Wat goud is…..
Wat is goud en wat is slecht….
Vroag nooit degeen dei t zeker wait,
want dei is nait oprecht!?
Guster zat ik weer eem in t verleden.
k Docht an de plietsies van dou. In Scheemde wazzen der in dei tied wel n stok of vieve,
dei geregeld deur ons ploatske fietsten om de orde in tact te holl n.
Aine der van was bie ons -jeugd- groag gezain, Olsder! Hai was ait aarg sportief en daailde aans gain bekeur n oet asdat t hoog neudeg was!
Tiedens t voetball n op t schoulplain schupde ain van d jongs de bale over t hek…
Hai stoiterde n moal of wat op Torenstroate en… boem! Tegen Olsder zien fietse!
Olsder stapde oaf, stoiterde d baale n moal of wat en zee: De voetbalwestrijd wordt tot nader order uitgesteld!
Dee d baale in fietstasse en fietste vot..
Aanderdoags kwam e weer langs in t speulketaar… Gooide de baale in d locht en nam hom op tone.
Kieken, of k hom ook over t hek kriegen kin!
Nait weer doun he. Beter richten!
Zo ook n kwoajong, dei der aanstoe m kwam op n plof…. Halt! Wat jagst ja haard! Hou old bist doe?
Vieftien Olsder! Olsder verbollereerd: Wat ja eerlek! k Zel die doarom nait bebouten, nou noar hoes, en nait op dat ding he! Lopen!!
As k zai, dast weer opstapst, krigst alsnog n dikke boute!
Transpoteur Haarm Heeres oet Nij Scheemde ree zunder oet te kieken van Zwoag noar d Meulenstroate…
Hai lette eem nait op en zag te loat, dat der al n auto over t Koudaipbrogge ree…
Mit truuk en treler op kop in sloot! Olsder komt der aan op fietse, stapt oaf en zegd: das nait te mooi Haarm!
Nee, kloten! Heb k die al ais eerder bekeurd? Nee, nait da k wait!
Den is dit d eerste moal!
En zulf ree ik op de Kapitein Mobylette deur d bochte bie t stainfebriek dou Olsder achter n boom weg sprong en Halt! raip…
Dat is goud mis schoot mie deur de kop… k Heb ja gain remmen!
k Stoof hom mit nog n beste gang veurbie…. keerde om en zee: ie laiten mie schrikken!
Zel wel, mor dien remmen doun t nait! Noa nog wat gesputter van mien kaante zee e: doe waist vast beter, mor doe gaist nou noar hoes
en letst d boudel vot moaken, begrepen? Joa Olsder.
Ik kom die noa heur! En as t nait dust, krigst asnog n dikke boute!
Ik vertelde t verhoal an mien voar, mor dei toalde nait…. Vot deur noar Mantjes, dei zit te springen om zien drokwaark!
Tegensputtern hailp nait… De klant ging in dit geval veur!
Intied, da k richten Maiden ree, is Olsder langs west en ik denk, dat mien voar verteld het, dat ik niks zegd heb….?
n Poar jpar loater kreeg k mien auto riebewies en mocht ik de klanten langs in ons ,Kevertje’.
Dou Olsder dat deur kreeg, hail e mie elke bod as e mie zag, aan! Halt!!
Soms wel vaar keer in d weke! En elke bod zee e: Papieren graag!
k Wuir der narreg van en vroug hom: Woarom dou je dat aal? Ie pakken mie toch nait! k Heb pepieren aait bie mie!
Dat waist mor noeit! Ainmoal nait, den krigst n beste boute! Hest nog van mie te goud!
Ik docht geliek aan de Kaptein zunder remmen! Verr.., dei galsterd!
Nou, zeumteg joar loater liekt t woord respect in t woordenbouk schrapt te wees n….
Anno 2023 is dei nait an de mens besteed. Op t mobieltje stait ja wel drei moal zoveul! Zulf denken?
Huift ja nait! Alles, mor din ook alles is der op te vinden… !
t Begunt al bie de klaintjes en ondanks, dat der veul schiere dingen op te vinden benn n, stait der ook veul rommel op?
Kinder worden hassenspuild zee moeke lest, en dat kin k wel mit heur ains wees n..
De wereld is ook slim verandert in zeumteg joar gaf ik aan. Op stroate speule n is der nait meer bie!
Ken ook ja nait! t Is aal blik!
En jeugdsozen woaras zai meziek moaken kenn n ook nait! As je ze rondslingern zain den zai je, dat ze zok strierlek verveel n!
Joa, en zo worden t makkelk prooi n van de criminail n! Op t plain bie ons wordt al doaglieks handeld-deald- deur jong en old!!
Plietsie komt enkelt n moal langs in n auto…
Meer blauw op stroate? Kinder thoes beter opvouden? Ik zol t nait waiten!
De wereld verandert in sneltrain voart…. Onze laiders doun doaraan dapper mit!
,Legoale ‘ gokkerijen as casino s en kansspeuln as lotto, enz. enz lokken joe mit vette priezen en elk schient miljonair te worden willen….
Bie de supers zai je atsmits ,aarme’ luu n haile reeks kraskoatjes trekken, in de hoop, dat ook zai es n schier bedrag winnen….!
Of Olsder den trogge kommen mout? Denk het ook nait…
De man zol, as e de hangjonkies aansprak over heur gedrag en het onvaileg moaken van t voutpad veur de super, allend
mot grote bekken kriegen…. Hai zol den wel bekeurn, mor der vast nait frisser van worden.
Nee, begunnen bie de wortel zee ons voar aait. Gain mooie proatjes en veuraal nait zo laigen as ons laiders al joaren doun.
Ie zain al wel… Ik wait ook nait hou t mout! Wel wil ik de hoop nait opgeem…..
Of d wale t schip keert?
Mien gedachten: Wat goud is, mout je zo loaten!
In ons jeugd al, was Olsder ons beste kameroad!
