n Meroakel

Ik stoar noar lucht
zwoar weer op komst
Zun zit bezied kropen
achter duustre wolken
dij jachteg heur gaang goan
Dunderkoppen draaigen
vanoet grode hoogte:
hier binnen wie boas

Slaangen van vuur
kronkeln laangs lucht
zetten wolken in n gloud
n Knitterslag van jewelste
dut mie d’oren toeten
Din gutst t wotter omdeel
t Liekt, der komt gain ènd aan
of boudel verzopt

Bui drieft over
zun loat zuk zain
Zai teuvert n regenboog
as n kleurge ‘Hemelpoort’
Widde slierten wolken
vörmen soam n Meroakel:
n doef ….. zien vleugels wied-oet
n Groutnis oet ‘Hemel’