Vekaanzie
Laankoet drievend
op n oranje luchtbèr
om mie tou wotter
glinsternd in zunschien
omliest deur baargen
en gold-geel zaand
Zun omaarmt mie
n genouglek gevuil
kriewelt mie deur t lief
mit mien ogen dicht
loat k mie stillekes
hinneweer zuzooien
Wind poest mie vot
van t drokke straand en
k luuster noar t geluud
van kabbelnde golfkes
k lig te genottern
op mien allaintjes
t Is hier zo vredeg
zun, zee ale roemte
t moakt mie soesderg
niks mout ales mag
tied aan miezulf
k heb vekaanzie !