Ie kinnen der mit lezen en schrieven
Zellen wie moar goan,
d’dag is op t inde.
d’Noatuur trekt zoch terogge,
d’bloumkes goan dicht.
Winkels goan sluten,
t wordt rusteg op stroade.
d’Kraanten bin òflangd,
t Rondje vlaigen is achter d’rògge,
d’Laampen goan aan,
moar t daglicht goat uut.
d’Gerdienen goan dicht,
t waark zit der op.
n Vogel flòit nog ain keer,
Din wordt t stil, wie goan.
Wonnen en geboren in Ol Pekel in de tied dat de zeuven stroketonfebrieken nog volop draaien deden en overaal nog Grunnegs proat wuir. In Ol Pekel heb ik de Geertsschool en doarnoa de MULO (nait òfmokt) bezögt. Aan de Grafische School in Stad heb ik het diplomoa boukdrokken hoald. Loater noast mien waark MAVO, HAVO en VWO òfmokt. Doarnoa kört ain Rechtenstudie in Rötterdam en aan de OU volgt. Op t leste de HBO Bachelor Inkoop aan de Inkoopakkedemie òfrond.
Ik heb ook nog in Stad, in Zuudbrouk en in Veendam woond. Mooie herinnerns bewoar ik aan mien rol as basgitarist bie “The Haunts” in de joaren ‘67 en ‘68.
Omdat dat goud was veur mien carrière bie de PTT/KPN bin ik verhoesd noar de Raandstad. Eerst heb ik in Zeuvenhuzen woond, toun in Den Hoag, toun in Waddinxveen en op t leste, sinds 1993, in Laaiden.
Noarmoate ik laanger weg was uut Grunnen, houveul meer ik de toal mizzen dee.
Spiedelk genog hebben we t noeit schrieven leerd op school. Lezen dee ik het wél. Doarom bin ik stukjes goan schrieven in Kreuze en zo ontdekte ik wat veur ain geweldige toal het Grunnegs wel is.
