’t Wuir tied
Dou de Polen ons bevrijdden,
Mainden wie hier: „’t Was an zied”
Maor op ins kwam er grenaotvuur
Om en bie zo middagtied.
d’ Haile streek wor zwaor beschaodigd,
’t Leven rouk oet zien verband……
Mennig vluchtte gauw het dörp oet,
Doodsbenauwd veur dood en brand.
’n Dag of wat mos dat zo duren,
Lu dei wassen ’t meer as zat.
Elke dag kwam er meer schaode
En er brandde ’n hoes of wat.
As de lu elkander troffen,
Zee men vot mit kwaode kop:
„Waor toch blieven vlaigmachines,
Zwaore bommen mouten er op.”
Elk zag ’t deur zien aigen brille
En naor maot hai schaode kreeg……
Allain ja daorom mos men zörgen
Dat ’t geschut opslag daor zweeg.
’n Rentenair was d’ haardste schraiwer
En zee: „’t Wordt verdorie tied
Dat dei schaiterij ais ophold……
’k Bin vief beste kukens kwiet”……
