Vaar weke vekansie….Noordkaap den mor?

In de loate joaren zeumteg ging ons leem radikoal om!

De vrouw haar net n wolwinkeltje opent en ik was mit n hellege kop oet t femiliebedrief stapt. t Kin verkeren!’ zee Bredero.

Gelokkeg zee Wim van Hanegem: Elk nadeel heb z n voordeel! (ja, dat het hai bedocht… en nait zoas wie ait dochten Johan Cruiff!)

En zo was t dou ook. Via n advertensie kreeg k n nije boas. t Wuir wat de sfeer betreft der nait beter op as bie mien olle boan, mor ik haar nait veul keuze! De start was wel goud. Hai vroug mie noa n poar weke al of ik ook vekansie pland haar……?

In de tied, da k bie mien voar waarkte kregen wie nait meer as n weke, omreden dat t aait veuls te drok was!! Doarom zee k ducht mie adrem: Ja, wie hebben Scandinavie besproken! Vaar weke! -loog k der omzuns eem bie…..Ik schrok doar zulf van, mor tot mien verboazen zee e: Dat is goed! Wanneer? Dat zel k joe aander weke precies waiten loaten!

t Was hom aal goud…. nou gauw op koarten kieken, wat meugelk was enz. De Noordkaap! Liekt die dat wat? Is dat nait te wied? Wat moakt t oet! Wie hebben ja vaar weke! End juli in de Simca 1300 en s oams al achter in Denemarken…. (zai mien veurege stokje: Verloofd).

Vanwege de toustanden en aargenis deur de veraanderns in Tivoli aanderdoags geliek op de boot noor Noorwegen…Tiedens n proatje mit n Zweed, -aan board van t schip- vroug e woar wie noar tou gingen…? De Noordkaap is t plan…Heb je zolang tied? Wait je wel hou wied dat is? Nee! Vanoet Holland kin je rekenen op wel zeumdoezend kilometer! Moeke slook n moal of wat oareg haard en zee verschrikt, mor goud duudelk: Dat dou ve nait! Veuls te wied!

De man pakde n koarte en stippelde n route veur ons oet, dei volgens hom veul schierder was! Hai was veur ons de TomTom in dei tied! n Mooiere raize hadden wie ons nait denken kent!

Wie stonden opains veur n baarg…. n Smaal spli-wegje mos ve op…… Moeke geliek baange. Dat dust mie nait! Kinder en ik dochten doar aans over en dus: noar boven. Staail! Wie haarn t nog noeit zo aarg had! De veurroaden zo n 80 cm hoger as achter. Zagen allend de mooie blauwe locht liggend op de stoulen! Moeke keek aalgedureg opzied en ging den mit kop onder t roam zitten mit t zwait in handen…. Zo daip was de oafgrond! En…. vlak aan d raante van t pad, woarop wie reden! k Haar t zulf ook nait te roem! Was ve mor boven, docht ik aal. Dou ve boom kwamen, bleek dat ve de ,Prekestoule’ beklommen hadden….

An daander kaante kon ve gelokkeg over n normoale stroate der weer oaf, op noar n nij oamtuur. t Simcachie begon wat roar te doun, aalgedureg vuil t motortje stil en mos ve n tiedje rusten, veur dat e wieder wol… Noa-ween van de beklimming van de Prekestoule??

Ook weer over baargen, mor den luttjen, wuir t aal stiller op de weg. En op n duur hailndal niks meer! Gain auto s, gain hoezen, niks!! Gelokkig wel n goud begoanboare stroate! De auto begon aal meer te sputtern en nou sloug mie de schrik om t haarte. k Heb wel n poar tankjes benzine, docht ik, mor as wie naarns tanken kinn n, wat den?

Noa n dik uur rieden raip ons dochter: Even stoppen pap! Daar staat een geit! En inderdoad! Wie stoppen en d kinder stoven noar boeten om t daartje te knuffeln! Zai wazzen schienboar blied endelk weer ais leem te zain! k Heb doar loater voak n moal an trogge docht!!

Noa de rit te vervolgen laip doar opains n vent in n kleureg pak mit lappen op scholder…. t Roampie noar beneden en vroagen of der in de buurt messchain n benzinepompe was…..? Helaas! Gain meugelkhaid om mekoar te begriepen!! Mit geboarntoal den mor! Mit n bekertje in d haand en doun of ik drinken wol, en wiezend op de auto kreeg e deur da k bezine hebben mos… Hai, wiezend op zien hoeloge dee mie begriepen, dat zo n haalf uur rieden, der n pompe stoan zol. Wie haarn n kander goud begrepen! n Shell-pompe! De tank vol en vroagt noar twei lampen, omdat t veurlicht aal zwakker wuir! No, wie have not! Den mor op geluk deurrieden. Gelokkeg reden wie n stadje binnen en geliek lait d auto t weer oafwaiten!

De wegenwacht doar belt en noa zo n rwinteg minuten loater n kroanwoagen op zied mit de vroag of wie belt haarn? Yes! zee ik, in de hoop, dat e t begreep…. en dat dee e. n Koabel oetrolt en op noar n garage. Dei was wieder vot as wie docht haarn in zo n klain ploatske….. !! (hai wos wel van wanten!!) De monteur bekeek wat der mis was en legde oet, wat e vonden haar… n Onderdail was haalf smolten. Ik kon n nije kopen of dizze reviseern. Wol ik n nije, den mos ik twei doage wachten.. Reviseern zol n dag duurn en was zowat d helfte goudkoper. Dat mor den. Wie konden t stadje ja wel bekieken en wat eten was ook nait verkeerd. Om vief uur kieken of e kloar was. Gelukkig wel! Betoalen en rieden mot weer.

Bie t stadje wiederop was t zulfde laidje: minder licht en nog mor n keer oetbloazen! Bah! zee k. Nog nait goud dus! Dou e ter weer an tou haar zag ik n bord mit de tekst: ,Zimmer vrai’… Ik dam op en of de Simca zeggen wol: Tot hier en nait wieder, sloug t motorgie prompt weer oaf! Noa t aanmelden de stad in om wat te eten en omdat wie al zoveul oetgeven haarn, kon n oetgebraide heerleke moaltied der ook nog wel oaf, docht ik! Woarop n Deen vroug: Hast Du zoviel geld? Wiezo den? vroug ik…. Sehr teuer!! En dat bleek bie t oafreken!!

Op trograize mor eem bie bruir in Lubeck aan, zee k tegen de vrauw en kieken of zien zeun mie helpen kin? Dou mor! Helaas kon dei t euvel ook nait kloaren en biffe op de bonefooi mor richten Scheemde reden.

d Weke der op weer an t waark…. Lait e mie in Stad, -in n stromende regen- weer stoan! ANWB beld en via hom n nij onderdail van dealer Alles inbouwt. Onderweg noar hoes docht ik: mor geliek noar de garage. Sloug e twinteg meter veur de garage weer oaf! Kon in de vrijloop nog net op dam kommen. Ie snappen vast wel wa k doarnoa besloot: Vot mit dat ding! Wat het dizze vekansie ons wel nait kost vroug moeke…..? k Wil t nait waiten was mien antwoord, mor loater heb k stiekom toch de nota s opteld en kwam k boven vaardoezend gulden oet!! Brrr! Dat dee zeer!

n Laank oamtuur mit prachtege herinnerns….. Dat mog ook ja wel wat kosten!