Veur aiweg jong
t was duuster
mor der braandde licht
aan overkaant van stroat
as n magneet
wol ik der hèn
mor t was ja aal zo loat
ik was aal laang
n olle vraauw
en zukswat dut men nait
mor ik wol
toch wel aibels geern
wat laifs veur mien verdrait
ik bin ja nog
zo jong van haart
en nog vol levenslust
ik krieg ja nog
n rooie kop
as jongeman mie kust
k heb lezen
in n hail dik bouk
en k spraaid mien aarms wied
ik blief
veur aiweg t leutje wicht
veur God bestaait gain tied