Vries de-Blaauw, Gepke

De Polen, dij n groot dail van Oost-Grunnen bevrijd hemmen, werden hail laank opholden in Finnerwolle, Beerte en Drijbörg. Dat was mit de schuld van boer Ebels op Polderweg, dij haar n grode gehaaime zender in zien boerderij en hai gaf deur aan de Duutsers woar de Polen zaten, tot t leste tou.
Dij Polen binnen doar zo kwoad om worden (zai hebben doar veul soldoaten verloren), dat ze, dou ze doar bie boerderij van Ebels wazzen, boer en zien vraauw veur d’ogen van heur kinder en Ebels zien olle moeke, doodschoten hebben.
Vot doarnoa hemmen ze boerderij in braand stoken. Kinder (Wieneke, Fekko en Derk Doeko) en ol mevraauw Ebels binnen doarbie omkommen.
Dit verhoal vergeet ik nooit, ik speulde voak mit Wieneke en Fekko.

Wonen aan Hoofdweg in t Oostenne, noar schoule in t Westenne… Wie gingen lopens noar schoule, konden asmits mitrieden op n boerenwoagen, totdat t nait meer mog van Meester… Ain van d’jongens vol derof en brak zien bain…
Swinters gingen we glieden over d’weg! Dat kon toun nog, der waren ja nog gain auto’s.
Allenneg peerdokter haar n auto.

Onze dokter Magendans haar n dikke motor.

Hai kwam aaltied om middag bie ons, keek in pane en as t om goud tou leek, bleef e eten.
Op schoule was meester De Vries dou ook al “Meester Proeme”, Juffrouw Buremoa was aaltied “Knapkoukje”… Woarom? Ik wait t nait. Toch was dat n best mens. Wie haren aaltied roezie mit kinder van ‘Koksjoanse” schoule. Noa schoultied speulde je weer mit mekoar, der waren ook nait veul aandern. Veurdat wie noar schoule gingen, mozzen we voak nog eerst noar toene, bonen en spruutjes plokken of mangels ruden.
Midwolle was ook t dörp van “Ol Graitje”, doar gingen we mit noar speultoene bie “Hessenbril”, of “Wedderveer”, of noar oomkes en taantes.
“Midwolle”, herinneringen van veur en tiedens d’oorlog, mooie tied? Toch wel! In t Oostenne was ik ja kind mit de kinder. Loater, in woningbaauw, waren der twij lutje bruiers, ik mos moeke helpen. Zoaterdoags bloumentoene aanhaarken, stroade vegen en dìn gingen we ook voak noar t kerkhof, graf van Opa en Opoe Wolle schier moaken. Twinteg joar “Midwolle”, dat vergeet je nait! Noa dij tied kwam je allenneg mor meer op vezide, mor dij herinneringen nemt gainaine mie of!

Nait zo’n slechte tied, veur en in de Twaide Wereldoorlog.
Wonen in t Oostenne haar veurdailen, veul roemte, veul boerenploatsen mit n appelhof, veul sloten en grachten, mooi speulterraain in t zandgat, törfkloeten zuiken in t veen en scheuveln op t Koudaip, noar Termunten en weerom.
Bie hoes speulen op t blaikveld woar ook sege aan t stek ston, klaaine sikjes aten mie de topjes van mien kniekouzen of. Moeke kwoad, ze was zo wies mit dij widde kniekouzen, mor ik was ze nait weerd zee ze, veul te kwoajongensachteg. Bie onze buurvraauw, vrouw Loer, kon ik wegkroepen onder t schoet, as aandern mie te noa kwammen,.t Was n gezelleg dik mìns, zai huil ons aaltied in de goaten as moeke ains weg was.
Jongens woar ik mit noar schoule ging, Heiko, Hendrik, Wiecher, Warntje en Appie, ze haren smörgens al n stok veur mie, Kok- sioanen mozzen weer n pak haauwe hebben… Dicht bie schoule werden stokken votstopt in beukenhege bie klokkengaiterij, as wie weer oet schoule kwammen, wazzen ze vot.
Oetvoeren van T.O.N.I.D.O., in Oostwold in hotel ‘De Witte Zwaan’ en in Midwolle in café Hillengoa. Generoale repetietsie in Oostwold, mit n koppel wichter, lopens weerom, Fienie, Fenna, Catrientje, Anje en nog veul meer, belletje trekken en zokswat.

Ainmoal kregen wie Jan Pieter Baarghoes (klompenmoaker) achter ons aan, op hozevörrels. Hai kreeg Fienie Kloassens te pakken, dij het in hoes goud op heur kop had van heur pa, moar wie haren veul lol. Zo kìn k nog wel n zetje deurgoan, mor dat dou k mor nait, misschain n aander keer.

Scheuveln is doan, t is deu. Opdracht van moeke: “Kom nait bie graachte! As t nat in hoes komst, ist nait best!” Toch even ies pebaaiern. Nadde vouten in klompen…. In schoule sokken oet en bie grode kachel dreugen. t Stonk as de pest, aal dij fieze sokken, nat van aal dat wotter oet graachte.
Weeromraaize wazzen sokken dreuge en klompen ook. Mit mekoar scholtje lopen, prachteg was dat! Mit vaaier, vief man op ain scholle. Dij brekt vanzulf…. Tot t lief tou in t wotter…. Nat, kold….. Hou mout dat nou, as k in hoes kom?
Grode bruier (woar k aaltied roezie mit haar) slagt aarm om mie tou en zegt: “Kom mor mit, k zel wel zeggen dat k die derin stöt heb…”

Dij kinder dij nait noar aandre schoule gingen, mozzen de achtste klazze ook nog doun, bevel van de Duutsers nog. Dou ik van schoule of was, mos ik in hoes helpen, der was aaltied genog te doun mit twij klaaine bruiers, mor ik mos ook wat verdainen, dat wer kraante rondbrengen. Noa d’oorlog kón dat weer en t was “Het Vrije Volk”, paasde ook sekuur bie ons hoesholden. k Mos der hailmoal mit achter noar t veen, weer of gain weer, licht of duuster… Dat mos dìn ook nog lopens, fietse was der ja nog nait.

k Von der niks aan en k was voak baange. Der kwam mie aingoal n kerel achterop fietsen en dij wol mie aaltied wel mitnemen, toun ook al…. k Heb t nooit doan, mor as k t in hoes vertelde, zee moeke aaltied dat ik mie nait aanstellen mos.
Poar moanden loater kreeg moeke bonnen veur n nije fietse, n “Veeno”. “n Haile goie”, zee pa, hai haar om leuf ik kocht bie Thomas Looyenga, dij was ook fietsenmoaker in Midwolle. d’Eerste tied mog ik hom nog nait broeken, dat was ja zunde, ik was doar veuls te roeg mit…. Fietse het joaren mitgoan. Toun ik al laank aner waark dee, broekte ik hom nog. k Wait t nait zeker meer, mor volgens mie heb k hom ook mitkregen dou ik in verplegen goan bìn. Der wazzen dou best goie fietsen, ook in Midwolle, zesteg joar leden, doch best n mooi dörp!