Terra cotta en swaarde belonnen

“Woar wastoe zotterdagmörgen, k heb die hailendal nait zain en zo drok was t ook ja
nait…” “Woar ik was…?”
Geert kikt met verstaand noar Lammert Loos uut Olhoof. Lammert Stiefkop, zo wordt e nuumd, komt uut Oost-Grunnen, kin je heuren. “Joa, of wast ook verkled as terracottasoldoat?”
Geert verslikt zuk hoast ien e kovvie. Hij zit bij de grootgrutter aan n luddek toaveltje maank koeken en stoetjes, t wotter lopt hum ien e mond. Lammert het m n bekertje Perla Super ientapt, mor wil nou wel es wieten, woar….“Nou, ik zat zotterdagmörgen thuus bij de tillefoon, dat ding rinkelde aalweg en….” “Doe aan tillefoon? Was dien vraauw dernait dìn? Zo’n protestbieainkomst mit swaarde belonnen kinst doch nait lopen loaten omreden tillefoon lewaait? Nee, Moatjes, lapzakkerij, of wol dien vraauw nait dast…” Geert boerket even en wisket t swiet van zien kop, hij het t hiet, komt wis en vast van die superkovvie.
“Och, niet maggen, niet maggen, vrouw haar der niet zo veul met op, dat is zo. Ze mottjede al n poar doagen over mosterd noa t eten en peerden die achter de woagen spand worden, hest niks belangriekers te doen…. Ik hol niet zo van aal die drukte, krieg k kopzeerte van en sloapeloosheid, mien bloed reageert doar niet goed op en…” “Hol mor op, k heur t al wel weer, kestanjes oet t vuur hoalen, doarveur huiven ze nait op dié reken, schiet-in-boksem. Nou ja, dij mouten der ook weden. Wat vinst aigelks van aal dij drokte over rondwegen en tunnels?” “Wel, veur mie….” Geert krigt n knovvel ien e rug, kikt gramnieterg achter zuk. Doar stijt Haarm Proatjeboksem met n grode kertonnen deus om zuk hèn, n poar swaarde belonnen ien e haand. Zien gezicht gijt verstopt onder n aanplakte grieze board en snor. Op e buuk het e n grode plakkoat: “Rondweg? Geef mor n rondje weg…” en noadat e zuk swiereg omdraaid het, ziet Geert n aandere uutsproak: “Gién Spiekman ien e uutverkoop!” Lammert leit al dubbel van t lagen en n bult gruttersklanten verdringen zuk om iets te zien van de onverwachtse Terra-Cottageneroal. Geert is riddersloagen en begunt sikkom te stuttern.
“M..m…mor, Harm, dát, dát k…k..kan….” “Joa, dat kán”, zegt Generoal Harm Proatjeboksem met n swoare stem. Lammert gnottert nog wat noa, t volk knivvelt, wacht schienboarliek op e toesproak en die komt vanzulf ok.
“Superbeste kovviedrinkers en anere Appiefans: aksie! Vot met de tirannie van GS, PS, VS en wat veur essen der nog mor meer fieze fingers ien e brood-en-brinta-pap hebben. Aksie! Der gijt gien Spiekman onnersteboven veur wat veur asfalt dan ok, der worden gien tunnels groaven om nog meer fienstof ien te joagen, der… “Met eerlieks grootske meneuvels en eernse teut holdt Harm zien pebliek ien e ban. “…En dan wil ik besluten met de hoop uut te…” n Geweldege knal altereert elkenien, de mensen vliegen ale kaanten op. Geert duukt onder t toaveltje, Lammert leit votdoadelk laankuut op e grond van de grutter. Generoal Harm zien board hangt scheef, n kepotte belon bungelt over zien linkerscholder. Dan stapt AH-boas Aksma noar veuren, hij het de kleren aan van Bromsnor en holdt n rokende Colt ien zien rechterhaand. Langzoam gijt de loop van e Colt ien e richten van Harm Proatjeboksems leste belon. Die bedenkt zuk niet en gijt der as n speer vandeur, nou ja, dat wil e eigelks, mor krekt op dat moment komt Lammert ien e benen en krigt zo de hiele Terra-Cotta-generoal over zuk hèn. “Heren, heren, kan het wat….” Aksma’s stem gijt verloren ien t gebeer van Harm die hankemank langs t moandverband en pleepepier t pand uutpoest en stènt. Lammert laagt al weer, Geert kruupt onner t toaveltje vot. Hij vuult even op zien kop, nee, gien bult, t vaalt met. Aksma wappert met e Colt noar de uutgang. “Heren, acties? Best, maar niet hier. Mag ik… “ Lammert en Geert stappen wat verbaldereerd op, de supermarktoorlog kon wel echt uutbroken wezen. Buten bij de fietsenstanders perbeert Generoal Harm zien uniform wat op te klandern. “Jongs, kan ik jim veur aal t ongemak n rondje aanbieden ien e kovviehoek van…..”