snackbar, dij haile dag deur open is.
Doar stapt e van fiets òf en gaait ter ien om zuk doar vol te proppen mit petat mit mayo of n petatje oorlog, volgd deur ain din wel meer kreketten, frikandellen en gakbaalen mit pindoasaus. Dat alles votspould mit grote gloazen cola. Gain ain kin hom doar en hai is der n rondom aander minsk.
Joakob zien gehaaim zol nog laang n gehaaim bleven wezen as nait op n dag Klaas van Koos en Sinie, dij körtens weer bie Joakob op joardag nuigd binnnen, n boan kregen haar op t kantoor tegenover snackbar.
Achter zien bureau op twijde verdaipen vot kin Klaas klandizie van snackbar zitten zain. Hai verboast zuk der over dat zien as n asceet levende dörpsgenoot, der sums twij moal doags noar binnen gaait om zuk vol te proppen mit junkfood. Hai grinnikt bie gedachte aan kommend joardag van Joakob.