Vergeten
Wat vergeten?
Smörgens vroagen wat of wie eten goan
wel vief keer verteld,
soms wat vergreld
mor hai is t vot weer vergeten…
Ik heb die toch zegd,
aaldeur oetlegd
wat ik kocht heb en wat wie eten goan.
Hai kikt mie aan, hai is t al weer vergeten…
Noamen van kinder en klaainkinder,
hai is ze vergeten…
Femilie en vrunden? zeggen hom niks
meer,
k vertel t hom, aaldeur weer,
mor t is net as mit t eten:
hai is alles zo weer vergeten…
Inains kikt e mie aan,
hai laagt en zegt:
Zo, gek wicht oet Midwolle!
Hai liekt even weer d’olle.
Dìn draait e zok om, hai mot eten.
Mie is e al laank weer vergeten…
