Popko

Eetcafe Gerak in Onstwedde in t houkje van Dörpsstroade, noast n baauwkoavel. Roare noam, zol wol n òfkörten wezen van Gerard en nog wat. Dag en nacht dij bred: ‘Kovvie is kloar’. Ok as t cafe sloten is. Mor doch: altied al n dörpskroug.

Bie levent kwammen dij hierzoot, zoepten heur klokje jannever. Ainbain Wubs, bie wel ain bain òfzet was. Ainoog Wubs, dij mor ain oge haar. En Haile Wubs dij niks mekaaierde.

Popko komt doar, dij zok nooit waskt. Mit vettege hoarpieken van onder zien pedde vot. Swaarte randen an zien jazebuutsen. Handen mit kaarven woar groede zok vast zet haar.

Vergreld is hai. Batst zo haard op de bar dat klokjes jannever hinneweer huppen op heur voutjes. Òflopen zummer haren dij lu zok n gruine glasvezelkoabel op zien laand in d’grond doan. Zunder vroagen, zo mor doan. Vandoage n braif van dij koabelbedrief. Of hai nog mor even permizzie geven wol dat dij koabel deur zien grond luip. Mooi nait! Zuks vroagst in t veuren! Nait eerst as dij koabel doar al ligt. Mooi dat hai doarveur nait d’handtaiken zet! Zootje berokroaten!

Gerard en stamgasten heuren hom bedoard an. Loaten Popko uutroazen. As dij uutroasd is vroagt Gerard of hai hom der nog aine insloagen zel. Dat wol Popko wol en gemoudelkhaid is weerom in t Eetcafe Gerak.

Noa slutenstied lopt Popko op huus an. Hai slentert n beetje, n waarme wolk alkohol komt zien mond uut. Popko Nathaals nuimen lu hom. Hai laagt doarom, stapt monter deur. Deur t Wandelbos mout hai. Doar is t stikduuster. Mor ja, wel draank nomen het kent gain vrees.

Popko grobbelt zok n pad, perbaaiert ok doar te blieven. Hai vuilt zien vouten verstrikt roaken. Puult zok lös mor t kost muite. Aal weer nije droaden grepen zok vast om hom hin, doar in t stikduuster Wandelbos. Dat zol doch nait t Spinwief wezen? Dij manskerels verstrikt in de droaden van heur web. Mor dij zit op Spinbaarg bie Jipsenhoezen. Dij baarg is doar al laank nait meer. Zol dij doarom in t Wandelbos hier…
Popko schudt de kop. Zukke foabeltjes geleuft hai nait. Mor hai verstrikt zok aal meer. Kin gain kaande meer uut. Zit vast in n web.

Aanderdoagsmörgens. Mensen van Onstwedde loaten d’hond uut. In t Wandelbos vinden dij allinneg nog zien pedde. En dij jaze mit swaarte randen an d’buutsen.