Ie kinnen der mit lezen en schrieven
n Poar doagen op mien aailaand,
vuilde mie miezerg en beroerd.
Vannommedag n eindje
fietsen, kaande op van t Oerd.
Deurjoagen tot t ènde van t pad,
bin der volsloagen allain.
Hail in de wiedte lig t Wad.
Kìn d’boudel goud overzain.
Zunne schient mie in t gezicht.
Lucht, zee en felgeel zaand.
Alles in het mooiste licht.
Landschop mit n golden raand.
Hier huif ik noeit te wennen.
Hier bin ik gelukkeg as n kind.
Hier loat ik mie nait kennen.
Vuil opains gain tegenwind.
Geboren: 19 jan 1947 in Veenhoezen
Woont in: Stad
Ik bin geboren op in Veenhoezen, n streek tussen Onstwedde en Knoal. Dou k drij was binnen wie noar Deventer goan. Tot mien 16e doar woond en dou noar Stad. Van 1964 tot 2005 bie plietsie in Stad waarkt. In veul functies zo as motorrieder en rechercheur en alles wat doar tussen zit. Ik bin aal sikkom 40 joar traauwd mit n vraauw oet Dordrecht. Dus in hoes altied Ollands proaten. En dat is nait goud veur mien Grunnegs. In 2005 is der boukje van mie oetkommen mit gedichten dai aal de plietsie as underwaarp hemmen. In t Ollands. Dou t boukje der was bin ik wieder goan in t Grunnegs. Ik leuf dat dat aalgedureg wat beter gaait.
