Stemmen
Gezienus en zien vraauw Geesie binnen òflopen joar mit verkaizens twij moal noar stemburo west, mor hemmen nait stemd. Dat kwam zo. Zai zollen aal hìn, zoas zai dat aaltied wènd west haren te doun, mor t mishottjede heur dismoal glad. Zuster van Gezienus zien vraauw, Tjoaktje, en heur Hinderk wazzen ien t boetenlaand op vekaanzie en Gezienus en Geesie zollen ook veur heur hin goan te stemmen. Mozzen volmachten wel aal regeld worren vanzulf en dat haren zai din ook doan. Eerst stempazzen opstuurd noar vekaanzieadres om taiken te loaten en dij kwammen radjes weerom. Mor dou zai t pampier goud leesden, kwam Geesie der achter dat zai ìns nait stemmen konnen veur zuster en heur kerel. Zai woonden ja nait ien zulfde gemainte. Noa proat veur tillefoon mit minsen over grup zeden zai doar dat stempazzen mor vernijs noar vekaanzieadres stuurd worren mozzen, din zollen zai femilie oet aigen woonstee benoadern veur heur te stemmen.
![](https://dideldom.nu/wp-content/uploads/2023/07/afbeelding-111.png)
Van dij gevolgen dat Gezienus boudel dus vernijs ien kevot kreeg en opstuurde noar Frankriek. Hopelk kon t apmoal krekt veur daag dat ter stemd worren mos ien odder kommen. Dat kwam t ook. Op dag van verkaizens tuugden Gezienus en vraauw noar stemburo. Stempazzen haar Gezienus gaauw van bòzzem òfgrepen en ien buus doan. Op stemburo gaven zai pampierkes òf aan lu achter toavel. Dij loerden Gezienus aan en vrougen noar heur paspoorten. Glad vergeten! Kerel van stemburo zee dat zai zunner nait stemmen moggen! Gezienus en Geesie vergrèld weer op hoes aan. n Hail gezuik noar paspoorten, dij Geesie op t leste von ien loag van kamnet, en zai gingen der vernijs op oet. Dou zai veur twijde moal bie kerel achter toavel ien stemlokoal kwammen, stak Gezienus kerel paspoorten en stempaskes tou. No zol t wel ien odder weden, dochde hai. Veurzitter van stemburo bestudaaierde paspoorten en paskes en zee dou dat ter wat nait kloppen dee. Kerel zee dat ter op paspoort Gezienus ston en op stempas Hinderk. En op paspoort van Geesie ston ook heur aigen noam, mor op stempas ston ja Tjoaktje. “Dat kin ook ja nait”, raip Gezienus vergrèld, “ Hinderk en Tjoaktje dij zitten ja ien boetenlaand!”
Geesie haar t votdoalek deur. Ach laive toetpot, haren zai heur aigen stempazzen hìnstuurd en lagen dij van zuster en swoager no veur man op toavel. Mit n kop as n boeskool is Gezienus stemlokoal oetbuuld en Geesie het pampieren weer mitreten. Zai mout van goje hoeze kommen, wil zai Gezienus ankom moal mitkriegen om stemmen te goan.
19-12-2010