Boane

Weer as op n ansichtkoart. Daip blaauwe locht. Gruin is intens gruin, rode panendoaken eerliek rood. Kold, en lege winterzunne dij grel in d’ogen schient. Zo zugt de wereld der uut op moandag, mien eerste waarkdag.

Van huus uut, Vlagtwedde, bin k op bus stapt. Overstapt in Winschoot en Delfziel stoatsion. Ruum intieds bin k in Faarmsum Oosterhörn, begun van mien boane bie dij grote chemiese kompleks. Haar t al roekt dou k uut bus stapte, viezege biesmoak in de locht.

Mor t is wol mien eerste boane. En den ok nog geliek as prozesopereter, woar k veur leerd haar. Optemisties en in mien schiere pak mit strik wol k niks slims heuren over chemiese indestrie. Meld mie bie rezepsie, krieg n baauwhelm en klembred mit instruksies uutriekt. Mout mie melden bie Plant drij.

Koeskas over reuzen febrieksterraain lopen eksekjoetiefs as mie in pak mit strik, baauwhelm en klembred. Apmoal doulgericht en zulfbewust in heur aigen richten. Zo mout k dus ok doun: wis van mien zoak noar Plant drij lopen. Aargens in wold van buzenstelsels, rafinaadjenkolommen en spijende schosstainen. k Lop hin, t wordt stille rondom mie. En ok n beetje kold. Plant drij kin k naargens vinden.

Doulgericht lopen veraandert langzoam in oarzelnd swaarven. Tussen insteloaties zai k n deure. k Goa doarhin, toets sieverkode in dij op mien klembred stoat. Deure reageert nait, blieft stief tou.

Den mor n tillefoontje noar mien waarkgever. k Toets nommer in dij op mien klembred stoat. En kom in ain zok herhoalende kringloop van kaizemenus, waachtriegen en insproken tieden dat aal us meedwaarkers in gesprek binnen. En den nog weer waachten mit n knuterg meziekje doarbie. Op mie waarkt t onrecht, k word allinneg mor minder liedzoam doarvan. En kold. Kört zegd: lokt mie nait aine te spreken te kriegen.

k Vuil ongemakkelke vroagen kommen: is t mien brek dat k dij Plant drij nait vinden ken? n Slim begun in mien droomboane. Nog mor es tillefoneren en onderwegens verder zuiken. Mit aal mien aandacht op tillefoon kiek k nait woar k lop. Krap mis k n daip gat in de grond. Kel kiek k om mie hin. k Bin allinneg, zai gainaine meer. t Is kold en k wait nait woar k hin mout.

Mor den heur k wat rammeln. t Komt dichter bie, t piept, t knaarst en de zoem van n elektriese motor. Karetje mit sliert aanhangwoagens verschient. k Wink sjefeur. Wait hai meschain woar Plant drij is? Sjefeur kiekt mie nait begriepend an, hoalt de scholders up. Hai spreekt gain Nederlands, ok gain Ingels. Wis uut Litouwen of zo. Mit hom kom k der nait uut.

Hoog boven mien kop, maank buzenstelsels en febrieksinsteloatsies, nog n plak daip blaauwe locht. Hier beneden komt zunne nait en ondertied bin k meroakels kold. Gelokkeg kromt zok n buis noar mie mit n ventiel dij n dikke stroal stoom ofbloast. Ken k mie n beetje opwaarmen. Mor as k mien haanden der insteek verbraand k benoasten mien vingers. Gloepend hait is dij stoomstroal.

Ongelokkeg en nog altied kold goa k mor weer verder. Pas nait goud op, glidder uut in n plak blaauwgruine bragel dij van aargens her op de grond lekt haar. Doar leg k den en mien schiere pak is vies worden. k Wait t nait meer.

k Keer dus mor weerom en vind mien weg noar de rezepsie. Woar k blied binnen kwaam om an mien eerste boane te begunnen. t Liekt zo laange heer. Noe bin k vies, ongewis, nait blied mit sitewoatsie. Bie balie meld k mie nog n moal. Vertel van mien boane. Dat k mie melden mout bie Plant drij en dat k dij nait vinden ken. Zie kieken mie vrumd an, vroagen mien persoonsgegevens. Zuiken in kompjoeter, vinden niks. Vroagen of ik t wol wis wait, zuiken andermoal. Niks. Tussentied loeren dij noar d’aiken blaauwgruine bragel op mien pak.

Meschain mout k bie n aander òfdailen wezen, mainen dij. Sturen mie deur ainege deuren. Mor ok doar kinnen lu niks vinden. En dij stoaren nog noadruklieker noar de vieze aiken op mien pak. Aine griept tillefoon, sprekt wat in.

En den stoat der opins n droeze man achter mie in sekjoeretie-uniform. Hai vroagt of k geliek metkommen wol. In hal griept hai zunder vroagen baauwhelm van mien kop. En zunder wat te zeggen ropt hai klembred van under mien aarm. Knovvelt mie deur uutgang noar buten.

Dus stoa k weer op stroade. Noe zunder boane en in n vies pak. En ondertied klippertaandend van kol. k Goa mor de bus in, weerom noar huus, noar Vlagtwedde. Mien dreumboane is versmoord, in smook verdwenen.