Ie kinnen der mit lezen en schrieven
Opains krieg je n bericht
Woarin gain troost te vinden is
Al heurt t bie t leven
En is t bie geboorte mitgeven
t Mout binnenkört gebeuren
Je willen t laiver nait heuren
Mor onverbiddelk gaait t deur
Ook al bin je der nait kloar veur
En dat zel je ook nooit wezen
Want joe is leerd t te vrezen
Mor t heurt bie ons bestoan
Dat ains tied komt om te goan
t Is n noatuurlek proces
Het t aaltied al west
En we kommen der nait onderoet
Aan t ènd van t joar
Staait t nije al weer kloar
Ik bin Jakob Arbeider (Aarbaider in ons aigen toal) en bin geboren op vief september negentien-zeuvenviefteg in Faarmsom.
Noa dik aacht joar as zeevoarende te hebben waarkt, bin k op n grode fabriek in Delfziel terecht kommen en heb doar ainentwinteg joar waarkt. Dou wör t tied om veur miezulm te goan begunnen mit n schilder en klusbedriefje.
Sund 2012 schrief ik in t Grunnegs. Ik bin begonnen te schrieven in n clubblad van n motorclub en loater ook in Toal&Taiken en Kreuze.
En nou dus ook via Dideldom.
