Tom Tom

Gezienus en Geesje binnen gain echte vekaanzieminsen. Aiglieks hebben zai der ook gain tied
veur. Der is aaltied wel wat te doun op boerderij en dat let zuk nait ien n agenda stoppen.
Deurdat Gezienus groag n beetje handelt en kwaanzelt, haar hai twij joar leden n nog knappe
caravan op kop tikt. Der was ain, dij zien vekaanziehoeske op wielen wel ruilen wol veur vatteg
boal koelgras dij Gezienus over haar. Dij ruil was aangoan.
Geesje haar dat mor niks vonden en haar der over foeterd. Wat mozzen zai as boerelu nou mit
zo’n fertuut. Mor dou zai der n moal mit heur twijbaaident mit op raais west haren noar Drint, haar Geesje smoak te pakken kregen. Noa nog n weekendje Achterhouk, wazzen zai loater zulfs al n moal ien Limburg west.
Dit joar haar der n boetenlandse raais op pergram stoan. Tou België ien zol t goan, haldaal
noar Ardennen. Dat von Gezienus wel n beetje spannend, mor hai haar n Tom Tom op zien joardag vroagd, en ook kregen, en doar konden ze mooi mit op pad. Wegenkoarten konden thoes blieven; hikhakkerij over welkse òfslag zai hebben mozzen was vleden tied.
Raais ging best en pad noar camping aargenswoar bie Remouchamps, haar mit Tom Tom n
floitje van n sint west. Totdat ze der sikkom wazzen!
Zai zagen camping, wied vot onder ien t dal aalliggen, dou Tom Tom-ding Gezienus opdruig
votdoadelk rechtsòf te sloan, n smaal baargwegje op. Geesje haar veul laiver grode weg volgen
wild, omreden dij zol ook vast en zeker wel aargens bie camping ien buurt oet kommen. Gezienus haar zegd dat Tom Tom zekerwoar n kortere weg noar camping veur ogen ston en doar ging t hìn. Nou dat grote vertraauw op t wegwies-fertuut het Gezienus waiten!
Noa n poar honnerd meter was t wegje smaler en smaler worden. Geesje haar nog tegen Gezienus zegd, dat e mor beter keren kon nou dat t nog kon, mor hai haar zegd dat ze al stoef bie camping wazzen en haar wieder reden.

Mor t wegje was nog smaler worden en ook minder; daipe koelen en stukken rots dij deel valen wazzen vanòf staaile hellens, doar zai tussendeur pebaaierden te kommen mit caravan. Tot ze nait wieder konden. t Wegje wer te smaal en wat nog slimmer was, der hong n dikke boom over wegje hin, doar auto wél mor caravan náit onner deur kon!
Gezienus vlukte en bandiesde, Geesje was hail stil worden mor jammerde òf en tou even, dat
haar Gezienus toch mor noar heur luustern wild. Doardeur was Gezienus nog kwoader worden en haar hai t nog waarmer kregen. Op t leste het e caravan, dij sikkom vaast zat tussen twij
baargwanden aan weerskanten, lös gooid en binnen zai allain mit auto wieder kropen en hobbeld en bie camping aanland.
Campingholder, dij gelukkeg Nederlands proatte, had heur stomverboasd aan kommen zain over wegje dat veur twij joar leden al òfsloten was veur verkeer, omreden der kwammen stukken rots omdeel valen. Hai haar Gezienus en Geesje vroagd woarom zai nait gewoon over nije rondweg kommen wazzen, dij vlak veur camping laans laip.
Mit veul pien en muite is caravan zulfde nommirreg nog mit trekker van campingboas ruggelings terug noar grote weg tou sleept. Haldaal zunder schoa is kerrevan der nait òfkommen mor der kon nog ien sloapen worden, t weer was schier west en noa n weekje rusteg aan doun, binnen Geesje en Gezienus, dit moal over nije rondweg, richten snelweg weer op hoes aan goan.
Op n grode parkeerploats onderwegens, doar zai even n kop vol kovvie dronken haren, vroug ain heur weg noar Remouchamps. Ploats ston wel op zien koart, zee e, mor weg der hin nait. Hou of dat kwam? Kerel haar n grode Bos schoulatlas open op moterkap van zien auto liggen. Overzichtskoart van België en Luxemburg, schoal 1: 800.000 op bladziede 73, lag veur. Terug ien auto haar Gezienus, wieder riedend, aibels veul lol had over dij domme Hollander, dij mit schoulatlas oet 1964 op pad was. Geesje haar wat mit kop schud en zegd dat je echt gain domme Hollander weden huifden om op raais preblemen te kriegen.
Dou zai weer thoes wazzen kon der ien geuren en kleuren over heur boetenlaandse raais verteld
worden, veuraal deur Geesje. Bosatlas en Tom Tom kregen doar ien vanzulf roem aandacht.
Zai goan zekerwoar nog wel ais vannijs noar boetenlaand mit ien tied moakte caravan, mor den
wel … zunder Tom Tom en mit n nije wegenkoart.