Noe is ‘t klaor
De invoering van het vrouwelijk element kan volgens generaal
Kruls belangrijke voordelen afwerpen… (Krantbericht.)
In ons land wordt alles aanders,
Bie het olle blift ‘t hier nait. –
Ook ons leger wordt veraanderd,
Krist daordeur meer weerbaorhaid.
Kruls, ons generaol, het ‘t vonden,
Hai begreep ja waor in ‘t zat;
Dat ‘n leger zunder vrouluu
Nait veul te betaiken had.
Maor noe gait men an ‘t verneien,
Waor ‘t hom kneep zag hai allain;
En de generaol het ‘t zeker
Psychologisch hail goud zain…
Vrouger, as men zok har vastlot,
Wuir men hellig in de hoed,
Maor dat heurt noe tot ‘t verleden,
Jao, het gait er op veuroet.
‘t Vroulek element gait dainen –
Dit was ‘t ja waor ‘t an ontbrak –
En ons land is mit dei wichter
Op ins netjes onderdak…
In de tied van marketentsters
Was ‘t in ‘t leger niks ja daon,
Maor mit jonge fikse wichter
Komt ‘t er aanders veur te staon.
Fijn wordt noe ‘t soldaoten-leven,
Iederain dei vindt ‘t ja goud,
Dat de lotterij is ofschaft
En dat elk den dainen mout.
Mit diz’ leste nei verorden
Is de zaok goud veur mekaor –
En men krigt in Neerlands leger
Nooit meer ain dainstwaigeraor!
