Woarhaid
Hai nuimde heur aaid laiverd,
zai antwoordde laif: “Mien tude”.
Kregen in t geniep n verholden,
kocht heur weekelks wat rozen.
Stonden op tocht en werden verkolden.
Geft niks as joe van nkander holden.
Gain mensk is der verlaifder west,
as dit jonge gelokkege poar.
Ze smokden mekoar in t openboar
nieds was dou nog de rest.
Hebben ons toun loaten waiten,
dat ze traauwen wollen dit joar.
Laifde was aans gain bliever,
den noa n dik anderhaalf joar,
wazzen ze nkander al weer zat
en gongen zie oet mekoar.
Tudebekje wer weer kadde,
rooskes kregen dikke stiekels.
Veur heur baaident vuil dou t douk.
t Huwelk noa laank geproat op stroat.
En noa nait ains zo’n laank tied
luip elks mit n aander rond.
Wel of dou ok woare vond?
Heur ring blift bloots n herinnern.
